If you have would like a copy of this version please contact info@davaraudiobibles.org

The Dawro Bible, CC-BY-SA-4.0, The Word for the World International and The Word for the World Ethiopia (Text). Dawro Audio Bible, CC-BY-SA-4.0, Davar Partners International, 2018. (Audio).

ጌሻ ማጻፋ

የሱስ ዮሃንሳዋፐ ዳርያ ባረና ካልያዋንታ ባረኮ ሺሼነ ጻማቄ ግያዋ ፓርሳዋቱ ስሴዳዋ የሱስ ኤሬዳ ዎደ፥ ይሁዳ አጊደ፥ ጋሊላ ቤዳ፤ ግዶፐነ፥ የሱሳ ካልያዋንቱ ጻማቄዳዋፐ አትን፥ የሱስ ባረ ሁጰዉ ኦናነ ጻማቅቤና። ጋሊላ ቢደ፥ ሳማርያና አናዌ አ አሸናባ ግዴዳ።
ሄዋ ድራዉ፥ ያቆብ ባረ ናኣ ዮሴፎ እሜዳ ጋድያ ማታን ደእያ ስካሮ ጌተትያ ሳማርያ ካታማ ቤዳ። ሄ ሳኣን ያቆባ ሃ ኦላይ ደኤ፤ የሱስ ሀመታን ዳቡሪደ፥ ሄ ሃ ኦላ ማታን ኡቴዳ። ሄ ዎደ ሳአይ ኡሱፑን ሳትያ ሄራ።
ሳማርያ ምሽራታ ሃ ዱቃናዉ ዬዳዉኖ የሱስ፥ “ታና ሃ ኡሻርኪ!” ያጌዳ። የሱሳ ካልያዋንቱ ቁማ ሻማናዉ ካታማ ቤድኖ።
ሄ ምሽራታ ዛራደ አ፥ “ኔን አይሁዳ አሳ ግዳደ፥ ሳማርያ ማጫ አሳ ግዴዳ ታና፥ ዎታ ደኡዋ እምያ ሃ ኡሻ ጋይ?” ያጋዱ፤ አያዉ ጎፐ፥ አይሁዳቶነ ሳማርያ አሳዉ እትፐተይ ባይና ድራሳ።
የሱስ ዛሪደ እዞ፥ “ኔን ጾሳ እሞታነ ቃይ ኔና ‘ታና ሃ ኡሻ’ ግያዌ ኦነንቶ ኤርያዋ ግድንቶ፥ አ ዎሳናሳ፤ እካ ነዉ ደኡዋ እምያ ሃ እማና” ያጌዳ።
ምሽራታ ዛራደ፥ “ጎዳዉ፥ ነዉ ዱቂያባይ ባዋ፤ ኦላይካ ጪሙዋ። ያትና፥ ደኡዋ እምያ ሃ ሀቃፐ አካኒ? ኑዉ ሀ ሃ ኦላ እሜዳ ኑ አዉዋ ያቆባፐ ኔን ዳራይ? እ፥ አ ናናይነ አ መሂ ሀዋፐ ኡሼድኖ” ያጋዱ።
የሱስ ዛሪደ፥ “ሀ ሃፐ ኡሽያ ኦንነ ላኤንዋ ሳመታናዋ። ሽን ታን እምያ ሃ ኡሽያ ኦንነ ላኤንዋ ሳመተና። ታን እምያ ሃይ ሄ አ ግዶን መና ደኡዋስ ፑልትያ ፑልቱዋ ግዳናዋ” ያጌዳ።
ምሽራታ፥ “ጎዳዉ፥ ታን ሳመተና ማላነ ሃ ትካናዉካ ሃ ዬና ማላ፥ ታዉ ሄ ሃ እማ!” ያጋዱ።
የሱስ እዞ፥ “ባደ ነ አስና ጼሳደ ሃ ስማ” ያጌዳ።
ምሽራታ ዛራደ፥ “ታዉ አስናይ ባዋ” ያጋዱ።
የሱስ፥ “ታዉ አስናይ ባዋ ግያዋን ቱሙዋ ጋዳ። ኔን እቼሹ አስና ገላዳ፤ ሀእ ኔናና ደእያ ብታኒ ነ አስና ግደና። ኔን ሀእ ታዉ ኦዴዳዌ ቱማ” ያጌዳ።
ምሽራታ ቃይ፥ “ጎዳዉ፥ ኔን ናብያ ግድያዋ ታ ሀእ ኤራድ፤ ኑ ሳማርያ አሳ አዎቱ ሀ ደርያን ጎይኔድኖ፤ ሽን አይሁዳቱ ህንተንቱ አሳይ ጾሳዉ ጎይናናዉ በስያ ሳአይ የሩሳላመና ያጊታ” ያጋዱ።
የሱስ፥ “ሀ ምሽራቴ፥ ታና አማና፤ ሀ ደርያን ዎይ የሩሳላመን አዉዋ ጾሳዉ ህንተንቱ ጎይነና ዎዲ ያናዋ። ህንተንቱ ሳማርያ አሳይ ህንተ ኤረናባዉ ጎይኒታ፤ ጾሳይ ኑና አይሁዳቱዋ ጎኤቲደ አቶተ አህያ ድራዉ፥ ኑን ኑ ኤርያዎ ጎይኔቶ። ሽን አዉዋ ጾሳዉ ቱሙዋፐ ጎይንያዋንቱ አ፥ ጌሻ አያና ዎልቃንነ ጾሳ ጾሳተዳን ጎይንያ ዎዲ ማታቴዳ፤ ኡባ ሀእካ ጋኬዳ። አያዉ ጎፐ፥ አሳ ባረዉ ጎይናና ማላ፥ አዉ ጾሳይካ ሀ ኦግያን ጎይንያዋንታ ኮዬ። ጾሳይ አያና፤ አዉ ጎይንያዋንቱካ ጌሻ አያና ዎልቃን ጾሳ ጾሳተዳን ጎይናናዉ በሴ” ያጌዳ።
ምሽራታ፥ “ማስህያ ጌተትያ ኦከቶዌ ያናዋ ታን ኤራይ። እ ይያ ዎደ ኑዉ ኡባባ ኦዳናዋ” ያጋዱ።
የሱስ፥ “ሀ ኔናና ሃሳይያዌ ታን አ” ያጌዳ።
ሀዋ ኡንቱንቱ ሃሳይሽን፥ የሱሳ ካልያዋንቱ ቤዳሳፐ ስሜድኖ። የሱስ ምሽራትና ሃሳይሽን ኡንቱንቱ በኢደ ዳርስ ማላለቴድኖ፤ ሽን ምሽራቶ፥ “አያ ኮያይ?” ዎይ የሱሳ፥ “ኢናና አያዉ ሃሳያይ?” ጊደ ኦቾዌ ኦንነ ባዋ።
ሄዋፐ ጉይያን፥ ምሽራታ ባረ ሃ ኦቱዋ አጋ ባሻ ጉየ ካታማ ባደ አሳዉ፥ “ታን ኦዳዋ ኡባ ታዉ ኦዴዳ ብታንያ በአናዉ ደንድተ፤ ሄዌ ክርስቶሳ ግዳንዴሻ?” ያጋዱ። አሳይ ካታማፐ ከሲደ፥ የሱሳኮ ቤዳ።
ሄዌ ሀንሽን፥ አ ካልያዋንቱ የሱሳ፥ “ጉባ ማርኪ!” ያጊደ ዎሴድኖ።
ሽን እ፥ “ታዉ ህንተንቱ ኤረና ቁማይ ታን ምያዌ ደኤ” ያጌዳ።
ሄዋ ድራዉ፥ አ ካልያዋንቱ ባረንቱ ግዶን፥ “አዉ ምያባ አሄዳ አሳይ ደአንዴሻ?” ያጌድኖ።
የሱስ ኡንቱንቶ፥ “ታ ቁማይ ታና ኪቴዳዋ ሸንያ ኦሱሳነ አ ኦሱዋ ፖሉሳ። ህንተንቱ፥ ‘ኦይዱ አገናፐ ጉይያን፥ ካይ ጫከታናዋ’ ጊክቴዬ? ታን ህንተንቶ ኦዳይ፤ ጎሻ ሎይ ጼልተ፤ ካይ ጫካ በሴዳ። ዘርያዌነ ጫክያዌ እትፐ ናሸታና ማላ፥ ጫክያዌ ድርጉዋ አኬነ ካ መና ደኦ ሺሼ። ሀ ጋሱዋን፥ ‘እቱ ዘሬ፤ ቃይ እቱ ጫኬ’ ግያ ሃሳያይ ቱማ። ህንተንቱ ዳቡርቤናዋ ጫካና ማላ፥ ታን ህንተንታ ኪታድ፤ ሀራቱ ኦ ዳቡሬድኖ፤ ህንተንቱ ሀራቱዋ ዳቡራን ገሌድታ” ያጌዳ።
ምሽራታ፥ “እ ታን ኦዳ ኡባባ ኦዴዳ” ጋደ ማርካቴዳ ድራዉ፥ ሄ ካታማን ደእያ ሳማርያ አሳፐ ጮራይ የሱሳ አማኔዳ። ሳማርያ አሳይ የሱሳኮ ዬዳ ዎደ፥ ባረንቱ ማታን ጋምአና ማላ፥ የሱሳ ዎስና እ ያን ላኡ ጋላሳ ኡቴዳ።
እ ኦድያ ቃላ ድራዉ፥ ካሰዋፐ ጮራ አሳይ አማኔዳ፤ ቃይ ኡንቱንቱ ምሽራቶ፥ “ኑን ኑ ሁጰዉ እ ግያዋ ስሲደ አማኔዳዋፐ አትን፥ ኔን ማርካቴዳ ድራሳ ግደና፤ እ ቱሙ አላምያ አሳ አሽያዋ ግድያዋካ ኑን ኤሬዶ” ያጌድኖ።

ላኡ ጋላሳፐ ጉይያን፥ የሱስ ሳማርያፐ ከሲደ፥ ጋሊላ ጋድያ ቤዳ። አያዉ ጎፐ፥ እ ባረ ሁጰዉ፥ “ናቢ ባረ ጋድያን ቦንቼተና” ያግ ኦዴዳ። የሱስ ጋሊላ ጋኬዳ ዎደ፥ ጋሊላ አሳይ አ ሞኬዳ፤ ፓስጋ ቦንችያ ጋላስ ኡንቱንቱ የሩሳላመን ደእያ ድራዉ፥ እ ኦዳ ኡባባ በኤድኖ።
የሱስ ሃ ዎይንያ ኡሻ ከሴዳ፥ ጋሊላን ደእያ ቃና ካታማ ቤዳ። ቅፍርናሆማን አ ናአይ ሳከትያ፥ ካትያ ጎለን ኦያ እት ካፑ ደኤ። የሱስ ይሁዳፐ ጋሊላ ዬዳዋ ሄ ካፑ ስሲደ፥ አኮ ዪደ ሀይቃናዉ ማቴዳ ባረ ናኣ ቢደ ፓና ማላ፥ የሱሳ ዎሴዳ።
የሱስ ሄ ካፑዋ፥ “ጾሳይ ኦያ ማላታነ ሄቾ ጊስያባ በኤናን ደኢደ፥ ህንተንቱ አይነ አማንክታ” ያጌዳ።
ሄ ካፑ ዛሪደ፥ “ጎዳዉ፥ ታ ናአይ ሀይቀናን ደእሽን፥ ታናና ባርኪ” ያጌዳ።
የሱስ፥ “ባ፤ ነ ናአይ ፓጻ ደአናዋ!” ያጌዳ።
ሄ ካፑ የሱስ ጌዳዋ አማኒደ ቤዳ። እ ባረ ጎለ ቢሽን፥ አ ቆማቱ አናና ኦግያን ጋከቲደ አ፥ “ነ ናአይ ፓጻ ደኤ” ጌድኖ።
እ ባረ ቆማቱዋ ባረ ናአዉ አይ ሳትያን ኬኬደንቶ ኦችና ኡንቱንቱ፥ “ዝኖ ላፑ ሳትያን ቆጹ አ አጌዳ” ያጌድኖ። ናኣ አዉ የሱስ ባረዉ፥ “ነ ናአይ ፓጻ ደአናዋ” ጌዳዌ ሄ ሳትያና ግዴዳዋ ሀሳዬዳ። ሄዋ ድራዉ፥ እነ አ ሶይ አሳይ ኡባይ አማኔድኖ።
ሀዌ የሱስ ይሁዳፐ ጋሊላ ዪደ ኦዳ ላኤን ማላታ።

Ouvir ዮሃንሳ ምሽራቹዋ 4