LUKA 8
8
1Yaa dana n ŋua Jesu den goagoadi i dociami leni i dowaali nni kuli, ki kpaani ki wangi *U Tienu diema Laabaaliŋamo. 2Bi piiga n niliediba den yegi leni o. Bi potianba, mu cicibiadimu n den kpa ye yaaba yaa niinni leni yaaba n den pia yiantoe ke Jesu paagi ba kuli, den cangi o. Bi siiga poyendo den yi Maliyama Magidala yua,#8.2 Gileka maama nni li tie Magidala yua, yaala n tua Madelene mi bonpienma nni. cicibiadimu lele n den ñani yua yaa niinni.#Mat 27.55-56; Mak 15.40-41; Luk 23.49 3One mo Jana, o bado *Elodo ligikubilo Kusa pua, one mo Susana, leni potoaba boncianla, yaaba n den ñandi bi piama nni ki todi Jesu leni o ŋoadikaaba bi yema nni.
I bonbi pagima kpanjama
(Mat 13.1-9; Mak 4.1-9)
4Bi niba boncianla den ña i dogi kuli nni ki kpendi Jesu kani. Ku niligu n den taani boncianla, o den pua mi naa kpanjama:
5«O kpakpaalo den ñani ki baa pagi o bonbuoli. Wan den pagini, i tiami den baa u sankunu. Bi den ŋmaa yi ke ti bonyugiditi mo dini yi. 6I tiami mo den baa ki tancaliga po. Yin den pudi, yi den kuodi, kelima yii den pia soangima. 7I tiami mo den baa ti konkondi nni. Ti konkondi den taani ki fii leni yi ki dini yi. 8I tiami mo den baa ki tinŋanga nni ki kpedi ki loni bonbiyenbu kuli kobiga kobiga.» Jesu n den maadi lankuli o den kpaani: «Yua n pia a tuba ki baa gbadi, wan gbadi.»
Jesu n pua mi kpanjama yaala yaa po
(Mat 13.10-17; Mak 4.10-12)
9O ŋoadikaaba den buali o laa kpanjama bundima. 10O den goa ki yedi ba: «Bi puni yinba yin bandi U Tienu diema bondoaginkaala, ama nitoaba po, n maadi ba leni mi kpanjama ke ban yaa nua leni bi nuni ki nan da le liba, ki go yaa cengi leni bi tuba ki nan da faami liba.#Esa 6.9-10
Jesu bundi i bonbi pagima kpanjama
(Mat 13.18-23; Mak 4.13-20)
11Cengi mani mi kpanjama yeni bundima. I bonbuoli tie U Tienu maama. 12Yaaba n tie nani u sankunu tinga yeni tie yaaba n gba U Tienu maama, ke Sutaani cua ki ñani maa bi pala nni, ke ban da daani ki baa mi *tindima. 13Yaaba n tie nani ki tancaliga yeni tie yaaba n gbadi mi maama ki ga ma lanyogunu leni li pamanli. Ama baa pia jiinmoani, bi daani u yogunu waamu bebe po ama mi tulinma#8.13 Mi biigima, yaaka mi tulinma. yaa cua yaa yogunu, se ban ŋa li *dandanli. 14Yaa bonbi n baa ti konkondi nni tie yaaba n gbadi mi maama, ama bi yaa suagi liiga, bi cedi ke bi yema yanyagidi leni ŋalimani leni mi yemanma yankuali dini laa maama, ke bi bonluonkaala liba kuli ki beni. 15Yaa bonbi n baa ki tinŋanga nni mo tie yaaba n gbadi mi maama ki ga ma yaa pala n tiegi ki ŋani nni ki kpaagi mipo ki kubi ma bonŋanla, ki juuni ki ban loni li bonluonkaala.
Ki fidisanga kpanjama
(Mak 4.21-25)
16Niloba kan cuoni ki fidisanga ki taa li sancianli ki ŋoagini ga, yaaka ki kubini ga u duanu tiipo, kali wan tuani ga u fidisantuankaanu, ke yaaba n kua li dieli nni n yaa nua mi yenma.#Mat 5.15; Luk 11.33 17Liba kuli ki ye ki wuo ki kan wuodi. Liba kuli ki ye ki duagi ki kan doagidi bi niba n bandi.#Mat 10.26; Luk 12.2 18Lani yaa po yin fangi mani yi yula leni yin cengi maama, kelima bi baa pa ki pugini yua n pia, ama yua n ki pia wani, bi baa ga o kani baa wan nua ke o pia yaala.»#Mat 25.29; Luk 19.26
Jesu naa leni o waamu
(Mat 12.46-50; Mak 3.31-35)
19Jesu naa leni o waamu den cua ki baa le o ki naa fidi ki pundi o kani kelima bi niba n yaba maama. 20Bi niba den yedi Jesu: «A naa leni a waamu se niinpo ki bua ki le ŋa.» 21Jesu den goa ki yedi: «N naa leni n waamu tie yaaba n cengi U Tienu maama ki tiendi man yedi yaala.»
Jesu duani ku tafaaciangu
(Mat 8.23-27; Mak 4.35-41)
22Dayenli Jesu leni o ŋoadikaaba den kua ku ñinbiagu nni ke o yedi ba: «Tin duodi mani ki gedi nepo boanjaali.» Bi den fii ki caa. Ban den kudi ki caa yaa yogunu, Jesu den guani. 23Ku faabiadigu den kua mi ñincianma nni, ke mi ñima bua ki gbie ku ñinbiagu, ke li bia bipo. 24Bi den nagini ki fundi Jesu ki yedi o: «Canbaa, canbaa ti bia.» O den fundi ki maadi leni ku faagu leni a ñinguonpaala leni li bali ke likuli duani suo. 25O den yedi o ŋoadikaaba: «Yi dandanli ye le?» Ti jawaandi leni li pakili den cuo ba ke bi yedi biyaba: «One wani daa, o tie ŋme ki maadi baa ku faagu leni mi ñima ke likuli tuo ki tieni wan yedi yaala?»
Jesu ñani ki cicibiadiga Jelasa yua niinni
(Mat 8.28-34; Mak 5.1-20)
26Bi den duodi mi ñincianma ki pundi Jelasa dogu tinbianu yu n tiegi *Galile. 27Jesu n den ñani ku ñinbiagu nni ki se li wali po, u dogu nni nilo, mu cicibiadimu n den ye yua yaa niinni den cua ki tuogi o. Li den waagi ke o ja yeni ki go yie tiadi. Waa go den ye diedi nni, o di den ye a kula nne. 28Wan den laa Jesu, o den tiani, ki gbaani o nintuali ki kpaani boncianla: «Be n ye mini leni fini siiga, Jesu, U Tienu yua n ye hali Tanpojoma Bijua? N mia ŋa, ŋan da faligi nni.» 29O den yedi yeni kelima Jesu den yedi ki cicibiadiga gan ña o niinni, gani yaaga n den diedi o ke li waagi. Bi den luo o i kuseseli ki kpaagi o ti kpaadi ki gu o, ama o den yen cenli li bonlolikaala ke ki cicibiadiga caani o li fuali po. 30Jesu den buali o: «A yi lede?» O den goa ki yedi o: «Ku Niligu.» O den yedi yeni kelima mu cicibiadimu boncianla den kua ki ye o niinni. 31Mu den miadi Jesu ke wan da yedi mun ña ki gedi u *kulu nni.
32Li den sua ke u duokuliciamu ye likani li juali po ki gbi i moajiini. Mu cicibiadimu den mia Jesu ke wan pa mu u sanu mun kua i duoli yeni niinni, ke o puni mu. 33Lani mu cicibiadimu den ñani o ja yeni niinni ki ban kua i duoli niinni, ke u duokulu kuli digi mi joayidima po ki jiidi ki baa mi ñincianma nni ki mia ki bodi. 34Yaaba n kpaa ba n den laa yaala n tieni, bi den sani ki ban waani li laabaalo u dogu nni leni i tinkundogi nni. 35Bi niba den ñani ki gedi ki baan le yaala n tieni. Bi den pundi Jesu kani ki laa mu cicibiadimu n ñani yaa ja yaa niinni yeni, ke o ka Jesu taana kani ki yie ti tiadi ki go pia o yama, ke ti jawaandi cuo ba. 36Yaaba n laa yaala n tieni kuli den togidi ba lan tieni maama ke mu cicibiadimu n den ye yua yaa niinni paagi. 37Lani Jelasa yaaba leni u tinkundogi yaaba kuli den taani ki mia Jesu ke wan ña bi kani kelima ti jawaanciandi den cuo ba.
Jesu den kua ku ñinbiagu nni ki baa goa ki duodi. 38Mu cicibiadimu n ñani yaa ja yaa niinni den miadi Jesu ke wan cedi wan yaa ye leni o. Ama Jesu den cabi o ki yedi: 39«Lebidi ki goa a denpo ki ban togidi U Tienu n tieni apo yaala kuli. O den gedi ki ban wangi u dogu nni kuli Jesu n den tieni opo yaala kuli.»
Jesu pia u paalu ki cie u yianu leni mi kuuma
(Mat 9.18-26; Mak 5.21-43)
40Jesu n duodi ki pundi nepo yaa boanjaali yaa yogunu, ku niligu den biali o kelima bikuli gu o. 41Ban den yi yua Jayilusa ke o tie li *bali maama bangima dieli yudaano den cua ki gbaani Jesu taana kani ki mia o wan cua o deni, 42kelima o den pia bonpoyenyenga yua n pia nani piiga n bina lie ke o yia ki bua ki kpe. Jesu n den caa, ku niligu den miabi o.
43O pua den ye likani ke o soama wuliti kaa se hali piiga n bina lie, o den biani o piama kuli a lotola kani, oba kuli ki den fidi ki paagi o. 44O den cua ki nagini Jesu puoli po ki sii o liadicuadi. Lanyogunu liga o soañakaama den sedi. 45Jesu den yedi: «Ŋme sii nni?» Bikuli n den nia ke baa sii o, Pieli den yedi: «Canbaa, ku niligu lindi a ki miabi a.» 46Jesu den goa ki yedi: «O nilo sii nni, kelima n bandi ke u paalu soani tuonliba.» 47O pua yeni n den sua ke waa wuo, o den cua ki digibi ki gbani Jesu nintuali ki waani bi niba kuli wan bi sii o yaala yaa po, ki go waani ke lanyogunu liga o paagi. 48Jesu den yedi o: «N bisalo, a dandanli paagi a. Gedi leni mi yanduanma.»
49Jesu n da den maadi yaa yogunu, o nilo den ñani li bali maama bangima dieli yudaano denpo ki cua bikani, ki yedi: «A bisalo yeni, waa ye, da go coagini canbaa.» 50Jesu n den gbadi lani, o den yedi li bali maama bangima dieli yudaano: «Da jie liba, daani bebe, o baa paagi.» 51Jesu n den pundi o ja yeni deni, waa den tuo nitoa kuli n yegi leni o ki kua, kali Pieli leni Jan leni Jaka leni ki biga yeni baa leni o naa. 52Bi niba kuli den buudibuudi opo i kumoe. Jesu den yedi: «Da buudi mani, waa kpe ka, o goa yo.» 53Bi den laa o ti laadi ki ñuadi o kelima bi bani ke o kpe. 54Jesu den cuo ki biga nuu ki kpaani: «Ki biga, fii.» 55O naano den goa ki kua o niinni ke o fii lanyogu liga. Jesu den yedi ba ban pa o wan je. 56Li pakili den cuo ki biga danba. Jesu den yedi ba ke ban da maadi niloba kuli yaala n tieni.
Jesu soani o piiga n tondiliediba
(Mat 10.5-15; Mak 6.7-13)
Obecnie wybrane:
LUKA 8: GUX03
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Gulmancema Bible © Bible Society of Burkina Faso, 2003.