If you would like a copy of this version please contact info@davaraudiobibles.org

Gonja Bible

Basa ŋgboŋ damta ko ka shɛr ndoŋ hale n ya kaa chichi abar so nɛ Yesu fara a kaŋɛ mbe bebɛsopo le: “Men baa de Efarisiana na be yiisi so, kumo e la fanɛ bumo be kebirkɔnshi be asheŋ. Kusɔ kama nɛ k buu so beeŋ ba dii efuli nɛ kumo be wulo kikɛ e ba bugi so. Amoso, kusɔ kama nɛ esa ŋana tentembiri to m malga, k beeŋ ba lar efuli so parr nɛ basa e nu kumo. Kusɔ kama malɛ nɛ esa kuli ŋ kaŋɛ basa ebu be ŋkpar to beeŋ ba lar awɔrso ashi ebuana be esoso.


N teriana, mee kaŋɛ menyi nna na fanɛ men sa maa ŋana basa nɛ baaŋ tiŋ m mɔ menyi be eyur ere ŋkaa maaŋ naŋ tiŋ n wora menyi shɛŋ. Meeŋ ŋini menyi esa nɛ e daga kaŋana: Men baa ŋana emo nɛ e beeŋ tiŋ m mɔ nseŋ naa kɔ eleŋ nɛ e tiŋ n ta amodoŋwura n wɔtɔ edɛ to. Kashenteŋto mee kaŋɛ menyi nna, men baa ŋana mo. Ekama nyi etitibi be yawu ka maŋ du kpakpa ŋko? Ŋke Ebɔrɛ maa teŋ amo be kekama so. Ebɔrɛ nyi kananɛ menyi be emin gba sa. Amoso, men sa maa lɔ kufu, ŋkpal manɛ so, men bɔ etitibi damta.”


Ma e kaŋɛ menyi na fanɛ ekama nɛ e bugi to ŋ kaŋɛ basa to fanɛ ma e wɔ mo, ma, Nyiŋgbasa Pibinyɛn gba beeŋ wora loŋ n sa mo ashi Ebɔrɛ be emalaika be anishito. Ama ekama nɛ e bee kaŋɛ basa to fanɛ mannɛ ma e wɔ mo, ma alɛ gba beeŋ kaŋɛ fanɛ m maŋ nyi mo ashi Ebɔrɛ be emalaika be anishito. Ekama nɛ e malga ŋ gbiti ma, Nyiŋgbasa Pibinyɛn beeŋ nya kumo be keyigempaŋ, ama ekama nɛ e malga ŋ gbiti Kiyoyu Cheeŋ na maaŋ nya kumo be loŋ be keyigempaŋ. “Nɛ b baŋ yɛr menyi nshɛrbuana to be benimuana be anishito ŋko n yɛr menyi egomena nɛ bewuraana kutɔ, men sa maa fɔŋ kananɛ menyeeŋ ya malga so ŋko kusɔ nɛ menyeeŋ ya kaŋɛ so. Ŋkpal manɛ so, Kiyoyu Cheeŋ na beeŋ ŋini menyi kusɔ nɛ menyeeŋ kaŋɛ kumo be jemanɛ na gbagba to.”

Ndoŋ nna nɛ jimaŋ na to be esa ko kaŋɛ mo: “Eŋinipo, kaŋɛ n da nɛ e sa ma kapetɛ nɛ n tuto yige n sa anyi na be ako.” Nɛ Yesu bishi mo: “N teri, wanɛ e sa ma ekpa fanɛ n ji menyi be demu nseŋ barga menyi be kapetɛ na to n sa menyi?” Kamalga ere be kaman nɛ e kaŋɛ basa na kikɛ: “Men baa da so nsaa gelge kejimuni be yiri kikɛ, ŋkpal manɛ so, esa baa kɔ asɔ kanaŋkamaso gba, mbe ŋkpa bre maŋ la mo peya.”
Ndoŋ nna nɛ Yesu bɔ bumo keŋasa ere ŋ kaŋɛ: “Damawura ko be adɔjibi e daŋ wora ga. Nɛ e fara a fɛ le be nfɛra: ‘M maŋ kɔ kakpa nɛ n ta ma adɔjibi ere kikɛ n wɔtɔ, amoso, nuso nɛ meeŋ wora?’ Ndoŋ nna nɛ nfɛra ba mo to nɛ e kaŋɛ mbe kumu: ‘N nyi kusɔ nɛ meeŋ wora. Meeŋ jija ma mpuro ere nseŋ naŋ lue agboŋi n ta ma ayu ere nɛ ma adɔjibi nɛ a ka na kikɛ n wɔtɔ amo to. Amo be kaman nɛ ŋ kaŋɛ ma kumu: Kumulelawura, feeŋ ta nfɛ damta nɛ fo kraa kɔ asɔ lela. Amoso, baa wɔtɔ boeŋ a ji a nuu nsaa ji fo kumu.’ Ndoŋ nna nɛ Ebɔrɛ kaŋɛ mo: ‘Ewulpo ere. Kanyɛ ere feeŋ paŋ fo ŋkpa ere. Nɛ fo alɛ paŋ kumo, wanɛ peya nɛ asɔ nɛ fo bela n yili fo kumu ere kikɛ beeŋ ki?’ ” Nɛ Yesu kaŋɛ: “To, kusɔ nɛ k beeŋ nya basa nɛ b maŋ kɔ shɛŋ Ebɔrɛ be anishito nsaa wɔtɔ a chala asɔ a sa bumo be amu nna na.”


Nɛ Yesu kaŋɛ mbe bebɛsopo: “Amoso, mee kaŋɛ menyi nna fanɛ men sa maa fɔŋ menyi be ŋkpa so a wɔtɔ a fɛ kananɛ menyeeŋ tiŋ n nya kusɔ jiso be asheŋ, ŋkpal manɛ so, ŋkpa e chɔ ajibi. Menyi alɛ e sa maŋ naa fɔŋ menyi be eyurana so a wɔtɔ a fɛ kananɛ menyeeŋ tiŋ n nya asɔbuuso be asheŋ, ŋkpal manɛ so, eyur e chɔ asɔbuuso. Men keni emɔmɔ, b maa du shɛŋ, bumo alɛ maa teŋi shɛŋ, b maŋ kɔ ajibi mpuro to, ŋkeshin nɛ Ebɔrɛ malɛ bee sa bumo asɔ jiso. Nɛ keni, menyi alɛ ka bɔ mbuibi kanaŋkamaso nde. Menyi be emo e naaŋ tiŋ n ta kafɔŋ n shin nɛ mbe ŋkpa e wora nteŋ n ti so? Nɛ men ka maaŋ tiŋ n wora le be kusɔbi ere gba nɛ manɛ so nɛ menyee fɔŋ asɔ nɛ a ka malɛ kikɛ so? Men keni kananɛ afitiri be atoto bee daŋ a walɛ loŋ, ama amo alɛ maa shuŋ shɛŋ ŋko a lue amo gbagba be asɔbuuso, ŋkeshin nɛ men baa nyi fanɛ Ewura Sɔlɔmɔn e daa kɔ kemaŋkura nɛ asɔ ga ere gba daa maa kɔ asɔbuuso nɛ a walɛ n fo atoto ere so. O yirdabiwuraana, nɛ Ebɔrɛ bee keni afitiri nɛ feeŋ wu kabre ŋ klade n fin amo ndoŋ ŋ gben ŋkpal b ka chɔɔ amo so ere so a sa amo amo be kela, nɛ menyi ere ka bɔ amo ere nɛ e maaŋ sa asɔbuuso a? Men sa maa fɔŋ so a wɔtɔ a yela kenishi to a fin asɔ nɛ menyeeŋ ji nɛ asɔ nɛ menyeeŋ buu. Loŋ be asɔ nɛ durnya ere to be basa nɛ b maŋ nyi Ebɔrɛ bee yela kenishi to a fin. Ama men Tuto Ebɔrɛ na nyi a ka daga fanɛ men nya loŋ be asɔ na. Amoso, men ta Ebɔrɛ be kuwura na be kasha n juŋkpar men be kebaawɔtɔ to nɛ e shin nɛ men nya asɔ na n ti so.”


Ma basa, men maŋ shi, ama men sa maa lɔ kufu. Ŋkpal manɛ so, men Tuto be keparso nna nɛ e yili kumo fanɛ e beeŋ ta mbe kuwura na n sa menyi.
Men fa menyi be ekpanjawu to be asɔ nseŋ ta amo be amansherbi n sa betirpo. Loŋ e naaŋ shin nɛ men baa kɔ ekpanjawu nɛ a bɔlɔ menyi be ekɔlgu a yil ebɔrɛso a maa jija, amo alɛ maa duga so. Eyu kikɛ maaŋ tiŋ n yuri amo ndoŋ, elala malɛ gba maaŋ tiŋ n ji amo. Ŋkpal manɛ so, kakpa nɛ fo kpanjawu wɔ, ndoŋ nɛ fo kagbene malɛ gba wɔ.

“Men bela ase ŋ kre so nɛnɛ nseŋ chɔɔ efitila so n yili fanɛ anya nɛ baa jo bumo nyɛnpe nɛ e shi kejafɔ to be kejigboŋ to m ba na. Loŋ na e baŋ ba ŋmɛa kabuna na, baaŋ bugi kumo epul na to n sa mo. Bumo nɛ bumo nyɛnpe na beeŋ ba tu nɛ b bela ase a jo mo nsaa keni na beeŋ nu ebel ga. Enyɛnpe na gbagba beeŋ shin nɛ b chena nɛ e kre so n wora ajibi n sa bumo. Hale nɛ e ba kiidiso ŋko saŋkama gba m ba tu bumo nɛ b bela ase a keni a jo mo, baaŋ nu ebel ga. Men baa nyi fanɛ laŋwura kama baa nyi saŋɛ nɛ eyu beeŋ ba mbe laŋ to e maaŋ shin nɛ eyu na e ba tintiŋ n luri mbe kowu m ba yuri. To, menyi alɛ gba e wora shiriya a jo ma, Nyiŋgbasa Pibinyɛn na, ŋkpal manɛ so, meeŋ ba saŋɛ nɛ men maaŋ baa tama ma.”


Nɛ Pita bishi mo: “Enyɛnpe, anyi nawule nɛ fee bɔ keŋasa ere a sa ŋko ekama?” Nɛ Enyɛnpe na bishi bumo: “Esa mo e la kenya nyiashempo nɛ e maŋ kɔ kebirkɔnshi, emo nɛ mo nyɛnpe na beeŋ shin nɛ e baa keni mbe anya kikɛ so nsaa sa bumo bumo be ajibi saŋɛ nɛ a daga na? Amo be kenya mo nyɛnpe baŋ yɔ kakpa ko m bɛta m ba tu mo nɛ e bee wora kusɔ kama nɛ kumo be ekpa so, kenya na beeŋ nya kechɔrɔ ga. Ma e kaŋɛ menyi kashenteŋto na fanɛ enyɛnpe na beeŋ shin nɛ amo be kenya na e baa keni mbe asɔ kikɛ so nyam. Ama nɛ fanɛ kenya na kaŋɛ mbe kumu le: ‘N nyɛnpe beeŋ chɛr ga pɔɛŋ nseŋ bɛta m ba’, nseŋ fara a bri anya nɛ b ka na, benyɛn nɛ beche kikɛ nsaa wɔtɔ a ji a nuu nsaa nuu nsa a boo, mo nyɛnpe na beeŋ ya bɛta m ba kachɛ nɛ jemanɛ nɛ kenya na maŋ nyi ŋko a tama mo. Enyɛnpe na malɛ ba tu mo loŋ e beeŋ kuya mo so m bɛlɛ to nseŋ shin nɛ e yɔ kakpa nɛ bumo nɛ basa maaŋ tiŋ n yirda na bee yɔ na. Kenya kama nɛ e nyi kusɔ nɛ mo nyɛnpe bee sha fanɛ e wora nseŋ maŋ bela ase ŋ koso n wora kumo, baaŋ kuya mo so ga. Ama kenya kama nɛ e maŋ nyi kusɔ nɛ mo nyɛnpe bee sha nseŋ wora asɔ nɛ baa kpal amo so ŋ kuya basa so, baaŋ kuya mo so gbrɛ. Esa kama nɛ b sa asɔ ga, amodoŋwura kutɔ nɛ baa tama kenya ga nɛ ekama malɛ nɛ b ta asɔ damta n wɔtɔ mbe enɔ to, mo kutɔ nɛ baa tama kenya ga.”


Nɛ Yesu naŋ kaŋɛ: “M ba na nɛ m ba bar edɛ durnya to. Nɛ kumo alɛ daŋ teŋ chɔɔ so nna naniere, k daa beeŋ par ma ga. A daga fanɛ b wɔtɔ ma tɔrɔ to fanɛ kananɛ baa muni esa nchu to a bɛr mo kabɔrɛbɛr na. Kumo alɛ maŋ loge, ma kagbene maaŋ dese ma kikɛ. Menyee tama fanɛ m ba na nɛ m ba sa durnya ere kagbenewushi nna ŋko? Ayai, mannɛ aloŋ nna, basa be kebarga abar be kebaawɔtɔ nɛ m ba sa. Yili kabre a yɔ, kanaŋ nɛ k kɔ basa fanɛ benu kumo to beeŋ barga to a kɔ abar. Kanaŋ na to be basa asa beeŋ wora kɔnɔkoŋwule a wɔ abar so nɛ benyɔ nɛ b ka na malɛ e wora kɔnɔkoŋwule a wɔ abar so. Betuto ko beeŋ ba kaa bar kebarga to ashi bumo nɛ bumo be mbinyɛnsobi ko be nferinto nɛ mbinyɛnsobi ko malɛ gba e ba kaa wora bumo tutoana loŋ. Benio ko beeŋ ba kaa bar kebargato ashi bumo nɛ bumo be mbichesobi ko be nferinto nɛ mbichesobi ko malɛ e ba kaa wora bumo nioana loŋ. Beshache ko beeŋ ba kaa bar kebargato ashi bumo nɛ bumo be mbia be beche be nferinto nɛ beko be mbia be beche malɛ gba e ba kaa wora bumo shacheana loŋ.”


Nɛ Yesu kaŋɛ basa na malɛ: “Saŋkama nɛ men baŋ ya wu kuwɔlpa lembir bɔrɛfito nɛ men teŋ kaŋɛ: ‘Bɔrɛ beeŋ ba’, kashenteŋ malɛ nɛ k ba. Nɛ ketarso be afu malɛ baa chela menyi so nɛ men kaŋɛ: ‘Kebleŋ e naa ba na’, kashenteŋ malɛ nɛ k ba. Kebirkɔnshiwuraana ere, menyee tiŋ a keni kasawule nɛ awɔlpa so a pin kananɛ a du be afito. To, nɛ manɛ e ba nɛ men maaŋ tiŋ m pin jemanɛ ere be kebaawɔtɔ be kifito?”


“Nɛ manɛ e ba nɛ men gbagba maa pin kusɔ nɛ k daga fanɛ men wora to? Nɛ fanɛ esa kaŋɛ fanɛ fo wora kusɔ ko n da mo so nsaa yɛr fo kɔɔti to, fo wora ania ga nɛ fo nɛ mo e lɔŋɛ kesheŋ na ekpa to nɛ e sa maŋ gberge fo n yɔ demujipo kutɔ nɛ mo alɛ e ta fo n sa kabutikenipo nɛ mo alɛ e ta fo n ti ebu. Ma e kaŋɛ menyi na fanɛ nɛ fo baa maŋ tiŋ ŋ ka fo kukɔ na kikɛ nyam, fo maaŋ lar kabuti na to kikɛ.”

Ouvir Luuk 12