Luka 6
6
Ekyo kya nkonu wa Sabato
(Mat 12:1-8; Mar 2:23-28)
1Naasa kyikava elyi nkonu wa Sabato, eefo ashiraa mareminy a nganu, valya vakiloshyony vakaurushwa fyaa, vakasisa na maako vakalya. 2Naasa Vafarisayo valya maata vakaamba, “A nkyikyi elyi mwatana kindo kilatiri mumu weetana elyi lya Sabato?” 3Nalyo Yesu kaalwa kavavia, “A mmbo mulandesomi shaasa Davidi aletana, llya eetirwa nshaa na valya aryani nawo? 4Shaasa aleanga na efo mmba ya Iruva kaipoo mikate ilya ya kideesyo? Kalya kaniingya na valya aryani nawo. Nayo nnyetiri mumu weelyiwa ni nndu-fo, kuuta Vakohani veni.” 5Nalyo kavavia, “Mwana yeto wa nndu mmbo akee Nndumi na wa Sabato.”
Nndu atiri woko lufirikye
(Mat 12:9-14; Mar 3:1-6)
6Naasa kikaa elyi lya Sabato ingyi kaanga nee-fo mmba yaawo yeeterevya kaloshya-fo. Nafo kusheye nafo nndu, woko lwakwe usha lweefi kye. 7Naasa vaarya valya va fitabu vasangyi na Vafarisayo veefo vallola kwakooya ashisaa nndu elyi lya Sabato, naambo vakooye inkumba. 8Nawe eeshi makusaro awo, kavia nndu ulya wa woko ufiri, “Kwiipoo, kushe na yaa nnang'ani.” Kakwiipoo kashesalala-u. 9Naasa Yesu kavavia, “Shamuvesany indi, ‘A kwiifo mumu weetanya nndu mesha elyi nkonu wa Sabato, ao niitana ukasha, ni ikira muu wa nndu ao ni yuureta?’ ” 10Kavalola kavakwaanisa woose. Kavia nndu ulya. “Orwa woko lwafo!” Nawe katana indo, nalyo woko lwakwe lukawuya iva usha. 11Naasa nawo vakarooyo nngoo, vakavaany varera wo veni na veni kindo vashiidimaa itannya Yesu.
Yesu asauwa vakiloshyony ikumi na vavii
(Mat 10:1-4; Mar 3:13-19)
12Naasa kyikava mikonu ilya kakwiipoo-fo kandefika ando a ifumbu-u indeterevya-fo Iruva. Kalala rembo taa eterevaa Iruva. 13Na elyi kwankya kavaanga valya vakiloshyony na ando akai. Efo nnang'ani yaawo kasauwa-fo ikumi na vavii. Nawo mmbo alevavaanga varumi. 14Nawo ni Simon, yeto alemmbaanga ni Petro, na Andrea we mwanamaye, na Yakobo na Yohane, na Filipo, na Bartolomayo, 15na Matayo, na Toma, na Yakobo ulya wa Alfayo, na Simon ulya avaangwa Selote; 16na Yuda Iskariote, mmbwe yeto aleva ndiingyi wakwe.
Yesu afo aloshaa na ishiisa vandu
(Mat 4:23-25)
17Nalyo kooloka-fo aryani nawo. Kasheirisha efo kukee kurambalali. Na vandu vakuumbye-u veengyi vakee vakiloshyony kyakwe. Na ironda iniini lya vandu lyiifo vaukye kulya Yudaya koose na Yerusalemu, na uruka lufiitani na yeeve ilya niini, lulya lwa Tiro na Sidoni. Nawo vasheye ishemwaaranya naishiiswa ndwari tawo. 18Na yewo valyise ukiva mmimuyo yeyo ya utefusu vakaveshiiswa. 19Na vandu valya vakuumbye-fo woose vakakunda ishempaana. Nyeli akee na finya ishyukyaa vandu woose ishiiswa.
Ngoma na Oshiny
(Mat 5:1-12)
20Nalyo kainwa miso kalola valya vakiloshyony kyakwe kaamba, Ngoma yeni mukee vakiva kimmba umangyi lwa Iruva lwava lwany. 21Ngoma yeni mutirwa nshaa ulaalu, kimmba mukaa muwuutiswa. Ngoma yeni mwiifo mwiiyaa ulaalu, kimmba mukaa museke. 22Ngoma yeni elyi vandu vamusua na imwaanta efo ikwaanuny lyawo, na imwaarara, na isuta irina lyany sheelyi ni kindo kyeesi, kwakooya ni kimaruma kya Mwana yeto wa nndu. 23Fureny-dwa nkonu eto na ifina, mashika akakalyi isina lyany lyava iniini efo iruveeu. Mashika findo fya ngata yeyo mfyo vandeye vawo valevetannya vakisuku valya. 24Indi yeni mukee vasuri, oshiny lwany, mashika fimuviryaa muu mulemmaa ifiwarya. 25Na yeni muwuurye shapu ulaalu, oshiny lwany, mmbo mukaa mutirwa nshaa. Na yeni mwiifo musekaa ulaalu oshiny lwany, mmbo mukaa mukunarye na iiya. 26Na yeni vandu vakamurera kya usha woose, oshiny lwany! Mashika niindo vandeyawo valeva vetanya vakisuku valya va wongo.
Ikunda vakiduva
(Mat 5:38-48; 7:12a)
27Indi kindo shamuvia yeni mwiifo musharanyaa, Kundeny vakiduva vany. Yewo vamusua vatanyiny fya usha. 28Yewo vamudenga vakundyeny mbora. Yewo vamwiinyala vaterevyeny efo kwa Iruva. 29Na nndu kakukapa woi lwa yuundu lyimwi, kyevemmberetye na yelyo lyingyi. Na nndu kakusoka soori yafo ya yeerya, na yeyo kuree nyamii-u nta kulamwiimi. 30Wo nndu akutereva kindo nniinge. Na nndu kakusoka efyo fyafo nreeye. 31Shaasa mukundye vamutannyi yeni, neeni kevevatanyiny indo-da. 32Na kwakooya mwakunda yewo vemukunda yeni tupu, a kyaanu kyany mushutaa-u nkyoki? Naakwa na vandu valyamari mmbo vavekunda yewo veevakunda. 33Mashika vandu muvatanyaa fya usha, kwakooya ni yewo vamutannyaa yeni fya usha, a kyaanu kyany mushuuta-u nkyoki? Naakwa na yevo valyamari ni indo-da vatanaa. 34Na vandu muvaakuyaa kwakooya ni yewo muvikye nsia wewarya-fo kindo, a kyaanu kyany mushutaa-u nkyokyi? Na yewo valyamari mmbo vaveakuya valyamari vauroye vawo vakooye itawo ekyo kiinani. 35Indi veny vekunda vakiduva vany, veny vetanya vandu fya usha na ivaakuya mulavereyaa kindo mutawaa. Llyo isina lyany lyisheng'anaa muveva na vana va eto akee uuwe ya findo fyoose. Kimmba we ava indo mwiisimba naakwa ni yewo valatiri kyaanu na yewo varavi. 36Naasa veny veelyilya vandu, shaasa na Nde eto waany akee mwiilillya.
Mirumbuye ya vandu vengi
(Mat 7:1-5)
37Nta mulakuvike veerumbwa kya vandu mukooye ekyo kyany kyarumbuwa indo. Nta mulave veutya vandu uvingo mukooye yuutyo uvingo yeni. Veny vereeya vandu siye tany, neeni mukooye ireeywa siye. 38Simbeny vandu simbo, na yeni muvesimbwa. Ni kyeeso kisha kyikee kisirye, kikee kisisikye, kikee kya mwangara nkyo vashemuletyaa efo maakony. Nyeli kyeeso musheesaa nakyo nkyo musheesyoo yeni mwiviiryo. 39Nawe kaveera kyaaso eki, “Ndesa nndu mfu miso ashiidimaa yoora nndu mfu miso uroye shia? Oode, wo vee vavii mmbo vashoolokaa irininy. 40Nta nkwiiyo nndu wa kiloshyony eerye mwiillosha-fo. Indi kammaa isongosyo deny mmbo ashiinanaa na mwiillosha. 41Neewe naambo-kyi kwalola kinaana kyikee irisony lya mwanamau, na ikongo lyikee irisony lyafo yewe kulalyilolye? 42A ni inda kusheviaa mwanamau, ‘Sya-do mwanama, shikweekye yuuta kinaana kikee irisony lyafo,’ kulalolyaa ikongo lyikee irisony lyafo ku muni? Yewe nkunang'ari songwa yuuta ikongo lyikee irisony lyafo kumuni, llyo kushelolyaa warya kinaana kyikee irisony lya mwanamau kukiute.”
Nri, ndunda tavayo
(Mat 7:16-20; 12:33-35)
43Mashika nkwiifo nri nsha uvikaa ndunda shikasha-fo. Nta nkwiifoo nri nkasha uvikaa ndunda shisha-fo. 44Mashika wo nri mmbo umanyika na ndunda tavayo. Mashika ndunda ta marwaa nshi efo nrweny tayaywa-fo, nta ndunda ta nsabibu ntidowaa efo miingeny-fo. 45Na nndu yeto nsha, efo findony fyakwe fisha asurumyi efo nriminy mmbo avaa mweende-fo ekyo kisha. Na nndu yeto nravi efo findony fyakwe fya uravi asurumyi nriminy kaveva mweende-fo ekyo kiravi. Mashika efyo fikee efo nriminy mfyo kana karera.
Vetana mmba va ngata ivii
(Mat 7:24-27)
46Neeni naambo ki mwashivanga, “Nndumi, Nndumi, na ekyo shaamba nta mulakitani? 47Wo nndu asha na kwakwa kaaranya marero yoo akwa kaatana, nshemoraa mmbo avakye vi? 48Mmbo avakye nndu aletana mmba yakwe kasuma uvasha kafika si. Kaiveiya uvasha ando iwe lyikwaalye si. Naasa mura ukasoka mwiingyi, mfu yeto ukashesindika mmba ilya, nta uleedimi isingisa, nyeli ikee shitani nisha. 49Na yeto mwaaranya kara nalatana, mmbo avakye nndu aletana mmba kaisimbita si nalasumi uvasha. Ikasha isindikwa ni mfu wa mura. Nalyo yeni ikawunduka na miwoye yavayo ikawa pu!”
Obecnie wybrane:
Luka 6: MASNT00
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
New Testament in Kimashami © Bible Society of Tanzania, 2000.