Mari, Meadow IBT Non-Drama (NT)

Mari, Meadow IBT Drama (NT)

Библийым кусарыше институт, Хельсинки 2007

Калык тӱшкам ужмеке, Иисус курыкыш кӱзен, а кунам шинчын, воктекыже тунемшыж-влак миеныт. Иисус ойлаш тӱҥалын, нуным тыге туныктен:
«Шкеныштым Юмын ончылно изилан ужшо-влак поро пиалан улыт:
Пылпомыш Кугыжаныш – нунын.
Ойгырышо-влак поро пиалан улыт:
нуно лыпландарыме лийыт.
Ӱҥышӧ-влак поро пиалан улыт:
нуно уло мландым наследство семын налыт.
Кӧн кочмо-йӱмӧ шумо семын
чыным шуктымым ужмыжо шуэш,
поро пиалан: тудо темеш.
Чаманыше-влак поро пиалан улыт:
нуно чаманыме лийыт.
Яндар шӱман-влак поро пиалан улыт:
нуно Юмым ужыт.
Тыныслыкым кондышо-влак поро пиалан улыт:
нуно Юмын шочшыжо-влак манын лӱмдалтыт.
Чын ыштыме верч поктылмо-влак поро пиалан улыт:
Пылпомыш Кугыжаныш – нунын.
Кунам тендам Мыланем кӧра вурсат, поктылыт да тендан нерген тӱрлӧ осал шоякым каласкалат, те поро пиалан улыда. Куаныза да йывыртыза, пылпомышто тыланда кугу суап лиеш: тендан деч ончыч илыше пророк-влакымат тыгак поктылыныт.
Те мландын шинчалже улыда. Шинчал шинчалан лиймым чарна гын, кузе тудым уэш шинчаланым ышташ? Ынде тудо нимолан ок йӧрӧ, тудым луктын шуат да еҥ-влак тошкат веле. Те тӱнян волгыдыжо улыда. Курык ӱмбалне шогышо ола шылын огеш керт. Чӱктымеке, лампым ате йымаке огыл, а лампыпӱкеныш шындат, да пӧртыштӧ тудо чылалан волгалтара. Тек тендан волгыдыдат еҥ-влак ончылно тыгак волгалтара. Тек нуно поро пашадам ужыт да Пылпомышсо Ачадам чапландарат.
Законым але пророк-влакын туныктымыштым кораҥдаш толынам манын ида шоно. Мый кораҥдаш огыл, а шукташ толынам. Тыланда чынак ойлем: чыла тиде шукталтмешке, пылпомыш да мланде пытыме марте, закон гыч ик изи букват, ик удыралтышат ок йом. Тыгеракын, кӧ эн изи ик кӱштымашым пудырта да весымат тыге ышташ туныкта гын, тудо Пылпомыш Кугыжаныште эн изилан шотлалташ тӱҥалеш, а кӧ кӱштымым шукта да тидлан еҥ-влакым туныкта, тудо Пылпомыш Кугыжаныште кугулан шотлалтеш. Тыланда ойлем: Юмын эрыкшым закон туныктышо ден фарисей-влак деч утларак ӱшанлын шуктен огыда шого гын, те Пылпомыш Кугыжанышыш пурен огыда керт.
Кугезе-влаклан ойлымым те колында: ”Ит пушт”. Кӧ пуштеш, суд ончылно мутым кучышаш. А Мый тыланда ойлем: кӧ шкенжын лишылжылан арам шыдешкен ила, суд ончылно мутым кучышаш, а кӧ лишыл еҥжым нимолан йӧрдымӧ манеш – Синедрион ончылно мутым кучаш тӱҥалеш, а кӧ весым ”ораде” манеш, тудо тамык тулыш логалеш.
Тугеже тый, жертвенник деке надыретым кондышетла, лишыл еҥетын ӱмбакет ӧпкеже улмым тушто шарналтет гын, надыретым тиде вер ончылан кодо, ондак кае да лишылет дене сӧрасе, вара веле пӧртыл да надыретым пу. Тавалыше еҥ дене корнышто пырля улмыда годымак писын сӧрасе. Уке гын, тудо тыйым судьялан пуа, а тудыжо ороллан пуа да тыйым казаматыш шындат. Тылат чынак ойлем: чыла пуышашлыкетым пытартыш ырет марте тӱлымешке, тушечын от лек.
Кугезе-влаклан мом каласымым те колында: ”Ит яжарлане”. А Мый тыланда ойлем: кӧ ӱдырамаш ӱмбаке сутланен онча, ынде шке шӱм-чоныштыжо тудын дене яжарланен. Тыйым пурла шинчат алгаштара гын, тудым луктын шу. Уло капет тамыкыш кудалталтмешке, посна ужашет пыта гын, тылат сайрак лиеш. Тыйым пурла кидет алгаштара гын, тудым руал ойыро да ӧрдыжкӧ шу. Уло капет тамыкыш кудалтыме лиймеш, посна ужашет пыта гын, тылат сайрак.
Тыгак каласыме: ”Кӧ ватыжым ойырен колта, тудо ватыжлан ойырлымо нерген кагазым пуышаш”. А Мый тыланда ойлем: кӧ ватыжым яжарланыме титак деч посна ойыра, тудо ӱдырамашым яжарланымашке шӱка, а кӧ ойырен колтымым марлан налеш, тудо яжарлана.
Кугезе-влаклан тыге ойлымымат те колында: ”Товатлыметым ит пудырто, Господь ончылно товатлыметым шуктен шого”. А Мый тыланда ойлем: йӧршын ида товатле. Ида товатле пылпомыш дене: тудо Юмын престолжо. Ида товатле мланде денат: тудо Юмын йолым шындыме верже. Иерусалим дене ида товатле: тудо кугу Кугыжан олаже. Шке вует дене ит товатле: тый ик ӱп пырчымат ошышкат, шемышкат савырен от керт. ”Туге” але ”уке” манын веле каласыза, тылеч утыжо – осал дечын.
Мом ойлымым те колында: ”Шинчалан – шинча, пӱйлан – пӱй”. А Мый тыланда ойлем: осалым ыштыше ваштареш ида шогал. Кӧ тыйын пурла шӱргетым сова гын, весыжымат тудлан савырал. Тувыретым шупшын налаш манын, кӧ тый денет судитлалтнеже, тудлан ӱмбал вургеметымат пу. А кӧ тыйым ик меҥгым виеш пеленже коштыкта, тудын дене кокытым кае. Тый дечет йодшылан пу, кӱсын налаш шонышо деч тупынь ит савырне.
Мом ойлымым те колында: ”Лишылетым йӧрате, тушманетым ужмышудымо лий”. А Мый тыланда ойлем: тушмандам йӧратыза, тендам каргышылан порым тыланыза, тендам ужмышудымо-влаклан порым ыштыза, тендам вурсышо да поктылшо верч кумалза. Тунам те Пылпомышсо Ачадан чын шочшыжо улыда. Осал-влакланат, поро-влакланат Тудо шке кечыжым луктеш, чын ыштышыланат, чын огыл ыштышыланат йӱрым колта.
Те шкендам йӧратыше-влакым йӧратеда гын, тидланже тыланда могай суап лиеш? Йозак погышо-влакат тыгак огыт ыште мо? Те шкендан лишыл-влакдам гына саламледа гын, мом поснак сайым ыштеда? Чын Юмым палыдыме-влакат тыгак огыт ыште мо? Сандене, Пылпомышсо Ачада могай поро, тугаяк поро лийза.

Ouvir Мф 5