MAARIKO 12
12
Ngerekano ya akombori mûnda baathûûku
(Math. 21:33-46; Ruka 20:9-19)
1Yiesû aanjîîria kûbeera mantû agîtûmagîra ngerekano. Abeera, “Kagiita kamwe ikwarî na muntû aarîmîîte mûnda, aanda ncabiibû. Acwirigîra, aathondeka bantû a gwitîra ncabiibû na aaka kîbayo. Rîru aakomborithia antû uu, aathi rûgendo.
2“Îgiita rîa maketha rîgûkinya, muntû ûyu aatûma mûruti ngûgî wake kîrî antû babu aakomborithîîtie mûnda. Amwîra athi amûgîîrîre bira biarî biake makethaani mamu kûringana na bûra baagwatanîrîte na antû babu. 3Mûruti ngûgî ûyu agûkinya, antû babu bamûgwata bamûtura, bamwîngatia, aacooka atarî na gîntû. 4Mwene mûnda aatûma ûngî kaîrî. Wana we agûkinya, antû babu bamûringanga kîongo na bamûrûthîra mantû maathûûku. 5Mwene mûnda agûtûma ûngî, antû babu bamûûraga. Mwene mûnda aatûma bangî baingî. Na bara aatûmaga antû babu ibaabaturaga kana bakaûraga. 6Mwene mûnda aatigwa na muntû ûmwe ûra agîtûma. N'we aarî mwana wake ûra eendeete mûno! Amûtûma arî wa mûthia, aiyî antû babu bakamûtîîya n'ûntû aarî mwana wake.
7“Antû babu bakwona mwana wa mwene mûnda beerana, ‘Ûyû n'we mwene rûgai. Tûmûûrageeni kaingo rûgai rûtuîka rwetû!’ 8Antû babu bamûgwata bamûûraga, baagera kiimba ome ya mûnda.”
9Yiesû abaûria, “Bûrîthûgaania mwene mûnda akaarûtha ata?” Yiesû abeera, “Akaathi athirie antû babu, akomborithie antû bangî mûnda wake. 10Anga bûtaathooma bûra kwandîkîîtwe *Maandîkooni Maatheru?
‘Iiga rîra rîongwa aaki baaregire,
îîndî i rîo rîtuîkîîte rîa gîtûmi mûno.
11I Mwathani atûmîîte ûntû bûbu bûkarîka,
na tûbuonaga bûrî bwa magegania.’ ”#Cabuurî 118:22-23
12*Athînjîri babu ba Ngai, aarimû ba watho, na akûrû bakwîgua ûgu ibaamenyire Yiesû i bo aatemagia. Kwoogu baanjîîria gûcûa bûra bamûgwata, îndî baakuthûka kîrîndî. Baarekana n'we baathi.
Kîûria mantûûni ma kûrûnga ûgooti
(Math. 22:15-22; Ruka 20:20-26)
13*Abarisai bamwe na bamwe ba bara baarî ba Eronde ibaatûmîîtwe kûgeria gûtega Yiesû na mîgambo yake. 14Bakûûya kîrî Yiesû, bamwîra, “Mwarimû, itwiyî ûrî mwîtîgua na ûtitindanagîra na mathûgaania ma antû. Ûtiendagîîra bamwe ûmena bara bangî, na ûrutanaga bûra bungwa mantû ma Ngai makari. Twîre kana weegua itwagîrîtwe tûrûngaga ûgooti kîrî Kaisaarî kana tûtiagîrîtwe. Tûrûngage kana tûtikaarûngage?”
15Yiesû naiyî ibeebuithagia. Abaûria, “I kî n'ûntû bûgûntega? Ûra arî na ciringi tanareete yo.” 16Bamûnenkera. Yiesû abaûria, “Ûthiû bûbû i bwa ûû? Na riîtwa rîrî i rîa ûû?”
Bamûcookeria bamwîra, “Bionthe i bia Kaisaarî.”
17Yiesû abeera, “Nenkagîraani Kaisaarî into biake. Na Ngai n'we mûnenkagîreeni bira birî biake.” Baarigara mûno n'îcookio rîru.
Kîûria mantûûni ma kûriûka
(Math. 22:23-33; Ruka 20:27-40)
18Asandukai bamwe baathi kîrî Yiesû. Na wîtîgio bwa Asandukai n'atî, gûtiûmbîka muntû ûmûkuû ariûka. Bakûthi beera Yiesû, 19“Mwarimû, Musa aatwandîkîîre watho atwîra, ‘Muntû akagûra mûka îndî agakua mbere ya bagîa na kaana, mûruagina nabatîîrue athûkia mûka ûyu aciarîra mûruagina mbeû.’#Kûririkanania Maathana 25:5 20Kwa ngerekano, kagiita kamwe ikwarî na nthaka mûgwanja cia muntû ûmwe. Ûra aarî mûkûrû akûgûrana aakua atatigîîte mbeû. 21Ûra aamûkinyîîte mûgongo aathûkia mûka ûyu. Îndî kinya we aakua atakûrî gûtiga mbeû. Wa bathatû akûthûkia mûka ûyu, wana we aakua atakûrî gûtiga mbeû. 22Bonthe barî mûgwanja baathûkia mûka ûyu wabagîkuyaga batagûtiga mbeû, mwanka mûka n'we aaya gûkua mûthiani.” 23Asandukai babu baûria Yiesû, “Îîndî rîra bara bonthe baakuire bakaariûkua rî, mûka ûyu agaatuîka wa ûû, n'ûntû ingî nthaka inu cionthe irî mûgwanja iciamûgûrîîte?”
24Yiesû abacookeria abeera, “Biû bûbîtîîtie mûno n'ûntû bûtiiyî *Maandîko Maatheru na bûtiiyî Ngai arî inya. 25Rîra antû bakaariûka batiigûrana kana bagûrwa. Bagaakara ta araîka ba îgûrû. 26Mantû ma kûriûkua gwa antû baakuû na mo rî, ka bûtaathooma bûra Musa aandîkîîte bantû ara agweteete mantû ma gakando kara gaakanaga mwanki? Bantû agu kwandîkîîtwe, Ngai aariirie na Musa amwîra, ‘Ndî Ngai wa Îburaîmu, Isaka na Njakubu.’#Kuuma 3:6, 15-16 27We ti Ngai wa bara bakuû. I Ngai wa bara barî mwoyo. Biû bûbîtîîtie mûno.”
I yathana rîrîkû rîrî gîtûmi nkûrûki ya maathana mara mangî?
(Math. 22:34-40; Ruka 10:25-28)
28Mwarimû ûmwe wa watho akwîgua Yiesû eeyana îcookio rîega, amûûria, “I yathana rîrîkû rîrî gîtûmi nkûrûki ya maathana mara mangî?”
29Yiesû amwîra, “I rîrî, ‘Thikîîria, Isiraeri, Mwathani Ngai wenu n'we Mwathani wenka. 30Enda Mwathani Ngai waku na nkoro yaku yonthe, na mwoyo waku unthe, na mathûgaania maaku monthe, na inya yaku yonthe.’#Kûririkanania Maathana 6:4-5 31Na yathana rîa maîrî na rîo, i rîrî, ‘Enda mûtûûri waku ta bûra wîbendeete.’#Mantû ma Araawî 19:18 Gûtirî yathana rîngî rîrî gîtûmi nkûrûki ya mama marî maîrî.”
32Mwarimû ûyu wa watho eera Yiesû, “Rîru n'îcookio rîega mûno, mwarimû. N'ûmma kuuga ûgu wauga. Atî, Ngai n'we Mwathani wenka na gûtirî ûngî. 33Na n'ûmma kuuga muntû nabatîîrue eenda Ngai na nkoro yake yonthe, na mathûgaania maake monthe, na inya yake yonthe. Na atî muntû nabatîîrue eenda mutûûri wake ta bûra eebendeete. Bu maathana mamu marî gîtûmi nkûrûki ya kinya kûrutîra Ngai kîgongwana.”
34Yiesû oona mwarimû ûyu naaragia na ûûme. Amwîra, “Ûtirî kûraaya mûno na ûnene bwa Ngai.” Gûtirî ûngî aûmîîria kûûria Yiesû kîûria kaîrî.
Kîrîstû i mwana wa ûû?
(Math. 22:41-46; Ruka 20:41-44)
35Yiesû akîrutanaga nyomba ya Ngai, aûria, “N'ata aarimû ba watho baûmba kuuga Kîrîstû i Mwana wa Ndaundi? 36Na Ndaundi we wengwa akîaragia kwa inya ya Kîrundu Ûmûtheru augire,
‘Mwathani Ngai neerire Mwathani wakwa,
“Kara nthî rûteere rwakwa rwa ûrîo,
mwanka ntuîkithie anthû baaku
ûkinyo bwa magûrû maaku.” ’#Cabuurî 110:1
37Ûkaaya kwîgua Ndaundi we wengwa arîmwîta ‘Mwathani’ rî, n'ata îîndî Kîrîstû aûmba gûtuîka mwana wake?”
Kîrîndî ikîarî agu kiingî mûno kîthikîîrîîtie Yiesû gîkeneete.
Yiesû eera antû beemenyeere kîrî aarimû ba watho
(Math. 23:1-36; Ruka 20:45-47)
38Yiesû aarutana antû abeera, “Îmenyeereeni kîrî aarimû ba watho. Beendaga kûthi beekîrîte nguo indaaya na gûkeethagua n'antû na gîtîîyo baarîîkana na bo. 39Rîra barî *masinagoogiini beendaga gûkara itîîni bia mbere bia gîtîîyo. Na baathi biathooni beendaga gûkara ara arî gîtîîyo. 40Beenagîîria ntigwa bakairîîra into. Na rîra bakûromba, beendaga kûromba maromba maaraaya bakîenda antû boona. Îgamba rîao ûkeegua rîrî rîthûûku nkûrûki.”
Kîewa gîa ntigwa
(Ruka 21:1-4)
41Yiesû naakari akubî na îthandûkû rîra rîethîranagîrua biewa nyomba ya Ngai akîonaga bûra antû baarutaga mbia. Baingî ba bara baarî itonga baaruta mbia inyingî. 42Ntigwa îmwe nkîa yaya, yaruta tûcerecere twîrî. 43Yiesû eera arutwa baake, “N'amma ga nkûbwîra, ntigwa îno nkîa îkûruta nkûrûki ya bara bangî bonthe. 44N'ûntû bara bangî bonthe baaruta bûra barî na cio. Îndî ntigwa îno yo, amwe na ûkîa bwa yo yaruta kîonthe kîra îkwîgwetie.”
Atualmente selecionado:
MAARIKO 12: thk
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2019, Bible Translation and Literacy