Génesis 8
8
1Te Dios la sna' te Noé soc spisil chambahlametic, spisil bintic cuxajtic te sjoquinejic ta barco. Dios la yac' taluc ic' ta bahlumilal, hich ts'uj cohel te ha'e. 2Mahquic te banti t'ohm loq'uel tal ha'etic ta xahab soc mahc te tulan ha'al ta ch'ulchan; quehchaj te ha'al te co tal ta ch'ulchan. 3C'unc'un ts'uj cohel te ha' ta bahlumilal, c'axix lajuneb swaxacwinic (150) c'ahc'al a te ts'uj te ha'e. 4Ta shuquebal u ta shuclajunebal (17) c'ahc'al cajal hilel te barco ta ba wits Ararat. 5Xquechcon ts'uj cohel te ha' c'alal ta slajunebal u. Ta shahchibal c'ahc'al yu'un te slajunebal u chicnaj te ba witsiltique.
6Cha'winic (40) c'ahc'al ta patil, te Noé la sjambe sventanahul te barco spasoj, 7la scoltay loq'uel joj te wihl bahel, bayuc nax baht ha to c'alal tup' te ha' ay ta bahlumilal. 8Soc la yac' bahel jcoht stsuhmut, yu'un yo'tanuc ya yil teme ts'uj cohel te ha' ta sba te bahlumilale. 9Te stsuhmut ma ba la sta banti ya xluhtsaj, hich suht tal ta barco, yu'un ay to ha' ta sba te bahlumilale. Te Noé la yac' loq'uel sc'ab, la stsac ochel ta barco.
10La smahliy huqueb xan c'ahc'al, la scha'loq'ues xan bahel ta barco te stsumute. 11Mahlelix c'ahc'al a suht tal te stsuhmut, slut'oj tal ya'binal olivo. Hich la sna' te Noé te ts'ujemix te ha' ta lumq'uinal. 12La smahliy huqueb xan c'ahc'al, la sloq'ues bahel yan buelta te stsumute; tey ma ba suhtix talel a.
13Te c'alal ayix jun sbuluchwinic scha'bahc' (601) ya'bilal a te Noé, ta shahchibal c'ahc'al yu'un te shahchibal u, tup' te ha' ta bahlumilal. Hich te Noé la sloq'uesbe smahquil te barco, la yil te taquijix te lumq'uinal. 14Ta huqueb scha'winic (27) c'ahc'al yu'un te schebal u taquij ta lec te lumq'uinal. 15Ha yu'un te Dios hich la yalbe te Noé: 16Loc'an ta barco, ha'at soc awihnam, anich'nab, soc yihnam anich'nab. 17Soc ya me aloq'ues spisil te chambahlametic te sjoquinejat, spisil ta chahp mutetic, chambahlametic, soc te bintic staslajan ya xbehenic ta lumq'uinal; behenanic ta q'uinal, sitinan soc p'ohla abahic ta bahlumilal, xchi.
18Hich loc' ta barco te Noé, te snich'nab, te yihnam, soc yihnam te snich'nabe. 19Spisil te chambahlametic, mutetic, soc bintic staslajan ya xbehenic, spisil ta chahp te bintic ya xbehenic ta lumq'uinal loq'uic ta barco.
20Te Noé la spasbe scajtajib ta chiq'uel mahtanil te Jehová, la stsa te chambahlametic soc mutetic te lec sc'oblalic, la yac' scohtol chic'bil mahtanil ta scajtajib. 21Te Jehová c'alal la ya'iy te sumet yic', la yal ta yo'tan: Ma xcaq'uix xan bohlobuc sc'oblal te lumq'uinal ta scaj te ants-winiquetic, como ta scolel sch'ihyelic to ya snopticlan ta yo'tanic te bintic chopol. Ma ba ya jlajinix spisil bintic cuxajtic hich te bin ut'il la jpasixe.
22Te jayeb c'ahc'al ay te bahlumilal,
ma xch'ay te yorahil sts'umbajel soc c'ajoj,
te yorahil sic soc sq'uixinal q'uinal,
te yorahil snahtil c'ahc'al soc scomil c'ahc'al,
te c'ahc'alel soc ahc'abal, xchi.
Obecnie wybrane:
Génesis 8: TZH
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Biblia Tzeltal Bachajon © Sociedad Bíblica de México, A.C., 2006.