Lucas 10
10
72 qatiraqninkunata Jesús kaćhanqan
1Tsëpikñam qanćhis ćhunka ishkë (72)#10.1 Qepa kaq griego copiakunaćhöqa qanćhis ćhunka (70) kanqantam ñin. qatiraqninkunata akraskir ishkë ishkë Teyta Jesús kaćhäqan pë ëwananpaq kaq markakunaman. 2Tsënö kaćharninmi Jesús kënö ñëqan: “Cosëcha poqurëkaqnömi mëtsikaq runakuna Teyta Diosman qoriypaq këkäyan. Qoreqkunaqam uchukllaraq kayan. Tsëmi Teyta Diosta rugakuyänëki atska willakoqkunata kaćhamunanpaq”.
3“Kanan willakoq ëwayë. Löbukunaman#10.3 Löboqa atoqpik mas atunmi. ïshakunata qëkunqan cuentam qamkunata kaćhëkaq. 4Ëwar ama apayankitsu qellëta, qepita ni llanqikikunata. Pïwanpis nänićhö töparqa ama parlakur kakuyankitsu”.
5“Pïpa wasinmanpis ćharqa ñiyanki: ‘Alli kawë qamkunaćhö këkutsun’ ñir. 6Tsë wasiyoq alli ćhaskiyäshuptiki ñiyanqëkinömi alli kawë tsë wasinćhö kanqa. Mana ćhaskiyäshuptikeqam alli kawë kanqatsu. 7Ama wasin wasinraqqa puriyankitsu. Tsëpa rantinqa patsätsiyäshunqëki wasillanćhö qepäkuyanki. Qarayäshunqëkita mikukuyanki y upuyanki. Arupakoq runa arunqanpik pägunta ćhaskeqnömi qamkunapis qarayäshunqëkita ćhaskiyanki”.
8“Më markamanpis ćhäyaptiki ćhaskiyäshurniki imallatapis qarayäshunqallëkita mikuyanki. 9Tsë markaćhö qeshyaqkunata kutikätsirnin willapäyanki: ‘¡Teyta Diospa mandakïnin ćhämushqañam!’ ñir. 10Më markaćhöpis mana ćhaskiyäshuptikeqa cälliman yarquskir ñiyanki: 11‘Kikikikuna utsayoq kayanqëki musyayänëkipaqmi markëkikunapa polvun ćhakëkunaćhö këkaqtapis tapsiyä. Ima kaptinpis musyayë Teyta Diospa mandakïnin ćhämunqanta’ ñir. 12Chumaq wiyayämë: Juiciu final unaqćhö unë Sodoma runakunata castiganqanpikpis mas kuyapëpaqmi tsë runakunata Teyta Dios castiganqa”.#Génesis 19.1-29.
13“¡Allaw imanöraq kayanki, Corazín y Betsaida marka runakuna! Qamkunaćhö milagrukunata ruranqänö Tiro y Sidón markakunaćhö#Isaías 23.1-18; Ezequiel 26.1—28.26; Joel 3.4-8; Amós 1.9-10; Zacarías 9.2-4. milagrukunata ruraptëqa mëñam utsa rurëninkunata dëjayanman käqan. Tsënöllam utsankunapik llakikurqa arrepentikur shïshuna ratëta ćhurakurkur ućhpa ananćhö uchïkur waqayanman käqan. 14Tsëmi Tiro y Sidón runakunata castiganqanpikpis masraq juiciu final unaqćhö castigayäshunki. 15Capernaúm markaćhö täkoq runakuna, ¿qamkunaqa ciëluman ćhäyänëkipaq kaqtaku yarpäyankipisćhi? Tsënö yarparpis infiernullamanmi qëkukäyanki”.#Isaías 14.13-15.
16Tsënö ñiskirñam discïpulunkunata ñëqan: “Qamkuna willakuyanqëkita ćhaskiyäshoqnikikunaqa ñoqatam ćhaskiyäman. Qamkunata mana ćhaskiyäshoqnikikunaqa ñoqatapis manam ćhaskiyämantsu. Ñoqata mana ćhaskimaq kaqkunaqa kaćhamaqnë Teyta Diostapis manam ćhaskiyantsu”.
Willakoq ëwaqkuna kutiyanqan
17Tsëpik uk ishkë semäna päsaptinñam qanćhis ćhunka ishkë (72) ëwaqkuna kushishqa kutir Jesústa ñiyäqan: “Teytë, shutikićhö qarquyaptëmi ¡shapshikunapis cäsuyämashqa!” ñirnin.
18Jesúsñam ñëqan: “Ömi, ñoqapis rikäqö imëka räyutanöraq ciëlupik Satanás ishkimoqta.#10.18 “Imëka räyutanöraqmi Satanás ishkimöqan” ñinanqa “Satanás poderninnaqmi rikäköqan” ñinanmi. 19Ñoqam podernëta qamkunaman ćhuräqoq culebrakunatapis atoqkurukunatapis saruskiyänëkipaq y Satanás imata ruraptinpis vinciyänëkipaq. Satanásta pärapuyaptikipis manam imapis päsayäshunkitsu. 20Tsënö shapshikuna cäsuyäshunqëkipik kushikurpis masraq kushikuyë ciëlućhö shutikikuna qellqashqa kanqanta”.
Teyta Diosta Jesús alabanqan
Mateo 11.25-27; 13.16-17
21Tsë hörañam Espïritu Santupa munëninwan kushikur Teyta Diosta alabar Jesús ñëqan: “Ciëlućhöpis kë patsaćhöpis imëkawan munëniyoq Papänillä, qamtam alaballaq yaćhaq tukoqkunata mana entienditsinqëkipik. Tsëpa rantinqa wamranö kaqkunallatam entienditsiköqonki. Tsënö kanantam ari munäqonki, Papänillä” ñir.
22Ñirkurñam tsëćhö këkaq runakunata ñëqan: “Papänillämi llapantapis munënëman ćhuramushqa.#Juan 3.35. Tsurin kanqëta pëllam musyan. Tsënöllam Papänillä kanqanta ñoqalla musyä. Tsëmi entienditsinqä kaqkunalla Papänë imanö kanqantapis musyayan”.#Juan 1.18; 10.15.
23Tsëpikñam discïpulunkunallata ñëqan: “Kanan päsanqankunata rikarmi kushishqa kayanki. 24Unë profëtakunapis y reykunapis rikayanqëkita rikëta munarpis manam rikayäqantsu. Wiyayanqëkita wiyëta munarpis manam wiyayäqantsu”.#Mateo 13.16-17.
Runa masinta Samaria runa kuyapanqan
25Uk kutićhöñam ley yaćhatsikoq runa Jesús yaćhaq o mana yaćhaq kanqantapis musyananpaq kënö tapöqan: “Teytë, ¿imatatan ruräman wiñë kawëta tarinäpaq?” ñir.
26Jesúsñam ñëqan: “¿Imañintan Teyta Diospa leyninćhö? Liyir ¿imatatan entiendinki?”
27Ñiptinñam tsë runa ñëqan: “Teyta Diospa leyninćhö kënömi ñiykan: ‘Teyta Diosta kuyanki llapan shonqïkiwan, llapan voluntänikiwan, llapan kallpëkiwan y llapan yarpënikiwan. Runa masikitapis kikiki kuyanqëkinö kuyanki’ ñir”.#Deuteronomio 6.5; Levítico 19.18.
28Ñiptinñam Jesús ñëqan: “Allitam ñëqonki. Tsë ñinqëkikunata cumplirmi wiñë kawëta tarinki”.
29Tsë runañam yaćhaq tukur tapöqan: “Tsë höraqa qampaq ¿pïtan tsë runa masëqa?”
30Tsënö tapuptinmi Jesús ñëqon: “Uk runash Jerusalénpik Jericó markaman ëwëkäñaq. Ëwëkaptinshi ladrunkuna alläpa maqaskärir ćhurakaranqan ratëninta y imëkantapis qećhuskir wañushqatanö dëjaskir ëqiyäñaq”.
31“Tsë nänipash uk cüra ëwëkäñaq. Tsëña wañushqatanöña runa itarëkaqta rikëkarpis mana rikaq tukurshi päsakuñaq. 32Tsëpikñash Leví trïbu runapis itarëkanqan kaqman ćhäñaq. Pëpis mana rikaq tukurshi tikrakuskir päsakuñaq.
33“Pëkunapa qepantañash Samaria runapis nänipa ëwëkar tsëman ćhäñaq. Pëqa yawarllata itarëkaqta tariskirshi alläpa llakipaskiñaq. 34Tsëshi witiykurnin aceitiwan y vïnuwan ampipëkur herïdankunata chumaq wataskiñaq. Ñirkurñash ashnunman lloqarkatsir patsäkunqan wasiman apëkur tsëćhö uchuk ukläyanqanyaq täparäñaq. 35Warantin ëwakurñash wasiyoqta ishkë unaq arupakur gänanqantanö qellëta pagrar ñiñaq: ‘Teytë, kë qeshyaq runata ampir rikëkäpamanki. Masta gastakuptikeqa kutimurmi pagrallashqëki’ ñir”.
36Tsënö willapëta ushaskirñam Jesús tapöqan: “Tsë kimsan runakunapik mä ¿mëqan kaqtan runa masinta kuyapäqan?”
37Ñiptinñam ley yaćhatsikoq runa ñëqan: “Tsë kuyapaq kaqćhari”.
Jesúsñam ñëqan: “Kanan qampis tsë runanölla runa masikita kuyapanki”.
Martapa y Maríapa wasinman Jesús ćhanqan
38Tsëpik discïpulunkunawan Jesús ëwarmi uk takshalla markaman ćhäqan. Tsëćhömi Marta shutiyoq warmi wasinman patsätsëqan. 39Martapa ñañan Maríañam Jesús yaćhatsinqanta wiyar ñöpanman uchukïköqan. 40Martaqam wasinćhö imëka rurëninkunata afanakïkarpis Jesúsman witiykur ñëqan: “Teyta, ¿imanartan ñañä tsëćhö uchuräkun imëka rurëkunawan apallä këkaptë? Ñiykï yanapamänanpaq” ñir.
41Teyta Jesúsñam ñëqan: “Ö Marta, Marta. Qamqa imëka rurënikikunallapaqmi yarpaćhakunki. 42Tsënö afanakur këkaptikipis ukllëllam mas alleqa. Tsëtam ñañëki Maríaqa akrashqa. Pë yaćhakunqantaqa manam pïpis qećhunqatsu”.
Obecnie wybrane:
Lucas 10: qcgPB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022, Wycliffe Bible Translators, Inc. All rights reserved.