ଲୁକ 8
8
ଜିସୁୱାଲେ ବୁଲାଜିମାର୍ହି ଆଇମେକ୍
1ଇୟା ୱେନ୍କା ଜିସୁ ଗାଡ଼୍ ଗାଡ଼୍କାଙ୍ଗ୍ ମାରି ନାର୍ ନାର୍କାଙ୍ଗ୍ ୱେର୍ସି ମାପୁରୁଦି ରାଜିଦି ନେଗିକାବୁର୍ ପ୍ରଚାର୍ କିଜି ବୁଲାଦେଙ୍ଗ୍ ଆସ୍ତାନ୍, ମାରି ବାରଲୋକ୍ ସିସୁର୍ ୱାନି ୱାଲେ ମାର୍ହାର୍, 2#ମାତିଉ ୨୭:୫୫,୫୬; ମାର୍କ ୧୫:୪୦,୪୧; ଲୁକ ୨୩:୪୯.ମାରି ଏମେ ଆଇମେକ୍ ମାଣାନ୍ ତାଗ୍ଇ ଆତ୍ମା ମାରି ରୋଗ୍ଦାନ ନେଗେଣ୍ତ୍ ଆତେ ମାର୍ଏ, ୱାକ୍ ବା ୱାନିୱାଲେ ମାର୍ଏ, ମରିୟମ୍ ଆମାତାନିଙ୍ଗ୍ ମଗ୍ଦଲିନି ଇଜିମାର୍ଆର୍, ଏମେତାନି ମାଣୁକୁ ସାତଗୋଟା ଦୁବେଙ୍ଗ୍ ସପ୍ତା ମାର୍ହାର୍ । 3ହେରୋଦଦି ଗୁମୁସ୍ତା କୁଜାଦି ଆଡ଼ି ଜୋହାନା, ସୋସନା, ମାରି ନାଣ୍ତ ଆଇମେକ୍ ୱାନିୱାଲେ ମାନ୍ଜି ନିଜେ ନିଜେଦି ସମ୍ପତ୍ତି ସିଇଜି ଜିସୁ ନି ୱାନି ସିସୁରି ସେବା କିଜିମାର୍ଏ ।
ୱିତୁୱିତ୍ନି କାତା
(ମାତିଉ ୧୩:୧-୯; ମାର୍କ ୪:୧-୯)
4ନାଣ୍ତ ଲୋକ୍ ଉଣ୍ତ୍ରେ ମାନୁ ଆଜିମାରି ଗାଡ଼୍ ଗାଡ଼୍କାଣ୍କୁ ଲୋକ୍ ୱାନି ଲାକ୍ତୁ ୱାତାର୍, ଜିସୁ ଇୟା କାତା ଇର୍ହାନ୍,
5ଅରେନ୍ ୱିତୁ ୱିତିନିକାନ୍ ନିଜେଦି ୱିତୁ ୱିତ୍ତେଙ୍ଗ୍ ସତାନ୍ । ୱାନ୍ ୱିତ୍ବୁ ୱିତ୍ବୁ ଏସଡ଼ ସାର୍ଦୁ ଆର୍ତେ ମାରି ପାଦାମ୍ ଆଡ୍ଗି ମାଟ୍ତାର୍, ମାରି ବାଦଡ଼୍ତି ପଟିଙ୍ଗ୍ ଆୟାୱିଜୁ ତିର୍ଏ । 6ମାରି ଏସ ୱିତୁ ଉଣା ସିକ୍ଲାମାନି ପିଡ଼ିପି ବୁମିଦୁ ଆର୍ତାତ୍, ମାରି ଗାଜାଆଜି ସିକ୍ଲା ଅଲ୍ ସିଲେତାତ୍ଆକା ୱାର୍ତାସରାତ୍ । 7ମାରି ଏସ ୱିତୁ ସାମ୍କା ଦୁପା ଲୋଇ ବା ଆର୍ତାତ୍, ମାରି ସାମ୍ମାରାକ୍ ତାନି ୱାଲେ ପିରିଜି ଆୟାୱିଜୁଦିଙ୍ଗ୍ ତିଗିତାତ୍ । 8ଆୟା ଏସ ୱିତୁ ନେଗି ବୁମିଦୁ ଆର୍ତାତ୍, ମାରି ପିର୍ଜି ସୟେ ଗୁଣୁ ପଲ୍ ଆସ୍ତାତ୍ । ୱାନ୍ ଇକା ଇନ୍ବୁ ଇନ୍ବୁ ନାଣ୍ତ ଆଉଲି ଆଜି ଇର୍ଆନ୍, “ଆମାୱାନିଙ୍ଗ୍ ୱେନ୍ଡ୍ରେଙ୍ଗ୍ ଗିତଣିଙ୍ଗ୍ମାନେ, ୱାନ୍ ୱେନିନ୍ ।”
କାତାଦି ଉଦେସ୍
(ମାତିଉ ୧୩:୧୦-୧୭; ମାର୍କ ୪:୧୦-୧୨)
9ଜିସୁଦି ସିସୁର୍ ଇୟା କାତାଦି ଅର୍ତ ଇନିକା ଇଜି ୱେନ୍ବାଦେଙ୍ଗ୍ ଆସ୍ତାର୍ । 10ଆବେଟ୍ ୱାନ୍ ଇର୍ହାନ୍, ମାପୁରୁଦି ରାଜିଦି ୱିଜୁ ବିସୟ୍ ନେସ୍ତେଙ୍ଗ୍ ମିଙ୍ଗିଁ ବୁଦି ସିଆତାମାନାତ୍, ମାତର୍ ଆଇୱାରିଙ୍ଗ୍ କାତାଦାନ୍ ଇଣ୍ତ୍ରେଙ୍ଗ୍ ଆନାତ୍, ଏଣ୍ତେସ୍ ୱାର୍ ସୁଡ଼ୁବୁ ସୁଡ଼ୁବୁ ସୁଡ଼ୁଦେଙ୍ଗ୍ ଆଟ୍ଏର୍ ମାରି ୱେନ୍ବୁ ୱେନ୍ବୁ ବୁଜାଏର୍ ।
ଜିସୁ ୱିତୁୱିତ୍ନି କାତାଦି ଅର୍ତ ବୁଜାକିତାନ୍
(ମାତିଉ ୧୩:୧୮-୨୩; ମାର୍କ ୪:୧୩-୨୦)
11କାତାଦି ଅର୍ତ ଇକା । ୱିତୁ ମାପୁରୁଦି ବାକ୍ୟ, 12ମାରି ସାରି ଲାକ୍ତୁରି ୱିତୁ ଇୟାୱାଜା ଲୋକାଙ୍ଗ୍ ବୁଜାକିନାତ୍, ଏମେକାର୍ ବାକ୍ୟ ୱେନାର୍, ଆୟାୱେନ୍କା ସୟତାନ୍ ୱାଜି, ଏଣ୍ତେସ୍ ୱାର୍ ବିସ୍ବାସ୍ କିଜ ରକିୟା ପୟ୍ଏର୍, ଆୟାଉଣ୍ତିଙ୍ଗ୍ ୱାରି ଜିବନ୍ତାନ୍ ବାକ୍ୟ ଡଙ୍ଗାଁ କିନା ଅନାତ୍ । 13ମାରି, ଏମେକାର୍ ବାକ୍ୟ ୱେନ୍ଜି ୱେଡ଼ିକାଦାନ୍ ମାନାନାର୍, ୱାର୍ ପିଡ଼ିପି ବୁମିଦୁ ଆର୍ତିମାନି ୱିତୁଦି ସାମାନ୍ । ଆୟା ସିକିୟା ୱାରିମାନୁ ନାଣ୍ତନେସ୍ନି ନେସ୍ଇ ମାନିଙ୍ଗ୍, ମାତର୍ ୱାର୍ ଲେୱା ସାଗ୍ଏତାତ୍ଆକା ୱାର୍ ଅଡ଼ପ୍ ସମୟ ବିସ୍ବାସ୍ କିନାର୍ ମାରି ପରିକା ୱେଡ଼ାଦୁ ଆର୍ନା ସନାର୍ । 14ମାରି, ସାମ୍ ମାରାକ୍ ଲୋଇ ଆର୍ତି ୱିତୁ ଇୟାୱାଜା ଲୋକାଙ୍ଗ୍ ବୁଜାକିନାତ୍, ଏମେକାର୍ ବାକ୍ୟ ୱେନାର୍, ମାତର୍ ଦୁନିଆଦି ସିନ୍ତା ମାରି ଦନ ନି ସୁକ୍ ପୟଜି ଜିବୁ ଜିବୁ ତିଗାନା ସନାର୍ । ନେଗି ପଲ୍ ପାଣ୍ତିସ୍ କିଏର୍ । 15ମାରି, ନେଗି ବୁମିଦୁ ଆର୍ତି ୱିତୁ ଇୟାୱାଜା ଲୋକାଙ୍ଗ୍ ବୁଜାକିନାତ୍, ଆମାକାର୍ ନେଗେଣାନ୍ ମାରି ନେଗି ଜିବନ୍ତୁ ବାକ୍ୟ ୱେନ୍ଜି ଆୟାକା ଆସ୍ସି ଇଡ୍ନାର୍ ମାରି ଡାଟାମ୍ତାନ୍ ପଲ୍ ଆସ୍ନାତ୍ ।
ଅଡି ଆଡ୍ଗି ଦିୱା
(ମାର୍କ ୪:୨୧-୨୫)
16 #
ମାତିଉ ୫:୧୫; ଲୁକ ୧୧:୩୩. ଆମାକାର୍ ଦିୱା କାସିସ୍ କିଜ ସାଟିଦାନ୍ ପିଡ଼ିକ୍ସ ଇଡେଏନ୍, ମାରି କାଟେଲ୍ ଆଡ୍ଗି ଇଡେଏନ୍, ମାରି ଦିୱା ଇଡ୍ନି ବାଡ଼ି ମୁସ୍କୁ ଇଡିନାନ୍, ଏଣ୍ତେସ୍ ଡ଼ୁଗିନି ଲୋକୁ ସୁଡ଼ୁଦେଙ୍ଗ୍ ଆଟ୍ନାର୍ ।
17 #
ମାତିଉ ୧୦:୨୬; ଲୁକ ୧୨:୨. ମାତର୍ ଆମାକା ନେସିଇକା, ଇୟାୱାଜା ନେସିଇ ବିସୟ ଇନିକା ସିଲେତ୍, ମାରି ଆମାକା ୱେଙ୍ଗାଁଜି ତରାଇଆଏତ୍, ଇୟାୱାଜା ନେସେଇ ବିସୟ୍ ଇନିକା ସିଲେତ୍ ।
18 #
ମାତିଉ ୨୫:୨୯; ଲୁକ ୧୯:୨୬. “ମାରି, ଏଣ୍ତେସ୍ ୱେନ୍ଜିନିଦେର୍, ଆୟା ବିସୟତାନ୍ ଜାଗାର୍ତା; ଇରିଙ୍ଗ୍ ଆମାୱାନିଦି ମାନାତ୍, ୱାନିଙ୍ଗ୍ ସିଆଇ ଆନାତ୍, ମାରି ଆମାୱାନିଙ୍ଗ୍ ସିଲେତ୍, ୱାନ୍ ଆମାକା ନିଜେଦି ମାନାତ୍ ଇଜି ମନେକିନାର, ଆୟାକା ବା ୱାନିବାଣାନ୍ ଅଆନାତ୍ ।”
ଜିସୁଦି ୟାୟା ନି ତଡ଼ାନ୍କୁ
(ମାତିଉ ୧୨:୪୬-୫୦; ମାର୍କ ୩:୩୧-୩୫)
19ଜିସୁଦି ୟାୟା ନି ତଡ଼ାନ୍କୁ ୱାନିଲାକ୍ତୁ ୱାତାର୍, ମାତର୍ ଲୋକାଗୋଲିଦି ଉଣ୍ତିଙ୍ଗ୍ ୱାନି ୱାଲେ ବେଟ୍ ଆଦେଙ୍ଗ୍ ଆଟ୍ଏଜି ମାର୍ହାର୍ । 20ଆବେଟ୍ ୱାନିଙ୍ଗ୍ ଏନ୍ ଅରେନ୍ ଇୟା କାବୁର୍ ସିତାନ୍, ମି ୟାୟା ନି ତଡ଼ାନ୍କୁ ନି ୱାଲେ ବେଟ୍ ଆଦେଙ୍ଗ୍ ବଦା କିଜି ଆତ୍ରେ ନିଲ୍ତାମାନାର୍ ।
21ମାତର୍ ୱାନ୍ ୱାରିଙ୍ଗ୍ ଇର୍ଆନ୍, “ଆମାକାର୍ ମାପୁରୁଦି ବାକ୍ୟ ୱେନାର ମାରି ମାନାନାର୍, ୱାର୍ ନା ୟାୟା ନି ତଡ଼ାନ୍କୁ ।”
ଜିସୁ ଗାଲି ପିରୁଦିଙ୍ଗ୍ ତିର୍ କିତାନ୍
(ମାତିଉ ୮:୨୩-୨୭; ମାର୍କ ୪:୩୫-୪୧)
22ଆୟା ୱେଡ଼ାଦୁ ଅର୍ନେଣ୍ତେ ଜିସୁ ମାରି ୱାନି ସିସୁର୍ ଉଣ୍ତ୍ରି ଡଙ୍ଗାଁଦୁ ଏକ୍ତାର୍, ମାରି ୱାନ୍ ୱାରିଙ୍ଗ୍ ଇର୍ହାନ୍, “ରାଦୁ, ସାମ୍ଦୁରୁତି ଆୟା ପାଡ଼ି ସନାଟ୍ ।” ଆବେଟ୍ ୱାର୍ ଏର୍ଜାଜ୍ କୁତାରଡ଼ିସିତାର୍ । 23ମାତର୍ ୱାର୍ ଏର୍ଜାଜ୍ତୁ ସନି ୱେଡ଼ାଦୁ ୱାନ୍ ଡରିତାମାର୍ହାନ୍ । ଆୟା ୱେଡ଼ାଦୁ ସାମ୍ଦୁରୁତୁ ଗାଲି ଆତାତ୍, ମାରି ୱାରି ଡଙ୍ଗାଁଦୁ ଏରୁ ପୁରୁନ୍ ଆଦେଙ୍ଗ୍ ଆରାମ୍ଆତେ ମାରି ୱାର୍ ବାଦାଦୁ ପଡ଼େଆତାର୍ । 24ଆବେନୁ ସିସୁର୍ ଲାକ୍ତୁ ୱାଜି ଜିସୁଙ୍ଗୁଁ ନିକ୍ସି ଇର୍ହାର୍, “ଏ ଗୁରୁ, ଏ ଗୁରୁ ମାପ୍ ସାତାପ୍ ।” ଇବେନୁ ୱାନ୍ ନିଙ୍ଗିଁଜି ଗାଲି ମାରି ନାଣ୍ତ ସାମ୍ଦୁରୁତି ଏରୁଦିଙ୍ଗ୍ ଆଦ୍ରିସ୍ତାନ୍, ମାରି ଆୟାୱିଜୁ ତିର୍ ଆଜି ସାନ୍ତି ଆତାତ୍ । 25ମାରି, ଜିସୁ ସିସୁରିଙ୍ଗ୍ ଇର୍ଆନ୍, “ମି ବିସ୍ବାସ୍ ଏମେଦି ?” ମାତର୍ ୱାର୍ ତିଲାଜି ମାରି ଚମ୍କେ ଆଜି ନିଜେ ନିଜେଦି ମାନୁ ଇନ୍ଡ୍ରେଙ୍ଗ୍ ଆସ୍ତାର୍, “ଇକାନ୍ ଆତିଙ୍ଗ୍ ଏନ୍ ଜେ ? ଗାଲି ନି ଏରୁଦିଙ୍ଗ୍ ବା ଆଦେସ୍ ସିଜିନାନ୍, ଗାଲି ନି ଏରୁଡର୍ ୱାନି ମାଟା ମାନ୍ଜିନେ ।”
ଦୁବା ଆସ୍ତି ମାରିକାନ୍ ନେଗେଣ୍ତ୍ ଆତାନ୍
(ମାତିଉ ୮:୨୮-୩୪; ମାର୍କ ୫:୧-୨୦)
26ୱେନ୍କା ଜିସୁ ନି ୱାନି ସିସୁର୍ ଗାଲିଲିଦି ଆଗିଡ଼ିରି ଆୟାପାଡ଼ିଦି ଗରାସିୟରି ରାଜିଦୁ ଇତାର୍ । 27ୱାନ୍ ଏରୁଜାହାଜ୍ତାନ୍ ସହସି ପାଡ଼ିଦୁ ରେତାନ୍, ଆୟା ଗାଡ଼୍ତି ଅରେନ୍ ଦୁବାଆସ୍ତି ଲୋକୁ ୱାନିଙ୍ଗ୍ ବେଟ୍ଆତାନ୍; ୱାନ୍ ନାଣ୍ତ ଦିନ୍ ସାନ୍ଦି ଆଙ୍ଗିଁ ଆରାଏଣ୍ତା ମାରି ଇନ୍ଡ୍ର ମାନ୍ଏଣ୍ତା ଦୁକିଦୁ ମାନ୍ଜି ମାର୍ଆନ୍ । 28ୱାନ୍ ଜିସୁଙ୍ଗୁଁ ସୁଡ଼ୁଜି ଆଉଲି ଆଜି ୱାନି ପାଦାମ୍ ଆଡ୍ଗି ଆର୍ଜି ପେରି ୱେୟୁଦାନ୍ ଇର୍ହାନ୍, “ଏ ପେରି ମାପୁରୁଦି ମାରିନ୍ ଜିସୁ, ନି ୱାଲେ ନାଙ୍ଗିଁ ଇନିକା ମାନାତ୍ ? ନାନ୍ ନିଙ୍ଗିଁ ମାଡ଼ିସ୍କିଜିନା, ନାଙ୍ଗିଁ କାସ୍ଟୁ ସିମା ।” 29ଇରିଙ୍ଗ୍ ୱାନ୍ ତାଗ୍ଇ ଆତ୍ମାଦିଙ୍ଗ୍ ଆୟା ଲୋକାମାଣ୍କୁ ସହସ ସନି ଉଣ୍ତିଙ୍ଗ୍ ଆଦେସ୍ ସିତା ମାର୍ହାନ୍ । ଆୟା ଦୁବା ନାଣ୍ତ ଦେବେଙ୍ଗ୍ ୱାନିଙ୍ଗ୍ ଆସ୍ତାମାର୍ହାତ୍, ମାରି ଲୋକୁ ୱାନିଙ୍ଗ୍ ସିକ୍ଣିଦାନ୍ ତର୍ସି ଇଡ୍ଜିମାର୍ହାର୍, ମାତର୍ ୱାନ୍ ତର୍ତିକାୱିଜୁ ତେଉଜି ପୋକ୍ସି ମାର୍ଆତ୍ ଦୁବା ୱାନିଙ୍ଗ୍ ସୁନ୍ସାନ୍ବାଡିଦୁ ଅସିମାର୍ହାତ୍ ।
30ଜିସୁ ୱାନିଙ୍ଗ୍ ୱେନ୍ବାତାନ୍, “ନି ଦର୍ ଇନିକା ?” ୱାନ୍ ଇର୍ହାନ୍, “ନା ଦର୍ ବାହିନି; ଇରିଙ୍ଗ୍ ନାଣ୍ତ ଦୁବେଙ୍ଗ୍ ୱାନିଙ୍ଗ୍ କାସ୍ତେ ମାର୍ଏ ।” 31ମାରି, ୱାନ୍ ଏଣ୍ତେସ୍ ୱାରିଙ୍ଗ୍ ପାତାଲ୍ତୁ ସନି ଉଣ୍ତିଙ୍ଗ୍ ଆଦେସ୍ ସିମାକିନ୍, ଆୟାଉଣ୍ତିଙ୍ଗ୍ ୱାର୍ ୱାନିଙ୍ଗ୍ ମାଡ଼ିସ୍ କିତାର୍ ।
32ଆବେନୁ ଗର୍ନ୍ ଲାକ୍ତୁ ଉଣ୍ତ୍ରି ପେରି ପାନ୍ଣ୍ତ୍ରିଙ୍ଗ୍ ମାନ୍ଦା ସାରାଜିମାର୍ଏ, ମାରି ୱାନ୍ ଏଣ୍ତେସ୍ ତାଗ୍ଇ ଆତ୍ମେଙ୍ଗ୍ ଆୟା ପାଣ୍ତ୍ରିଙ୍ଗାଁ ଲୋଇ ଡ଼ୁଗ୍ଦେଙ୍ଗ୍ ଉଣ୍ତିଙ୍ଗ୍ ସାରି ସିତାନ୍, ଆୟାଉଣ୍ତିଙ୍ଗ୍ ୱାର୍ ଜିସୁଙ୍ଗୁଁ ମାଡ଼ିସ୍ କିତାର୍ । 33ୱାନ୍ ୱାନିକାଙ୍ଗ୍ ସାରି ସିତାନ୍ଆକା, ଦୁବେଙ୍ଗ୍ ଆୟା ଲୋକ୍ତିବାଣାନ୍ ସହସି ପାନ୍ଡ୍ରିଙ୍ଗାଁ ଲୋଇ ଡ଼ୁଗିତେ; ଆବେନୁ ଆୟା ପାନ୍ଡ୍ରିଙ୍ଗ୍ ୱିଜୁ ଗରନ୍ ଟିପୁଦାନ୍ ଉରୁକ୍ସି ସଲ୍ସି ସାମ୍ଦୁର୍ତୁ ଆର୍ଜି ମୁଡ଼ୁଗିତେ ସାତେ ।
34ମିଜି ମାର୍ଇ ଲୋକୁ ଆୟା ଗଟ୍ନା ସୁଡ଼ୁଜି ଉରୁକ୍ସି ସଲ୍ସି ଗାଡ଼୍କାଙ୍ଗ୍ ନି ନାର୍କାଙ୍ଗ୍ଁ ଆକା ୱେର୍ତାର୍ । 35ଆବେନୁ ଲୋକୁ ଗଟ୍ନା ସୁଡ଼ୁଦେଙ୍ଗ୍ ସହସି ୱାତାର୍; ମାରି, ୱାର୍ ଜିସୁ ଲାକ୍ତୁ ୱାଜି, ଏମେ ଲୋକାମାଣାନ୍ ଦୁବେଙ୍ଗ୍ ସତେମାର୍ଏ, ୱାନିଙ୍ଗ୍ ନେଗି ୱାତି ପିଡ଼ିଗ୍ଜୋ ନେଗି ମୋନ୍ତାନ୍ ଜିସୁଦି ପାଦାମ୍ ଆଡ୍ଗି ବାସ୍ତିମାର୍ଇକା ସୁଡ଼ୁଜି ତିଲାତାର୍ । 36ମାରି, ଆମାକାର୍ ଇୟା ଗଟ୍ନା ସୁଡ଼ୁତାମାର୍ଆର୍, ୱାର୍ ଆୟା ଦୁବା କାସ୍ତି ଲୋକୁ ଏଣ୍ତେସ୍ ନେଗେନ୍ ଆତାନ୍, ଆକା ୱାରିଙ୍ଗ୍ ୱେର୍ତାନ୍ । 37ଆବେନ୍ ଗରାସିୟରି ରାଜିଦି ୱିଜୁ ତରିଟି ଲୋକା ମାଣାନ୍ ଡ଼ିସ୍ସି ସନ୍ଡ଼୍ରେଙ୍ଗ୍ ଜିସୁଙ୍ଗୁଁ ମାଡ଼ିସ୍କିତାର୍, ଇରିଙ୍ଗ୍ ୱାର୍ ନାଣ୍ତ ତିଲାତାମାର୍ଆର୍; ମାରି, ୱାନ୍ ଉଣ୍ତ୍ରି ଏରୁଜାହାଜ୍ତୁ ଏକ୍ସି ଡ଼େସିୱାତାର୍ । 38ମାତର୍ ଏମେ ଲୋକାମାଣାନ୍ ଦୁବେଙ୍ଗ୍ ସତେସର୍ଏ ମାର୍ହେ, ୱାନ୍ ଜିସୁୱାଲେ ମାନ୍ଡ଼୍ରେଙ୍ଗ୍ ମାଡ଼ିସ୍ କିଦେଙ୍ଗ୍ ଆସ୍ତାନ୍; 39ମାତର୍ ୱାନ୍ ୱାନିଙ୍ଗ୍ ସାଙ୍ଗ୍ଆ ଇଜି ଇର୍ଆନ୍, “ମି ଇନ୍ଡ୍ର ଡ଼େସି ସାଙ୍ଗ୍ଆ, ମାରି ମାପୁରୁ ନିଙ୍ଗିଁ ଇନି ଇନି କାର୍ମୁ କିତାମାନାନ୍, ଆକା ୱିଜୁୱେର୍ଆ ।” ଆବେଣାନ୍ ୱାନ୍ ସଲ୍ସି, ଜିସୁ ୱାନିଙ୍ଗ୍ ଇନି ଇନି କାର୍ମୁ କିତାମାର୍ଆନ୍ ଆୟାୱିଜୁ ଗାଡ଼୍ତୁ ୱେର୍ତେଙ୍ଗ୍ ଆସ୍ତାନ୍ ।
ଜାଇରସ୍ତି ଗାଡ଼୍ସି ଜିନିକା ମାରି ରୋଗ୍ଆତି ଆଇମା ନେଗେଣ୍ତ୍ ଆନିକା
(ମାତିଉ ୯:୧୮-୨୬; ମାର୍କ ୫:୨୧-୪୩)
40ଏସ୍ତିୱାଲେ ଜିସୁ ଆୟାପାଡ଼ି ୱାତାନ୍, ନାଣ୍ତଲୋକ୍ ୱାନିଙ୍ଗ୍ ୱେଡ଼ିକାଦାନ୍ ମାନାତାର୍, ମାତର୍ ୱିଜେରେ ୱାନିଙ୍ଗ୍ କାପ୍କିଜିମାର୍ଆର୍ । 41ମାରି, ସୁଡ଼ୁଦୁ, ଜାଇରସ୍ ଦର୍ତି ଅରେନ୍ ଲୋକୁ ୱାତାନ୍; ୱାନ୍ ପାର୍ତନା ଇଲୁଦି ପେରିକାନ୍ ମାର୍ଆନ୍ । ୱାନ୍ ଜିସୁଦି ପାଦାମ୍ଆଗ୍ଡ଼ି ନିଜେଦି ଇନ୍ଡ୍ର ୱାଦେଙ୍ଗ୍ ୱାନିଙ୍ଗ୍ ମାଡ଼ିସ୍ତାନ୍, 42ମାତର୍ ୱାନି ବାର ବାରସ୍ତି ଅରେତ୍ନେ ନା ଗାଡ଼ି ମାର୍ଆତ୍, ମାରି ୱାଦ୍ ସାତାମାର୍ଆତ୍ । ମାତର୍ ୱାନ୍ ସଲସିମାର୍ଇ ୱେଡ଼ାଦୁ ଲୋକୁ ୱାନି ୱାନି ମୁସ୍କୁ ମାଟ୍ସି ସାଜି ମାର୍ଆର୍ ।
43ନାସ୍ତିୱାଲେ ବାର ବାର୍ସୁ ସାନ୍ଦି ସୁତୁକ୍ ରୋଗଦି ଅରେତ୍ ଆଇମା ମାର୍ଆତ୍, ଏଦ୍କି ନିଜେଦି ୱିଜୁ ଡାବୁଙ୍ଗୁଁ ୱିସ୍ସି ଏବାଣାକୁବା ନେଗେଣ୍ତ୍ ଆଦେଙ୍ଗ୍ ଆଟ୍ଏଜି ମାର୍ଆତ୍, #୮:୪୩ ଏସ ରାସାତିମାନୁ ଇୟା ପଦ୍ ରାସାତିକା ସିଲେତ୍ 44ୱାଦ୍ ୱେନ୍କାରି ପାଡ଼୍କାଦାନ୍ ୱାଜି ୱାନି ୱାତି ଜାଲିଦୁ ମୁଟ୍ତାତ୍, ମାରି, ଆୟାଦାପ୍ରେ ତାନି ସୁତୁକ୍ ଆନି ରଗ୍ ନେଗେନ୍ ଆତାତ୍ । 45ଆବେନୁ ଜିସୁ ଇର୍ହାନ୍, “ଏନ୍ ନାଙ୍ଗି ମୁଟ୍ତାନ୍ ?” ମାତର୍ ୱିଜେରେ ସିଲେ ଇଜି ଇର୍ହାର୍, ପିତର ଇର୍ହାନ୍, “ଏ ଗୁରୁ, ଲୋକୁ ମାଣ୍ତାସୁଣ୍ତା ଆଜି ନି ମୁସ୍କୁ ମାଟ୍ସି ସାଜିନାର୍ ।”
46ମାତର୍ ଜିସୁ ଇର୍ହାନ୍, “ଏନ୍ ଅରେନ୍ ନାଙ୍ଗି ମୁଟ୍ତାନ୍, ମାତର୍ ନା ବାଣାନ୍ ସାକ୍ତି ସତାତ୍ ଇଜି ନାନ୍ ନେସ୍ତା ।” 47ଏସ୍ତିୱାଲେ ଆଇମାଲୋକ୍ ସୁଡ଼ୁତାତ୍ ଜେ, ୱାଦ୍ ମାରାଗ୍ଜି ମାନ୍ଣ୍ଡ୍ରେଙ୍ଗ୍ ଆଟେଏତାତ୍, ନାସ୍ତିୱାଲେ ୱାଦ୍ ତିର୍ଗ୍ଜି ତିର୍ଗିଜି ୱାଜି ୱାନି ପାଦାମ୍ ଆଡ୍ଗି ଆର୍ଜି, ଇନିଦାନିଙ୍ଗ୍ ୱାନିଙ୍ଗ୍ ମୁଟ୍ତାତ୍, ମାରି ଏଣ୍ତେସ୍ ଦାପ୍ରେ ନେଗେଣ୍ତ୍ ଆତାତ୍, ଆୟାୱିଜୁ ଲୋକା ଆଗ୍ଡ଼ି ଇର୍ହାତ୍ । 48ଆବେଟ୍ ୱାନ୍ ତାନିଙ୍ଗ୍ ଇର୍ଆନ୍, “ଗାଡ଼ି, ନି ବିସ୍ବାସ୍ ନିଙ୍ଗିଁ ନେଗେନ୍ କିତାମାନାତ୍, ସାନ୍ତିଦାନ୍ ସାଙ୍ଗ୍ଆ ।”
49ଜିସୁ ଆୟା ମାଟା ଇନିୱାଲେ ପାର୍ତନା ଇନ୍ଡ୍ରଣି ପେରିଲୋକା ଇନ୍ଡ୍ରଣାନ୍ ଅରେନ୍ ୱାଜି ଇର୍ଆନ୍, “ମି ଗାଡ଼ି ସାତାତ୍ନି, ଗୁରୁଙ୍ଗ୍ ମାରି କାସ୍ଟୁ ସିମା ।”
50ମାତର୍ ଜିସୁ ଆୟାକା ୱେନ୍ଜି ଜାଇରସ୍ତିଙ୍ଗ୍ ଡ଼େସି ଇର୍ଆନ୍, “ତିଲାମାଟ୍, ବିସ୍ବାସ୍ କିଦୁ, ମାରି ୱାଦ୍ ନେଗେନ୍ ଆନାତ୍ ।”
51ମାରି, ଇନ୍ଡ୍ର ୱାଜି ପିତର, ଜୋହନ ମାରି ଜାକୁବ, ମାରି ଗାଡ଼ିସ୍ଦି ୟାୟା ବୁବା ଡ଼ିସ୍ତିଙ୍ଗ୍ ମାରି ଏୟେଙ୍ଗ୍ ନିଜେୱାଲେ ଲୋଇ ସନ୍ଡ଼୍ରେଙ୍ଗ୍ ସିଏତାର୍ । 52ମାତର୍ ୱିଜେରେ ତାନି ଉଣ୍ତିଙ୍ଗ୍ ଆଡ଼୍ବାଜି ଆଡ଼୍ବାଜି ବକାଦୁ କତାଜି ମାର୍ଆର୍ । ଆବେନୁ ୱାନ୍ ଇର୍ଆନ୍, “ଆଡ଼୍ବାମାଟ୍; ୱାଦ୍ ସାଏତ୍, ମାତର୍ ସୁସ୍ତାମାନାତ୍ ।”
53ମାତର୍ ୱାଦ୍ ସାତାମାନାତ୍ ଇଜି ନେସ୍ତିବାଣାନ୍ ୱାର୍ ଜିସୁଙ୍ଗୁଁ ସେମାର୍ କିଜିମାର୍ଆର୍ । 54ମାତର୍ ୱାନ୍ ଆଇଲିଦି କିୟୁ ଆସ୍ସି କୁକ୍ସି ଇର୍ଆନ୍, “ଏ ଆଇଲି, ନିଙ୍ଗିଁଆ ।” 55ଆବେଟ୍ ତାନି ଜିବନ୍ ଡ଼େସି ୱାତାତ୍, ମାରି ୱାଦ୍ ଆୟାଦାପ୍ରେ ନିଙ୍ଗିଁତାତ୍, ଜିସୁ ତାନିଙ୍ଗ୍ ଇନିକାବା ଉଣ୍ତେଙ୍ଗ୍ ସିଦେଙ୍ଗ୍ ଇର୍ଆନ୍ । 56ଇବେଟ୍ ତାନି ୟାୟା ବୁବା କାବା ଆତାର୍; ମାତର୍ ଆୟା ଗଟ୍ନାଦି ମାଟାଦିଙ୍ଗ୍ ଏଙ୍ଗ୍ବା ଇନ୍ମାଟ୍ ଇଜି ୱାରିଙ୍ଗ୍ ଇର୍ଆନ୍ ।
Atualmente selecionado:
ଲୁକ 8: NTKoo20
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020