1လေးစားအပ်ပါသော သော်ဖိလု၊ ကျွန်ုပ်တို့လောကတွင် ဖြစ်ပျက်ခဲ့သော အံ့ဖွယ်အကြောင်းအရာများကို 2အစဦးကပင် မျက်မြင်သက်သေဖြစ်ခဲ့ကြသောသူများနှင့် ဘုရားရှင်၏သတင်းစကားကို ဟောပြောသွန်သင်သူတို့ ပြောဆိုခဲ့ကြသည့်အတိုင်း လူများစွာတို့က ကျွန်ုပ်တို့ထံသို့ ရေးသားဖော်ပြခဲ့ကြပါသည်။ 3ထို့ကြောင့် ကျွန်ုပ်သည်လည်း ဖြစ်ပျက်ခဲ့သည့် အကြောင်းအရာအလုံးစုံတို့ကို ဂရုတစိုက် စုံစမ်းလေ့လာခဲ့ပြီး 4သင်တို့ သင်ယူခဲ့ရသည့် အကြောင်းအရာတို့သည် မှန်ကန်ကြောင်းကို သိစေရန် သင်တို့ထံ ဤကဲ့သို့အစဉ်အတိုင်း ရေးသားလိုက်ရခြင်း ဖြစ်ပါသည်။ 5ယုဒပြည်၌ ဟေရုဒ်မင်းကြီး အုပ်စိုးသောအချိန်တွင် ဇာခရိအမည်ရှိသော ဂျူးပုရောဟိတ်သည် အဘိယဟုခေါ်သော ပုရောဟိတ်အဖွဲ့ဝင် တစ်ဦးဖြစ်လေ၏။ သူ၏ဇနီး ဧလိရှဗက်မှာလည်း အာရုန်ဟုခေါ်သော ပုရောဟိတ်၏မျိုးရိုးမှ ဆင်းသက်လာသူဖြစ်၏။ 6သူတို့နှစ်ဦးသည် ဘုရားရှင်၏ပညတ်တော်တို့ကို အမှားမရှိ လိုက်နာကြသဖြင့် ဘုရားရှင်၏ရှေ့တော်၌ ဖြောင့်မတ်သောသူyများ ဖြစ်ကြ၏။ 7သို့ရာတွင် သူတို့၌ သားသမီးမရှိကြချေ။ အဘယ်ကြောင့်ဆိုသော် ဧလိရှဗက်သည် မြုံသောကြောင့် သားသမီးထွန်းကားခြင်းမရှိဘဲ သူတို့နှစ်ဦးစလုံးမှာလည်း အသက်အရွယ် လွန်စွာအိုမင်းနေသောကြောင့်ဖြစ်ကြ၏။ 8တစ်နေ့တွင် ပုရောဟိတ်ဇာခရိသည် ဗိမာန်တော်z၌ အလှည့်ကျတာဝန်ကို ဆောင်ရွက်နေစဉ် 9ဘုရားရှင်ကို အလုပ်အကျွေးပြုရသော ပုရောဟိတ်တို့၏ဓလေ့ထုံးစံအတိုင်း ဗိမာန်တော်ထဲတွင် အမွှေးနံ့သာထွန်းညှိပူဇော်ရန် မဲနှိုက်၍ ရွေးချယ်ရာ၌ သူ့အား ရွေးချယ်ခံရ၏။ 10သို့ဖြစ်၍ ဇာခရိသည် အမွှေးနံ့သာများ ထွန်းညှိပူဇော်နေသောအချိန်၌ လူအများသည် ဗိမာန်တော်ဝန်း၌ ရပ်လျှက်ဆုတောင်းနေကြ၏။ 11ထိုအချိန်၌ ဘုရားရှင်စေလွှတ်တော်မူသော နတ်ဒေဝါaတစ်ပါးသည် ဇာခရိအမွှေးနံ့သာများ ထွန်းညှိပူဇော်နေရာ ပလ္လင်၏လက်ယာဘက်၌ သူ့အား ကိုယ်ထင်ပြလျှက် ရပ်နေသည်ကို 12ဇာခရိမြင်လျှင် သူသည် အလွန်ကြောက်လန့်၍ တုန်လှုပ်လေ၏။ 13သို့သော် နတ်ဒေဝါက သူ့အား “မကြောက်နှင့်၊ ဇာခရိ။ အကြောင်းမူကား၊ သင်၏ဆုတောင်းသံကို ဘုရားရှင်ကြားသိတော်မူပြီ။ သင့်ဇနီး ဧလိရှဗက်သည် သင့်အတွက် သားယောကျ်ားတစ်ဦးကို ဖွားမြင်ပေးလိမ့်မည်။ သင်သည် သူ့ကို ယောဟန်ဟု အမည်ပေးရမည်။ 14သူမွေးဖွားသည့်အချိန်၌ သင်တို့ အလွန်ရွှင်လန်းဝမ်းမြောက်ရသကဲ့သို့ အခြားသူများသည်လည်း ဝမ်းမြောက်ပျော်ရွှင်ရလိမ့်မည်။ 15အကြောင်းမူကား ယောဟန်သည် ဘုရားရှင်၏ရှေ့တော်မှောက်၌ ကြီးကျယ်မြင့်မြတ်သောသူဖြစ်လိမ့်မည်။ သူသည် ဘယ်သောအခါမျှ စပျစ်ရည်နှင့် အရက်သေစာတို့ကို သောက်သုံးလိမ့်မည်မဟုတ်။ မိခင်ဝမ်းထဲမှာ ရှိစဉ်ကတည်းကပင် သူသည် ဉာဏ်အလင်းတော်၏ဦးဆောင်ထိန်းချုပ်မှုအောက်တွင် ရှိနေလိမ့်မည်။ 16သူသည် များစွာသော အစ္စရေးလူမျိုးတို့ကို အပြစ်ဒုစရိုက်မှ နောင်တသံဝေဂရစေပြီး သူတို့၏အရှင်သခင်ဖြစ်တော်မူသော ဘုရားရှင်ဘက်သို့ ပြန်လှည့်စေလိမ့်မည်။ 17ယောဟန်သည် အရိယာသူတော်စင်cဧလိယကဲ့သို့ ဉာဏ်အလင်းတော်နှင့် တန်ခိုးတော်ရှိပြီး အရှင်သခင်၏ရှေ့တော်ပြေး ဖြစ်လိမ့်မည်။ သူသည် မိဘများမှ သားသမီးတို့အပေါ်ထားသည့် စိတ်နှလုံးကို ပြောင်းလဲစေပြီး နာခံခြင်းမရှိသောသူတို့အား ဖြောင့်မတ်မှန်ကန်သည့် အသိဉာဏ်ပညာတို့ကို သင်ပေးလိမ့်မည်။ ထိုမှသာ လူတို့သည်လည်း အရှင်သခင်ကြွရောက်လာချိန်၌ အဆင်သင့်ဖြစ်နေကြလိမ့်မည်” ဟုဆိုလေ၏။ 18ထိုအခါ ဇာခရိကလည်း နတ်ဒေဝါအား “ဤကဲ့သို့ ဖြစ်လာနိုင်မည်ဆိုသည်ကို အကျွန်ုပ်မည်ကဲ့သို့ သိနိုင်ပါမည်နည်း။ အကြောင်းမူကား အကျွန်ုပ်တို့ ဇနီးမောင်နှံနှစ်ဦးစလုံးသည် အလွန်ပင်အိုမင်းနေကြပါပြီ” ဟုပြန်ပြောလိုက်သဖြင့် 19နတ်ဒေဝါက ဇာခရိအား “ငါသည် ဘုရားရှင်၏ရှေ့တော်၌ ခစားရသည့် ဂါဗြေလဖြစ်၏။ ဤမင်္ဂလာသတင်းကောင်းကို သင့်ထံ လာရောက်ဟောကြားဖို့ရန် ဘုရားရှင်သည် ငါ့အား စေလွှတ်လိုက်ခြင်းဖြစ်၏။ 20အချိန်တန်လျင် ဖြစ်လာမည့် ငါ့စကားကို သင်မယုံကြည်သည့်အတွက် ထိုအဖြစ်အပျက်များ ဖြစ်မလာခင်အချိန်တိုင်အောင် သင်သည် စကားမပြောနိုင်ဘဲ ဆွံ့အနေလိမ့်မည်” ဟုဆိုလေ၏။ 21ထိုသို့ ဇာခရိနှင့် နတ်ဒေဝါတို့ ဗိမာန်တော်အတွင်း၌ စကားပြောနေကြစဉ် အပြင်ဘက်တွင်ရှိသော လူထုပရိသတ်တို့သည် ဇာခရိအား စောင့်ဆိုင်းလျှက် ရှိကြ၏။ သူတို့သည် ဗိမာန်တော်အတွင်းတွင် ဇာခရိအဘယ်ကြောင့် အချိန်ကြာမြင့်စွာ ရှိနေသည်ကို အံ့ဩလျက်ရှိကြ၏။ 22ဇာခရိ အပြင်သို့ ပြန်လည်ထွက်လာသည့်အချိန်တွင် စကားမပြောနိုင်တော့သဖြင့် ဗိမာန်တော်အတွင်း၌ရှိနေစဉ်က ဇာခရိသည် နိမိတ်လက္ခဏာတစ်ခုခုကို မြင်ခဲ့ရသည်ဟု လူထုပရိသတ်တို့က နားလည်သွားကြလေ၏။ ဇာခရိသည်လည်း စကားပြောနိုင်ခြင်းမရှိဘဲ လူတို့အား ဆက်လက်၍ ခြေဟန်လက်ဟန်ဖြင့်သာ အမူအရာများပြသနေခဲ့လေ၏။ 23ထို့နောက် ဇာခရိသည် ဗိမာန်တော်၌ ပုရောဟိတ်တို့ ပြုလုပ်ရမည့် အမှုကိစ္စအဝဝတို့ကို ဆောင်ရွက်ပြီးစီးသောအခါ သူ၏အိမ်သို့ပြန်လေ၏။ 24အချိန်အတန်ကြာသောအခါ ဇာခရိ၏ဇနီး ဧလိရှဗက်တွင် ကိုယ်ဝန်ရှိလာ၍ 25သူမက “အရှင်ဘုရားသည် သူ၏မဟာကရုဏာတော်ဖြင့် ငါ့အား ကိုယ်ဝန်ဆောင်စေခြင်းအခွင့်ကိုပေးပြီး လူအများ၏ကဲ့ရဲ့အထင်သေးခြင်းမှ ငါ့အား ဖယ်ရှားပေးတော်မူခဲ့ပြီ” ဟုသူမကိုယ်သူမဆိုလျှက် ငါးလခန့် ကြာမြင့်သည်အထိ လူအများအကြားသို့ သွားလာခြင်းမပြုဘဲနေလေ၏။ 26ထို့နောက် ဧလိရှဗက်ကိုယ်ဝန်ခြောက်လခန့်ရှိသောအခါ ဘုရားရှင်သည် နတ်ဒေဝါဂါဗြေလအား ဂါလိလဲပြည်ရှိ နာဇရက်မြို့သို့ စေလွှတ်ကာ 27မာရိဟုခေါ်သော အပျိုစင်တစ်ဦးထံသို့ သွားရောက်၍ သတင်းစကားပြောဆိုစေခဲ့၏။ မာရိသည် ဘုရင်ဒါဝိဒ်၏မျိုးရိုးမှ ဆင်းသက်လာသူဖြစ်သည့် ယောသပ်နှင့် စေ့စပ်ထားသူဖြစ်သည်။ 28နတ်ဒေဝါက မာရိအား နှုတ်ခွန်းဆက်ပြီးနောက် “ဘုရားရှင်ဟာ သင်နှင့်အတူ ရှိတော်မူပြီး သူ၏မဟာကရုဏာမေတ္တာတော်ကို သင့်အပေါ်မှာ အခြားအမျိုးသမီးများ အားလုံးထက်သာ၍ ပြသလေပြီ” ဟုပြောကြားလေသည်။ 29သို့သော် မာရိသည် နတ်ဒေဝါ၏စကားတို့ကို ကြားသောအခါ အလွန်ပင်စိတ်ရှုပ်ထွေးပြီး နတ်ဒေဝါ၏စကားများသည် မည်သည်ကိုဆိုလိုကြောင်း တွေးတောနေလေ၏။ 30ထို့နောက် နတ်ဒေဝါက သူမအား “မာရိ၊ ကြောက်ရွံ့ခြင်းမရှိနှင့်။ အကြောင်းမူကား ဘုရားရှင်သည် သင့်အား မျက်နှာသာပေးတော်မူလေပြီ။ 31သင်၌ ကိုယ်ဝန်ဆောင်၍ သားတော်တစ်ပါးဖွားမြင်လိမ့်မည်။ သင်သည် သူ့အမည်ကို ယေရှုဟူ၍ မှည့်ခေါ်ရမည်။ 32သူသည် ကြီးမြတ်သောသူတစ်ဦးဖြစ်လာပြီး အမြင့်မြတ်ဆုံးသောဘုရားရှင်၏သားတော်ဟု ခေါ်ဝေါ်ခြင်းကို ခံရမည်။ ဘုရားရှင်သည် သူ့အား သူ၏ဘိုးဘေး ဘုရင်ဒါဝိဒ်ကဲ့သို့ သူ၏လူမျိုးများကို အုပ်စိုးနိုင်သည့်အခွင့်ကို ပေးအပ်တော်မူလိမ့်မည်။ 33သူသည် အစ္စရေးလူမျိုးအပေါင်းတို့ကိုd ရှင်ဘုရင်အဖြစ် ထာဝရအုပ်စိုးတော်မူပြီး သူ၏နိုင်ငံတော်သည်လည်း အဘယ်သောအခါမျှ ပျက်သုန်းလိမ့်မည်မဟုတ်” ဟုဆိုလေ၏။ 34ထိုအခါ မာရိက “အကျွန်ုပ်သည် အပျိုစင်တစ်ဦးဖြစ်သည့်အတွက် ဤအရာသည် မည်သို့ဖြစ်နိုင်ပါမည်နည်း” ဟုနတ်ဒေဝါအား ဆိုသဖြင့် 35နတ်ဒေဝါကလည်း “ဉာဏ်အလင်းတော်သည် သင့်ထံသို့ ဆင်းသက်၍ ဘုရားရှင်၏ဘုန်းတန်ခိုးတော်သည်လည်း သင့်အပေါ်၌ လွှမ်းခြုံလိမ့်မည်။ ဤကဲ့သို့ မွေးဖွားလာမည့် မြင့်မြတ်သောကလေးငယ်သည်လည်း ဘုရားရှင်၏သားတော်ဟု ခေါ်ဝေါ်ခြင်းခံရမည်။ 36သင်၏ဆွေမျိုး ဧလိရှဗက်သည်လည်း အိုမင်းမစွမ်း၍ လူအများက ကိုယ်ဝန်မဆောင်နိုင်ဟု ထင်ကြသော်လည်း ယခုတွင်မူ သူမသည် ကိုယ်ဝန်ဆောင်နေသည်မှာ ခြောက်လခန့်ကြာမြင့်လေပြီ။ 37အကြောင်းမူကား ဘုရားရှင် မတတ်နိုင်သည့်အရာဟူ၍ မရှိသောကြောင့်ဖြစ်၏” ဟုပြောဆိုလေသည်။ 38ထိုအခါ မာရိက “ဘုရားရှင်၏အစေခံတစ်ဦးဖြစ်ပါသော အကျွန်ုပ်၌ ဘုရားရှင်၏အလိုတော်အရ သင်ယခုပြောဆိုသော စကားများအတိုင်းပင် ဖြစ်ပါစေသော်” ဟုဆိုလေ၏။ ထို့နောက် နတ်ဒေဝါသည်လည်း မာရိထံမှ ထွက်ခွာသွားလေ၏။ 39များမကြာမီတွင် မာရိသည် အသင့်ပြင်၍ ဇာခရိနေထိုင်ရာ ယုဒပြည်ရှိ တောင်ပေါ်မြို့တစ်မြို့သို့ အလျင်အမြန်သွားလေ၏။ 40ထိုနေရာသို့ရောက်သောအခါ သူမသည် ဇာခရိ၏အိမ်ထဲသို့ဝင်၍ ဇာခရိ၏ဇနီးဖြစ်သူ ဧလိရှဗက်အား နှုတ်ခွန်းဆက်လေ၏။ 41မာရိ၏နှုတ်ခွန်းဆက်စကားကို ကြားရသည်နှင့်တစ်ပြိုင်နက် ဧလိရှဗက်၏ဝမ်းထဲမှ ကလေးငယ်သည် လှုပ်ရမ်းကာ ဧလိရှဗက်သည်လည်း ဉာဏ်အလင်းတော်အားဖြင့် ဝမ်းမြောက်ရွှင်လန်းပြီး 42သူမသည် မာရိအား “ဘုရားရှင်သည် အခြားသော အမျိုးသမီးများအားလုံးထက် သင့်အား သာ၍မင်္ဂလာရှိစေပြီး သင်မွေးဖွားလာမည့် ကလေးငယ်သည်လည်း မင်္ဂလာရှိပါ၏။ 43ဤကဲ့သို့ အရှင်၏မယ်တော်သည် အကျွန်ုပ်ထံသို့ လာရသည့်အခွင့်ထူးကို အဘယ်ကြောင့်အကျွန်ုပ်ခံယူရပါသနည်း။ 44အကြောင်းမူကား အသင်၏နှုတ်ခွန်းဆက်သံကို ကြားရသည်နှင့်ချက်ချင်း အကျွန်ုပ်၏ဝမ်းဗိုက်ထဲမှ ကလေးငယ်သည် ကြီးစွာသောပျော်ရွှင်မြူးတူးခြင်းဖြင့် လှုပ်ရမ်းပါ၏။ 45ဘုရားရှင်၏သတင်းစကားသည် အမှန်တကယ်ပင် ဖြစ်လာလိမ့်မည်ဟု ယုံကြည်သောသင်သည်လည်း မင်္ဂလာရှိပါပေ၏” ဟုကျယ်လောင်သောအသံဖြင့် ဟစ်ကြွေးလေသည်။ 46ထိုအခါ မာရိကလည်း “ဘုရားရှင်၏ကြီးမြတ်လှစွာသော ဘုန်းတန်ခိုးတော်ကို အကျွန်ုပ်၏စိတ်နှလုံးထဲမှ ချီးမွမ်းထောပနာပြုပါ၏။ 47အကျွန်ုပ်၏စိတ်ဝိညာဉ်သည်လည်း ကယ်တင်ရှင်ဘုရားရှင်ထံတော်၌ အားရရွှင်လန်းပါ၏။ 48အကြောင်းမူကား ဘုရားရှင်သည် သူ၏နိမ့်ကျသောအစေခံဖြစ်သည့် အကျွန်ုပ်ကို မေ့လျော့မထားပေ။ ယခုအချိန်မှစ၍ နောင်လာနောင်သားအပေါင်းတို့သည်အကျွန်ုပ်အား မင်္ဂလာရှိသောအမျိုးသမီးဟု ခေါ်ဝေါ်ကြလိမ့်မည်။ 49အကြောင်းမူကား ဘုန်းတန်ခိုးကြီးမြတ်တော်မူသော ဘုရားရှင်သည် ကျွန်ုပ်ထံ၌ ကြီးမြတ်သောအရာတို့ကို ဆောင်ရွက်ပေးတော်မူလေပြီ။ သူ၏နာမတော်သည်လည်း မြင့်မြတ်စုံလင်တော်မူပါ၏။<br> 50ခေတ်အဆက်ဆက်၌ ဘုရားရှင်သည် သူ့ကိုကြောက်ရွံ့ရိုသေသော သူတို့အား မဟာကရုဏာမေတ္တာတော်ကို အစဉ်အမြဲထင်ရှားစွာ ပြသတော်မူ၏။ 51သူသည် မာန်မာနထောင်လွှားသူ လူအပေါင်းတို့အား သူ၏တန်ခိုးတော်ဖြင့် လွင့်စင်စေတော်မူ၏။ 52သူသည် အုပ်စိုးသောသူတို့အား သူတို့၏ပလ္လင်ပေါ်မှ ဆွဲချ၍ နှိမ့်ချတတ်သူအပေါင်းတို့အား အရေးပါသောသူများ ဖြစ်စေပါ၏။ 53သူသည် ဆာလောင်ငတ်မွတ်နေသောသူတို့ကို သူတို့လိုအပ်သည့်အရာတို့ဖြင့် ကျေနပ်နှစ်သိမ့်စေ၍ ကြွယ်ဝချမ်းသာသောသူတို့ကိုမူကား လက်ချည်းဗလာ စေလွှတ်တော်မူ၏။ 54ဘုရားရှင်သည် ကျွန်ုပ်တို့၏ဘိုးဘေးဖြစ်သည့် အာဗြဟံနှင့် သူ၏မျိုးရိုးစဉ်ဆက်တို့အပေါ် အစဉ်ထာဝရ မဟာကရုဏာမေတ္တာတော်ထားရှိမည်ဟု ကတိတော်ထားခဲ့၏။ 55ယခုအခါ၌ ဘုရားရှင်သည် သူ၏ကတိတော်ကို အောက်မေ့အမှတ်ရတော်မူလေပြီ။ ထို့ကြောင့် သူသည် အကျွန်ုပ်တို့နှင့် သူ၏အမှုတော်ကို ထမ်းဆောင်သူအစ္စရေးလူမျိုးအပေါင်းတို့ကို ကူညီမစတော်မူလေပြီ”

ဟုဘုရားရှင်ကို ချီးမွမ်းထောပနာပြုလေ၏။ 56ထို့နောက် မာရိသည် ဧလိရှဗက်နှင့်အတူ သုံးလခန့်နေထိုင်ခဲ့ပြီးနောက် သူမ၏အိမ်သို့ပြန်လေ၏။ 57ထို့နောက် ဧလိရှဗက် မီးဖွားရန် အချိန်ကျလာသဖြင့် သားယောကျ်ားတစ်ဦးကို ဖွားမြင်လေ၏။ 58သူမ၏အိမ်နီးချင်းများနှင့် ဆွေမျိုးများသည် သူမအပေါ် ၌ ဘုရားရှင်၏မဟာကရုဏာမေတ္တာတော်ကြီးမားပုံကို ကြားသိကြသဖြင့် သူမနှင့်ထပ်တူ ရွှင်လန်းဝမ်းမြောက်ကြရလေ၏။ 59ထို့နောက် ကလေးငယ် မွေးဖွားပြီး ရှစ်ရက်မြောက်သောနေ့တွင် အရေဖျားလှီးမင်္ဂလာeကဲ့သို့သော ဆောင်ရွက်ရန်ဝတ္တရားများကို ဆောင်ရွက်ရန် လူများရောက်လာစဉ်တွင် သူတို့သည် ကလေးငယ်ကို ဖခင်ဖြစ်သူ၏အမည်ကိုယူ၍ ဇာခရိဟု အမည်ပေးလိုကြ၏။ 60သို့သော် မိခင်ဖြစ်သူဧလိရှဗက်က ငြင်းဆန်ကာ “ထိုသို့မဟုတ်ပါ။ ကလေးငယ်အား ယောဟန်ဟု အမည်မှည့်ခေါ်ရမည်” ဟုဆိုလေ၏။ 61ထိုအခါ လူအပေါင်းတို့ကလည်း သူမအား “သို့သော် သင်၏မျိုးရိုး၌ ဤသို့သောအမည်ရှိသူ တစ်စုံတစ်ဦးမျှမရှိ” ဟုဆိုကြပြီးနောက် 62သူတို့သည် ကလေးငယ်၏ဖခင်ဖြစ်သူ ဇာခရိအား လက်ဟန်ခြေဟန်ဖြင့် ကလေးငယ်ကို မည်ကဲ့သို့သောအမည်ကို မှည့်ခေါ်လိုသနည်းဟု မေးမြန်းကြလေ၏။ 63ထိုအခါ ဇာခရိသည် ကျောက်သင်ပုန်းတစ်ချပ်ကို တောင်းယူလိုက်ပြီး သူ၏သားအမည်မှာ ယောဟန်ဖြစ်သည်ဟု ချရေးလိုက်သဖြင့် မြင်တွေ့ရသူ လူအပေါင်းတို့မှာလည်း အံ့အားသင့်သွားကြလေ၏။ 64ထိုခဏချင်းတွင် ဇာခရိသည် ပြန်လည်စကားပြောလာနိုင်ကာ ဘုရားရှင်၏ဂုဏ်ကျေးဇူးတော်ကို စတင်ချီးမွမ်းလေ၏။ 65အိမ်နီးချင်းများသည် ထိုအဖြစ်အပျက်ကို မြင်သောအခါ ကြောက်ရွံ့တုန်လှုပ်သွားခဲ့ကြလေ၏။ ထို့ပြင် လူအားလုံးတို့သည်လည်း ထိုသတင်းအား ယုဒပြည်တောင်ပေါ်ဒေသရှိ နေရာတိုင်း၌ ပြောဆိုနေကြလေတော့၏။ 66ထိုသတင်းတို့ကို ကြားသိကြရသောသူအပေါင်းတို့ကလည်း “ဤကလေးငယ်ကြီးပြင်းလာသောအခါ မည်ကဲ့သို့သောသူ ဖြစ်မည်နည်း” ဟုသူတို့၏စိတ်နှလုံးထဲတွင် တီးတိုးပြောဆိုနေကြလေ၏။ အကြောင်းမူကား ဘုရားရှင်၏တန်ခိုးတော်သည်လည်း ကလေးငယ်နှင့် အတူရှိနေသောကြောင့်ဖြစ်၏။ 67ထို့နောက် ကလေးငယ်၏ဖခင်ဖြစ်သူ ဇာခရိသည် ဉာဏ်အလင်းတော်၏ဦးဆောင်လမ်းပြမှုဖြင့် ဘုရားရှင်၏သတင်းစကားကို ဟောပြောသည်မှာ 68“အစ္စရေးလူမျိုးအားလုံးတို့၏ အရှင်သခင်ဖြစ်တော်မူသော ဘုရားရှင်၏ဂုဏ်ကျေးဇူးတော်ကို ချီးမွမ်းပါ၏။

သူသည် သူ၏လူမျိုးအပေါင်းတို့အား လွတ်မြောက်ခြင်းပေးရန် ရောက်လာလေပြီ။ 69ဘုရားရှင်သည် မိမိ၏အစေခံဒါဝိဒ်မှ ဆင်းသက်လာသော တန်ခိုးအာဏာကြီးမားသည့်

ကယ်တင်ရှင်အား ကျွန်ုပ်တို့အားလုံးအတွက် ပေးသနားတော်မူလေပြီ။ 70ရှေးအချိန်ကပင် ဘုရားရှင်သည် သူ၏မြင့်မြတ်သော အရိယာသူတော်စင်များမှတဆင့် မိန့်ကြားခဲ့သည့်အတိုင်း 71ဤတန်ခိုးကြီးသောကယ်တင်ရှင်သည် ကျွန်ုပ်တို့အား ရန်သူအပေါင်း၏လက်မှ ကယ်တင်မည့်အပြင် ကျွန်ုပ်တို့အား မလိုမုန်းတီးသူများ၏ဘေးအန္တရာယ်မှလည်း ကင်းလွတ်စေမည်ဖြစ်ပါ၏။ 72ဘုရားရှင်သည် ကျွန်ုပ်တို့၏ဘိုးဘေးများအပေါ် မဟာကရုဏာမေတ္တာတော်ကို ပြသတော်မူမည် ဖြစ်ကြောင်းနှင့်

သူ၏မြင့်မြတ်သောပဋိညာဉ်ကို အောက်မေ့အမှတ်ရတော်မူလိမ့်မည်ဟု မိန့်တော်မူခဲ့၏။ 73ဘုရားရှင်က ကျွန်ုပ်တို့၏ဘိုးဘေးဖြစ်သည့် အာဗြဟံကို ပေးထားခဲ့သည့်ကတိတော်အတိုင်း 74ကျွန်ုပ်တို့အား ဘေးအန္တရာယ်ပြုသူ ရန်သူများလက်မှ လွတ်မြောက်စေပြီး 75အကျွန်ုပ်တို့သည် အသက်ရှင်နေသမျှကာလပတ်လုံး ဘုရားရှင်၏ရှေ့တော်မှောက်၌ မြင့်မြတ်ခြင်းနှင့် ဖြောင့်မတ်ခြင်းရှိလျက်

အကြောက်တရားကင်းဝေးစွာဖြင့် ဘုရားရှင်ကို အလုပ်အကျွေးပြုနိုင်ကြလိမ့်မည်” ဟူ၍ဖြစ်၏။ 76ထို့နောက် ဇာခရိသည် သူ၏ကလေးငယ်အား “ငါ၏သားငယ်၊ သင့်ကို အမြင့်မြတ်ဆုံးသောဘုရားရှင်၏အရိယာသူတော်စင်ဟု ခေါ်ဝေါ်ချီးမြှင့်ကြလိမ့်မည်ဖြစ်ပြီး သင်သည် အရှင်သခင်၏ရှေ့ကသွား၍ သူ၏လမ်းကို ကြိုတင်ပြင်ဆင်ပေးရမည့်သူလည်း ဖြစ်ပေလိမ့်မည်။ 77အရှင်ဘုရားသည် လူတို့၏အပြစ်ဒုစရိုက်များကို ခွင့်လွှတ်တော်မူခြင်းအားဖြင့် ကယ်တင်ခြင်းအခွင့်ကို ပေးအပ်ရန် ရောက်လာတော့မည်ဖြစ်ကြောင်းကို သင်သည် လူတို့အား ဟောပြောရပေလိမ့်မည်။ 78ဘုရားရှင်သည် အကျွန်ုပ်တို့အပေါ်၌ မဟာကရုဏာမေတ္တာတော်ကြီးမားလှသည့်အတွက်

သူ၏လူမျိုးတော်များကို ကယ်တင်တော်မူမည်ဖြစ်၏။ 79ကောင်းကင်မှ မိုးသောက်အရုဏ်ဦးနေမင်းသည် အမှောင်ထုကို ဖယ်ရှားသကဲ့သို့ ဘုရားရှင်ထံတော်မှ လာသည့် ကယ်တင်ရှင်မေရှိယအရှင်သည်လည်း ဘုရားရှင်ကို မသိမမြင်ကြသူများနှင့် သေခြင်းတရားကို ကြောက်ရွံ့ကြသူများကို ကူညီမစဖို့ရန်

ကြွရောက်လာပါလိမ့်မည်ဖြစ်ပြီး သူသည် အားလုံးသောသူတို့အား ငြိမ်းချမ်းသာယာသည့်လမ်းသို့ ဦးဆောင်လမ်းပြပေးတော်မူပါလိမ့်မည်”

ဟုဆိုလေ၏။ 80ယခုအခါ၌ ယောဟန်သည်လည်း အရွယ်ရောက်လာပြီး အကျင့်သီလနှင့်ပြည့်စုံသူဖြစ်လာပြီးနောက် ဘုရားရှင်သည် သူ့အား အစ္စရေးလူမျိုးတို့ရှေ့၌ အမှုတော်ကို စတင်ဆောင်ရွက်စေလိုသော နေ့ရက်မတိုင်မီအထိ သူသည် တောကန္တာရထဲတွင် ကျင်လည်နေခဲ့လေသည်။

Ouvir Luke 1