Matayo 2
2
Kuja kwa wandu walachu kufuma mashariki
1Nao Jesu aghenda avalo Bethlehemu ya Judea ngelo za mzuri Herode, wandu walachu kufuma mashariki wekeja Jerusalemu, 2wakakotela, “Uwo hiyo mwana avelo ewo mzuri wa Wayahudi? Kwani tanaonile ndonde yake mashariki nesi teja kumtasa.” 3Nao mzuri Herode aghenda asikila hung'u kasirima ngoloni ngila mojori na wandu wose wa Jerusalemu. 4Nao kawakoghanya Wakohani wabwaa wose na Walimu wa Sheria kawakotela, “Ni hiyo Masihi ejevalilo?” 5Nawo wakamtumbulila, “Kele Bethlehemu ya Judea; kwani niko iwandiko ni tondolo:
6‘Uwe Bethlehemu wa isanga lya Juda,
Suwo mchache kungi kele wabwaa wa Juda,
kwani kwako ufumagha kilongozi
elongozagha wandu wangu wa Israeli.’”
7Nao Herode kawapang'a walye wandu walachu kwa kiviso, kawakotela kirani ngelo ilya ndonde ioneke. 8Nao kawatuma Bethlehemu kewauza, “Ghendeni mumuhade mwana, na ilyi mwamona, muniletele uvoro, eri namose nighende nimtase.” 9Nawo waghenda wasikila gha mzuri, wakaghenda ngila yawe. Nao lola ilya ndonde waionile mashariki ikawakayaila hata ikaghenda ikamanga alye andu mwana eluo. 10Nawo waghenda waiona, wakaboelo na ndighi. 11Nao wakangila nyumba wakamwona mwana na Mariamu mee, wakadyaya ngokoro, wakamtasa. Nao wakafungula mali zawe, wakamhawa manosi: zahabu, marumba na manemane.
12Nao wakaonyo kwa kuloteso siwauyile kwa Herode, wakagala mzawe kwa ngila nzima.
Kukimbilila Misri
13Nao wandu walachu waghenda wagala, malaika wa Bwana kamufumila Josefu kwa kuloteso, kemuza, “Uka umwate mwana na mee ukimbile Misri na ukale alye hata nikughorere, kwani Herode ondemuhada mwana amulaghe.” 14Nao Josefu kauka kamwata mwana na mee wakauka chilya kiro chenyi, kaghenda Misri. 15Naye kakala alye hata Herode kafwa. Eri lyikatile ilagho lyighoriro ni Bwana kwa tondolo, “Nanamwitile Mwana wangu kufuma Misri.”
Kuulagho kwa wanake
16Nao Herode aghenda aona kamba wakalilo ni walye wandu walachu, kawasilo, katumana wanake wose wa kialume weluo Bethlehemu na mbalimbali yake waulagho, kufuma awa weluo na miaka mili na naisi kuirimana na ngelo eipatile kufuma kwa walye wandu walachu. 17Nao lyikakatila ilagho lyighoriro ni tondolo Jeremia:
18“Lwaka losikilike Rama,
lukalila na kushighira na ndighi,
Raheli kelilila wana wake;
kelegha kusaruso,
kwa kukala wafwa.”
Kuuya kwa Jesu kufuma Misri
19Nao Herode aghenda afwa, Malaika wa Bwana kamfumila Josefu kwa kuloteso alye Misri, 20kemuza, “Uka umwate mwana na mee ughende kele isanga lya Israeli, kwani walye weluo wekemhada mwana wamuulaghe wanafwile.” 21Nao Josefu kauka kamwata mwana na mee kauya isanga lya Israeli.
22Ela Josefu aghenda kusikila kamba Arkelao oluo ketawala Judea kibalo cha tatie Herode, kaogha kughenda alye. Naye kwa kuonyo kele kuloteso kaghenda Galilaya, 23kaghenda kukala kele muzi ghuitogho Nazareti eri ghakatile ghalye ghaghoriro ni wana tondolo, “Ujeito Mnazare.”
Obecnie wybrane:
Matayo 2: SAGALLANT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
(C) The Bible Society of Kenya, 1993