Mateo 21
21
Yerosare‑ya Yeso kobone
1Yerosare hawi‑ya oda yakana, Orifera adami toha, Befaki toha na, yakari‑ya oda kobona, Yeso‑ya oda da‑daba mai fama mai‑ya yose,
2“A‑ahi‑ya mai tabori‑ya dai towakahi. Mai tabori‑ya dai towakiya, mai tabori‑ke boho bidi yetene madi eyehe yaditone dai awiya, dai disawaheya, dai kakamayaho.
3‘Hini yamata‑bone boho mai dai disawahiti?’ Mai ati niya,
‘Ai‑ka Hidi mai haahinani.’ Dai ati niya,
Boho mai‑ya mai daanaboneni.” Yeso ati nemarine.
4Hibati‑ya Deoso ati‑ya mai mi‑mita‑mete mai‑ka owa ati‑mata dai mitahi,
5“Yerosare‑ya mai wi‑wina mai‑ya dai hiyarahi. Dai‑ka hidi webote dai‑ya kakibona, ati hamarebona, boho mese‑ya itaribonane. Boho bidi yetene mese‑ya itaribonane.” Ati nemata,
ati‑nima yama nawahamaroni.
6Yeso‑ya oda da‑daba mai fama, Yeso ati‑nima mai towaka, Yeso ati‑nima boho mai‑ya mai wasemaroni.
7Boho bidi yetene madi eyehe‑ya mai kakama, boho mai mese‑ya oda‑ka bora oda sookanire‑ya Yeso itari, Yerosare‑ya oda tokawahamaroni.
8Yeso‑ya mai dama mai sawe, Yeso hawine‑ya mai‑ka bora‑ya mai nawiya, mai one awa afe‑ya nawiya namaroni.
9Mai one dai toha, mai one yoto na, mai hiyara, mai ati kita,
“Oda‑ka hidi i‑di Dafi‑ka nodi oda kahiyarineni. Deoso tiwa‑ya yose, tiwa‑ya kasomayaho, oda ati nineni. Deoso neme‑ya wine, Deoso oda kahiyarineni.” Mai dama mai ati namaroni.
10Yerosare‑ya oda kobona, mai dama mai ati yanana,
“Ebeni‑ke tohati?” Mai ati namaroni.
11“Yeso Nasare‑ke amane. Deoso ati‑ya mi‑mita amane.” Mai ati namaroni.
Deoso‑ka yobe‑ya Yeso toke
12Deoso‑ka yobe‑ya Yeso toke, yama‑ya mai one daa, mai one yama‑ya kanika na, mai‑ya Yeso kananiwahemarine. Yinero‑ya mai da‑daa mai‑ka mesa‑ya Yeso fatatokawiti, wayomata mai‑ya mai da‑daa mai‑ka kadera‑ya Yeso fatatokawiti nemarine.
13Mai‑ya hiyare,
“‘Oka yobe‑ya owa‑ya mai hiyaraboneni.’ Deoso‑ka yama hani ati na,
dai ene yama‑ya mai bo‑boti mai‑ka yobe‑nima yobe nawawahane.” Yeso ati nemarine.
14Deoso‑ka yobe‑ya mai noki awihinara mai toha, mai one ka‑kakona mai toha na, mai‑ya Yeso nakitamemarine.
15Deoso‑ka yobe‑ya Yeso tamine‑ya madehe hiyara,
“Dafi‑ka nodi ai kahiyarineni.” Madehe ati namaroni.
Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha na, Yeso ene amose‑ya mai awa, madehe ati‑ya mai mita na, mai yawawahamaroni.
16“Yeso, madehe ati timitineni?” Mai ati na,
“Mai ati omitani. Deoso‑ka yama hani dai kadikaterini?
‘Madehe, madehe borehe, mai na, Deoso ene Deoso‑ya mai kahiyaraboneni.’” Yeso ati nemarine.
17Makobote Betaniya‑kaya Yeso oda eyehe tokomemarine, oda amonabonehe.
Fiko abineni
18Yerosare‑ka hawi‑ya oda tokomaminatasa, Yeso fimimarine.
19Hawi fowari bodi‑ya fiko ohare waa‑ya Yeso awe, toke, fiko bonora, afe hinama tohamaroni.
“Tibonomateraboneni.” Yeso ati ne,
Ati ene fiko wayatonamaroni.
20Fiko wayatona‑ya oda awa,
“Ka! Hini yamata ihi fiko wayatona kanibote nihi?” Oda ati namaroni.
21Yeso oda‑ya hiyare,
“Owati amosa dai mitahi.
‘Deoso kitatene.’ Dai atibodi ati nahi,
‘Deoso kiteba awane.’ Dai atibodi ati riyahi,
Deoso ati dai nofabisiya, owa ene kitabote‑nima dai ene naboneni.
‘Adami webote, tibokahi.’ Dai ati niya,
dai ati ene adami webote bokaboneni.
22Deoso ati dai nofiya, Deoso dai haaniya, dai ati‑nima yama naboneni.” Yeso ati nemarine.
Yeso‑ya mai weena
23Deoso‑ka yobe‑ya Yeso tokiyome, mai‑ya kanawatomarine. Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha na, mai kamake, Yeso‑ya mai weenabone, Yeso‑ya mai hiyara,
“Ebeni‑ke ati ene mai‑ya kanatiniti? Ebeni‑ke ati ene mesa‑ya fatatikawiti tiniti?” Mai ati namaroni.
24“Dai ati omiti bahi, owati dai mitahareboneni.
25Ebeni‑ke ati ene Yowaho Batita mai‑ya habanirisati? Deoso ene toha, ai owa ene toha nane, hini yamata‑nima dai ati niti?” Yeso ati nemarine.
Mai ibi hiyara,
“‘Deoso ati ene amane.’ Ai ati niya,
‘Hini yamata ihi Yowaho Batita ati dai nofariti?’ Yeso ati nebonane.
26‘Ai owa ati ene amane.’ Ai ati niya,
ai‑ya mai bisinaboneni. Mai dama Yowaho Batita ati‑ya mai nofa,
‘Yowaho Batita Deoso ati‑ya mai mi‑mita mai‑ka owa amane.’ Mai dama mai ati teni.” Mai ibi hiyara mai ati namaroni.
27Yeso‑ya mai hiyaramatasa,
“Yowaho Batita tamine oda wato awirini.” Mai ati na,
Yeso mai‑ya hiyare,
“Yowaho tamine dai kaminara, owa tamine okaminahariraboneni.
Ai owa bidi mai fama
28Owati dai miti bahiya, dai ati omitaboneni. Ai owa bidi mai fama, bidi daidi‑ya hiyare,
‘Ai‑ka ofa bodone‑ya yama anitinahi.’ Badi ati ne,
29‘Ofa bodone‑ya yama anini onofarini.’ Bidi daidi ati ne,
makobote, atibodi ene toke, ofa bodone‑ya yama‑ya aninibisane.
30Makobote bidi yoto‑ke‑ya hiyare,
‘Ai‑ka ofa bodone‑ya yama anitinahi.’ Badi ati ne,
‘Ofa bodone‑ya yama ani·onaboneni.’ Bidi yoto‑ke ati ne, makobote yama‑ya anirene.
31Ebeni‑ke badi ati‑ya tokadababisati?” Yeso ati ne,
“Bidi daidi badi ati‑ya tokadababisane.” Mai ati namaroni.
“Owati amosa dai mitahi. Kofeno‑ka yinero‑bona‑ya mai ha‑haa mai toha, fana towe mai toha na, Neme‑ke ai nafi‑ka hidi kitabote tohawahe‑ya mai sawebone, dai‑ta dai sawiraboneni.
32Dai atibodi amosawahabone tamine‑ya Yowaho Batita hiyare, ati dai nofaramaroni. Kofeno‑ka yinero‑bona‑ya mai ha‑haa, fana towe mai toha na, Yowaho Batita ati‑ya mai nofabisamaroni. Mai ihi amosawaha mai dai awa, Yowaho ati dai nofasa rani.” Yeso ati nemarine.
Fadara tamine
33Yeso mai‑ya kanawatobona mai‑ya hiyare,
“Ofa tabori‑bone‑ya hidi hawa tonihi, ofa noki‑ya kamane, yama ba‑barikana‑ya wamane, ofa ta‑tai‑ka hodi‑ya wamane, ofa‑ya mai na‑nawada‑bone mai tabori nemehe‑bone‑ya wamanamaki, yama yaki‑ya tokebona mai‑ya hiyare,
‘Oka awa bono dai nawadahi, hadiya, one okayafa, one dai kayafa naboneni.’ Ofa hidi ati ne,
‘Hehe, sibarini.’ Mai ati nani.
Fara yama yaki‑ya ofa hidi tokawahemarine.
34Ofa hadiya, ofa hidi‑ya mai na‑narifa mai‑ya yoseme,
‘Owa tabaro one‑ya dai tokomahi. Ofa one‑ya dai‑ya mai daaniya, ofa dai kakamiyahi.’ Hidi ati nene.
35Hidi‑ka ofa‑ya hika yo‑yose mai haana, ofa‑ya mai na‑nawada ofa‑ya mai daara, hidi‑ka yo‑yose owa‑ya mai bisi, owa mai hinaboha, owa yati‑ya mai hikinari hinane.
36Hidi yawe, hika yo‑yose mai one dama mai‑ya yosemakitasane, ofa‑ya kayafebonaha. Ofa‑ya mai daara, hika yo‑yose mai mai bisihinamakitasineni.
37Makobote bidi‑ya yosemakitase,
‘Oka dao ati‑ya mai nofabisaboneni.’ Hidi ati nene.
38 # 21:33-41 Ofa mai na‑nawada Yodeo mai‑ka hidi mai tamine toha, ofa hidi i‑di Deoso tamine toha, ofa hidi‑ya mai na‑narifa i‑di Deoso ati‑ya mai mi‑mita mai tamine toha, hidi bidi i‑di Yeso tamine toha ne, Yeso‑ya mai nanahababone ihi Deoso mai‑ya weeni kitebonane. Hidi bidi‑ya mai awa, mai ibi hiyara,
‘Bidi ai nanahabaho. Ai nanahabeya, badi abamakiya, mai‑ka yama nafi ai kayafaboneni.’ Mai ati na,
39bidi mai hinahabe, awa beheri‑kaya abo mai korohiwitine.
40Ofa hidi kameya, hini yamata‑nima nabati?” Yeso ati nemarine.
41Yeso ati‑ya mai mita, mai ati yanana,
“Hidi kameya, mai nafi‑ya nanahabebonane. Mai one mai‑ya yosemakiya, hika awa mai hinawada, ofa one‑ya mai daanaboneni.” Mai ati nemarine.
42 # 21:42 Yobe‑ya mai wa‑wama Yodeo mai‑ka hidi mai tamine amani. Awa mai werehiwite Yeso tamine amane. Deoso ati ene mai‑ka hidi kitabote Yeso tohawahebonane. Yeso ati yananamatase,
“Fara amani. Deoso‑ka yama hani ati dai mitahi,
‘Yobe‑ya mai wa‑wama awa mai werehiwite, yobe tati mese ewene tohawahene.’ Deoso‑ka yama hani ati nineni.
Deoso ene ai awemari, ai ya‑yainineni.” Yeso ati nemarine.
43“Owati dai mitahi. Deoso dai‑ya haanemarine, hika yama dai nawadabonehe. Hibayata bara mai‑ya haanebonane, hika yama mai hinawadabisabonehe. Deoso ati‑nima mai nawahaboneni. Deoso‑ka yama dai nawadami awiraboneni.
44 # 21:44 Awa‑ya ai sonariya, Yeso ati mai nofara Deoso mai‑ya weenebona tamine amane. Awa ai‑ya koboniya, Deoso‑ka we‑wee tamine amani. Yobe tati mese‑bona home‑ya ai sonariya, ai bakatonaboneni. Yobe tati mese ewene soneya, ai‑ya koboneya, ai abi ohareboneni.” Yeso ati nemarine.
45Deoso‑ka yama‑bone‑ya mai da‑daa mai‑ka hidi mai toha, fariseo mai toha na, Yeso ati‑ya mai mita, mai yawa,
“Oda tamine‑ya Yeso hiyarane.” Mai atibodi ati namaroni.
46Yeso‑ya mai watabone mai atibodi ati na, mai hiwati awiremarine. Mai dama mai sawe mai ihi yama yofina, Yeso Deoso ati‑ya mi‑mita amane, mai dama mai ati teni.
Atualmente selecionado:
Mateo 21: jaaNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão