Shitatiko 10
10
Bihemunwino bya bana ba Nowa
(1 Byambo 1:5-23)
1Ebye nibyo bihemunwino bya bana ba Nowa, bengile Shemu na Hamu na Yafweti. Aba bahatu babelekele bana oho libazi lyapitakale.
2Bana ba Yafweti bengile Ngomela na Mangongi na Mendiya na Yabani na Tumbalu na Mesheki na Tilashi. Aba bengile bankaka za bantu aba batumbile matunga mazina wabo. 3Bana ba Ngomela bengile Ashikenazi na Lifwati na Tongama. 4Bana ba Yabani bengile ba Elishahi na Tashishi na Kitimu na Londanimu. 5Nibo bengile batata bantu bazika ha shibumbo naha bikuli bya liwate. Aba nibo bana ba Yafweti bekalilenga mu mishobo yabo ya kulitapulula na matunga akulitapulula, kanzunga na kanzunga kambilenga lulimi lwako.
6Bana ba Hamu bengile Kushi na Engepita na Limbiya na Kenaani, aba bengile bankaka za bantu batumbile matunga mazina wabo. 7Bazukulya Kushi bengile ba Shemba na Habila na Shambita na Lama na Shambitika. Bana ba Lama bengile ba Shemba na Ndendani. 8Kushi wa belekele Nimulondi, ou wengile muntu wakutatika hano hanci mu ka kulwa wa ngovu. 9Niye wengile shibinda wamunene ku meho a Nyambi. Eshe nisho shuma bantu bambilenga ngayi, “Nyambi ya Ngula mwanga akwingishe wamunene ngonehe shibinda Nimulondi.” 10Ha kutatika wene wendi washimbile hamo na Mbambelu na Eleki na Akandi zinkena nimwazo eze zihatu na Kalina zekalile mu litunga lya Shina.#10:10 Shina: Mu shihebelu nilyo litunga lya Mbambiloniya. 11Oho afumine mu litunga liyo, wayile ku Ashiliya niko akazikile zinkena za Neniva na Lehomboti Ila na Kala na 12Leshena lukena olwe luli mukati ka Neniva na lukena lwalunene lwa Kala.
13Bana ba Engepita bengile bantu ba ku Lundimu na Anamimi na Lehambimi na Nafutuhima, 14Patuluzi na Kashiluhimu na bantu ba Kafwitola, niko kwa fumine Bafwilishitina.
15Bana ba Kenaani babalume bengile Shindoni wa mweli na Heti. Aba bengile bankaka za bantu aba batumbile matunga mazina wabo. 16Kenaani wengile kami nkaka ya Bayembushi na Baamoli na Bangilingashi, 17na Bahivi na Baakite na Bashina, 18na Alibanditi na Bazamaliya na Bahamati. Kunyima yanebye mishobo nimwayo ya Bakenaani yahanyine nimwako, 19hantu zinginza za Bakenaani za kumine kubalika ku mabukubuku a Shindoni kukuma naku Ngela na hahepi na Ngaza naku mushamuko kukuma ku Shondoma na Ngomola na Andima na Zemboyima hahepi na Lasha. 20Aba nibo bana ba Hamu, bekalile mu mishobo yabo na matunga wabo akulitapatapa, pe lupashi na lupashi lwambilenga lulimi lwabo.
21Shemu ou wengile yaya Yafweti, niye wengile tata bahebelu nimwabo. 22Bana ba Shemu bengile Elamu na Ashula na Alipakishandi na Lundi na Alamu. 23Bana ba Alamu bengile ba Uzi na Hula na Ngeta na Mashi. 24Alipakishandi wengile tata Shela, Shela wengile tata Emba. 25Emba wabelekele bana babili umo watumbiwile ngayi Pelengi#10:25Pelengi: Lizina elye likulifweka na lizu lya mu Shihebelu likutontolola “kutapa.” ndaba ha shikati shendi bantu ba hanci balitapatapile. Wamina watumbiwile ngayi Yokitani. 26Yokitani wabelekele Alimondandi na Shelefi na Hazalamabeta na Yela, 27na Handolamu na Uzalu na Ndikila, 28na Ombalu na Ambimayele na Shemba, 29na Ofwila na Habila na Yombambu, nimwabo aba bengile bana ba Yokitani. 30Litunga omu bazikile lyanenehele kubalika ku Mesha kukakuma naku Shefwa ku binkanda bya ku mushamuko. 31Aba nibo bana ba Shemu, bayo bekalilenga mu mishobo na matunga abo a kulishiyashiya, kanzunga na kanzunga kambilenga lulimi lwako.
32Bantu aba nimwabo bengile bazukulya Nowa na mu shihemunwino shabo na mishobo yabo. Kunyima ya libazi, mikoka nimwayo ya hano hanci yatutikile kuli bana ba Nowa babalume.
Obecnie wybrane:
Shitatiko 10: LLK
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Libuka Lya Kuyela © Bible Society of Zambia, 2020.