लुका 3
3
बप्तिस्मा याछ युहन्नौ प्रचार
(मत्ती ३:१-१२; मर्कूस १:१-८; युहन्ना १:१९-२८)
1रोमी सीजर तिबेरिअसै राज्य जाट्च पन्ध्र वर्ष छानन्या। होडीक बेला पन्तियस पिलातस यहूदा छेत्रौ बाड्को-हाकीम लेया। रोमी महाराजौ अधिनाङ हेरोदै गालीलौ छेत्राङ राज्य जाट्न्या र होच्यौ डाजे फीलीपै चहीँ इटुरीया र टाराखोनीटीसौ छेत्राङ राज्य जाट्नन्या। अबीलेने डेच ठावाङ चहीँ लुसानीयास डेच भर्मीये राज्य जाट्नन्या। 2होडीक बेलुङ यहूदिकुङ प्रधान पुजाहारीको चहीँ हन्नास र कैयाफा लेया। होडीक न बेला परमेश्वरौ बचन जकरीओ मीजा युहन्ना लेठाङ राहा।
3होटै युहन्नै यर्दन नदियो खेरेपुङ ठाउँ-ठाउँवाङ नुङार भर्मीकोलाक इट डेम प्रचार जाटा, “पापको डास्नी र परमेश्वर पट्टी ल्हेसार बप्तिस्मा लानी। होटै परमेश्वरै नाखुरीकै जाट्च पापको क्षमा याल्हे।” 4इटजाट्न यशैया अगमवक्तै धर्मशास्त्राङ रीक्च इसे कुराको ओल्हार राहा,
“सेनी उजाड-ठाँवाङ काट भर्मीये बाड्को सोर छ्युकार इट डेमन ले,
प्रभुओ लाम टयार जाट्नी, होसकुङ लाम सोझो खास्नी।
5पट्ट खोल्साको पुरीस्ले।
होटै पट्ट डाँडा-काँडा न्हामाक्ले, बाङ्गो टेडोको सोझो छान्ने।
होटै अप्ठ्यारो लामको न्हाम्च छान्ले।
6होटै पट्ट भर्मीकै परमेश्वर लकीङ राछ मुक्ति डाङ्ले।”#यशैया ४०:३-५
7होटै वास्टै भर्मीको युहन्ना लेठाङ बप्तिस्मा लाकी डेम राहा र युहन्नै होखुरीककी डेया, “ए बुलौ मीजाको! आइ लग्डीस्च क्रोध लकीङ भोक्डीस्की नाखुरीककी सुये चेटावनी याहा? 8पापको डासार परमेश्वर पट्टी ल्हेस्नी र लाहा-लहो मीमनकी परमेश्वर पट्टी ल्हेसाक्च हो डेनाङ होटजाट्न न ह्वानी। टर ‘कानको अब्राहामौ सन्टानको हो’ डेनाङ न नाखुरीक दण्ड लकीङ भीस्की डीन्ल्हे डेम माआर्मीट्नी। टर परमेश्वरै अब्राहामौ लागी डेम ल्हुङ लकीङ र सन्टान खास्की य्होक्ले। 9चाहाँ न आउरा सीङ म्यार्टुङकुङ जराङ पर्न भ्यामने। होटबाटै असल मीस्या मास्याटाक्च सीङ म्यार्टुङ कोलाक चेयार म्हेआङ लोम्हकाले।”
10होटै भर्मीकै युहन्नाकी गीना, “होट डेनाङ कानकै ही जाट्की पर्ले?” 11युहन्नै होखुरीककी डेया, “लाहा खाटा नीस डौरा लेचये हीर मालेच कोलाक काट यान्ही। सु-सु खाटा ज्याच ठोक ले होखुरीकै र होट न जाट्नी डेम पाहाका।” 12कर सोट्च भर्मीको र बप्तिस्मा लाकी डेम राहा र युहन्नाकी गीना, “गुरुज्यु, कानै ही जाट्की पर्ले?” 13होखुरीककी युहन्नै डेया, “सरकारै डेच डेनाङ वास्टै कर मासोट्की।” 14सीपाहीकै र गीना, “कानै चहीँ ही जाट्की पर्ले?” युहन्नै होखुरीककी र डेया, “फोकोकी माछान्च दोष लैडीयार, झुक्डीयार मालुट्डीकी। लहो न टलबाङ सन्टोक जाट्की।”
15पट्ट न भर्मीको मुक्ति याछ ख्रीष्टौ लाम ङोस्न ङुमन्या। होटै होखुरीकै चहीँ मीमनाङ युहन्ना न मुक्ति याछ ख्रीष्ट हो की य्हाले? डेम आर्मीट्न न लेया। 16होखुरीककी युहन्नै डेया, “ङा नाखुरीककी डीये बप्तिस्मा याल्हे। टर ङा डेनाङ कर्हाङ्छ काट जना राम्हन ले। ङा च होसकुङ मीहीलुङ चप्पलौ फीट्टा फोसाक्की ज्योस्च र माले। होसकै नाखुरीककी पवित्र आत्मा र म्हेये बप्तिस्मा याल्हे। 17टाप्च न्हाङ्ल्या होस्कुङ मीहुटाङ न ले। होटबाटै गहुँ र भुस भाकार गहुँ जटी ढुकुटीयाङ ठन्कडीले र भुसकी चहीँ सेन्र मासीच म्हेयाङ काम याल्हे।”
18इटजाट्न वास्टै अर्तीको याम्ह युहन्नै भर्मीकोलाक परमेश्वरौ सेछ समाचार सेटाका। 19टर हेरोद राजै लहो भायो मास्टो हेरोदीयासकी मेल्हा खाटा डामन्या र मासेछ काम जाट्च बाटै युहन्नै हेरोदकी हक्कारीम्या। 20होटबाटै युहन्नाकी हेरोदै झ्यालखानाङ ठुना र होच्ये झन मासेछ काम जाटा।
येशूये बप्तिस्मा लाच
(मत्ती ३:१३-१७; मर्कूस १:९-११; युहन्ना १:३२-३४)
21होटै पट्ट भर्मीकै बप्तिस्मा लाचै जाट्नाङ प्रभु येशूये र बप्तिस्मा ला र होसकै प्रार्थना जाट्चै जाट्नाङ होडीक न बेला स्वर्ग उघारीसा। 22होटै पवित्र आत्मा ढुकुर लेखा होसको मीटाक बाम्ह राहा। होटै स्वर्ग लकीङ याङ्च आवाज राहा, “नाको ङौ प्यारो मीजा हो, नाको खाटा ङा सार्है मार्हाङ्ने।”
मुक्ति याछ ख्रीष्टौ पुर्खाको
(मत्ती १:१-१७)
23इटजाट्न येशूये परमेश्वरौ काम जाट्की सुरु जाट्नाङ होसको टीस वर्ष टाम्हन्या। भर्मीकै योसेफकी न येशूओ बोइ डेम मन्डीमन्या। योसेफौ बोइ एली लेया, 24एलीयो बोइ मत्तात, मत्तातौ लेवी, लेवीयो मल्की, मल्कीयो यान्ना, यान्नौ योसेफ, 25इटजाट्न न योसेफौ बोइ मत्ताथियास, मत्ताथियासौ बोइ आमोस, आमोसौ बोइ नहुम, नहुमौ बोइ इसली, इसलीयौ बोइ नग्गै, 26नग्गैयो माथ, माथौ मत्ताथियास, मत्ताथियासौ सेमैन, सेमैनौ योसेख, योसेखौ बोइ योदा लेया, 27योदाओ बोइ योआनन, योआननौ रेसा, रेसौ यरुबाबेल, यरुबाबेलौ शालतिएल, शालतिएलौ नेरी, 28नेरीयो बोइ मल्की, मल्कीयो बोइ अद्दी, अद्दीओ कोसाम, कोसामौ एलमादम, एलमादमौ एर, 29एरौ बोइ यहोसु, यहोसुऔ एलीएजर, एलीएजरौ योरीम, योरीमौ मत्तात, मत्तातौ लेवी, 30लेवीयो शिमियोन, शिमियोनौ यहूदा, यहूदौ योसेफ, योसेफौ योनान, योनानौ एल्याकीम लेया, 31एल्याकीमौ बोइ मलेआ, मलेऔ बोइ मीन्ना लेया, मीन्नौ मत्ताथा, मत्ताथाओ नातान, नातानौ दाउद, 32दाउदौ यीसै, यीसैयो ओबेद, ओबेदौ बोअज, बोअजौ सल्मोन, सल्मोनौ नहसोन, 33नहोसोनौ अम्मीनादाब, अम्मीनादाबौ बोइ एडमीन लेया, एडमीनौ आरम, आरामौ बोइ हेस्रोन, हेस्रोन फारेस, फारेसौ यहूदा, 34यहूदौ याकुब, याकुबौ इसहाक, इसहाकौ अब्राहाम, अब्राहामौ तेरह, तेरहौ नाहोर लेया, 35नाहोरौ बोइ सरुग, सरुगौ रउ, रउओ पेलेग, पेलेगौ एबेर, एबेरौ सेलह, 36सेलेहौ केनान, केनानौ अर्पक्षद, अर्पक्षदौ सेम, सेमौ नोह, नोऔ लेमेख, 37लेमेखौ मतूशेलह, मतूशेलहौ हनोक, हनोकौ येरेद, येरेदौ महलालेल, महलालेलौ केनान, 38केनानौ एनोस, एनोसौ सेट, सेटौ बोइ आदम लेया, आदमौ बोइ परमेश्वर लेया।
Obecnie wybrane:
लुका 3: EMGP
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2024 (Active), Wycliffe Bible Translators, Inc. All rights reserved.