Yohanna 1
1
Pwoo khi Naan buakhar gurum
1Phigyet diy sh'ee bhi gwooh a Pwoo khi Naan#1:1 Rev 19:13 nhighin. Pwoo khi Naan ni gyet kihshag kihh Naan, Pwoo khi Naan ni zag a Naan. 2Nyi kihshag kihh Naan phigyet diy sh'ee.
3Naan l'e bii weett a sh'i nyi. Baah mee'bii w'u Naan l'e kad baah a sh'i nyi mou. 4Seen a dhighin nyi; seen ni a peebhangg p'ee zhepp gurum mwopp. 5Peebhangg ni kaah bhanggpee dhighin pee'kwoo, dhangg baah pee'kwoo mak manshiiy nyi mou.
6M'ee gurum w'u Naan lop, w'u shumm nyi a Yohanna gyet ji. 7Ji a p'ee tupp'pwoo kaah peebhangg ni, tihh gurum weett mwopp pihhzeenn diy lhiwaa nyi. 8Baah gyet a nyi a peebhangg ni mou; ji-ji kyekk p'ee tupp'pwoo kaah peebhangg ni. 9Dihng peebhangg w'u zeenn-zeenn w'u kihh bhanggpee gurum mwopp weett gyet p'ee ji dhighin yill ni. 10Phigyet nyi diy dhighin yill ni, dhangg kooh bhalang phirooh Naan l'e yill ni a sh'i nyi, weett kihhsheh bhi baah yill ni man nyi mou. 11Ji kihpee mwopp'miin diy, dhangg baah mwopp lapp nyi mou. 12Dhangg kapp mwooh mwopp lapp nyi, w'u a mwooh mwopp pihhzeenn dhighin shumm nyi, bhi pihh pee mwopp tihh mwopp pwat zhepp khi Naan diy. 13Baah a zhepp w'u mwopp la mwopp a dhighin seghen khi gurum, kooh re'bhet khi shoopshik, kooh re'bhet khi l'aa gurum mou; a sh'i sh'in khi Naan.
14Pwoo khi Naan ni buakhar gurum, tong kihshag kihh munn. Mu naah men'riin khinyi, men'riin khi l'aa w'u a shik wu'khimhi kihh Pukhun, w'u a nyi kyekk put kihpee Pukhun diy. Nyi a g'u wu'rett, nyi a guzeenn pwetd.
15Yohanna y'aa tupp'pwoo kaah nyi bhall-bhall le, “A nyi a gwooh deh ih kihh satt wunn ih le, 'Gwooh kihh ji bwoon nah mett a'n fwaiy seh, p'ee phigyet wu'nyi diy dhangg wu'an.' ” 16A dhighin dw'uu wu'rett khinyi bhi munn weett mu lapp wu'rett harr kihh waah dyikihh. 17P'ee w'aar gyet ji a sarr Musa; wu'rett kihh zeenn ji a sarr Jesu Kristi. 18Baah m'ee gurum cham naah Naan mou; a L'aa khinyi w'u a nyi kyekk a shik wu'khimhi kihh nyi, w'u nyi zag a Naan, yakhal nyi kuss sh'i Pukhun, a nyi l'e tihh mu man nyi diy.
Yohanna shiih le a riy a Kristi mou
(Mat 3:1-12; Mar 1:1-8; Luk 3:1-18)
19A mihhse a bii w'u Yohanna gyet satt p'ar w'u mwoohnan khi Zhepp Yahuda w'u Urshalima mwopp lop pakk prist kihh pakk Levi mwopp tihh mwopp dum nang diy phi nyi kooh kyed nyi a wuyeh oh. 20Baah Yohanna mwaall mwopp mou, satt a kihgaak le, “Baah a a'n a Kristi mou.”
21Mwopp nang phi nyi le, “Gha a wuyeh? Gha a Iliya aa'?”
Shiih mwopp, satt le “Haiyou.”
Mwopp waa nang dyi phi nyi le, “Dheeh a gha a Gu-wanggshiiy shi bwaatt?”#WSW 18:15,18
Lapp mwopp le, “Haiyou.”
22Kyess ni bhi mwopp waa nang dyi phi nyi le, “Dheeh gha a wuyeh? Ghi satt meeh munn tihh mu dum diy mu dyangg mwooh mwopp lop munn o'h.”
23Yohanna lapp mwopp sh'i pwoo khi Ishaya gu-wanggshiiy le, “A a'n a dhekheh w'u kihh peetpee dhighin dh'em le, ‘Wu dhakk arr lhidum fyaatd Daah Naan.’ ”#Ish 40:3
24A nyi seh bhi pakk Farisiiy w'u mwopp lop mwopp seh, 25mwopp nang phi Yohanna ni le, “Dheeh a mihyeh l'e bhi gha phi sh'in baptisma kad kan a gha a Kristi, kooh Iliya, kooh Gu-wanggshiiy shi mou ayeh#1:25 Zhepp Isra'ila gyet mwopp kihh m'ang le gu-wanggshiiy w'u Musa satt dhighin WSW 18:15,18 dyikk kihh Kristi. Dhang nyi a kihhsheh mou, mwopp a wu'khimhi.?”
26Yohanna lapp mwopp le, “Wu'an phi sh'in baptisma wunn a sh'i a'm, dhangg dhighin wunn w'u wu kihh dyarrang nhighinse, bhi m'ee gurum nhighin naar wu w'u baah wu man nyi mou. 27A nyi a gwooh p'ee yakhal bwoon nah. Wu'an sh'i kaah nah maah a mak dheeh kromm w'u p'ee shwat kwaghashag shiiy nyi mou.”
28Mwopp sh'in bii mihhse weett a Betani, takhann yit'am Urdu w'u koghob wu'zeh, pee w'u gyet Yohanna kihh sh'in baptisma diy.
Jesu, L'aa Tihm khi Naan
29Kih dhi'dhaarr ni kaarooh Yohanna naah Jesu kihh ji bhi satt le, “Wu naah L'aa Tihm khi Naan w'u p'ee m'ang shigbis khi yill ni s'ang. 30A nyi a gwooh deh a'n phi kadpwoo kaah p'ar w'u a kihh satt diy wunn a le gwooh p'ee yakhal bwoon nah mett wu'an fwaiy seh, p'ee phigyet wu'nyi diy dhangg wu'an. 31Wu'an sh'i kaah nah baah gyet ih man nyi mou, dhangg bii w'u l'e tihh ih ji ih y'aa sh'in baptisma sh'i a'm a tihh Naan dyingg nyi diy Zhepp Isra'ila.”
32Yohanna waa tupp'pwoo dyi kaah Jesu le, “Ih naah Riin tong kih dhengNaan sam diy kaa duu'duu se sam dheeh kaah nyi. 33Baah dyinn deh wu'an p'ee man rooh kan a nyi a Kristi ni mou, kad baah a gwooh lop a'n p'ee sh'in baptisma sh'i a'm satt a'n le, ‘Gwooh mihh ghi naah Riin tong ki dhengNaan sam dheeh kaah nyi, bhi a nyi a gwooh p'ee sh'in baptisma sh'i Riin Wu'bhangg. 34An ih naah bii mihhse, pee'mhinyi bhi ih kihh tupp'pwoo kaah nyi a le a nyi a L'aa kihh Naan.’ ”
Zheppkamm khi Jesu wu'shee
(Mat 4:18-22; Mar 1:16-20; Luk 5:2-11)
35Kih dhi'dhaarr ni bhi Yohanna mwopp nhighin kihshag kihh vel dhighin zheppkamm keeniy mwopp. 36Kaarooh naah Jesu kihh ji p'ee dh'el bhi satt le, “Wu naah L'aa Tihm khi Naan a'ng!”
37Kaarooh zheppkamm khinyi w'u vel mhizeh mwopp klihng satt kihhsheh bhi mwopp lang'dang Jesu. 38Jesu buakhar naah mwopp kihh ja dang niy bhi nang phi mwopp le, “A ranggyeh? Wu kihh re'bhet mee'bii aa'?” Bhi mwopp lapp nyi le, “Rabbi, (w'u shiiy khinyi a Gukamm) ghi kihh tong a nihyeh?” 39Jesu lapp mwopp le, “Wu ja tihh a kattpee ni diy wunn.” Bhi mwopp duam naah pee w'u Jesu kihh tong diy. Mwopp sihkhitt kakhar puus mhizeh kihshag kihh nyi, p'ee pee gyet a kaa gonggpee wu'feerr se.
40Andrawus, em'nhikhin Siman Bitrus, gyet a kihmeh dhighin gurum w'u vel wu mwopp lang'dang Jesu kaarooh mwopp klihng bii w'u Yohanna satt seh. 41Bii w'u Andrawus sh'in chou, bhi lyap a emnhikhin Siman kad, bhi satt nyi le “Wu'munn mu kad Almasihu shi, w'u a Kristi.” 42Bhi ji kihh nyi kihpee Jesu diy. Jesu naah Siman, bhi satt nyi le, “Gha a Siman, em Yohanna, mwasseh dheeh mwopp p'ee kihh peet gha a Kefas.” (Shiiy khi shumm w'u a Kefas a Bitrus.)
Jesu peet Filip mwopp kihh Nataniel
43Kih puus wu'zeh bhi Jesu ryeeh dhel dum Galili. Kaarooh kad Filip bhi satt nyi le, “Ghi langdang na.”
44Filip a Gu-Batsaida zag kaa Andrawus mwopp kihh Bitrus se. 45Filip kad Nataniel bhi satt nyi le, “Wu'munn mu kad gwooh Musa gyet ran pwookaah nyi dhighin w'aar khi Naan shi, w'u a gwooh mhi-wanggshiiy mwopp ran pwookaah nyi seh zag. Nyi a Jesu Gu-Nazaret, em Yusufu.”
46Nataniel nang phi nyi le “Nazaret a'ng? Mee'bii wu'rett p'ee cham put Nazaret aa'?” Filip satt nyi le, “Ji ghi naah sihng!”
47Jesu naah Nataniel kihh ji bhi satt pwoo kaah nyi le, “L'aa Isra'ila w'u a zeenn seh, w'u baah m'ee shiinzeenn dhighin nyi mou kooh lee.”
48Nataniel nang phi nyi le, “Ghi shitt a rangg ghi man a'n diy ayeh?” Jesu lapp nyi satt le, “Ai dyinn ih naah gha bhi ghi kudyi a der tihngg koon, dhangg bhi Filip kihh peet gha.”
49A nyi seh bhi Nataniel satt nyi le, “Gukamm, a gha a L'aa kihh Naan; a gha a Miskakhamm khi Isra'ila!”
50Jesu satt nyi le, “Ghi pihhzeenn pee'rooh ih satt gha ih le dyinn ih naah gha bhi gha kudyi a der tihngg koon e'h. T'o, gha kudyi p'ee naah v'ur bii w'u mett mihhseh.” 51Waa satt dyi mwopp le, “Ih satt a zeenn wunn, wunn p'ee p'ar naah dhengNaan wangg, tihh wu naah kihpee mhi'lop khi Naan mwopp kihh ka duam yakhal mwopp kihh wak sam diy kaah L'aa khi Gurum.”
Atualmente selecionado:
Yohanna 1: Chakfem
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
©️2022 Luke Initiative for Scripture Translation