Lucas 9
9
Ćhunka ishkë (12) discïpulunkunata Jesús kaćhanqan
Mateo 10.5-15; Marcos 6.7-13
1Tsëpikñam ćhunka ishkë discïpulunkunata qayëkur poderninta Jesús qöqan runakunapik shapshikunata qarquyänanpaq y imëkaläya qeshyëwan qeshyakoqkunata kutikätsiyänanpaq. 2Ñirkurñam pëkunata kaćhäqan Teyta Diospa mandakïnin ćhämunqanta willakuyänanpaq y qeshyakoqkunata kutikätsiyänanpaq. 3Tsëmi ñëqan: “Ëwar ama apayankitsu tukruta, alporjata, millkapata ni qellëta. Anëkikunaćhö ratënikikunallawan ëwakuyanki. 4Pïpis wasinman patsäkurpis tsëllaćhö kakuyanki tsë markapik ëwakuyanqëkiyaq. 5Më markaćhöpis mana ćhaskiyäshuptikeqa ćhakikikunaćhö polvuta tapsikuskir ëwakuyanki. Tsënöqa rurayanki Teyta Dios pëkunata castigananpaq kaqta musyayänanpaq” ñir.
6Tsënö kaćhaptin discïpulunkuna markan markanmi purir Teyta Diospa alli willakïninta willakuyäqan. Qeshyaqkunatapis mëtsëćhömi kutikätsiyäqan.
Jesústa Herodes reqsiyta munanqan
Mateo 14.1-12; Marcos 6.14-29
7Jesús ruranqankunata musyaskirmi Galilea provinciapa mandaqnin Herodes alläpa yarpaćhaköqan. Wakin runakunam Jesúspaq ñiyäqan: “Bautizakoq Juanmi kawarimushqa”. 8Wakinkunam ñiyäqan: “Profëta Elíasmi yurimushqa”. Wakinkunañam ñiyäqan: “Unë profëtakunaćh mëqan karpis kawarimushqa” ñir. 9Herodesñam yarpaćhakur ñëqan: “Juanpataqa kikëmi umantapis roqutsirqa ¿pïraq kanman tsë runa?” ñir. Tsënö yarpaćhakurmi Jesústa imanöparaq reqsiyta munäqan.
5,000 runakuna mikuyänanpaq milagruta ruranqan
Mateo 14.13-21; Marcos 6.30-44; Juan 6.1-14
10Willakuyanqanpik apostolkuna kutirñam llapan rurayanqankunata Jesústa willayäqan. Tsëpikñam pëkunata pusharkur Betsaida markapa tsunyaq kinranman Jesús ëwäqan. 11Tsëpa ëwayanqanta musyëkur atskaq runakuna qepanta ëwayäqan. Pëkunata ćhaskirmi Teyta Diospa mandakïnin imanö kanqanta Jesús yaćhatsëqanmi. Tsënöllam qeshyaqkunatapis kutikätsëqan.
12Patsa tardiyaptinñam ćhunka ishkë (12) discïpulunkuna Jesústa ñiyäqan: “Teytë, kë tsunyaqćhöqa manam ni imapis kantsu kë runakunata qaranantsikpaq. Pëkunata ñiykï ëwakur imallatapis rantir mikuyänanpaq y posädata ashiyänanpaq” ñir.
13Jesúsñam ñëqan: “Qamkuna mikuyänanpaq qarayë”.
Tsënö ñiptinmi ñiyäqan: “Këćhö pitsqa tantawan ishkë pescädullaña kapayäman. Këtsika runakunapaqqa ¡rantimurraqćhi ëpätsishunman!” ñir.
14Tsëćhömi pitsqa milnö (5,000) runakuna kayäqan. Discïpulunkunatañam Jesús ñëqan: “Runakunata pitsqa ćhunka kaman (50) uchötsiyë”.
15Ñinqannömi llapanta uchötsiyäqan yupar yupar. 16Jesúsñam tsë pitsqa tantata y ishkë pescäduta tsarirkur ciëluman rikaćhakïkur Teyta Diosta agradëciköqan. Ñirkurñam tsë tantata y pescäduta pakiskir discïpulunkunata makyäqan runakunata ëpätsiyänanpaq. 17Paćhankuna untanqanyaq mikuyäqan. Manaña munar sobrankunatañam ćhunka ishkë (12) canastakunaman qoriyäqan.
Teyta Dios kaćhamunqan Cristo kanqanta Pedro ñinqan
Mateo 16.13-19; Marcos 8.27-29
18Uk unaqñam discïpulunkunapik witiskir Teyta Diosman Jesús kikillan mañaköqan. Mañakïta ushaskirñam pëkunata tapöqan: “¿Pï kanqätan runakuna ñoqapaq yarpäyan?”
19Discïpulunkunañam ñiyäqan: “Wakinmi ñiyan Bautizakoq Juan kanqëkita. Wakinkunam ñiyan unë profëta Elías kanqëkita. Y wakinkunañam ñiyan uk profëta wañunqanpik kawarimushqa kanqëkita” ñir.
20Tsënö ñiyaptinñam Jesús tapöqan: “Qamkunaqa ¿pï kanqätan yarpäyanki?” ñir.
Pedruñam ñëqan: “Qamqa Teyta Dios kaćhamunqan Cristum kanki”.
Wañutsiyänanpaq kaqta Jesús willakunqan
Mateo 16.20-28; Marcos 8.30—9.1
21Tsënö Pedro ñiptinñam discïpulunkunata Jesús ñëqan pïtapis mana willayänanpaq. 22Ñirkurmi ñëqan: “Runapa Tsurintam#9.22, 26, 44, 56, 58 Runapa Tsurinpaq parlarqa kikinpaqmi Jesucristo parläqan. alläpa ñakatsir maltratayanqa. Autoridäkuna, cürakunapa mandaqninkuna y ley yaćhatsikoqkuna contran yarqurmi wañutsiyanqa. Tsëpik kimsa unaqtaqa kawarimunqam”.
23Ñiskirñam llapan runakunatapis kënö ñëqan: “Pïpis discïpulö këta munarqa kikinpa munënillanta rurar ama kawatsuntsu. Ñakanan wañunan kaptinpis cada unaqpis ñoqaman confiakamur qatimätsun.#Mateo 10.38; Marcos 8.34; Lucas 10.38; 14.27; Juan 12.24. 24Kawëninta salvëta munaqkunaqa kawëninta oqrayanqam. Kawëninta ñoqa rëku oqraqkunaqam kawëninta salvayanqa.#9.24 Kawëninta salvëta munaqkunaqa kikin munanqannölla kawaqkunam kayan. Jesucristo rëku kawëninta oqraqkunaqa Jesucristo munanqannö kawaqkunam kayan.#Mateo 10.39; Marcos 8.35; Juan 12.25.
25“Infiernuman itëkushqa kananpaq këkaptinqa ¿imapaqraq välin entëru mundupa duëñun kanqanpis? 26Pïpis ñoqapik y willakïnëpik pinqakuptinqa Runapa Tsurinpis pëpik pinqakunqa, Teyta Diospa, santu angelninkunapa y kikinpa chipipikyarraq shamurmi. 27Chumaq wiyayë. Manaraq wañurmi wakiki Teyta Diospa mandakïninta rikäyanki”.
Jesús chipipikyarraq tikranqan
Mateo 17.1-8; Marcos 9.2-8
28Tsëpik semänatanöñam Pedruta, Juanta y Santiaguta pusharkur uk irkaman Jesús witsäqan Teyta Diosman mañakoq. 29Teyta Diosman Jesús mañakïkaptinmi qaqllan ukläya chumaq tikraskëqan. Tsënöllam ratëninpis alläpa yullaq püruman tikraskëqan. 30Tsëćhömi unë profëtakuna Moiséswan Elías yuripuskir Jesúswan parlëkäyäqan. 31Tsë alläpa chipipikyaqćhömi parlayäqan Jerusalénćhö Jesús wañunanpaq kaqta.
32Pedruñam ishkë discïpulu masinkunawan puñï jikutaptin rikćhakïkäyäqan. Tsëmi rikäyäqan Jesús chipipikyarraq ishkaq runakunawan parlëkäyaqta. 33Tsë ishkaq runakuna ëwakuyänanpaqña këkaptinmi mana imanö këtapis puëdir Jesústa Pedro ñëqan: “Teytë, ima allipaqmi këman shayämöqä. Kananqa kimsa tsukllakunata rurayämushaq: ukta qampaq, ukta Moiséspaq y uktaña Elíaspaq” ñir.
34Tsënö parlapëkaptinmi pukutë tsapaskëqan. Pukutë rurinćhömi discïpulukuna alläpa mantsakäyäqan. 35Pukutë rurinpikñam Teyta Dios ñimöqan: “Pëmi akranqä kuyë tsurë. Pë ñiyäshunqëkikunata cäsukuyë” ñir.
36Tsënö parlar ushaskiptinñam discïpulunkuna Jesúsllataña rikaskiyäñaq. Irkaćhö rikäyanqankunata manam pïtapis willakuyäqanraqtsu.
Shapshi qeshyatsinqan wamrata Jesús kutikätsinqan
Mateo 17.14-21; Marcos 9.14-29
37Warënin irkapik urëkëkäyämuptinñam atskaq runakuna Jesústa tsaripäyäqan. 38Tsë atskaq runakunapik uk runa rugar ñimöqan: “¡Teyta, kë ukllëlla tsurilläta kuyapar rikëkapamë! 39Shapshim tsurëta illaq illaq qayarätsin, alläpa siksikyätsin, pusoqëtapis aqtutsin. Mana dëjëpam maltratar ñakatsin. 40Shapshita qarqïkuyänanpaq discïpulïkikunatapis rugakuptëpis qarqïtam puëdiyashqatsu”.
41Tsënö ñiptinñam Jesús ñëqan: “¡Confiakïninnaq utsasapa runakuna! ¿Imëyaqraq qamkunawan paqta këkäshaq? ¿Imëyaqraq awantayashqëki?”
Tsënö ñiskirmi wamrapa papäninta ñëqan: “Wamrëkita apamï” ñir.
42Jesúspa ñöpanman ćhëkatsiptinmi wamrata patsaman shapshi ishkiskatsir alläpa siksikyätsëqan. Shapshita ollqutuparñam Jesús ñëqan: “Kë wamrapik yarqï” ñirnin. Tsë höram wamra sänuña tikraskiptin Jesús papäninta entregäqan. 43Tsënö Teyta Diospa poderninwan shapshita qarqunqanta rikarmi runakuna mantsakaskir kushikuyäqan.
Wañutsiyänanpaq kaqta Jesús yapë willakunqan
Mateo 17.22-23; Marcos 9.30-32
Ruranqankunapik runakuna kushishqa këkäyaptinmi discïpulunkunata Jesús ñëqan: 44“Kanan willayanqaqta mana qonqar wiyayämë. Runapa Tsurintam ćhikeqninkunapa makinmanmi entregayanqa”.
45Jesús tsënö parlapaptinpis discïpulunkunaqa imata ñiykanqantapis manam entiendiyäqantsu. Tsënö mana entiendirninpis imapik tapukïtaqam mantsayäqan.
Mëqanpis mas mandaq kananpaq discïpulukuna tapuyanqan
Mateo 18.1-5; Marcos 9.33-37
46Tsëpikñam Jesúspa discïpulunkuna kikinkuna pura piñanakuyäqan mëqan llapanpik mas mandaq këta munar. 47Tsënö yarpëkäyanqanta musyaskir Jesús uk wamrata ñöpanman shäkatsëqan. 48Ñirkurñam ñëqan: “Pïpis kë wamratanö shutëćhö ćhaskeq kaqqa ñoqatam ćhaskiman. Ñäña ñoqata ćhaskimarnëqa kaćhamaqnëtam ćhaskin. Qamkunaćhöpis mas humildi kaqqa mandakoqmi kanqa”.
Shapshita qarquptin mana mićhäyänanpaq Jesús ñinqan
Marcos 9.38-40
49Juanñam ñëqan: “Teytë, ñoqakuna rikäyäqö uk runa shutikićhö shapshikunata qarqoqtam. Ñoqantsikwan paqta mana puriptinmi mićhäyäqö”.
50Tsënö ñiptinñam Jesús ñëqan: “Alli ruranqanta ama mićhäyankitsu. Pïpis contrantsik mana karqa favornintsikmi këkan”.
Santiagutawan Juanta Jesús piñapanqan
51Ciëluman kutinanpaq rikoqña tiempu ćhëkämuptinmi mana mantsakurtsu Jerusalénman Jesús ëwäqan. 52Ëwëkarñam kaćhäqan Samariaćhö uk markaman tsëćhö patsäkuyänanpaq wasita asheq. 53Jerusalénman ëwëkanqanta musyarmi tsë markaćhö runakuna ćhaskiyäqantsu. 54Tsëmi discïpulunkuna Santiaguwan Juan ñiyäqan: “Teytë, ciëlupik shamoq ninawan kë runakunata ushakätsinanpaq ¿Teyta Diosman rugakuyämanku [profëta Elías rugakunqannö]?” ñir.
55Jesúsñam piñapar [ñëqan: “Tsënö yarparqa manam Teyta Dios munanqannötsu yarpäyanki. 56Runapa Tsurinqa manam runakunata ushakätsinanpaqtsu shamushqa, sinöqa runakunata salvananpaqmi”.]
Tsënö ñiskirmi uklä markapaña ëwakuyäqan.
Qatirëta munaqkunata Jesús entienditsinqan
Mateo 8.19-22
57Nänipa ëwëkäyaptinmi Jesústa uk runa ñëqan: “Teytë, mëpa ëwaptikipis qatirashqëkim” ñir.
58Jesúsñam ñëqan: “Atoqkunapa maćhëninkuna kanmi. Pichukunapapis qeshwankuna kanmi. Runapa Tsurinpaqam mëćhö puñunallanpaqpis kantsu”.
59Tsëpikñam uk runata ñëqan: “Aku ëwakushun”.
Ñiptinñam ñëqan: “Teytë, qamta qatiränäpaq papänëtaraq pampaskamushaq” ñir.
60Jesúsñam ñëqan: “Wañushqakunataqa wañushqa masinkuna pampakuyätsun. Qamqa ëwar Teyta Diospa mandakïninta willakï”.
61Tsëpikñam uk runapis ñëqan: “Teytë, ñoqapis qatirashqëkim. Wasëćhö castäkunataraq willëkamushaq ëwakushunpaq” ñir.
62Jesúsñam ñëqan: “Pïpis qepapa tikrakushqaqa yapyantsu. Tsënö castanpaq y imëkankunapaqpis yarparëkarqa ñoqapa discïpulö këtaqa manam puëdinqatsu”.
Obecnie wybrane:
Lucas 9: qcgPB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022, Wycliffe Bible Translators, Inc. All rights reserved.