Matiye 11
11
1 Jeju ndəjə njê-njaje goe tə̂ kə̂ dɔku gire joo le tunga a, nɔtu naw mə tɔkə bbeje tə̂ kə̂ dɔ nangə tə̂ənn ta tɔju nɛ̂n ddəm ta kila mbər Tar kə̂ Maji ddəm.
Jan-Batisi ula duju tar Jeju
2 Jan-Batisi nayn kəy-kula tə̂ a, oo tam kula kə̂ Kristə aw dda. Yeenn bba, nula marə njê-njaje goe tə̂ rɔɛ̂ tə̂ narə 3daw dujeje nan: «Əi â ə-to dəw kə̂ a ta ddee le wase maji karə n-ngəbbə marə dəw dang wa?» 4Jeju ilade tə̂ nan: «Aw paje nɛ̂n kə̂ ooje kə kəmse ddəm kə mbise ddəm le arəje Jan. 5Ə-paje nan: ‹Njê-kəm-tɔje ooje lo, njê-gɔl-gotoje njaje, banji lə dəwje goto rɔde tə̂ kə ddang, njê-mbi-kutuje ooje tar, dəwje kə̂ oyje ndolje ngaâ njê-ndooje ooje Tar kə̂ Maji.› 6Maji arə dəw kə̂ əman â, mâ to nje-dda karə mə-kunn laa oso ang.»
Jeju pa tar dɔ Jan-Batisi tə̂
7Njê-njaje go Jan tə̂ le təlje a, Jeju unn kutu pa tar dɔ Jan tə̂ arə dəwje kə̂ banya le nan: «Ddi â awje aw ooje mə kɔr tə̂ le wa? Waa lə habbə kə̂ ləl aw yəkə wa? 8Bbo to ye ang a, ddi â aw ooje wa? Aw ooje dəw kə̂ ula kubbu kə̂ kura wa? A njê kə̂ ulaje kubbuje kə̂ kura isije kəy-mbay tə̂. 9A ddi njaa â aw ooje le wa? Marə nje-kila mbər tar lə Lubba wa? Tɔkɔrɔ, m-pa marəse, nuta nje-kila mbər tar lə Lubba bbay. 10Jan le â, n̂-pa tar laa Makəturu tə̂ lə Lubba nan:
‹Mâ kula nje-kaw-kula ləm nɔin tə̂
karə n̂-dda ddəw nɔin tə̂.›
11«Tɔkɔrɔ m-pa marəse: Horo dəwje tə̂ tɔyn kə̂ dɛnɛ̂nje ujude, dəw kə̂ uta Jan-Batisi goto. A dəw kə̂ to tɛn uta kəseje mə Bbe-kɔn tə̂ kə̂ darâ utɛ̂. 12Unn kute dɔ ndɔ tə̂ lə Jan-Batisi ndərəng bbasinɛn, Bbe-kɔn kə̂ darâ to nɛ̂n kuwa kə singa ngaâ njê-singaje â aw sangəje ddəw ta kuwa taa. 13Mba njê-kilaje mbər tar lə Lubba kə Ndu lə Mɔyijə paje tar Bbe-kɔn lə Lubba ndərəng tee dɔ Jan tə̂. 14A bbo ə-ndikije tə̂ səm a, ne njaa n̂-to Eli kə̂ a ta ddee le. 15Dəw kə̂ mbia to a, maji karə oo tar nəənn!
16«Njê kə̂ dda bba mâ kunnde kɔju nɛ̂n dəwje kə̂ bbokənɛn wa? N̂-toje tokə ngannje kə̂ isije natâ ngaâ paje kə̂ taar arəje ngann marəde nan: 17‹N-kɔl mbula karə ə-laje nɛ̂n, a ə-laje ang, jɔsu pa yo jarəse a, ə-nɔnje nɛ̂n ang tɔ.› 18Mba Jan-Batisi ddee le ɔn muru ang ddəm ay nɛ̂n ang ddəm. A dəwje paje nan: ‹Ndil kə̂ maji ang to məɛ̂ tə̂.› 19Ngonn lə dəw ddee ngaâ ɔn muru ddəm ay nɛ̂n ddəm a dəwje paje nan: ‹N̂-to nje-nɛ̂n-kusa kə nje-nɛ̂n-kay. N̂-to nje-buwa-kura lə njê-taaje narɛ lambo ddəm njê-nɛ̂n-ddaje kə̂ maji ang ddəm.› A kulaje kə̂ kəm-karɛ lə Lubba le aw dda, tɔju to kəm-karɛ le to gatə gatə.»
Dəwje kə̂ bbeje tə̂ kə̂ mbətəje ta kunn məde karə Jeju
20Yeenn ngaâ Jeju unn kutu kɔl nya kə dəwje kə̂ n̂-dda nɛ̂n-mɔrije bbeê ləde nya uta kəseje tɔyn, mba n̂-mbətəje ta turu məde. 21N̂-pa nan: «To ndoo nya arəse, see dəwje kə̂ Korajɛn! To ndoo nya arəse, see dəwje kə̂ Betesayida! Nɛ̂n-mɔrije kə̂ m-dda horose tə̂ nəənn, bbo m-dda mə bbeje tə̂ kə̂ Tir kə Sidɔn â be a, ləw baa njaa dəwje kə̂ mə bbeje tə̂ənn a kulaje kubbu-ndoo ddəm dâ kisije dɔ bu-puru tə̂ ddəm ngaâ dâ turuje məde. 22Mba yeenn bba, m-pa marəse: Ndɔ gangə sariya a, sariya kə̂ dɔse tə̂ a ngəng kuta sariya kə̂ dɔ Tir kə Sidɔn tə̂.
23«A əi Kapɛrnawum, dâ kunni kə taar ndərəng darâ wa? Dâ təl səi bəər ndərəng lo tə̂ lə dəwje kə̂ oyje. Mba nɛ̂n-mɔrije kə̂ m-dda bbe ləi, bbo m-dda Sɔdɔm a, bbe le a nayn baa bbay ndərəng bbokənɛn. 24Mba yeenn bba, m-pa marəse, ndɔ gangə sariya a, sariya kə̂ dɔse tə̂ a ngəng kuta sariya kə̂ dâ gangə dɔ dəwje tə̂ kə̂ Sɔdɔm.»
Jeju tɔju bɔɛ̂je arə dəwje kə̂ tɛn gəreje
25Karə tə̂ənn, Jeju pa nan: «Mɔsu gajii Bɔy, əi kə̂ ə-to Əbbə-dəwje darâ ddəm nangə̂ ddəm mba iya nɛ̂nje nəənn le njê-kəm-karɛje ddəm njê-nɛ̂n-gərəje ddəm. A ə-tɔju nɛ̂njeenn le dəwje kə̂ toje to dəwje kə̂ tɛn baa. 26Tɔkɔrɔ Bɔy, mba əi njaa ə-ndiki karə to tokə baann.»
27«Bɔy inya nɛ̂nje tɔyn jim tə̂. Dəw kâra gərə Ngonn le ang. Bɔ kâra baa â gəre. Dəw gərə Bɔ le ang. Ngonn le kâra baa â gəre, a dəw kə̂ Ngonn le ndiki ta tɔjɛ̂ Bɔ le bba a gərə Bɔ le tɔ.»
Maji ta ddee rɔ Jeju tə̂ kinga lo kuwa-rɔ
28«Ə-ddeeje rɔm tə̂, sese tɔyn kə̂ nɛ̂n-koto aw ɔɔyse arə singase ɔru, mâ karə uwaje rɔse. 29Ə-taaje juku ləm otoje ngaâ arəje m-tɔjuse nɛ̂n, mba m-wul pee ddəm məm to mə ngonn-kasə ddəm. Yeenn bba â kuwaje rɔse. 30Mba juku kə̂ mâ kunda gɔsuse tə̂ ɔɔy ang ddəm nɛ̂n-koto kə̂ marəse karə otoje kara ɔlɛ pel pel ddəm.»
Atualmente selecionado:
Matiye 11: KabbaDkS
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2020, ACOTBA