Matayo 14
14
Gwa'arár Yohanudá' Baatimaamiís
(Mk 6:14-29; Lk 9:7-9)
1Qoomaadae waawutmo Herode iidíguú Yesu guri axaás, lawaaleerós gari báy, 2“Kwisíng an Yohanudá' Baatimaamiís. Nina waasleé/ baraá múk aa qaátl wa ale. Gawaá adoorihe /uuruuduú baraawós i dirií' in gadiyér tleehh.”
3Asma Herode inós Yohana aáng guna óh guri tseék, guri dahaás baraá doó tseegamo as Herodia, harér Filipo hhiyoó Herode. 4Asma Herode kuna báy nee Yohana, “A hariímarooká kuúng harér hhiyaawók kawa dux.” 5Ala Herode Yohana guna gaasár wa slaá', ala muu guri da'ayuút. Asma muu Yohana guna tsaáhh adór tar aarusmo.
6Tam qoomár deeloodá' ur ar Herode kuwa laqwaál niwa xeér, dasír Herodia ina nét dír geerá múk wa aleeró, nee Herode guri qwal/atís. 7Tam Herode al'axweesani gari haniís ar lo'o, ar gídaabá, “Umuúqo gaaro ar kiíng ta sla' firiimang.”
8Dasi iri ó', “Gár án ni slaa' a ságw Yohanudá' Baatimaamiís baraá xooslmoó i qaasang.” Ala gár dasi adoorí ngisa ó', a aayír'ín ngina adoorí beér.
9Waawutmo Herode iri gurhaamuút, ala as lo'odá' aa huúw, nee as mukdá' didá' wa /ayiima, hara'aya gari haniís saga kuwa haniisi. 10Hee guri ya/aáw, ságw Yohana kuri tsattá áy baraá doó tseegamór i alé. 11Sagwdá' kunguri xooslmór huúw, kuri haniís dír dasiidá', nee dasiidá' guri húp amór aayír'ín. 12Ala eeharuusér Yohana niri hardát, slaqwtá Yohana garir tleér, kari foól. Nee aluuwo tari tláy, iidíguuwí kuri xu'utisár áy dír Yesu.
/Aymisír múk kumér kooán
(Mk 6:30-44; Lk 9:10-17; Yn 6:1-14)
13Nee Yesu adoodá' ngiwa axaás, iri tláy ar miringamo ay dír muu iwa kahhi. Nee boo/oó muu adoodá' ngiwa axaás, kuri eehaár ar ya'a' amór gixsaduuín wa ale. 14Yesu niwa ti'iít baraá miringamoó wa ale, boo/oó muu oo yaariír guri ár, guri gurtláy. Tiqtuuser'ín gari hungu/uumiís.
15Tsiindo niwa xayé', eeharuuseerós guri i daqeér guri beér, “Diirí tay diriiaan a baraá darma, nee slám looa aa dát. Boo/oó muu deelór i ooeek as tawa ki/i baraá gixsaduuín as muruú /aymar'ín kuwa tlaxór ay.”
16Yesu giri báy, “Gár tas quutli i káhh, muruú /ayma kuungá' hanisaak.”
17Kuri báy, “Gár ta koomaan i káhh, ala a har mikaátér kooán nee siyoó tsár.”
18Iri oó', “Diirí huuware'.” 19Hara'aya gari haniís, boo/aay iwa iwiiti gawaá gitso. Mikaáteedá' kooán nee siyoódá' tsár giri óh, iri gawaá doorí qaytsiít, iri sluufiís, giri eeharuuseerós i haniís. Eeharuuse giri boo/aydí hanmís. 20Sleémeero tari /ayín tari aáx. Parhheemaá naa meetiye' kiri sleemiís, katatoó mibá nee tsár iri haáts. 21Nee múk aa /ayin a hhawaate kume kooán, ala /ameena nee na/'ii kaa harafaariiká.
Yesu i ya'aár hi'imiit gawaá daanduú tlawtá wa ale
(Mk 6:45-52; Yn 6:15-21)
22Hamtidár kilae eeharuuseerós gari báy, “Tsa/amé' gawaá miringamo, ta geerí waarahhá' ay gayuuqá', dír án nir deelór kah dír boo/aay.” 23Deelo ooaro ngiwa hhe'eés, iri tsa/án gawaá tlooma, iri firór áy dír muu iwa kahhi. Nee qoomár axweesuwo i gawaadí dirii' inós kilós. 24Nee miringamoodá' i tla/ángw tláwtí dirii', ku daawitimiis kángw kilá' wa ale nee gwaanduú ma'aay. Asma fur'a i ló'wa xarásl.
25Qoomár dakiingo Yesu giri i hardáh, i gawaá daanduú tlawtár hi'iimiit. 26Eeharuuse nguwa aán i gawaá tlawtár hi'iimiit, tari da'ayuút tari káh, “Gaa a geehhaantamo.” Tari uú' ar dae.
27Yesu iri ilawaáts giri báy, “Mune gawdeesaak. Hee a aníng. Ma da'ayumitaara'.”
28Petro iri ilawaáts iri oó', “Aáko, hee bar kuúng, án ateetáng, ni hardáh amoorók i alé, ar gawaá daanduú ma'aay.”
29Yesu iri oó', “Qwaláng.” Petro iri aweér gawaá miringamoó wa ale, iri hi'iít ar gawaá daanduú ma'aay, as iwa amór Yesú kay. 30Ala Petro fur'aadá' ngiwa ár iri da'ayuút, naxés i /e/etín baraá ma'aay, iri uú', iri oó', “Aáko, aníng ba/amisáng.”
31Hamtidár kilae Yesu dakós guri gan'aás, dákw Petro guri óh, guri báy, “Kuúng haratlintaaoorók ka tsuwa niina. Asma milá masa xurút?”
32Nee qoomár inooín tawa tsa/an gawaá miringamoó i alé, fur'a iri xaslít. 33Nee kudá' baraá miringamoó i diriiá', Yesu nguri i tumbarara'atiyé', tari oó', “Ar ló', kuúng a Garmoó Mungú.”
Yesu i tiqtuusér hungu/uumiis Genesaretír wa ale
(Mk 6:53-56)
34Qoomár tawa waaraáhh baraá tlawto, tari hardáh baraá yaamaá Genesareti. 35Nee múk yaamuudá' Yesu kuwa tsaáhh, muu kuri ya/aáw amór yaamaá bihhiidí tseewá', tiqtuuse sleémeero kingiri huúw dír Yesu. 36Kuri firín gídaabá tam pasltá inqwaarirós kilós ngi kwatiitiye'. Nee mukdá' sleémeero pasltá inqwaarirós gaa kwatiit, tari hunguú/.
Obecnie wybrane:
Matayo 14: IQWNT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Iraqw New Testament © Bible Society of Tanzania, 1977.