Johan 7
7
Jisu ar acʼren boehako
1Noa tayom Jisu do Gạlilregeye dãṛãnkan tahẽkana. Ar Jihudi mukhiyạko gojeko menetʼ tahẽkante uni do Jihudạ disạmre dãṛãne bạgikeda.
2 #
Lev 23.34; Bib 16.13 Unre Jihudikoakʼ chạuni-porob do sor hecʼakan tahẽkana. 3Onate uniren boehakoko metadea, “Noa jaega bạgiyakʼte Jihudạ disạmte calakʼme, jemon okakom kạmikan ona do amren celakoko ńel daṛeakʼ. 4Jãhãe acʼte sodorokʼe menjoṅkan khan uni do oko okote cetʼge bae kạmiya. Ado noakom kạmikante am do hoṛko samaṅre udugokʼme.” 5Ar acʼren boehako hõ Jisu do bako pạtiạuae kan tahẽkana.
6Onate Jisu do onkoe metatʼkoa, “Ińakʼ okte do ńit hõ ạuriyakʼa, menkhan ape do jaoge menakʼtapea. 7Dhạrtiren hoṛko ape do bako kurudapea menkhan iń doko kurudạńgea, ente onko reaṅ noa gohań emeda je, onkoakʼ joto kạmi do bạṛicʼgetakoa. 8Do, apege porobte calakʼpe. Ińakʼ okte do ńit hõ baṅ purạu akante bạń sen hataṛokʼ kana.” 9Noako katha menkate Jisu do Gạlilregeye tahẽyena.
Chạuni porobre Jisu
10Ado acʼren boehako porobteko senen khan acʼ hõ onḍeye calaoena, menkhan sodorte do baṅ bickom oko okotege. 11Ar porobre Jihudi mukhiyạko do Jisu ńam baṛayeko ehopʼena arko menkeda, “Uni hoṛ do okare menaea?”
12Ar hoṛko hõ bhiṛ talare Jisu reaṅko phasar phusuretʼ tahẽkana. Adomko doko menkeda, “Uni do bhage hoṛ kanae.” Arhõ adomko doko menkeda, “Baṅ, uni do hoṛkoe bulạuetʼkoa.” 13Menkhan Jihudi mukhiyạko botorte okoe hõ uni reaṅ sodorte do cetʼge bako roṛetʼ tahẽkana.
Chạuni-porobre Probhu Jisuakʼ sikhạuna
14Ado porob adha ạdhiyen khan Jisu do mundilre bolokate cetʼakoe ehopʼena. Noate Jihudi mukhiyạko do hahaṛayenteko menkeda, 15“Nui hoṛ do jãhãn sikhnạt bae ńamakatʼre hõ cekate noako reaṅ doe baḍaekana?”
16Jisu do onkoe metatʼkoa, “Oka cecetʼakʼ iń emokʼkan ona do ińakʼ do baṅkana, menkhan okoeye kolakadiń, uniyakʼ kangea. 17Jãhãe uniyakʼ sanaleka senokʼe menjoṅ khan enḍekhane bujhạu daṛeakʼa noa cecetʼakʼ do Isor secʼ khonakʼ kana se iń nij khoniń roṛeda. 18Okoe nij khon kathae roṛ uni do acʼakʼ sabasigeye ńam baṛaea, menkhan okoe kolakadiyicʼ reakʼ sabasiye ńam baṛayetʼkan uni doe sạrigea ar unire jãhãn eṛeakʼ do bạnukʼanaṅ. 19Mose do cetʼ ạn-ạriko bae emakatʼpea? Menkhan ape modre okoe hõ onako ạn do bape manaoeda. Enḍekhan cedakʼ gojeń lạgitʼ dope kurumuṭuyeda?”
20Onkoko roṛ ruạṛadea, “Amre do bhut menaea; okoe am gocʼme lạgitʼ doe kurumuṭukana?”
21Jisui metatʼkoa, “Iń do mitʼṭecʼ iń kạmi akatʼte sanamkope hahaṛakʼ kana. 22#Lev 12.3; Gen 17.10 Mose do khatnakʼ reakʼ ạne emakatʼpea, ar jirạukʼ mãhãre hõ ape dope khatnayetʼkoa. Menkhan noa niạm do Mose khonakʼ do baṅkana, hapṛamko ṭhen khonge hecʼ ạguakana. 23#Jhn 5.9 Moseyakʼ ạn alo rạpud lạgitʼ jirạukʼ mãhãre gidrạkope khatnayetʼko khan, enḍekhan jirạukʼ mãhãre mitʼṭen hoṛiń bogekedete cedakʼpe edreạń kana? 24Mẽtʼãhã ńelte do alope bicạra bickom hok reakʼge bicạrpe.”
Uni do cetʼ Mạsi kanae?
25Unre Jerusalemren adom adom hoṛko menkeda, “Mukhiyạko gojeko menetʼkan hoṛ do cetʼ nui kangeae? 26Menkhan uni ma khulạsate kathae roroṛkan, ar mukhiyạko hõ coṅ cetʼge bako metaekan. Enḍekhan onko do cetʼ sạrigeko baḍae oromkedea, nui doe Mạsi kana mente? 27Tobe abo mabon baḍaege nui do oka khone hecʼakana mente. Menkhan Mạsiye hecʼlenre okoe hõ bako baḍaeyea uni do oka khone hecʼakana.”
28Ona tayom Jisu do mundilreye cetʼakokan tahẽkanre ãṭ aṛaṅteye menkeda, “Ape do iń hõpe baḍae akadińạ, ar oka khoniń hecʼ akana ona hõpe baḍaegea. Ente ińte do bạń hecʼakana, menkhan sạri Isorgeye kolakadińa. 29Uni do bape baḍae akadea menkhan iń doń baḍae akadea, ente iń do uni ṭhen khongeń hecʼakana ar unige iń doe kolakadińạ.”
30Noa iạte onko hoṛ do Jisu sabeko menetʼ tahẽkana, menkhan un hạbicʼ hõ okte do baṅ hoyakantae tahẽkante okoe hõ bako joṭetʼledea. 31Menkhan ḍher hoṛge Jisure pạtiạuenteko menkeda, “Nui do aema hahaṛawakʼkoe kạmikana. Mạsiye hecʼlenre noako khon hõ bạ̃ṛti hahaṛawakʼko cetʼ bae kạmiya?”
Jisu sabe lạgitʼ peadako kol ocokʼkan
32Hoṛko Jisu reaṅko phasar phusuretʼkan ona do Phạrusikoko ańjomkeda. Unre maraṅ naekeko ar Phạrusiko do Jisu sabe lạgitʼ peadakoko kolketʼkoa. 33Jisui metatʼkoa, “Ape talare ḍher din do bạnuńa. Ona tayom okoeye kol akadiń uni ṭheniń ruạṛ calakʼa. 34Arpe ńam baṛayińạ menkhan bape ńameńa, ar okareyiń tahen onḍe hõ ohogepe sen daṛelena.”
35Jisuakʼ noa kathate Jihudi mukhiyạko do ako talareko menkeda, “Nui hoṛ do okateye calakʼte babon ńam daṛeaea? Baṅ do Junạniko talare chirchạtur akan Jihudiko ṭhen senkate Junạnikoe cetʼako? 36Enteye meneda, ‘ńam baṛańape menkhan bape ńameńa, ar iń okareń tahen onḍe do ohope sen daṛelena,’ noa katha reakʼ mane do cetʼkana?”
Jion dakʼ reakʼ jharna
37Ado porob reakʼ mucạtʼ din do mitʼṭecʼ asol din tahẽkana. Enhilokʼ Jisu doe teṅgoyente ãṭ aṛaṅteye menkeda, “Jãhãe hoṛ tetaṅede khan uni do iń ṭhene hijukʼma ar dakʼe ńũ idijoṅma. 38#Jeh 47.1; Sak 14.8 Ińre pạtiạukʼkạnicʼ do sonot sostor reakʼ katha leka uniyakʼ ontor khon jiwetʼ dakʼ reakʼ gaḍa ạtu oḍokokʼa.”
39Noa do uni Jiu reaṅe roṛkeda, one okoe acʼre pạtiạukʼte sonot Jiuko ńame. Unre sonot Jiu do bae emakan tahẽkana, ente unhạbicʼ Jisu hõ bae ṭhonok ocoakan tahẽkana.
Hoṛko talare katha baṅ jurikʼkan
40Ado noako katha ańjomkate gadel hoṛko modre adomko doko menkeda, “Sạrige nui doe uni nạbi kana.”
41Ar eṭakʼko doko menkeda, “Nui kangeae Mạsi do.”
Menkhan adomko doko menkeda, “Mạsi do cetʼ Gạlil khone hijukʼa? 42#2 Sam 7.12; Mik 5.2 Sonot sostorre cetʼ bae meneda, Dạud bõs ar Dạude tahẽkan Betlehem khonge Mạsi doe janamokʼa mente?”
43Nonkate Jisu iạte hoṛko talare bhinạ bhini hoyena. 44Onko modre adomko do Jisu sabeko menetʼ tahẽkana menkhan okoe hõ unire hat bako lagaoleda.
Hoṛko talare bhinạ bhini
45Ar okoe peadakoko kol ocolen onko do maraṅ naeke ar Phạrusiko ṭhenko ruạṛ hecʼen khanko kuli ocoyena, “Uni do cedakʼ bape ạguledea?”
46Adoko menkeda, “Uni hoṛ cetʼ lekae roṛetʼkan onka do okoe hõ tisge bako roṛakada.”
47Noate Phạrusiko do onko peadakoko metatʼkoa, “Ape hõpe bulạu ocoyena se cetʼ? 48Mukhiyạko se Phạrusiko modren okoe hõ coṅ unirema bacoko pạtiạu akan. 49Menkhan noko hoṛko, noko do Moseyakʼ ạn-ạriko hõ bako baḍaea; nokore do sarap paṛao akana.”
50 #
Jhn 3.1,2 Nikodemus, okoe do lahate Jisu ṭhene senlen, uni do Phạrusiko modren mitʼ hoṛe tahẽkana. 51Uni doe metatʼkoa, “Jãhãe hoṛakʼ moca katha begor ańjomte ar cetʼe ceka kana begor baḍaete sạjại emae do cetʼ aboakʼ ạnre menakʼgea?”
52-53Phạrusiko do Nikodemusko roṛ ruạṛadea, “Am hõ cetʼ Gạlilren hoṛ kanam? Sonot sostor ḍunḍhạukate ńelme, Gạlilre jãhãe nạbi janamokʼ reakʼ katha do bạnukʼa.”
Obecnie wybrane:
Johan 7: SBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Santali Bible © Bangladesh Bible Society, 2021.