Matiye 2
2
Aalimnigee ma ibiniy kalli asaa elliti Iisa
1Iisa gu weyya darre ta Beteleyem ma aaye kiɗa ta Yudee#2.1 Beteleyem ay darriti sultan ka tatta ka Isirayel kee Dawud maa gu wewɗiya. Elloŋ 1 Samiyel 16.1. wikinne maa ga Erod alɗo sultan ka Yudee. Guu aalimnigee ma ibiniy kalli ma garaayo gaari ma asaa, waciɗe min ta jarilti, guu asiɗe geegar ka Zerizalem. 2Guu inniɗiy giimi goo: «Ay ŋa ga miica maa gu weero ma akka dee sultanco Yawudigeyyo? Ni elliyya kaalu min ta jarilti ma tasaaca wiyawti nii asiɗe ni asiyyee darsa unti.» 3Maa ga sultan Erod giyyicca kabarre taata, gaa barjilɗe ta tirta o giimi ku Zerizalem kulla paracco barjileero ma gata. 4Gaa tappiɗiy taattuweeco soƴoowee ku saɗikaŋgeyyo paracco, o aalimnigee ku Kitamniti Muusa, gaa inniɗiy gaa: «Masi pa, gata maa ga Mella aparriya, gu weewaa taŋaa?» 5Guu tiiliyyee goo: «Weewaa darre ta Beteleyem ma aaye kiɗa ta Yudee, asan ga ay keeke appe maa ga nabiinice ketepeyye.» Nabiinice pa ketepeyye gaa:
6«Kaŋ, darre ta Beteleyem, ma aaye kiɗa ta Yudee,
min diyargee ku kiɗaati Yudee, ka rommata ɗa,
asan ga ay min oko kaŋ appe ga akka ooma tattuwe,
ma akka dee aleŋ maggu ma akkiy tawwa gimtaw ku Isirayel#2.6 Elloŋ Misee 5.1..»
7Gaa min oko kaaka ga Erod kolliɗiy ma ƴaapo ka aalimnigee ma ibiniy kalli, gaa inniɗiy gaa ga kaalu oomiyoo wikinne ŋawwa. 8Gaa min oko kaaka ga n̰aamiɗiy Beteleyem gaa: «Aɗoŋ gonek ku deeɗo inna daŋ daŋ ma gaartee miici. Wikinne maa kuu gassiyya pa, ku asoŋ ku asinnaw beneyya ku maa ga naa kulla kaatiɗo na deeɗe darsa.»
9Gaa maa ga sultan Erod beneyyiyyoogu beneyyiŋgeetee kotti, guu aalimnigee ma ibiniy kalli kaatiɗe. Gaa kaalu maa gu elelle kee min ta jarilti oomiyyoo gaa sapaɗɗo unco namma ga sarɗe ya were maa ga miica alɗo, gaa warriɗe. 10Maa gu elliyya ga warre, guu aalimnigee ma ibiniy kalli parhinɗe ta kaw. 11Guu un̰n̰iɗe aatti giiri, guu gassiyya miica ma yaati tee Mariyam. Guu darsiɗe unti. Guu iyyiɗiy lawco, gu biriyyee dahamne o dokkane o itir ka kaali maa gu kolaa goo mir.
12Gaa maa gu waciɗe min iŋaa pa, gaa Mella beneyyiyyoo ma waano gaa gu addo yooka ɗa wikirti Erod. Guu icciɗe botol kaƴi gu yookiɗe kiɗaaco.
Masi gu gaɗakkiki Masir
13Maa gu aalimnigee ma ibiniy kalli yookiɗe paaɗe kiɗaaco, gaa malaykatti Mella Miltine oomiyyee oko Yuusup ma waano, gaa beneyyiyyee gaa: «Wacu, icciya miica ma yaati, ki gaɗɗikkitoŋ Masir. Addo nunta gonek namma ya wikinne maa na asiyyam beneyya payya naa ki yooku, asan ga Erod deyekka miica ga deeɗiya.» 14Gaa ma haŋka keeke aɗe ma aandoŋ kaaka saa, ga Yuusup icciyya miica ma yaati, gaa gaɗɗikkiko Masir gu deeɗe gubba. 15Gaa nuntiɗe gonek Masir namma ga Erod maatiɗe. Ay goŋŋa appe ga beneyti Mella Miltine maa ga nabiinice beneyye asiɗe butulti. Miltine pa beneyye gaa: «Na kolliya runtu ga oomiɗo min Masir#2.15 Elloŋ Ozee 11.1..»
Diyawco miico
16Maa ga Erod leeɗe kabarre kadar gu aalimnigee ma ibiniy kalli daɓalliya, gaa unɗe hep ma bogor. Gaa beneyyiyyoo oko asaakargeetee gaa gu aɗiy dee miici paracco ku miɗitta ma koyyenta min ƴilaakee seera o ma lekka ƴilaakee seera ku Beteleyem o ku diyargee ma aaye saripti. Caaɗo ta ƴilaakeyyo taata pa maa ga Erod bire, wagee ma beneyco aalimnigee ma ibiniy kalli maa gu beneyyiyee ma gaari ku wikinniti kaali maa ga oomiyyoo. 17Ay goŋŋa appe ga beneyti nabiinice Zeremi asiɗe butulti. 18Miltine pa beneyye gaa: «Guta giimi giyye kawwiko, o erco o laatiyo ta tirta darre ta Rama. Gita pa ay Rasel ma ereccay ronti. Gii alɗo aŋka ɗa daddibo asan gu ronti matte#2.18 Elloŋ Zeremi 31.15. Rasel teete pa ay daatti Yakub. Gita matee min tippa ƴilaakee ƴilaakee hatta guu weeɗiya Iisa Masi. Yawudigee pa massallica aleŋ yaaco ta balco. Gita pa massalliy daati paracco ku Yawudigeyyo maa gu deyyoogu ronco wikinniti sultan Erod..»
Yuusup o Mariyam o Iisa yokaa min Masir
19Maa ga Erod maatiɗe, gaa malaykatti Mella Miltine oomiyyee ma waano oko Yuusup maa gu alɗo missa Masir. 20Gaa beneyyiyyee gaa: «Wacu, icciya miica ma yaati, kuu yookiɗo kiɗa ta Isirayel asan gu ma deyekke diyawti miici matte paaɗe.» 21Gaa Yuusup waciɗe gaa icciyya miica ma yaati. Guu yookiɗe kiɗa ta Isirayel. 22Innasoo ga Yuusup leelo kabarre kadar ga Arkelawus deero sultan gaddanti tatti kee Erod kiɗa ta Yudee. Ay kaaka appe ga ɓayɗe yooko gonek. Gaa Mella pa beneyyiyyee payya ma waano. Gaa Yuusup kaatiɗe kiɗa ta Galilee. 23Gaa deeɗe nunta geegar maa goo Nazaret. Keeke pa deero ku maa ga beneyco nabiinigeyyo asiɗo butulti. Nabiinigee pa beneyye goo: «Masi gu akkiya kolowwa goo ‘Gimu ka Nazaret’.»
Atualmente selecionado:
Matiye 2: mmy
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2019, Wycliffe Bible Translators, Inc. All rights reserved.