Zapotec, Guevea de Humboldt: Zapoteco, Guevea de Humboldt NT (New Testament)

Zapoteco, Guevea de Humboldt NT

To dzé galuu Jesúz meññ xtiidz Dioz ruꞌ idoró. Lo hor-wé, bydzihñ xjefy yahc bahl no muextr ni ruuḻ yahc xleiy Moiséz, no zrieñ mînguhl yahc ni nac guxtisy. Ra yâme leeme:
―Guhdzyu noꞌ: ¿dxu naquiꞌ par ctzooy gyre nirieꞌ? ¿o dxu guhdzy lii ctzooyu?
Ra Jesúz leeyâme:
―Zegahc rapaꞌ to ni gnabdiidzaꞌ laꞌd, lâ ga naa: ¿Dxu pshahl Juaṉ lehdy bidchôbnihs me meññ? ¿Dioz ni nu gybaa la, o cuentz meññ?
Were ra saꞌ yâme:
―¿Biaz‑e naꞌ ga nó leeme? Bâḻ nó ga nó Dioz pshahl Juaṉ, za me nó: “¿Biaz nacu naꞌ di nlíladzy laꞌd leeme?” No bâḻ nó ga nó cuentz meññ pshahl leeme la, sshadguie meññ-guiedzy nó we, porni gyre meññ rlíladzy profet‑e Juaṉ.
Ni ptzohdy yâme, beeiydí, ra yâme Jesúz:
―Nehx nann noꞌ dxu pshahl leeme par bidchôbnihs me meññ.
Ra Jesúz leeyâme:
―Zegahc nehx zapyaꞌ laꞌd dxu nacaꞌ par ctzon gyre nirieꞌ.


Luxu, gyzac guzlo Jesúz ganino me meññ ndaagü lo diidz, ra me leeyâme:
―Güyuꞌ to mpyquie, bdziib me blatzy to lo xroꞌ lyu, no luxu bdee meu zrieñ meññ-ctzoo dziiñu por glaꞌy. Luxu za me to guiedzy ru ziht no gylee meu xroꞌ tiémp. Dze-ba gayahc xicüsech blatzy‑e naꞌ, pshahl me to xmós me, ziycaꞌ ni ctzulaꞌy yâme de lo cüsech ru nu meññ-caḻ yahc ni gatzoo dziiñ. Per ru bydzihñ me, aaḻ güdihñ yâme leeme, no gubyguiat me zehzy. Gyzac pshahl me sto xmós me, za; per ru bydzihñ me zehg güdihñ yâme leeme, no gu yâme leeme didz-nahcsy, no gubyguiat me zehzy. Ni bionn vuelt pshahl xbixwaan lyu sto mós, za; ru bydzihñ me we naꞌ, zegahc ptzuné yâme leeme, no blaag yâme leeme.
’Were ne xbixwaan lyu: “¿Xnahcs‑e naꞌ dzictzon? Beeiydí, cshaalaꞌ dshiñaꞌ ni ndzin lee; wé duhn ctzoo yâme ni gynii hor-gydzihñ me ru nu yâme.” Per scâsy bwieꞌ meññ-caḻ leeme, guzlo gahc gaya saꞌ yâme: “Mpyquie-ziaad, leeme we ni guian-no gyrenac dziiñ dze-ba guhty xtad me; igaꞌdy nó leeme lehdy gac dixchieñ nó gyreu.” Were güloo yâme leeme leññ lyu ru dziib blatzy, no bgaꞌdy yâme leeme.
Ra Jesúz leeyâme:
―¿Biaz‑e naꞌ ctzoo xbixwaan lyu-caḻ meññ-rieꞌ yahc? Ni ctzohdy me la, guiaad me no igaꞌdy me meññ-rieꞌ yahc, no gdee me lyu-wé, ycaꞌ zrieñ meññ.
Ru bieññ meññ günii Jesúz mod-wé, ne yâme:
―¡Di ñahcladzy Dioz ñahc nó mod-wé!
Were bwieꞌ Jesúz gyre yâme, no ne me:
―¿Nann laꞌd bia rnii ni nu lo Guehtzy ru queꞌ xtiidz Dioz la?, ru neu mod-rieꞌ:
Guie ni di ne meññ-rzaa yuꞌ nquihñ,
naꞌ lehbu ba nash squiñp ru raa guie ni ma rquihñ lehdy tzaa yuꞌ zaꞌgndzi.
No leewe, dxu guiahb chehsh guie-wé la, stzubiuw lee; per bâḻ guie-wé guiahbu chehsh dxuhch la, ctzudéu lee.


Gucladzy xjefy yahc bahl no muextr ni ruuḻ yahc xleiy Moiséz nnahzy yâme Jesúz lohg hor-ganii me, porni bdee yâme cuent de leeyâme günii Jesúz nirieꞌ ni ndaagü lo diidz. Per di ntzoo yâmeu, porni rdzie yâme meññ-guiedzy. Güliahz yâme güyuꞌr to mód, were güluꞌ yâme meññ-güya par nisquiee leeme, ndedy por meññ-tziaawy par nwieꞌ bâḻ nnii me behch, lehdy ñuꞌ mod-nnahzy yâme leeme par niyno yâme leeme lo gobernador. Ru bydzihñ yâme, ra yâme leeme mod-rieꞌ:
―Muextr, noꞌ nann noꞌ gyre ni rniiy no gyre ni rluuy meññ, ni uli we leeu, no par lii tohzy mdid‑e rsahc gyre meññ. Rluuy ni uli lguia ni racladzy Dioz ctzoo meññ. Leewe gu noꞌ: ¿xñahzu we quix noꞌ mpuezd lo xṟeiy meññ-Ṟom la, o yac?
Per Jesúz nann me guîlrieñ-nahcsy ni zidno yâme. Were ra me leeyâme:
―¿Bia nacu riñlo laꞌd csiahb laꞌd naa no to ni ngann? Lâ gluu naa to medy-guiib ni zidnot. ¿Dxu lo we nirieé, no dxu le queꞌ neé?
Ra yâme leeme:
―Xchieñ Cézr ni nac xṟeiy meññ-Ṟom.
Ra me meññ-wé yahc:
―¿Biaz mazy? Lâ gdee Cézr ni nac xchieñ Cézr, no lâ gdee Dioz ni nac xchieñ Dioz.
No di ñaḻ ndzial yâme bia mód ntzoo yâme contr leeme, aaḻ modni ptzunadz yâme no mod-günii me, no ba di nnabdiidzr yâme leeme mbehty.


Güdedy nirieꞌ, gyzac güya meññ-nac yahc saduceu lo Jesúz; no meññ-rieꞌ yahc naꞌ, ne yâme nehx zbahñ mînguty; ra yâme Jesúz:
―Muextr, Moiséz bzaa me lo leiy, ne me: “Bâḻ to mpyquie rehty me no riaꞌn tziahl me no nehx güdahp xiiñ la, behtzy gahcme guidzña no ngüna-rieꞌ lehdy gap xiiñ yâme xcuent behtzy me ni guhty.” Naꞌ hôrrieꞌ, güyuꞌ gahdzy meññ-mpyquie behtzy saꞌ yâme; no ni nac lguhl lahd yâme bidzña me, per guhty me no biaꞌn tziahl me nehx güdahp xiiñ me. Were bidzña ni byrohp yâme no ngüna-caḻ, no zegahc guhty no di ñahp xiiñ yâme. Gyzac bidzña ni bionn yâme no ngüna-caḻ no nehx güdahp xiiñ yâme. No mod-wé glo byzaꞌ gydiby gahdzy yâme ni cuaꞌ ngüna-caḻ. No por últim, zegahc guhty ngüna-wé. Naꞌz naꞌ, dze-gybahñ mînguty, ¿dxu de leeyâme gac tziahl ngüna-wé, porni gydiby gahdzy yâme bidzña no leeme?
Were, ra Jesúz leeyâme:
―Lo guiedzylie-rieꞌ ridzña mpyquie no ngünaa, no rdee meññ guîltziahl xiiñ. Per meññ ni gybahñ sto no ni beeiy ctzoo yahc gan tzu lo guiedzylie-coby, uga ba nehx zidzña, no nehx zdee meññ guîltziahl xiiñ. No dze-ba gübahñ meññ la, ba nehx ziuꞌ dzé gaty yâme. Beeiy gahc ángel ni nu gybaa we gac yâme. No meññ-gybahñ yahc sto, wé ba xiiñ Dioz‑e leeyâme. No lguia ni gybahñ mînguty naꞌ, Moiséz gahc bzaa me lo guehtzy lguiau, ru queꞌ ni ra Dioz leeme ru bwieꞌ me rdahl biaḻ lo yag-guiahtz; no ne me ni rtzoo mdad we xDioz Braṉ, Isac no Jacop ni güyuꞌ yahc ba xtze. No Dioz naꞌ, dac‑e xDioz mînguty leeme, mazyg xDioz meññ-mbahñ‑e leeme; no par leeme la, gyre meññ‑e mbahñ, nîcze nehx nu yâme lo guiedzylie-rieꞌ.
Were, ra lahd muextr leeme ni ruuḻ yahc xleiy Moiséz:
―Leeu mod-neꞌy, Muextr.
No ba bydzie yâme nnabdiidzr yâme leeme.


Ra Jesúz leeyâme:
―¿Bia mód‑e ne meññ, xiiñ ṟeiy-Davit‑e Crist? No luxu, Davit gahc bzaa lo libr-Salm, ne me:
Günii Dioz, ra me Señor ni rtzoo mdad naa:
“Gürie dcoon lad-drech,
xtâ glo ctzon gyre meññ-rdziadzyno lii, guisshiby yâme loꞌy.”
Davit gahc ra me Crist: “Señor ni rtzoo mdad.” Were, ¿bia mód‑e naꞌ ne meññ lguia Crist, xiiñ Davit‑e leeme?


Gyre meññ gayieññ ru ra Jesúz xmeññ me:
―Lâ gap laꞌd no muextr ni ruuḻ yahc xleiy Moiséz. Riuꞌladzy yâme rzeꞌ yâme ruhtz yâme lar-duhñ ni rsahc. No ru ganzeꞌ yâme leññ guiedzy, racladzy yâme gynii meññ diux leeyâme no xroꞌ guîlrzacbeeiy. No ryo yâme ru ma mos rbia yâme leññ idoo ru rbia meññ-rsahc; no zegahc ryo yâme ru ma mos rbia yâme ru rotzie yâme no meññ. Rboo yâme xyuꞌ ngünaviud, no sto lad ba zu yâme ruuḻ yâme laꞌy xtze, rluuw ulihbu meññ-tziaawy leeyâme; per ma xroꞌ guîlné we ycaꞌ yâme.

Ouvir LUCAS 20