लुका 16
16
चलाख नाइक्या
1येशूये लहो चेलाकोलाक डेया, “काट धनी भर्मीयो काट जना नाइक्या लेया। होचे लहो मालीकौ धन सम्पत्ति भुरुक्ङ न ले डेम होसकी कुरा लैडीच बाटै, 2धनी भर्मीये नाइक्याकी आर्घार डेया, ‘ङै नाकुङ बारेयाङ इसे ही सेमन ले? नाकुङ पट्ट न हीसाब कीताब ङाकी यान्ही। अब लकीङ आलाक नाको नाइक्या छान्की माय्होक्ले’ 3होटै नाइकेइ लहो मीमनाङ डेया, ‘अब ङा ही जाट्की? हीजैडेनाङ मालीकै ङौ काम स्याट्की पामने। य्हा कोहार ज्याकी र माय्होक्ले, ङेम्ह ज्याकी र काराम सेले। 4होटबाटै कामीङ छ्युक्च न्हुइङ भर्मीकै ङाकी होखुरीकुङ इमाङ कुटजाट्न मन्डीच खास्की पर्ले डेम ङै वार्न्ह भ्यामे।’ 5होटै न्हुइङ होचे मालीकौ रीन लाच कोलाक काट-काट जनाकी आर्घा। होटै पहीला राछकी गीना, ‘नाकोकी ङौ मालीकौ रीन कुडीक ले?’ 6होचे डेया, ‘सोम हजार लीटर सीडी’ होटै व्यवस्थापकै होसकी डेया, ‘नाकुङ टमसुक राक्नी। छीटो जाटार होला पन्ढ्र सय लीटर रीक्नी।’ 7होटै अर्कोकी गीना, ‘नाकोकी रीन कुडीक ले?’ होचे डेया, ‘सोम सय पचास क्वीन्टल गहुँ।’ होचे होसकी डेया, ‘नाकुङ टमसुकाङ सोम सय क्वीन्टल रीक्नी।’”
8“इसे थाहा डीन्छ न्हुइङ होसे मालीकै बेइमान नाइक्यौ चलाखीयौ टारीफ जाटा। हीजैडेनाङ परमेश्वरकी विश्वास माजाट्चको अरु भर्मीको खाटा चलाख छानार ब्यबहार जाट्ले। टर पनी परमेश्वरकी विश्वास जाट्चको होखुरीक ल्याक्च चलाख माछान्ले। 9ङा नाखुरीककी डेले, लहो लागी संसारुङ धनै लाफाको खास्नी। जब होसे धन र कायाक भ्याले। होटै होखुरीकै नाखुरीककी स्वर्गाङ मान जाट्ले।”
ठोरै कुराङ र भर पर्च छान्की पर्ले
(मत्ती ६:१४)
10येशूये चेलाकोलाक डेया, “मार्जा कुराङ इमानदार छान्च भर्मी बाड्को कुराङ र इमानदार छान्ले। होटै माजा कुराङ बेइमानी छान्च भर्मी वास्टै कुराङ र बेइमानी छान्ले, 11इटजाट्न नाखुरीक इसे संसारुङ धनाङ इमानदार माछाना डेनाङ, नाखुरीककी सत्यौ धनौ जीम्मा सुये याल्हे? 12इडीक नाखुरीक अरुकुङ धनाङ इमानदार माछाना डेनाङ, नाखुरीकै डुप्की पर्च धन सुयेर याल्हे र?
13“सुयेर नीस मालीकौ सेवा जाट्की माय्होक्ले। नभा च होचे काट्की जाक्ले र अर्कोकी माजाक्ले। की ट होचे काटौ चहीँ इमानदार छानार सेवा जाट्ले र अर्कोकी चहीँ हेला जाट्ले। होटबाटै नाखुरीकै र परमेश्वर र धन नीसौ न सेवा जाट्की माय्होक्ले।”
येशूये डेच अरु कुराको
(मत्ती ११:१२-१३; ५:१८,३२)
14होटै इसे पट्ट कुरा सेरखीङ फरीसीकै येशूओ गील्ला जाटा। हीजैडेनाङ होखुरीकै पैसाकी साफ्फी माया जाट्नन्या। 15होटै येशूये होखुरीककी इट डेया, “नाखुरीक भर्मीकुङ म्याहासाङ लाहाकी धर्मी खास्की च पाले, टर परमेश्वरै नाखुरीकुङ मीमन की वार्ल्हे। हीजैडेनाङ भर्मीकै ही की बाड्को खास्नने, परमेश्वरौ म्याहासाङ होसे झीर्न सेच छान्ले।
16“बप्तिस्मा याछ युहन्नौ बेलासम्म मोशौ व्यवस्था र अगमवक्ताकुङ शिक्षाङ भर्मीको व्हामन्या। होटै होसे बेला लकीङ इलाक चहीँ नाखुरीककी परमेश्वरौ राज्यौ सेछ समाचार सेटाक्ने। होटै पट्टको होला पर्की डेम जोड जाट्न न ले। 17होटै सर्घा र पृथ्वी म्हाटार नुङ्की य्होक्ले, टर व्यवस्थाङ लेच काट कुरा र माम्हाट्ले। 18सुये लहो मास्टोकी डासार अर्कोकी ब्याहा जाट्ले, होचे व्यभिचार जाट्ले, र लेन्जै डास्च मास्टोकी ब्याहा जाट्च भर्मीये र व्यभिचार जाट्ले।”
धनी भर्मी र लाजरस
19होटै येशूये डेया, “काट धनी भर्मी लेया। होसे मेल्हाकी सढैँ महङ्गो पर्च बैजनी रङुङ नरम लाइलनौ बढीन बील्छै डीन-डीनै मोज-मज्जा जाटार ङुम्या। 20टर होच्यौ गालामटुआङ लाजरस म्यार्मीनुङ काट गरीब भर्मीकी राकार डाम याम्हन्या। होच्यौ जीउभरी म्हा न म्हा लेया। 21होटै होसे धनी भर्मीये ज्यानाङ टेबुल लकीङ झाल्च जुठाको ज्याकी डुप्ले की डेम होसे ङोस्चै ङुम्या। होटै चीउको राहार होच्यौ म्हाकी ल्हाक्न्या।”
22होटै होसे गरीब भर्मी सीया। स्वर्गदूतकै होसकी आल्हार अब्राहाम छीनीङ डाम याहा। होटै होसे धनी भर्मी र सीया अनी ठाका। 23होटै नरकाङ नुङा र बाड्को कष्ट भोग्डीकी पर्या। होचे ढेम्लाक ङोसा र अब्राहामौ छेवाङ लाजरसकी डाङा। 24होटै होचे बाड्को सोरै डेया, ए बोइ अब्राहाम, ङाकी दया जाटार लाजरसकी बीर्न्हकाम यान्ही। होचे मेनो अमलौ मीडुम डीयाङ ठाकार ङौ मेलेट्की सीटल खास्न अट येहे। हीजैडेनाङ ङा इसे म्हेआङ छट्पडीस्न ङुमे। 25टर अब्राहामै डेया, “ङौ मीजा, आर्मीटो ट, नीये लहो जीवनाङ पट्ट न सुखौ कुराको भोग्डीम भ्या। टर लाजरसै चहीँ डुखै डुख भोग्डीया। होसकी अब इला आरम ले। होटै नाको चहीँ कष्टआङ ले। 26इडीक मट्टै होइन, इटै सुर नुओ खेरेप नुङ्की पानाङ र अट माय्होकै र होटै इला राखी पानाङ र अट माय्होकै डेम नुओ र कानुङ मीघ्याङ लुप्च ढाँडो ले। 27होटै होचे डेया, ‘होट डेनाङ बोइ, नाकोकी ङा बिन्ती जाट्ले, लाजरसकी ङौ बोयो इमाङ बीर्न्हकाम यान्ही। 28हीजैडेनाङ ङौ बाङा जना डाजे-भाइको ले। होचे नुङार होखुरीककी चेटावनी अट येहे; नभा च होखुरीक र इसे नरकाङ आरहे।’ 29टर अब्राहामै डेया, ‘होखुरीक खाटा मोशा र अगमवक्ताकुङ कीताब ले होसे न अट सेए’ 30होटै होचे डेया, ‘होइन, बोइ अब्राहाम, सीच भर्मीको लकीङ काट जना जीवार होखुरीक लेठाङ नुङा डेनाङ च होखुरीक लहो पापको डासार परमेश्वर पट्टी ल्हेस्ले।’ 31टर अब्राहामै होसकी डेया, ‘मोशा र अगमवक्ताकुङ कुरा होखुरीकै मासेले डेनाङ, सीचको लकीङ सुर जीवार नुङ्नाङ र होखुरीकै विश्वास माजाट्ले’।”
Obecnie wybrane:
लुका 16: EMGP
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2024 (Active), Wycliffe Bible Translators, Inc. All rights reserved.