Najə̄ kə́ Majə yā Jeju ń Luk ndang ní 19
19
Jeju ō Jase ō
1Dan ń Jeju udə kem ɓē kə́ Jeriko tə́ ní anī, a ənda kem yā gān̄g. 2Anī dəngam kógə̄ḿ kə́ rīn na i Jase i noó ō. Ni i ngol ngé taā lambóo gə̄ ō, i de kə́ ənge yá̰á̰ ngá̰ý ō. 3Ni a sāā i ka̰a̰ ké Jeju nəkɔ́ i náā bang wa, ba ni-ənge loon alé tām̄ kósə de gə̄ kə́ ngá̰ý gə̄ tə́, tɔdɔ̄ ni i de kə́ gīndə̄ ngá̰ý. 4Anī ni-a̰ȳ ngɔ̄də̄ kété aw̄ al̄ dɔ kāgə̄ kógə̄ḿ kə́ to tītə̄ kótə̄ tə́ beé, loo ń Jeju a mān̄ tū tə́ ní tə́, yā kadə̄ kə n-a̰a̰ń Jeju. 5Dan ń Jeju reē ugə̄ loo ngeé ń noō tə́ anī, ənī kumən kə̄ dɔɔ́ ba ɓār̄ yá̰a̰, əda na:
Jase, ī-risə nang tə́ láẃ, na ɓōólaā ní i gáŕ kadə̄ mā m̄-ndi i ta kújə́ tə́ looí.
6Ni risə láẃ ba aw̄ əhɔn mbā ɓē yān tə́ kə rɔ̄nelēé ngá̰ý. 7Dan ń a̰a̰n̄ tītə̄ ń noō ní a, kósə de gə̄ malang yṵ́rə̄n̄ najə̄ ədan̄ na: Á̰a̰ī wa! Ni-aw̄ əhɔ ɓē mbā ɓē de kə́ nge rāā majaĺ!
8Banī Jase ḭḭ ra no Jeju tə́, ba ədan na:
Kɔ́ɔ̄ɓē kə́ rɔ̄kum tə́ ní, m-ā m-ādə̄ núsə yá̰a̰ kənge yāḿ gə̄ ngé ndoō gə̄. Tá ré m̄-rāā yá̰á̰ kə́ gōtə́ aĺ kə deē kógə̄ḿ anī, m-ā m̄-tél yā kadə̄ kɔ́ɔ̄ yá̰a̰ yān gogə́ kadə̄ mān̄ dɔɔ́ nja sɔ́.
9Anī Jeju əda najə̄ yān na:
Ɓōólaā kajə reē ugə̄ kem kújə́ ń toō tə́, tɔdɔ̄ deē ń toō i ngōn̄ kaa Abəraham ō. 10Tɔdɔ̄ Ngōn̄ Deē reē i sāā ngé kə́ tadə́ tḭ̄ḭ̄ gə̄ tə́ ō, kajədə́ tə́ ō.
Kūjə́ najə̄ kə́ dɔ sə́lē lɔ́r gə̄ tə́
(Á̰a̰ī Mat 25.14-30)
11Dan ń de gə̄ a oōn̄ najə̄ ngeé ń toō ní anī, Jeju ədadə́ kūjə́ najə̄ kógə̄ḿ ɓáý to̰, tɔdɔ̄ ni a əndā dɔ ɓē kə́ *Jerusalem ngɔr, tá nin̄-gírə̄n̄ kadə̄ *Ɓē ko̰o̰ yā Nə́ɓā a teē hɔy i kə̄ ta jī tə́ noō ō. 12Ni ədadə́ tītə̄ ń toō beé na:
Deē kógə̄ḿ kə́ gír kaan i ngār aw̄ dɔ ɓē kógə̄ḿ kə́ sa̰y tə́ yā taā ndū ko̰o̰ ɓē tá yā tél reē ko̰o̰ ɓē ɓáý. 13Ni ɓāŕ ngé kəla yān gə̄ kutə, ba nə̄ɓōdə́ sə́lē lɔ́r gə̄ ɓú ɓú nja kutə kógə̄ḿ kə dɔdə́ gēé, ba ədadə́ kadə̄ kə rāān̄ kadə̄ teē madə̄ dɔ tə́ bátə́ kadə̄ ugə̄ń ndɔ̄ télən tə́. 14Ba madə̄n gə̄ kə́ gō nang yān tə́ imə̄nən̄ ngá̰ý, adə̄ ɔrə̄n̄ de gə̄ əlan̄də́ gōn tə́ kadə̄ aw̄ ədan̄ na: Jḭḭ jə-gḛy kadə̄ ni-o̰o̰ ɓē dɔjí tə́ alé.
15Ba dan ń ni-taā ndū ko̰o̰ ɓē ní oy adə̄ tél reē ɓēé anī, ɓāŕ ngé kəla gə̄ ń adə̄də́ sə́lē lɔ́r gə̄ ní, yā kadə̄ kə n-a̰a̰ nar ń nin̄ kógə̄ḿ kógə̄ḿ kə dɔdə́ gə̄ əngen̄ dɔ madə̄ tə́ ní. 16De kə́ ta kəga dɔ reē ba əda na: Kɔ́ɔ̄ɓē, sə́lē lɔ́r yāí gə̄ ní teē madə̄ i kutə kógə̄ḿ. 17Ni ədan na: Majə! Ḭ̄ i nge kəla kə́ majə, tá dan ń ḭ̄ ī-ra dɔ ndūí tə́ tām̄ yá̰á̰ kə́ ngá̰ý aĺ gə̄ tə́ ní, m-ādī kadə̄ ó̰o̰ ɓē gə̄ kutə. 18Nge kə́ nge ko̰ jōó reē yān ba əda na: Kɔ́ɔ̄ɓē, sə́lē lɔ́r yāí teē madə̄ i mí. 19Anī ədan ɓáý to̰ ō na: Ḭ̄ ā ó̰o̰ ɓē gə̄ mí. 20Nge kə́ rang reē yān ba əda na: Kɔ́ɔ̄ɓē, á̰á̰ sə́lē lɔ́r yāí ní n toō: m̄-ngɔ̄mə̄n majə kem kūbūú, 21tɔdɔ̄ mā m̄-ɓōlíī tām̄ ḭ̄ i de kə́ tōr̄ ngá̰ý. Ká i yá̰á̰ kə́ i ḭ̄ n ə̄nī aĺ gə̄gē a, ā un i mbée ō, i kōō kə́ ī-dubə̄ aĺ gə̄gē a, ā ə́ja i mbée ō. 22Ngār ní ədan na: Ḭ̄ i nge kəla kə́ majaĺ. M-ā m̄-gān̄g sarya dɔí tə́ i kə gō najə̄ gə̄ ń teēn̄ taí ḭ̄ kɔ́ tə́ ní. Adə̄ m-ā m-ún yá̰á̰ kə́ m-ə̄nā aĺ ō, m-ə́ja kōō kə́ m̄-dubə̄ aĺ ō, 23ba i tām̄ rí tə́ á ī-ɓɔ̄ɔ̄ nar yāḿ loo ń nar a ənge mānə̄n dɔ tə́ tū tə́ ní kadə̄ ta télə́ḿ tə́ anī m̄-taā kə manə̄neé dɔ tə́ aĺ ní? 24Anī ngār tél əda ngé gə̄ ń ndin̄ kum tə́ noō ní na: Ī-táāī sə́lē lɔ́r yān gə̄ kɔ̄ɔ́, ba ādī madə̄n ń yān i kutə ní. 25Ba nin̄-tél ədanən̄ na: Kɔ́ɔ̄ɓē, ba ń ni aw̄ń i kutə kɔ̄ɔ́ ɓá ní. 26Ni ədadə́ na: Ādə̄ m-ə́dásí, deē ń i kə yá̰á̰ ní, a adə̄nən̄ madə̄ dɔ tə́, ba deē ń i kə yá̰á̰ aĺ ní, a taān̄ ni kə́ ngá̰ý aĺ nəkɔ́ ń noō jīn tə́ kɔ̄ɔ́. 27Ba madə̄ ba̰ā̰ḿ gə̄ ń gḛyn̄ kadə̄ m-ó̰o̰ ɓē dɔdə́ tə́ aĺ ní, ī-reēī sedə́ laā, ba ə́jaī míndə́də́ ta kumḿ tə́.
Jeju udə kem ɓē kə́ Jerusalem tə́
(Á̰a̰ī Mat 21.1-11; Mark 11.1-11; Ja̰a̰ 12.12-19)
28Dan ń Jeju ɔr̄ najə̄ tītə̄ ń noō oy anī, nəkɔ́ əsō nodə́ tə́ kété ta kaw̄ kə̄ *Jerusalem. 29Ba dan ń aw̄n̄ ngɔr kə̄ gidə ɓē kə́ Betpaje tə́ ō, kə́ Betani tə́ ō, kadə mbal̄ ń a ɓārə́n̄ na i mbal̄ *kāgə̄ olibə gə̄ tə́ ní ō anī, ɔr̄ ngé ndóō yá̰a̰ yān gə̄ jōó, əladə́ ba ədadə́ na:
30Āwī kem ɓē ń ra nosí tə́ noō. Dan ń ā údiī kə̄ kemeé anī, ā ə́ngeī ngōn̄ kərō kə́ deē kógə̄ḿ gə̄gē a al̄ gidən tə́ aĺ ɓáý kə́ do̰ō̰nən̄ ta bēl̄ tə́. Ī-tútəniī ba ī-reēī seneé. 31Ba ré a dəjen̄sí na ké i tām̄ rí tə́ á ī-tútin̄ wa anī, ə́daī na i Kɔ́ɔ̄ɓē n a sāā.
32Ngé gə̄ ń Jeju əladə́ ní aw̄n̄ ba əngen̄ yá̰a̰ gə̄ tītə̄ ń ni-əda ní. 33Ba dan ń nin̄ a tútən̄ ngōn̄ kərō ní anī, kɔ́ɔ̄n gə̄ reēn̄, a dəjen̄də́ na ké a tútən̄ kərō na i tām̄ rí tə́ wa.
34Anī nin̄-tél ədan̄ na i Kɔ́ɔ̄ɓē n a sāā.
35Nin̄-reēn̄ kə kərō ní, adə̄n̄ Jeju, lábə̄n̄ kūbə̄ yādə́ gə̄ gidən tə́, ba adə̄n̄ Jeju al̄ ndi dɔn tə́. 36Ba dan ń ni-aw̄ anī, de gə̄ lábə̄n̄ kūbə̄ yādə́ gə̄ kum róbó. 37Ni-əndā dɔ mbal̄ *kāgə̄ olibə gə̄ ngɔr kadə̄ a risə ta kə́ ngəran tə́ nang tə́. Loo ń noō tə́ ní kósə́ ngé ndóō yá̰a̰ yān gə̄ malang rāān̄ rɔ̄nel̄ ngá̰ý, adə̄ nin̄-tɔ̄ȳn̄ Nə́ɓā kə ndūdə́ kə́ boó tām̄ yá̰á̰ kə́ yáā gə̄ malang ń a̰a̰n̄ tə́ ní, 38ba ədan̄ na: Tɔ́r̄ ta i dɔ nge ń reē tə́ ní, dɔ mban̄g ń reē kə rī Kɔ́ɔ̄ɓēé tə́ ní. Kem sɔl̄ lɔm i dɔ rā̰ tə́ ō, *kɔsə gɔn i yā Nə́ɓā dɔɔ́ nú ō.
39*Parijiyḛ kə́rēý gə̄ i dan kósə de gə̄ ní tə́, adə̄ ədan̄ Jeju na: Ngoljí, ī-ndán̄g ngé ndóō yá̰a̰ yāí gə̄ sḛ́ý tá tā. 40Ba Jeju ədadə́ na:
Ādə̄ m-ə́dásí, ré nin̄ a ran̄ kə tadə́ kə́ mbóó gə̄gē anī, i mbal̄ gə̄ n a əgan̄ kɔŕ ní.
Jeju nōō najə̄ yā ɓē kə́ Jerusalem tə́
41Dan ń ni-ugə̄ ngɔr ba a̰a̰ ɓē ní anī, ni-nōō tām̄ yān tə́, ba əda na:
42Nə́ngētə́ ɓōólaā ń toō ḭ̄ ī-ger̄ yá̰á̰ ń a adī lɔm ní anī, ba ngɔlaā yá̰á̰ ń toō i kə́ ɓɔ̄ɔ̄ kɔ̄ɔ́ ta kumií tə́. 43Tɔdɔ̄ ndɔ̄ gə̄ a reēn̄ noó kadə̄ madə̄ ba̰ā̰í gə̄ a ɔrən̄ gɔng yā rɔ̄ɔ̄īneé ō, a gīrə̄n̄ gidií njek njek ō, a utə̄nī kə̄ loo gə̄ tə́ malang ō, 44a rējə̄n̄sí rárák nang tə́, ḭ̄ gə̄gē ngání gə̄ ń a ton̄ kem bɔr yāí tə́ ní gə̄gē, a əya̰n̄ mbal̄ kógə̄ḿ dɔ mbal̄ madə̄ tə́ looí alé, tɔdɔ̄ ī-ger̄ ndɔ̄ ń Nə́ɓā reē go̰ō̰īneé tə́ ní alé.
Jeju aw̄ kem kújə yā Kɔ́ɔ̄ɓē tə́
(Á̰a̰ī Mat 21.12-17; Mark 11.15-19; Ja̰a̰ 2.13-22)
45Gō tə́ dan ń ni-aw̄ kem *kújə yā Kɔ́ɔ̄ɓē tə́ ní anī, 46udə kə̄ rɔ̄ ngé kigə yá̰a̰ gə̄ tə́ a tə̄ɓādə́ kɔ̄ɔ́ ba ədadə́ na:
Ndangən̄ ədan na:
Kújə yāḿ a tél kújə ndɔ̄ȳ, a sḭḭ̄ ī-tél ī-rāāī adə̄ tél to tītə̄ bəlo mbal̄ ɓɔ̄ɔ̄ rɔ̄ yā ngé gān̄g róbə gə̄ a?
47Ni ndóō de gə̄ yá̰a̰ kə dɔ ndɔ̄ gə̄ kem *kújə yā Kɔ́ɔ̄ɓē tə́. Ngol gə̄ kə́ dɔ *ngé tun̄ yá̰a̰ gə̄ tə́ ō, ngé ndóō de gə̄ *ndū najə̄ gə̄ ō, *kum kɔɔ̄ yā ngán *Israel gə̄ ō sāān̄ yā tɔ̄lə̄n, 48ba gerə̄n̄ loon alé, tɔdɔ̄ ngán Israel gə̄ malang ní, tadə́ ra yaka loo koō najə̄ kə́ ta Jeju tə́.
Obecnie wybrane:
Najə̄ kə́ Majə yā Jeju ń Luk ndang ní 19: BS
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2006, 2010 Alliance Biblique du Tchad