Hyolmo - WBT (NT) Non Drama

Hyolmo - WBT (NT) Drama

फरिसीया़ नाहङला निकोदेमस मिहन थो़क्‍यो मेहन्‍दा च्‍यी़ येहकें। खो यहूदी छो़बा छ्यिम्‍बु माएँ छो़बागी मिह च्‍यी़ यिहन्‍गे। ओहले कुहङमु च्‍यी़ खो येशूसाला ओहङदी मासीन, “लोबेन ला़ह, ङ्यिहला क्‍यी़ह येह राहङ किन्‍ज्‍यो लाहमले ङ्यिहला लोप्‍च्‍येला फेप नाङग्‍यो यिहम्‍बा, च्‍यिबेमाना किन्‍ज्‍यो राहङ ङ्याम्‍बु ज़्‍य़ू माहनाङबा यिहनानी राहङगी जे नाङग्‍यो ल़ेहमु दि याहम्‍जेम्‍बागी ताक्‍छेनया़ सुज्‍यीगीॱआङ पेह मी़हखुएँ।”
ओहले येशूगी खोला सुङ नाङसीन, “तेहम्‍बाराङ ङाह ख्‍येला माएँ, साम्‍बा पेहती माहक्‍ये थु सुज्‍यीगीॱआङ किन्‍ज्‍योगी क्‍याहल्‍सी थोङ मी़हखुएँ।” निकोदेमसगी येशूला मासीन, “मिह केहपु काहल सिहन फान्‍ज्‍योॱआङ येहपाराङ काह-ठि पेहते क्‍ये ख़ूएँ ले? च्‍यि खो राहङगी आमाकी फोवा नाहङला स्‍य़ूहदी क्‍ये ख़ूएँ ले?”
येशूगी ल़ेहन क्‍याहप नाङसीन, “तेहम्‍बाराङ ङाह ख्‍येला माएँ, छ्यु दाङ थु लाहमले माहक्‍ये थु सुज्‍यीॱआङ किन्‍ज्‍योगी क्‍याहल्‍सीला स्‍य़ूह ख़ूज्‍ये म़ेह। ज़ुबु ङो़ले क्‍येक्‍योदी ज़ुबुराङ यिहन ओहले नाम्‍पार-ताहक्‍पा थु ङो़ले क्‍येक्‍योदी थुराङ यिहन। ङाहगी ख्‍येला साम्‍बा पेहती क्‍ये कोहएँ म़ेदी माएँमु ख्‍ये ह्‍अ मा़हलेह। ल्‍हा़बा का़हले सेम ने़गे ओ़हलेराङ स्‍याङगे। ख्‍येगी ल्‍हा़बागी क़ेनी थे़गे, यिहॱनाङ ल्‍हा़बा का़हलेगी ओहङगे ओहले का़हला डोएँ, ओ़ह ख्‍येगी ह्‍अ मेहकोहएँ। थु लाहमले क्‍येक्‍यो मिह थाम्‍ज्‍यी ओ़ह ल़ेहमुराङ ओहङगे।”
निकोदेमसकी येशूला स्‍युहसीन, “दि काह-ठि पेहती ओहङ ख़ूएँ ले?”
येशूगी खोला सुङ नाङसीन, “ख्‍येनी इस्राएलीया़गी लोबेन यिहन, यिहॱनाङ दि केच्‍याया़ ङोह मे़हस्‍ये दु? तेहम्‍बाराङ ङाह ख्‍येला माएँ, ङ्यिहगी च्‍यि ङोह स्‍य़ेगे ओ़हदीॱराङ माएँ, ओहले ङ्यिहगी च्‍यि थोङग्‍यो येहबा ओ़हगी तेहन्‍दाला पाङबु तेर्के, यिहॱनाङ ख्‍याया़गी ङ्यिहगी तेरक्‍यो पाङबुला ची़नाङ मेहबेएँ दु। ङाहगी ख्‍याला जाम्‍बुलीङगी ताम मासीन, यिहॱनाङ ख्‍यागी यिह मे़हछ्ये दु, ओहले ख्‍याला स्‍यिहङगामकी ताम स्‍य़ेसीन माना काह-ठि पेहती ख्‍यागी यिह-छ्य़े ख़ूज्‍ये ले? स्‍यिहङगामलेगी फेप नाङगे मिहगी स़ेबु च्‍यी़ मिहम्‍बानी लेहमेन सुज्‍यीॱआङ स्‍यिहङगामला काहल्‍दी म़ेह। मोशागी रिह-काम्‍बुला पितलगी प्रुहलला क्‍या़क्‍यो ल़ेहमुराङ मिहगी स़ेबुॱलाङ क्‍या़ कोहज्‍ये येह। ओहले का़हन्‍दीगी मिहरोला यिह छ्य़ेगे, खोगी था़ म़ेहबागी मिहली ज़ाङबु ज्‍योर्च्‍ये येह। च्‍यिबेमाना किन्‍ज्‍योगी जाम्‍बुलीङला दे़ज्‍ये माहङा चेवा जे नाङसीन, मिहरोगी राहङगी च्‍यिमे च्‍यी़राङ स़ेबुॱआङ नाङसीन। किन्‍ज्‍योकी स़ेबु थो़ला यिह छ्य़ेगे सुज्‍यीॱआङ तोङदी डोज्‍ये म़ेह, यिहॱनाङ खुङया़गी था़ म़ेहबाकी मिहली ज़ाङबु ज्‍योर्च्‍ये येह। च्‍यिबेमाना किन्‍ज्‍योगी जाम्‍बुलीङला ङ्य़ेहबा फो़ च्‍य़ूज्‍ये म़ेदी स़ेबुला दि जाम्‍बुलीङला ताङ माहनाङ यिहॱनाङ जाम्‍बुलीङ मिहरो लाहमले थार ख़ूज्‍यु म़ेदी स़ेबुला दि जाम्‍बुलीङला ताङ नाङसीन। का़हन्‍दीगी किन्‍ज्‍योकी स़ेबुला यिह छ्य़ेगे खोला ङ्य़ेहबा फो़ज्‍ये म़ेह, यिहॱनाङ यिह मेहछ्य़ेया़ला तोहङलेराङ ङ्य़ेहबा फो़ सिहन्‍दे येहबा, च्‍यिबेमाना खोगी किन्‍ज्‍योगी च्‍यिमे च्‍यी़राङ स़ेबुकी छेनला यिह छ्य़ेक्‍यो म़ेह। किन्‍ज्‍योगी आप्‍ता च्‍ये नाङग्‍योदी दिराङ यिहम्‍बा: क्‍या-साङे जाम्‍बुलीङला फेप सिहन्‍दी येह, ओहले मिहया़गी क्‍या-साङेला म़ेदीॱआङ माहङबु ना़-जुबेला चा़ पेहसीन, च्‍यिबेमाना खुङया़दी ल़ेह ङ्येहम्‍बा येहकें। च्‍यिबेमाना ल़ेह ङ्येहम्‍बा पेहकेन मिहगी क्‍या-साङेला ङेन्‍ज्‍येन पेहकें, ओहले खुङ क्‍या-साङेला मेहयोहङगे, मिहन्‍सीमानानी खोगी पेहक्‍यो ल़ेह चोक्‍पाया़ क्‍या-साङेला थोङज्‍ये येह। यिहॱनाङ तेहन्‍दामगी स्‍याहल ङ्यिहन्‍गेन मिहदी क्‍या-साङेला ओहङगे ओहले दि ल़ेहमु पेहती खोगी पेहक्‍योगी ल़ेहया़ थाम्‍ज्‍यीराङ किन्‍ज्‍यो लाहमले पेहक्‍यो यिहन माएँ ताम छ्यिसाल-नाहङसाल थोङ ख़ूएँ।”

ओ़ह तिङले येशू राहङगी स्‍याहप्‍च्‍यीया़ ङ्याम्‍बु यहूदीया लुहङबाला फेप नाङसीन ओहले ङ्यिहमा तोबाज्‍यी खुङ ङ्याम्‍बु ज़्‍य़ू नाङसीन ओहले बप्‍तिस्‍मा नाङसीन। यूहन्‍नागीॱआङ सालीम युहल पोहला येहकेन्‍गी एनोन माएँ ग्‍या़ला बप्‍तिस्‍मा तेर्केॱराङ येहकें च्‍यिबेमाना ओ़हला माहङबुराङ छ्यु येहकें। ओ़हला मिहया़ बप्‍तिस्‍मा लेहन्‍ज्‍येला ओहङ तेहको येहकें। ओ़ह ती़हजी थु यूहन्‍ना चोन-खाङला छ्यिती म़ेहबा येहकें।
ओ़ह ती़हजीलाराङ यहूदी मिह च्‍यी़ ङ्याम्‍बु यूहन्‍नागी स्‍याहप्‍च्‍यीया़ चाङमा डोएँ माएँ तामकी तेहन्‍दाला ताम फार छुर स्‍याङ स्‍याङ काहल्‍सीन। खुङया़ यूहन्‍नासाला ओहङदी मासीन, “लोबेन ला़ह, यर्दन चाङबुगी फार्केन देपला येहकेमु राहङ ङ्याम्‍बु मिह च्‍यी़ ज़्‍य़ू नाङदी येहकें। राहङगी ङ्यिहला मिहरोगी तेहन्‍दाला सुङ नाङग्‍यो येहकें। ज़ी़-नाङदोङ, ताहन्‍दा मिहरोगीॱराङ बप्‍तिस्‍मा नाङगेराङ येह ओहले मिह थाम्‍ज्‍यीराङ मिहरोसाला डोएँॱराङ येह।” ओहले यूहन्‍नागी ल़ेहन क्‍याहप्‍ती मासीन, “स्‍यिहङगामले माहनाङ थु मिहगी च्‍यिॱआङ ज्‍योर मी़हखुएँ।
‘ङाह मास्‍यीकानी मिहन, यिहॱनाङ ङाह मास्‍यीका म़ेदी तोहङले ताङग्‍योगी मिहज्‍यीॱराङ यिहम्‍बा’ म़ेदी ङाहगी पाङबु तेरक्‍योनी ख्‍याया़गी थे़दीॱराङ येह। काहदी मिह ङ्याम्‍बु नामा साम्‍बा तेहकें ओ़हदीॱराङ माहक्‍पा साम्‍बा यिहम्‍बा। माहक्‍पा साम्‍बा पोहला लाहङदी तेहकें रो़ह माहक्‍पा साम्‍बागी क़े थे़दी क़ेहनाङ पेहकें। ओ़ह सोङबे ङाहती दि काहसो ता़ह छाङबु काहल्‍दी येह। मिहरो छ्येरो-छ्येरो डो कोहएँ, ओहले ङाहदी च्‍युङरो-च्‍युङरो डो कोहएँ” म़ेदी यूहन्‍नागी मासीन।

याहरले फेप नाङगेन्‍दी थाम्‍ज्‍यी म़ेदी चा़ छ्यिम्‍बु येह। जाम्‍बुलीङला क्‍येक्‍योगी मिहया़ जाम्‍बुलीङदीराङ ओहङगे ओहले जाम्‍बुलीङगी तामया़ॱराङ माएँ। यिहॱनाङ स्‍यिहङगामले फेप्‍केन्‍दी थाम्‍ज्‍यी म़ेदी चा़ छ्यिम्‍बु ज़्‍य़ू नाङदी येह।
मिहरोगी राहङगी ज़ी़क्‍यो दाङ सेन्‍ग्‍योगी स्‍याहलया़ॱराङ सुङ नाङगे। यिहॱनाङ मिहरोगी सुङ नाङग्‍यो स्‍याहलला सुज्‍यीगीॱआङ यिह मे़हछ्येएँ। मास्‍यीकागी सुङ नाङग्‍योकी स्‍याहलला ची़गेन्‍दीगी किन्‍ज्‍योॱराङ तेहम्‍बा-तेहन्‍सुम यिहन माएँ तामगी दास्‍यी तेर्के। च्‍यिबेमाना किन्‍ज्‍योगी ताङ नाङग्‍यो मिहगी किन्‍ज्‍यो लाहमलेॱराङ स्‍याहल सुङगे, च्‍यिबेमाना किन्‍ज्‍योगी मिहरोला राहङगी थु छे-मे़हबा माहङबु नाङदी येह। याहपगी राहङगी स़ेबुला चेवा जे नाङगे, ओहले ना थाम्‍ज्‍यीराङ मिहरोगी छ्या़ला ज़्‍या़ नाङदी येह। का़हन्‍दीगी स़ेबुला यिह छ्य़ेगे, खो ङ्याम्‍बु था़ म़ेहबा मिहली ज़ाङबु ओहङगे। का़हन्‍दीगी स़ेबुला यिह मे़हछ्येगे, खोगी मिहली थोङज्‍ये म़ेह, यिहॱनाङ किन्‍ज्‍योगी थुयाल खो थो़ला बाप्‍च्‍ये येह।

Ouvir यूहन्‍ना 3