Najə̄ kə́ Majə yā Jeju ń Luk ndang ní 15
15
Kūjə́ najə̄ yā batə̄ kə́ ta tḭ̄ḭ̄
(Á̰a̰ī Mat 18.12-14)
1Ngé taā lambóo gə̄ kə ngé rāā majaĺ gə̄ reēn̄ rɔ̄ Jeju tə́ malang yā koō najə̄ kɔrə̄n. 2Anī *Parijiyḛ gə̄, kə ngé ndóō de gə̄ *ndū najə̄ gə̄ a yṵ́rə̄n̄ najə̄ dɔ Jeju tə́ ədan̄ na:
Deē ngeé ń toō ní a əhɔ ngé rāā majaĺ gə̄ kə̄ rɔ̄n tə́ ō, a əsa yá̰a̰ sedə́ ō wa!
3Anī Jeju ədadə́ kūjə́ najə̄ ń toō na:
4I náā dansí tə́ laā n ré kɔ́ɔ̄ aw̄ kə batə̄ gə̄ ɓú, ba tḭ̄ḭ̄ ta kógə̄ḿ anī, a əya̰ madə̄ kə́ kutə ndōhó gidə i ndōhó gə̄ dan bembeé yā kaw̄ń sāāń nja nge ń tan tḭ̄ḭ̄ ní bátə́ kadə̄ ré əngen tá tél aĺ ní.
5Dan ń ni-aw̄ ba əngen ní anī, a unən kə rɔ̄nelēé yā kəgan dɔ bɔ̄gə̄n tə́. 6Ba dan ń tél reē ugə̄ ɓēé looneé anī, a ɔsə dɔ madə̄n gə̄ ō, madə̄ ɓēn gə̄ ō naā tə́, yā kədadə́ na kə rāān̄ rɔ̄nel̄ seneé, tɔdɔ̄ na n-ənge batə̄ yān ń tan tḭ̄ḭ̄ ní kɔ̄ɔ́. 7Ādə̄ m-ə́dásí na rɔ̄nel̄ a to dɔ rā̰ tə́ ngá̰ý tītə̄ ń noō ō tām̄ yā nge rāā majaĺ kə́ kógə̄ḿ beē kə́ tūr̄ hálən tə́ tɔȳ yā de kə́ súmūú kə́ kutə ndōhó gidə i ndōhó gə̄ kə́ ɓō tūr̄ háĺdə́ rāādə́ aĺ tə́.
Kūjə́ najə̄ yā njáŕ sə́lē arjā̰a̰ kə́ ta tḭ̄ḭ̄
8Aláa i dəyá̰ kə́ rá n, ré aw̄ kə sə́lē gində̄ arjā̰a̰ kutə ba tḭ̄ḭ̄ ta kə́ kógə̄ḿ anī, a əndā hor tū lámba tə́ ō, a ɔy kem kújə ō, yā sāāń mer mer bátə́ kadə̄ ənge tá aĺ ní?
9Ba dan ń ənge anī, a ɔsə dɔ madə̄n gə̄ ō, madə̄ ɓēn kə́ dəyá̰ gə̄ ō naā tə́, ba a ədadə́ na: Ī-rāāī rɔ̄nel̄ seḿ tɔdɔ̄ m-ə́ngé njáŕ sə́lē arjā̰a̰ yāḿ kə́ kógə̄ḿ ń m̄-tḭ̄ ta ní kɔ̄ɔ́. 10Ādə̄ m-ə́dásí, *de kə́ dɔ rā̰ tə́ gə̄ yā Nə́ɓā a rāān̄ rɔ̄nel̄ kə́ ngá̰ý tītə̄ ń noō ō, tām̄ yā nge rāā majaĺ kə́ kal kógə̄ḿ beē kə́ tūr̄ hálən tə́.
Kūjə́ najə̄ yā ngōn̄ kə́ tan tḭ̄ḭ̄
11Jeju ədadə́ ɓáý to̰ na:
Deē kógə̄ḿ aw̄ kə ngáń kə́ dəngam gə̄ jōó. 12Nge kə́ dūú əda bɔbə̄n na: Bɔbə́ḿ, ādə̄m̄ núsə́ yá̰a̰ kənge ń sɔɔ̄ dɔḿ mā ní. Anī bɔbə̄də́ kēgə̄də́ yá̰a̰ yān gə̄ ní naā tə́. 13Ba gō tə́ ndɔ̄ ngá̰ý aĺ ɓá anī, nge kə́ dūú ní kán̄ yá̰a̰ yān malang, ba aw̄ gō nang kógə̄ḿ kə́ sa̰y ngá̰ý tə́, aw̄ nujəń kɔ̄ɔ́ loo rāā kaya tə́. 14Dan ń ni-nujəń malang kɔ̄ɔ́ anī ɓō əsō gō nang ngeé ń noō tə́, adə̄ ndoō əla gír rāān. 15Ni-aw̄ nam̄ kə dəngam kógə̄ḿ kə́ gō nang ní tə́, adə̄ dəngam ní əlan bembeé ngɔ̄m̄ kosong yān gə̄ tə́. 16Əndā kumən kəsa yá̰á̰ ń kosong gə̄ a əsan̄ ní tə́ gə̄gē, banī deē adə̄n alé. 17Loo ń noō tə́ tél a gír̄ najə̄, əda na: Ngé gə̄ ń bɔbə́ḿ ɔydə́ kəlaá ní i kóndóńg, kə́ yá̰a̰ kəsa yādə́ əla loo kə̄ nang tə́ ō, mā m̄-to adə̄ ɓō a tɔ̄lə̄m̄ kɔ̄ɔ́ ō ní? 18m̄-gḛy tél kaw̄ gogə́ rɔ̄ bɔbə́ḿ tə́ kədan na: Bɔbə́ḿ, m̄-rāā yá̰á̰ kə́ majaĺ kə Nə́ɓāá ō, seí ḭ̄ḭ́ ō. 19Mā m̄-ndetə kadə̄ ā ī-ɓārə́m̄ ngōn̄ kemií to̰ alé, ba ī-rāām̄ deē kógə̄ḿ kə́ dan ngé kəla yāí gə̄ tə́ tə́ ní. 20Anī ni-ḭḭ dɔɔ́, aw̄ ta kaw̄ gogə́ rɔ̄ bɔbə̄n tə́.
Dan ń ni i sa̰y ɓáý á bɔbə̄n a̰a̰ dɔn, anī kumən o̰o̰n seneé. Bɔbə̄n a̰ȳ ngɔ̄də̄ ɔjə non, əhɔn kə̄ rɔ̄n tə́ ɓirə̄n dagə. 21Loo ń noō tə́ ngōn̄ ní əda bɔbə̄n na: Bɔbə́ḿ, m̄-rāā yá̰á̰ kə́ majaĺ kə Nə́ɓāá ō, seí ḭ̄ḭ́ ō. Adə̄ m̄-ndetə kadə̄ ā ī-ɓārə́m̄ ngōn̄ kemií to̰ alé. 22Banī bɔbə̄n əda ngé kəla yān gə̄ na: Ī-reēī kə kūbə̄ kə́ majə mān̄ madə̄ gēé láẃ, ə́laī rɔ̄n tə́ ō, ə́laī kulūm̄ ta ngōn̄ jīn tə́ ō, ī-tə́laī sākə̄rā njan tə́ ō. 23Ī-reēī kə duĺ man̄g kə́ bo majə, ī-tɔ̄lī ādə̄ j-əsaī, ba jə-rāāī rɔ̄nel̄ ō, 24tɔdɔ̄ ngōnə̄ḿ ń toō oy i mbée, ba ngɔlaā ni-tél ajə gogə́, tan tḭ̄ḭ̄ i mbée ba j-əngeniī kɔ̄ɔ́ tā. Loo ń noō tə́ nin̄-əlan̄ gír rāā rɔ̄nel̄.
25Ba ngōn̄ hágən i ndɔrɔ́, adə̄ dan ń tél a reē kə̄ ɓēé ba ugə̄ gidə ɓēé ngɔr anī, oō ká̰ yá̰a̰ gə̄ kə́ a əndan̄ ō, oō kōō de gə̄ kə́ a ndāmə̄n̄ naā ō. 26Ni ɓāŕ nge kəla kógə̄ḿ ba dəjen kum, anī nge kəla ní ədan na: 27I ngōkó̰ó̰í kə́ dūú ní n tél reē á bɔbí tɔ̄l̄ duĺ man̄g kə́ bo majə ní, tɔdɔ̄ ni-tél əngen i kə rɔ̄ ngangāá. 28Loo ń noō tə́ ni-əsō wōn̄g kɔ̄ɔ́ ba mbātə́ kudə ndogó. 29Bɔbə̄n teē aw̄ rāān ɓɔ́, banī ni-tél əda bɔbə̄n na: Á̰a̰ā̰, i ɓāl̄ kóndóńg n mā m̄-rāań kəla seí ō, m̄-rāań yá̰a̰ malang ń ɔ́jəm̄ ní kanjə̄ kadə̄ m̄-mbātə́ taí tə́ ō ní, ba ngōn̄ bə̄yā̰ kógə̄ḿ gə̄gē ādə̄m̄ kadə̄ m̄-tɔ̄l̄ m̄-rāań rɔ̄nel̄ kə madə́ḿ gēé alé. 30Ba ngōnīí ń toō ń aw̄ nujə yá̰a̰ yāí malang kɔ̄ɔ́ kə ájə́ba gēé ní, tá ré tél reē, ādə̄ tɔ̄lə̄n̄ duĺ man̄g kə́ bo tām̄ yān tə́? 31Anī bɔbə̄n ədan na: Ngōnə̄ḿ, ḭ̄ ī-ndi i seḿ ngándáńg, adə̄ yá̰a̰ yāḿ malang i yá̰a̰ yāí. 32Ba majə ngá̰ý kadə̄ jə-rāāī yá̰á̰ kə́ to rɔ̄nel̄ gə̄, jə-rāāīneé rɔ̄nel̄, tɔdɔ̄ ngōkó̰ó̰í ń toō ní oy i mbée, ba tél ajə gogə́, ni-tan tḭ̄ḭ̄, ba ngɔlaā j-əngeniī kɔ̄ɔ́ tā.
Obecnie wybrane:
Najə̄ kə́ Majə yā Jeju ń Luk ndang ní 15: BS
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2006, 2010 Alliance Biblique du Tchad