Versículos bíblicos populares de Chɔ᷄ŋ 12

Partilhar

Wānā o̍ wāna̍ hɛ̄na̍ŋ mbō tōsa̍ wa̍llo̍ le̍ ya̍ pɛ̍, mɛ̄ɛ̍ mbō tōl la̍ kɔ̄ɔ̄lī. Nāa̍ ya̍ I̍ chō wā wa̍, lo̍ŋ bu̍ɛ̍i̍yāā nīa̍a̍ bɛ̍ɛ̍ a̍ cho̍ wā ni̍. Ndu̍yɛ̍, wānā o̍ wāna̍ to̍sa̍ wa̍llo̍ le̍ ya̍ pɛ̍, fi̍nyā nūu̍ chō wānā ko̍ŋ bɛ̄ɛ̄le̍ŋ kē.”

Wānā o̍ wāna̍ ka̍a̍la̍ yōōmū ndɔ̄ɔ̍ pɛ̍, mɛ̄ɛ̍ ō chō yōōmū kpe̍e̍kpe̍i̍yo̍ fūlā. Ndu̍yɛ̍, wānā o̍ wāna̍ tu̍l yōōmū ndɔ̄ɔ̍ ho̍ō chi̍e̍ēŋ na̍nu᷄ŋ le̍yɛ̍ pɛ̍, mɛ̄ɛ̍ wānā ko̍ŋ chō hūnɔ̄ɔ̄ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ sɔ̄lā.

Mī di̍mu̍l nya̍ tōnya̍a̍ wa̍la̍ŋ, tē ō ve̍ mā wōu̍ ku̍lo̍o̍ o̍ pūūlōo̍ bɛ̄ŋgu̍, o̍ ko̍ŋ kɔ̍ɔ̍lī mbō vī le̍, mɛ̄ɛ̍ ndu̍ pīlɛ̍ o̍ wa᷅ ni̍. Kɛ̍, tē ō vī pɛ̍, ō chō wūlɔ̄ɔ̄ mbō hu᷄ŋ to̍sā ku̍lu̍la̍ŋ ta̍u̍.

I̍ hi᷅ŋ māhūnāā o̍ chi̍e̍ēŋndo̍ chōo̍ māā nyɛ̄ wa̍wo̍ŋ māā wānā o̍ wāna̍ dɔ̍ū tīīnda᷄ŋndo̍ o̍ ya̍ ni̍ŋ pɛ̍, ō lo᷅ lɛ̍ o̍ mānyūm ni᷄ŋ te̍.

Wānā o̍ wāna̍ tu̍e̍ī pɛ̍ di̍ōmndā ya̍ I̍ di̍mī la̍ŋ, kɛ̍, mbō tōsa̍ nyɛ᷅ la̍ di̍mi̍ wo̍ le̍, mɛ̄ɛ̍ ō cho̍ ya̍ le̍ cho̍ ndu̍ īyāma̍ kīlūl te̍. Kāni̍ fu̍u̍le̍, ya̍ I̍ hi᷅ŋ māhūnāā le̍ mī wāŋnda̍ sɔ̄la̍ pīōŋɔ̄ɔ̍. I̍ hi̍ŋ le̍ mī I̍ ki̍lu̍l wāŋnda̍ o̍ chi̍e̍ēŋndo̍ ni᷄ŋ i̍ya᷅ma̍ le̍.

O̍ ko̍ŋ, mi̍ Mēēle̍ chu̍ā sānīo̍o̍ a̍ si̍ɛ̍ndīi̍ma̍ ba̍ā kālā mā pūm lēni᷄ŋ. Tɔ̄lɔ̄ɔ̍ ō pūm dīōla̍ŋ āā, na̍ād, a̍ ndu̍ nda̍ a̍a̍ to̍o̍si̍a̍a̍ si̍ɛ̍ndīi̍ya̍ŋ ma᷅ŋ ni̍. Mā kɛ̄ndɛ̄ wa̍la̍ŋ. Mɛ̄ɛ̍ o̍ chu̍a̍ ma̍ŋ, mbo̍ tālā ma̍ŋ Chi̍i̍sū o̍ ŋ̄pēlū wu̍ū. Mbo̍ mūli᷄ŋ mbo̍ wɔ̄ɔ̄sūū ndu̍ pēlo᷄ŋ a̍ yīīŋnde̍ ndu̍ o̍ lēbōl. Mi̍ chūŋ kɛ̄ndɔ̄ɔ̍ tīū chīɛ̄ī ni̍ŋ si̍lɔ̍.

Tūēīyɔ̄ɔ̍ le̍nde̍, ma̍ bīī sīɔ̍ɔ̍la̍ wāūla̍ŋ o̍ lābā ma̍ kūā ndu̍ dēmūl. Ā wa̍ dēŋīo̍o̍ mā dīmī āā, “Lā ŋ̄ sāŋga̍la᷅ŋ Mɛ̄lɛ̄ka̍. Wāna̍ hi᷅ŋ ho̍ō sɔ̍ŋgɔ̍ Māsānɔ̄ɔ̍ Mɛ̄lɛ̄ka̍a̍ wo̍, o̍ cho̍ ho̍ō māsā bɛ̍ndōo̍ le̍ I̍sɔ̄lūɛ̄ī yo̍, Mɛ̄lɛ̄ka̍ dɔ̄ū ndu̍ sa̍lā bɔ̄ɔ̍.”

Mi̍ Chi̍i̍sū lo᷅ o̍ ko̍ŋ mbo̍ mūlūl nda̍ āā, “Te̍le̍ŋndo̍ ō fūūlu̍u̍ le̍ mī Mɛ̄lɛ̄ka̍ chɔ᷄m mɛ̄ɛ̍ wāna̍ nda̍ vēēlū āā, Po̍ Wa̍nā Pɔ̍nɔ̍ɔ̍ wo̍ chō wāna̍ kɔ̄ndɔ̄fi̍li̍ yɛ̍.