João 1
1
Tokantshi
1Hyinuwajikolu rawa tokantshi. Hoyakaluymatkalu Tokantshi hiyrun-koxa Hoyakalukni wale Tokantshi.
2Hyinuwajikolukananukotka Hoyakaluyma rawatka Tokantshi.
3Hoyakalu ptowru potuko ruyakota waleyma. Hikepotukni ruyakoleru Hoyakalu wale minje.
4Tokantshi hiwekluni. Xye hiweklu katalni yine nikotyehitatshri.
5Katalu nikotlu mapchahawaka hiyrun-koxa mapchahawaka hi hiwakatkalu katalu.
6Hoyakalu yokanatlu satu jeji João tshinkaluru.
7Xye jeji hapokatka hiphujtatatshri rixyawaka ruphujexyawakaplu katalu katni wale. Wan-rixa ptowru yineru halixatshri rixinripa runkakle tshinanu.
8Xye katalu hi João-kni wale. Seyni runatka João ruphujtaxyawakaplu katalu katni.
9Katalu halikakalutu waleni katalu xye tshijne hapokatshri ptowru yineru hchinikanu nikotatshri.
10Xye tshijne rawa hiyrunu xye tshijne hiyakotatshrini wale. Seyni xye tshijne hajene hi himathetatkalu.
11Runatka waleko rayinetene yehimka seyni rayinetene hi ralukanatkaluna.
12Seyni ptowruneko, ralixjene pejnu rutakna Hoyakalu whenene rixyawakapna, ralix-hiwakatjene pejnu tshinanu wan-rixa.
13Wanna ptowruneka hi hrahtshiyma matutatshine tsonni, hi mantshi matuxikatshine tsonni, hi yineru halujyawaka tshinanu matutatshinetkani seyni Hoyakalu tshinanu matutatshinni wanna.
Tokantshi Manewaxyawaka Piranapni
14Tokantshi manewata. Hiyrun-koxa hixa tskala rawakanatatka. Wetlu royaknu. Hoyakalu hoyaknu pixka rixatka Hoyakalu whene satupkalutu. Hpoyahokakatkalu ptowru potuka Hoyakalu hihlenu hiyrunu halikakalutu pirana hpoyahokakatka.
15João hiphujtatlu xye yineru. Tsru tokantshiyma wla htshina João:
— Xyekatkani ntshinjekanatanru: “Hita natjini hapokatshripa hita yohnik-kahwakpiratkaluru klu tshinanu nma matutkanuklunuwa rawakotka wale.”
16Klu tshinanu rumukatle tsru potuko hepixlewatatshri yoptotatshinwu hixa ptowrunekwu. Ruhlenu renekachale yoptotatshinwu hiyrunu ruhlenu renekachale wane pnutepa yoptotatshinepwu.
17Hiykolu pirana yonatkaluru yokanatatshrini Moisés-ni seyni Jesus Cristo-kni Hoyakalu hihlenu ptowru potuka hiyrunu halikakalutu pirana hiyakotatshrini wale.
18Hi satukna yineru hikeklu hetjejetlu Hoyakalu. Halikaka Hoyakalu whene satupkalutu, ruru Hoyakalusko potuko hwatshriko, walekni hiphujtatlu Hoyakalu.
João Batista Tshinkaluru Hinkaklewaxyawaka Piranapni
19Xyekni João pirana, judeu-ne mitshi yokanatna sacerdote-ne hiyrunu levita tshinkalune, Jerusalém poktshi hichpajikatshine, João tshinkaluru nwaka repomhiywakapluna João, katnihe wale.
20Waneya João hiphujexnawa. Hi pnuko htshinatka.
Seyni halikaka htshina, wla htshinatka:
— Hi Cristo-no hita, htshina.
21Waneya repomhatkaluna:
— Katpotyihe pixa? Elias tshinkalurlayihe?
Waneya João hihitna, wla htshina:
—Hike, hi waleno.
Waneya repomhatnakna:
— Hoyakalu tokanu hinkakletatshripotuklayhe?
Seyni wla htshinatka João:
— Hike.
22Hiyáhoni wane htshinruna:
—Punkakanwu katpotyihe pixa? Waluk-himatletlu kathe pikahwajnawa wunkakapyawakapna wyokanatjene, wepomhakjixjene.
23Waneya João wla tshina:
—“Hitni kahnete poktshiri saplewaxikatshri tokanno, wla tshinatshri: Halpokotanru Tsru Hixikatshriwa hatnu hapotkaka. Hoyakalu tokanu hinkakletatshrini Isaías-ni tshinkalurni tshinyawaka pixka nixa.”
24Seyni João hepomhapatshine wannani fariseu-ne.
25Hiyáhoni repomhaluna, waneya wane htshinruna:
— Cristo pmixkanuklunu ho Elias pmixkanuklunu ho Hoyakalu tokanu hinkakletatshri koxa pmixkanuklunu kluneru tshinanhe p-batiz-lewjeta?
26Waneya João hihitna, wla htshina:
— Hita honha n-batiz-jexyana. Seyni hixa hanikajite rawa satu yineru hmimatyehitanutu.
27Walekni hita pnute hapokatshripa hita yohnik-kahwakpiratkaluru. Hita hi tsru hixikatshriwano nkochpirojyawakaplo h-sapato-tetslu.
28Xyekaka ptowruka hakanhatka Betânia poktshiya, Jordão wenne pa sreta hwatshri, João batiz-lewjekanaxyawaka.
João Batista Hiphujexyawakatnaklu Katni Jesus Piranapni
29Waneya wale prika João hetlu Jesus. Runamta Jesus João nwaka. Waneya João wan-tshina:
— Hetanu hixa, xyekni Hoyakalu carneiro-te. Xyekni xye tshijne hektunu konatshripa.
30Xyekatkani nunkakletakanatanru: Satu jeji hita pnute hapokatshripa hita yohnik-hijhakalurni klu tshinanu hi nmatutawa rawatka wale.
31Hit-potuko hi nimathetatkalu katuktani seyni nuna n-batiz-lewajexyawaka honhaya rimaxyawakapluna israel-nerune katuktani wale.
Jesus Batiza-xikolu Piranapni
32Waneya João xye pirana hinkakletatka:
— Netlu Hoyakalu Hiwejikaluru, motkokoji pixka rixmaneta, tenhohne ruchpajya Jesus hoho rapokatka wale hoho rutukatka.
33Himka nimathetatkalu katuktani seyni Nyokanatjeru n-batiza-xyawakapa honhaya hinkakhapkatno wane htshina:
— Wale jeji honra pexiniplu Hoyakalu Hiwejikaluru hijrukhohotlu walekni batiza-tanna yine Hoyakalu Hiwejikaluruya.
34Hita hetlu hiyáhoni nunkakletanru, halikakni xye jeji Hoyakalu whenni.
Jesus Mitshikananu Hasruklene Piranapni
35Waneya wale prikatnaka João wane hwakanata hepi rasrukleneyma.
36Jesus reta yanamtatshri waneya wla htshina:
— Hetanru Hoyakalu carneiro-te.
37Nyi hepi João hasruklene jemlu htokanu. Waneya romkahitluna Jesus.
38Waneya Jesus hiprotaka, retna romkahitjene. Waneya wla htshinna:
— Kluhe hijhajeta?
Wanna wla tshinru:
— Hasruklewatatshri (wale Tsru Hixikatshriwa raluka tshinreta). Hanhe pwajeta?
39Waneya wale wan-tshinna:
— Hinanu hetapanru.
Wane hyana retluna rawjexyawaka. Wale hohne rutukna wale yehi klu tshinanu kayitkani quatro horas hetkotkani.
40Satu wanna hepi João tokanu yijnakotatshine, Jesus homkahitatshri, André tshinkalurni, Simão Pedro hepuru.
41André yahapkata himole potuko Simão tshinkaluru nwaka. Waneya wla htshinatkalu:
— Wukchikatkalu Messias. (Yokakkalurutka waleni Cristo.)
42Waneya André hanikatkalu himole Simão Jesus nwaka. Jesus hexiniklunru wla htshinru:
— Phiwaka Simão, João tshinkaluru whene. Seyni xawakni pixa hiwakatka Cefas. (Yokakkalurutka waleni sotlu.)
Jesus Nurexyawakna Filipe Hiyrunu Natanael Piranapni
43Waneya wale prika Jesus hichiniklu Galileia tshijne sreta hyiywakapa. Seyni mitshikananhapka Filipe rukchika waneya wla htshinru:
— Pomkahitanno!
44Filipe Betsaida hajerni, André hiyrunu Pedro hwajexyawaka poktshi hajerni wale.
45Filipe hijhatkalu Natanael waneya wla htshinru:
— Wukchikatkalu wale yineru Moisés-ni yonyehitanru yonruru piran-yehi hiyrun-koxa Hoyakalu tokanu hinkakletatshine yonyehitanru. Jesus-ni wale, José tshinkaluru whene, Nazaré poktshi hajeru.
46Waneya Natanael hepomhalu:
— Rumukathe satu pa hixanu kihleru Nazaré poktshi hakanhalexya?
Waneya Filipe wla tshinru:
— Punanu, petapanru.
47Waneya Jesus hexinri Natanael wale nwaka hinamta wla htshinanwakatlu:
— Hetanru! Tujrapatkani jeji israel-neru halikakalutu. Waleni maylokletu.
48Waneya Natanael wan-tshinru:
— Hanhe pix-himathetletno?
Waneya Jesus wla tshinru:
— Filipe mtomhaknuklunuwayi netyi figueira muna hpuko pwakanaxini.
49Waneya Natanael hihitlu, wla htshina:
— Kasruklewakleru, pixni halikaka Hoyakalu Whenyi! Pixni halikaka israel-neru pohireyi!
50Waneya Jesus wan-tshinru:
— Figueira muna hpuko pwakanaxini nexyayi ntshinre tshinanrahe, palixno? Xyekaka yohnik-hijhakalurkaka petanu.
51Waneya wla htshina:
— Halikakni, halikakni wla ntshinhi pa hohne tenhohne hitpukatshri hetanu hiyrunu hiwejikalune Hoyakalu towrene tenhohne hajene hetanu hatskomtatshine, serpikamtatshine Jeji Whene tshinkaluru hohowaka yapamtatshine.
Atualmente selecionado:
João 1: mpdBiblia
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil