路加 13
13
悔改抑係滅亡
1當時，在該位有人㧯耶穌講，有兜加利利人向上帝獻祭个時被彼拉多殺害。 2耶穌講：「因為這兜加利利人慘死，你等就恅到佢等比其他个加利利人罪較重係麼？ 3𠊎㧯你等講，毋係恁樣；除了你等悔改，你等个結局共樣也係滅亡。 4西羅亞塔橫掉个時，所磧死个十八儕，你等恅到佢等比其他住在耶路撒冷个人較壞係麼？ 5𠊎㧯你等講，毋係恁樣；除了你等悔改，你等个結局共樣也係滅亡。」
無結果子个無花果樹
6接等，耶穌對佢等講一個比喻：「有一個人在自家个葡萄園種一頭無花果樹。佢想愛在樹頂尋果子，總係尋毋到。 7所以，佢對掌園个講：『你看，三年來，𠊎在這頭無花果樹頂高尋果子，麼介也尋無。斬掉它！樣愛使俾它佔等土地哪？』 8掌園个講：『頭家，今年暫時留等，等𠊎挖鬆它堘頭个泥，加兜肥。 9明年若係結果子就好了；若係無，正斬掉它。』」
在安息日醫好駝背个婦人家
10有一個安息日，耶穌在一個會堂教人。 11有一個婦人家被邪靈附身，病十八年，腰骨彎彎，無法度企直起來。 12耶穌看到姖，就喊姖，對姖講：「婦人家，你个病離開你了！」 13耶穌用手捍等姖，姖个腰骨即時直起來；姖就頌讚上帝。
14會堂个管理員看到耶穌在安息日醫病，盡譴，就對大家講：「𠊎等有六日好做事；你等有病愛醫个，應該在這六日當中來，無應當在安息日！」
15主應佢講：「你這兜假冒為善个人啊！敢講你等逐儕在安息日就無解開槽邊个牛抑係驢仔，牽去啉水嗎？ 16這婦人家係亞伯拉罕个後代，姖被撒但捆等十八年；敢講在安息日就無應該解開姖个鎖鍊嗎？」 17耶穌這個話使所有㧯佢作對个人感覺盡見笑；同時，眾人對佢所做一切个奇事非常歡喜。
芥菜子个比喻
(馬太 13:31-32；馬可 4:30-32)
18耶穌講：「上帝个國像麼介呢？𠊎做得用麼介來比呢？ 19上帝个國可比一粒芥菜子，有人將它種在自家个園肚。芥菜大起來，成做一頭樹，連飛鳥也在它个樹枝頂高做藪。」
發酵个比喻
(馬太 13:33)
20耶穌又講：「𠊎愛拿麼介來比上帝个國呢？ 21它像發酵，有婦人家拿來放在四十公升个麵肚，使歸團麵全部發起來。」
狹个門
(馬太 7:13-14，21-23)
22耶穌往耶路撒冷去个時，經過盡多城市㧯村莊，歸路教訓人。 23有人問佢講：「主啊，得救个人盡少係麼？」
24耶穌應講：「你等愛盡力對狹門入去。𠊎㧯你等講，有盡多人想愛入，總係無法度入去。 25等到家主䟘起來關好門，你等正企在門外掽門，講：『主啊，請㧯𠊎等開門！』佢會應講：『𠊎毋知你等係對㖠位來个！』 26你等會講：『𠊎等識同你共下食啉；你也識在𠊎等个大街項教過𠊎等。』 27總係，佢會講：『𠊎毋知你等係對㖠位來个。你這兜作惡个人，閃開！』 28你等會看到亞伯拉罕、以撒、雅各，㧯所有个先知在上帝个國，總係你等反轉受拒絕在外背；在該位，你等就會大噭，咬牙切齒了！ 29對東、西、南、北，逐所在會有人來參加上帝國个筵席。 30事實上，該兜在最背尾个會做頭前；該兜在最頭前个會做背尾。」
為到耶路撒冷噭
(馬太 23:37-39)
31就在該時，有幾個法利賽人來見耶穌，對佢講：「你愛離開這位去別个所在，因為希律想愛㓾你。」
32耶穌應講：「你等去㧯該隻狐狸講：『你看！今晡日㧯天光日𠊎愛逐鬼㧯醫病，第三日𠊎就愛完成𠊎个工作。』 33雖然係恁樣，今晡日、天光日、㧯後日，𠊎定著愛向前行，因為先知在耶路撒冷以外个所在被人㓾死係毋著个。
34「耶路撒冷啊！耶路撒冷啊！你殺害先知，又用石頭㧹死上帝所差派來你這位个使者！𠊎樣般多擺愛保護你个子女，像雞乸聚集雞子在翼胛下一樣；總係你等無愛！ 35看啊，你等个家園會變做一片荒涼。𠊎㧯你等講，從今以後，你等會看𠊎毋到，直到你等講：『願上帝賜福給該奉主名來个！』」
Atualmente selecionado:
路加 13: THV12Hdb
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© The Bible Society in Taiwan, 2012
All rights reserved
© 台灣聖經公會版權所有 2012