Maroko 2
2
Maki yakare tamine
1Mahi fa‑famaraba ne‑ya Kafanaho‑ya Yeso kamatase, koboname tamine‑ya mai mita,
“Yeso, hini tabaro‑ya sawimatasematane.” Mai ati nameteni.
2Mai dama mai yorotokana, mai ihi yobe kibe, nokobi‑ya mai one dama naha, Deoso ati‑ya Yeso mai‑ya kaminemarine.
3Maki ka‑kakone mai hiwakame, awa‑ya bora dasikana‑ya maki foriya, mai 4 kana mai diwakanamaroni.
4Mai kamake, yobe doro kibe ene nokobi‑ya mai tokiyomara, yobe tati mese‑kaya mai hiwakimise, yobe tati mese‑ya mai seekana, yobe tati mese hodone‑ya maki‑ya mai kanakisamaroni.
5Mai ihi‑ya Yeso awe, “Owati‑ya mai nofineni.” Yeso atibodi ati ne, ka‑kakone‑ya hiyare,
“Soho, tiwa ene towe manakone wadamarini.” Yeso ati nemarine.
6Mose‑ka yama hani ati‑ya mai ka‑kamina Yeso ati‑ya mai mita mai yawawahamaroni.
7“Ai ati ene ai owa ene manakone fawatere, Deoso hini ati ene ai ene manakone fawateni. Maki ene towe manakone wadamaremona Yeso ati ne,
‘Deoso‑nima ona ama·oni.’ Yeso ati ne awane.
Hini ati ene abaho.” Mai atibodi ati namaroni.
8Mai atibodi ati‑ya Yeso wato, ati yanane,
“Hini yamata‑bone owa‑ya dai atibodi weeniti?
9Bofe‑ka mai ati ihi ai ene towe manakone fawarihi, bofe‑ka mai ati ihi ai owa kitamarihi tene.
10Owati ihi ai owa ene towe manakone wadamare, dai awaboneni.” Yeso ati nemarine.
Maki kiyane‑ya hiyare,
11“Owati timitahi. Tiwaamisahi. Tika fo‑fori‑ka yama diwatikaniya, tikamahi, tika yobe‑ya.” Yeso ati nemarine.
12Waamise, hika fo‑fori‑ka yama‑ya damane, mai dama mai noki‑ya tokome, mai hiwakatomemarine. Mai nafi atibodi yama‑ya kadika, Deoso‑ya mai kahiyara,
“Deoso ene amosane. Hibati‑ya haa‑nima ai ene na ai awaterani.” Mai ati namaroni.
Yeso Refi‑ya himane
13Faha widi‑ya Yeso tokomatase, mai nafi tokomake, mai‑ya Yeso kanawatomarine.
14I‑di Refi i‑di Aofio bidi amane. Yeso yakane, kiinawame, kofeno‑ka yobe bidi‑ya i‑di Refi itariya, Yeso awe, Refi‑ya himane,
“Owa‑ya tisawihi.” Yeso ati ne,
Refi waamise, Yeso‑ya sawiwahemarine.
15Yeso hika mai da‑daba mai eyehe i‑di Refi‑ka yobe‑ya mai tokamaroni. Kofeno‑ka yinero‑bona‑ya mai ha‑haa mai dama, mai ihi amosara mai dama, mai na, Yeso‑ya mai tokomake, Refi‑ka yobe‑ya mai nafi marinamaroni.
Yeso fariseo mai‑ya hiyare
16Mose‑ka yama hani ati‑ya mai ka‑kamina mai one fariseo mai toha, Yeso marine‑ya mai awa, Yeso‑ya mai da‑daba mai‑ya mai hiyaramaroni.
“Hini yamata‑bone towe mai eyehe Yeso tafati? Kofeno‑ka yinero‑bona‑ya mai ha‑haa mai eyehe oda tafarihi, mai ihi amosara mai eyehe oda tafarihi, oda teni.” Mai ati namaroni.
17Mai ati‑ya Yeso mite, ati yanane,
“Mai kiyara mediko mai‑ya kasomaterene. Mai kiyana‑ta mediko mai‑ya kasomatene. Mai ihi amosamone mai ati na mai hima·orani. Mai ihi amosara mai hima·onabone ihi okemaroni.” Yeso ati nemarine.
18Yowaho‑ya mai da‑daba Deoso‑ya mai kahiyarabone, mai tafarihi, fariseo mai‑ya mai da‑daba mai tafaharirihi namaroni. Fara ihi Yeso‑ya mai one hiyara,
“Yowaho‑ya mai da‑daba mahi owa‑ya mai tafara, fariseo mai‑ya mai da‑daba mahi owa‑ya mai tafaharirani. Haa‑nima mai ihi na damateni. Tiwa‑ya mai da‑daba mai tafi fawaterani.” Mai ati namaroni.
19Yeso mai‑ya hiyare,
“Mai‑ka owa fanebona sawi ene mai ya‑yaina, mai tafi fawarani. Maki fanebona sawi ene mai tafi fawarani.
20Yama one‑kaya maki mai hiwakebona, tabora bara‑ya tokeya, mai tonokosa, yawa ihi mai tafi fawanaboneni.” Yeso ati nemarine.
21 # 2:20-22 Ai ya‑yaina ai tafi fawarani. Yama bote‑ya yama yati dabara‑nima ai na, ai ya‑yainiya, ai tafi fawarani. “Ai‑ka bora bote hodeya, bora ibe yati ai nawaana, bora ai sokonawaha, bora ibe yati bi‑bidi nawama ihi bora bote nafi sibitonaboneni. Haa‑nima yama na towe tohateni.
22Bani ataro wamani yama wiye toha, wamani yatiya, fino yati ai soronisiya, wiye taokiterani. Yama wiye bote‑ya fino yati ai soronisaterani. Yama wiye bote‑ya fino yati ai soronisiya, taokana, yama wiye aba, fino abateni. Fino yati wiye yati‑ya ai soronibisateni.” Yeso ati nemarine.
Ai‑ka Ayo sabado hidi
23Sabado one‑ya mai yakana, fadara bai‑ya mai tokofaramiya, Yeso‑ya mai da‑daba tiriko tati‑ya mai bakakasamaroni, tiriko‑ya mai kababonehe.
24Mai ihi‑ya fariseo mai awa, Yeso‑ya mai hiyara,
“Hini yamata‑bone tiwa‑ya mai da‑daba tiriko tati‑ya mai bakakasiti? Sabado‑ya yama‑ya mai anina.” Fariseo mai ati namaroni.
25-26 # 2:25-26 Dafi hika mai eyehe Deoso‑ka yama‑bone‑ya mai da‑daa mai one mai tohi awirametemoneni. Deoso‑ka baho‑ya mai kaba, Deoso yawi awirematamonane. Yeso ati yanane,
“Dafi tamine dai kadikaterini? Abiata, Deoso‑ka yama‑bone‑ya mai da‑daa mai‑ka hidi webote tohemataya; Dafi, hika mai eyehe toke, mai fimi nafemetemoneni. Deoso‑ka yobe‑ya Dafi tokiyome, Deoso‑ka baho‑ya idi, baho‑ya mai kabametemoneni. Deoso‑ka yama hani ati ihi Deoso‑ka baho‑ya mai one kabaterani. Deoso‑ka yama‑bone‑ya mai da‑daa mai hikababisateni.” Yeso ati nemarine.
27 # 2:27 Feriado‑ya yama‑ya mai anirani. Domiko, nataho, semana sahata na‑ya yara mai anira, feriado ihi. Yeso ati yananamatase,
“Deoso ai‑ya wamani dai tohe, makobote ati ene sabado feriado tohawahametemoneni. Feriado‑ya Deoso wamanematamonane, ai‑ya kasomebonaha.
28 # 2:28 Dai‑ka Ayo neme‑ke Yeso ati ne, hini tamine‑ya hiyarematane. Dai‑ka Ayo neme‑ke sabado hidi amane.” Yeso ati nemarine.
Atualmente selecionado:
Maroko 2: jaaNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão