MAKA 12
12
1Lani yaa puoli Jesu go den maadi ba ki pua mi kpanjama. O den yedi: «O ja den ŋu duven tiidi kuanu, ki kpaa li nagili ki lindi, ki gbiidi ku buogu ban baa yaa ŋanbidi duven naankani, ki go paani li pagili i duven tiidi siiga. Lani o den guuni o kuanu bi koaguudiba, ki fii ki gedi u dogu.#Esa 5.1-2 2U jetaagu yogunu n den pundi, o den soani naacenyendo bi koaguudiba yeni kani, ke wan ga bikani o yaa biinu o kuanu bonbaakaala nni. 3Bi den cuo o ki pua o leni i gbiami ki yaadi o nukuomu. 4O go den soani naacentoa bikani. Bi den pua o yuli ki go fiagi o. 5O go den soani toa bikani ke bi ku o. O go den soani toaba ke bi pua bine ki ku bine. 6O koadaano bibuadiga bebe n di den sieni. O den juodi ki soani o bikani ki yedi: ‹Bi baa fangi n bijua wani.› 7Ama bi koaguudiba den yedi biyaba: ‹One n tie o faajielo, cedi tin kpa o mani, o faali baa tua ti yaa yaali.› 8Lani bi den cuo o, ki ku o ki luni o u kuanu puoli po.» 9Lani Jesu den buali ki yedi: «To, o koadaano baa tieni lede? O baa goa ki cua ki bolini bi koaguudiba, ki teni o kuanu nitoaba. 10Naani yii cogi i Diani nni yaa maama n tie na yoo?
Bi tanmaaba n den yie ki luni yaa tanli
Tua li tanpuuli tanjigi.#Pis 118.22-23
11Likuli den ñani o Diedo kani,
Li tie bonlidikaala ti nuni po.»
12Jufinba nikpiaga den bandi ke Jesu pua mi kpanjama yeni ki maadi leni bane, ke bi moandi ki baa cuo o, ama bi den jie ku niligu, ki fii o kani ki ban caa.
Loma badiciamo Sesa lubili
(Mat 22.15-22; Luk 20.20-26)
13Lani n pendi bi den soani Jesu kani *Falisieninba bi tianba, leni o bado *Elodo buakaaba bi tianba ke ban dia o ku madiagu ki cuo o o maama nni. 14Bi den cua ki yedi o: «Canbaa, ti bani ke a tie moamoandaano, ŋaa jie oba kuli, ŋaa gagidi oba kelima bi niba n nua ke a tie maama po, a bangi bi niba U Tienu sanŋoadima leni i moamoani mo. Naani li pia u sanu tin pa Loma badiciamo *Sesa li lubili bi, bi laa pia? Tin pa bi, bi tin da pa?» 15Jesu yua n den bani ke baa maadi leni bi pala kuli, den buali ba: «Be yaa po ke yi dia nni ku madiagu ki bua ki cuo nni? Cuani mani li kujapienli na min le.» 16Bi den teni o li ke o yedi ba: «Ŋme yaa nannanli leni ŋme yaa diani nna?» Bi den goa ki yedi o: «Sesa yaali yo.» 17Jesu den yedi ba: «Pa mani Sesa, yaala n tie Sesa yaala, ki pa U Tienu mo, yaala n tie U Tienu yaa yaala.» O maguankaama yeni den paki ba boncianla.
Sadusieninba buali, bi tinkpiba fiima po
(Mat 22.23-33; Luk 20.27-40)
18 *Sadusieninba yaaba n tua ke bi tinkpiba fiima ki ye, bi yaa siiga tianba den cua Jesu kani ki buali o ki yedi:#JTT 23.8 19«Canbaa, Musa den diani ki bili tipo li *balimaama nni ki yedi ke o nilo kpelo yaa kpe ki ŋa o pua kaa pia biga, wan taa o kpelo yeni pua ki baa o kpelo po u buolu.#Tia 25.5 20To, jaba lele den ye ki taa baayendo, ke o bonkpelo den taa o pua ki kpe, waa ŋa biga. 21O bonlielo moko den taa o ki kpe, waa ŋa biga. Li den tua yeni leni o bontaalo moko. 22Bani bonba lele yeni kuli den taa o, ama oba ki den ŋa buolu. O pua mo den ti yuandi ki kpe. 23Bi tinkpiba fiima yogunu bani jaba lele yeni siiga, o pua baa tie ŋme yaa yua? Kelima bani bonba lele yeni yendo yendo kuli den taa o ke o tua o pua.» 24Jesu den goa ki yedi ba: «Yin kaa bani i Diani n yedi yaala, kaa go bani U Tienu paaciamu yeni, lani n teni ke yi ye mi tudima nni. 25Kelima yaaba n kpe yaa goa ki fii yaa yogunu, bi jaba kan go taa puoba, bi puoba mo kan go kuni jaba, bi baa tie nani malekinba yeni tanpoli po. 26Yaala n tie bi tinkpiba leni bi fiima maama fuuli po, naani yii cogi Musa n den diani yaa tili#12.26 Jufinba yaa yedi Musa tili yeni, bi bua ki yedi li bali maama timuuda, Mi Cilima, Mi Ñama, Lefi Buolu Yaaba Tuona, Mi Coadima leni Mi Tiadima. nni yaa fatuugu n co kani, ke U Tienu den yedi wani Musa: N tie Abalahama Tienu, Isaaka Tienu leni Jakobo Tienu.#Ñam 3.6 27To, U Tienu naa tie kpiema Tienu ka, o tie yaaba n fo yaa Tienu yo. Yi tudi boncianla.»
Li bali maama mayuli
(Mat 22.34-40; Luk 10.25-37)
28Li *bali maama bangikaaba siiga yendo den gbadi ban nia yaala, ki bandi ke Jesu guani Sadusieninba yaa maama n dagidi. Lane o den nagini Jesu kani ki buali o: «Li bali maama kuli nni, mile n tie li mayuli?»#Luk 10.25-28 29Jesu den goa ki yedi o: «Li mayuli tie mine: Isalele buolu yaaba, yin cengi mani, ti Diedo ti Tienu, wani O Diedo tie yendo.#Tia 6.4-5 30Ŋan bua o Diedo a Tienu leni a pali kuli leni a miali kuli leni a yantiali kuli leni a fidu kuli. 31Yaala n ŋua mo tie: Ŋan yaa bua a nisaalilielo mo nani ŋan bua a yuli maama yeni. Li balimaama kuli nni mayutoali ki go ye ki cie mine.»#Lef 19.18 32Li bali maama bangika den yedi o: «Canbaa, yeni a maadi moamoani ke U Tienu tie yendo, ke toa ki ye kali wani,#Tia 4.35 33ke o nilo n bua wani leni o pali kuli leni o yantiali kuli leni o miali kuli leni o fidu kuli, ki go bua o nisaalilielo nani wan bua o yuli maama yeni, lani n cie ban padi a *padijuukaana leni yaa padibuoli n sieni kuli.»#Ose 6.6 34Jesu n den sua ke o bangika yeni guani o leni mi yanfuoma, o den yedi o: «Ŋaa foagi leni *U Tienu diema.» Laa yogunu liiga baa go den pia papaali ki buali o bualiba kuli.
Kilisiti n tie yua
(Mat 22.41-46; Luk 20.41-44)
35Jesu n go den bangi bi niba U Tienu diegu nni, o den buali: «Li ga lede ke li bali maama bangikaaba tua ke *U Tienu n Gandi Yua, tie Dafidi bijua? 36U Tienu Fuoma Yua den teni ke Dafidi oba kadi ki yedi:
‹O Diedo den yedi n Diedo:
Kali n jienu po
Hali min baa guli a yibalinba
Ŋan ŋmaa ba.›#Pis 110.1
37Dafidi oba yini o o Diedo, li nan go ga lede ke o tie wani Dafidi bijua?»
Jesu jagili li bali maama bangikaaba
(Mat 23.1-36; Luk 20.45-47)
Yaa niligu n yaba den cengi Jesu maama leni li pamanli. 38Wan den bangi ba yaa yogunu o den yedi: «Fangi mani yi yula leni li bali maama bangikaaba, yaaba n bua ki yaa goadi leni a liadiciama, ki go bua bi niba n yaa fuondi ki kpiagidi ba mu daamu nni. 39Bi go bua ki yaa ka i niciankali-kaani li bali maama bangima diena nni, ki go bua yaa kaani n gagidi mi jecianma kani, 40ki nan janbidi a kpepuona ki fenli bi diena, ki jaandi i jaandifoagi ki kpali ke bi tie jajaandimoana. Bi yaa buudi cuonu baa yaa bia ki cie.»
O kpepoluodo paabu
(Luk 21.1-4)
41Jesu den ka U Tienu diegu nni ki tiegi ku ligitiagu ki diidi ku niligu n kpiendi i ligi maama. A piada boncianla den kpiendi i ligi ke li yaba. 42O kpepoluodo mo den cua ki kpieni falino lie. 43Jesu den yini o ŋoadikaaba ki yedi ba: «N waani yi i moamoani, o kpepoluodo na puni ki cie yaaba n kpieni i ligi ku ligitiagu nni kuli, 44kelima bikuli ñani bi ŋalimani nni bi ligijodi, ki kpieni, ama wani, baa leni o luoma kuli o ñani wani pia yaala kuli, wan pia yaala ki baa je kuli, ki kpieni.»
Jesu pua sawali ke bi baa bolini U Tienu diegu
(Mat 24.1-2; Luk 21.5-6)
Obecnie wybrane:
MAKA 12: GUX03
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Gulmancema Bible © Bible Society of Burkina Faso, 2003.