Sélimɛ 1
1
LARIZELILI NI
Kolocɔlɔɔ n dulunyanw ní syɔɔn ye faan
1Làrizelili ni Kolocɔlɔɔ maa nyɛ̀ʔɛni ní tári yirige.
2Tári maa pye sìnzamaga ni, yarigaa da pye yaà í. Yébilimi maa lòkpɔɔ-cùrugi tɔ́n, Kolocɔlɔɔ Pǐli si i nyaari ni máari lǒgi ǹjoʔo ni. 3#2Kor 4:6 A Kolocɔlɔɔ jo: «Gbɛ̀ɛ́nmi n yɛlɛ bi yiri.» A gbɛ̀ɛ́nmi yiri. 4A Kolocɔlɔɔ gi nyaa gbɛ̀ɛ́nmi n nyɔɔ. A wi gbɛ̀ɛ́nmi wàli n láʔa yébilimi na. 5A Kolocɔlɔɔ i gbɛ̀ɛ́nmi yiri canʔa, ní i yébilimi yiri yébilige. A gi pye cângwɔʔɔ nyɔ́ɔ ní wɔ́ɔ baa pye nyɛ̀ʔɛ nyɔ́ɔ. Koro gi pye cânzeligi.
6 #
2Pyɛ 3:5
A Kolocɔlɔɔ jo: «Wàlima n yɛlɛ bi pye lǒyi nínge ni bi yi wàli bi láʔa yiyɛɛ na.» 7A Kolocɔlɔɔ gee bee kpéʔele, n táàma lǒgi wàli n láʔa ǹjoʔo ma wógi na. A gi pye kánmi bee na. 8A Kolocɔlɔɔ i ǹjoʔomaw yiri nyɛ̀ʔɛnɛ. A gi pye cângwɔʔɔ nyɔ́ɔ, ní wɔ́ɔ baa pye nyɛ̀ʔɛ nyɔ́ɔ. Koro gi pye canziin wógi.
9 #
Ŋún 24:2
A Kolocɔlɔɔ jo: «Nyɛ̀ʔɛni táàmaw lɔ̀ʔɔ n yɛlɛ bi kpóʔoro bi sa kòro tɛʔɛ nibin ni, tɛɛwaʔa si yiri.» A gi pye nya. 10A Kolocɔlɔɔ i tɛɛwaagi yiri tára. Lǒyee yi kpóʔoro yiyɛɛ na lè ní i koro yiri sólomi lɔ́ʔɔ. A Kolocɔlɔɔ gee bee nyaa a gi nyɔɔ. 11A Kolocɔlɔɔ jo: «Yáriri n yɛlɛ di fìin bi tári tɔ́n. Gee bee n jo nyàági, gee ki a ra yaliire kpéʔele lè bi yɛlɛ ní di féleyi ní, ní tíiri, dee ti a ra yasanri sangi lè bi yɛlɛ ní di féleyi ní tári na, di cèégèle si pye di ni.» A gi wɔ́ɔ̀ pye nya. 12A tári i yáriri fíin. Gee bee n jo nyàági gi lùguzíiw kpéʔele lè n yɛlɛ ní di féleyi ní, ní tíiri di sangi lè tári na n yɛlɛ ní di féleyi ní, cèégèle si i nyɛ di ni. A Kolocɔlɔɔ gee bee myɛ nyaa a gi nyɔɔ. 13A gi pye cângwɔʔɔ nyɔ́ɔ, ní wɔ́ɔ baa pye nyɛ̀ʔɛ nyɔ́ɔ. Koro gi pye candaanri wógi.
14A Kolocɔlɔɔ jo: «Gbɛ̀ɛnyirige-yariya n yɛlɛ yi pye ǹjogi ni, nyɛ̀ʔɛni na, bi cángi ní yébiligi wàli bi láʔa tiyɛɛ na. Yee bee a pye bàā làrigèle, ní cányi, ní yɛ́ɛgèle wɛ̀ɛ́. 15Yee bee si pye gbɛ̀ɛnyirige-yariya ǹjogi ni, nyɛ̀ʔɛni na bàā gbɛ̀ɛ́nmi yirigi tári na.» A gi wɔ́ɔ̀ pye nya. 16A Kolocɔlɔɔ gbɛ̀ɛnyirige-yakpoloyo siin sámaga. Wogbɔɔtelegi í tɛ́ɛn cángi làla nyúngo na, wobiigi si tɛ́ɛn yébiligi nyúngo na. A wi wɔ́ɔ̀ ŋɔripiigèle sámaga. 17A Kolocɔlɔɔ yi tɛ́ʔɛ ǹjogi ni, nyɛ̀ʔɛni na, yaa gbɛ̀ɛ́nmi yirigi tári na, 18jàngó yi pye cángi ní yébiligi nyúngo na bi gbɛ̀ɛ́nmi ní yébilimi wàli bi láʔa tiyɛɛ na. A Kolocɔlɔɔ gee bee nyaa a gi nyɔɔ. 19A gi pye cângwɔʔɔ nyɔ́ɔ ní wɔ́ɔ baa pye nyɛ̀ʔɛ nyɔ́ɔ. Koro gi pye canya sicɛrɛ wógi.
20A Kolocɔlɔɔ jo: «Sìi yárira saʔa n yɛlɛ taa nyaʔami da máari sólomi lɔ́ʔɔ ni, féjɛɛnri si wɔ́ɔ ra yìrigí da nyaari da máari tári ǹjoʔo ni nyɛ̀ʔɛni láara ni.» 21A Kolocɔlɔɔ sólomi lòkpɔʔɔ fúngo yaweekpoloyo sámaga n fàra sìi yáriri myɛ na di nyaʔami ni máari lè gi ni. A dee bee tɔ̀nɔ n nɛʔɛ gbanʔama n yɛlɛ ní di féleyi ní. A wi wɔ́ɔ̀ fókaanyi yárira myɛ sámaga, dee di yìrigí lè, n yɛlɛ ní di féleyi ní. A Kolocɔlɔɔ gee bee nyaa a gi nyɔɔ. 22A Kolocɔlɔɔ dùbaw taʔa di na níì jo: «Ki n yɛlɛ lǒgi fúngo yárira í da sii bàā nɛʔɛgi bi sólomi lɔ́ʔɔ nyìn, féjɛɛnri si wɔ́ɔ ra nɛʔɛgi tári na.» 23A gi pye cângwɔʔɔ nyɔ́ɔ, ní wɔ́ɔ baa pye nyɛ̀ʔɛ nyɔ́ɔ. Koro gi pye canya kagunɔ wógi.
24A Kolocɔlɔɔ jo: «Tári n yɛlɛ di yaweere yirige bi yɛlɛ ní di féleyi ní. Gee bee n jo kěgi yaweere, ní yáriree di fulolo lè, n fàra sìnbirigi yaweere na, n yɛlɛ ní di féleyi ní.» A gi wɔ́ɔ̀ pye nya. 25Kánmi bee na Kolocɔlɔɔ sìnbirigi yaweere sámaga n yɛlɛ ní di féleyi ní, ní wɔ́ɔ̀ kěgi yaweere sámaga n yɛlɛ ní di féleyi ní, n fàra yáriree na di fulolo lè. A Kolocɔlɔɔ gee bee nyaa a gi nyɔɔ. 26#1Kor 11:7 A Kolocɔlɔɔ jo: «Ki n yɛlɛ wo syɔɔn faan wolo niwirio, wi pye àmɛɛ wolo nyɛ lè, jàngó syɔɔn í tɛ́ɛn fábèle nyúngo na, ní féjɛɛnri ní ti yìrigí lè, ní kěgi yaweere, wí wɔ́ɔ tɛ́ɛn tári nyúngo na, n fàra yáriree myɛ na di fulolo lè tári na.»
27 #
Mat 19:4; Mar 10:6 #Sél 5:1-2A Kolocɔlɔɔ syɔɔn faan woro niwirio.
Wi n wi faan woro Kolocɔlɔɔ niwirio.
Wi n be faan nàɔn ní cɔlɔɔ.
28A Kolocɔlɔɔ dùbaw taʔa be na níì be pye: «Ki n yɛlɛ yaa sii yaa nɛʔɛgi ye tári nyìn, yáā di kàragí. Ye tɛ́ɛn fábèle nyúngo na, ní féjɛɛnri nyúngo na di nyaari lè ǹjogi ni, n fàra yaweeri myɛ na di fulolo lè tári na.» 29A Kolocɔlɔɔ jo: «Wéle, mii n tári yaliire myɛ ní tiisanri kaan yele ma, ti nyɛ lè ní cèegēle ní, toro í pye yele yaliiri. 30Gee si gi tári yaweere myɛ kéele kwɔ́ɔ lè, ní féjɛɛnri myɛ, n fàra yáriree myɛ na di fulolo lè tári na, dee ni ŋɔ́ngara nyɛ lè, mii n nyàápungi kaan toro myɛ ma gi pye ti yaliiri.» A gi wɔ́ɔ̀ pye nya. 31A Kolocɔlɔɔ wi yafaanri myɛ wéle n di nyaa a di tɔ̀nɔ n nyɔɔ gbanʔama. A gi pye cângwɔʔɔ nyɔ́ɔ, ní wɔ́ɔ baa pye nyɛ̀ʔɛ nyɔ́ɔ. Koro gi pye canya kɔrɔni wógi.
Obecnie wybrane:
Sélimɛ 1: CB10
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Kolocɔlɔɔ Syɛ́ɛnri © Bible Society of Côte d'Ivoire, 2008.