ဒေါ ဂုဝ် 7

လွင် အိုမ် မ့ပုန် ကာဒါယ်

1ဒါ အာနုဝ် ဟဲ့ ဟွတ့် ဘူင် ရိုဝ် ဆင်ဖုဝ် တီ၊ ဇဝ်ဖြာ ဝီ တဝ်း ဒီ အန်၊ “တဲး မဲ ဟာဝ် လိုပ် ခဲင် ရိုဝ် ဆင်ဖုဝ်။ ဘော မဲ ဘော န့ဟူမ် မဲ၊ တဲး ဘေ ဟာဝ် လိုပ် တူတ့်။ ခဲ့ မိုဝ်း ဂေ ဒူအီ၊ အုဝ် ဇဝ်ဖြာ ဟဲ့ ယိုဝ် မီ မဲ အူ ဝီ အီ ဟဲ့ မိုဝ်း နဝ်း ဆိူဝ် နဝ်း မှာန်။ 2န့ ဘော မိုဝ်း အာမျုဝ် ဒုဝ် ဆတ်ဒါဝါ၊ ပီ တဝ်း အုဝ် အီ မွှိုမ် အီ ဆီချာ၊ မဲ လုဝ် ဒိုဝ်း ဘူ ဂူ၊ ဘော အာလူင့် ဘူ ဒုဝ်၊ ဘော အာဟျာင် ဘူ ဒုဝ်။ ခဲ့ ကွယ် ဂေ ဒုဝ် ဆတ်ဒါဝါ အီ တူ မွှိုမ် အီ တူ ဆီချာ၊ မဲ ယီ လုဝ် ဒိုဝ်း အူ မျုဝ် အူ ဂူ။ 3ဘော ဂေ မာဆိမ် အီ ကွယ် ခဲင် ဘ့လေန့်၊ မဲ လုဝ် ဒိုဝ်း အူ မျုဝ် အူ ဂူ၊ တဲး န့ လိုပ် ခဲင် ရိုဝ် ဆင်ဖုဝ်၊ တဲး န့ ဝီ မိုဝ်း အာမျုဝ် ဒွန် မျုဝ် ဒဲင် ကာဒါယ်။ 4ဂိတ် ဘူ ဆီငဲ၊ အုဝ် ဒီ တဲး ဂ့လာယ် တာင် တး၊ တဲး န့ ဂ့လာယ် အာဒါ ဖွုန် ဂိုဝ် ဆီငဲ ဒီ ဖွုန် ဂိုဝ် မှိုဝ်။ ခဲ့ ပီ ဘူင် အုဝ် ဒဲင် ကာဒါယ် နီ၊ န့ ဒီ စှိုမ် တူတ့်၊ အာဝ် ဟူ တဲး န့ မိုဝ်း။”

5ဇဝ်ဖြာ ဟဲ့ ဟွတ့် တဝ်း ပါယ် တီ အာနုဝ် မိူဝ် ဘူင် တူတ့် ပီ ဒမ် ဇဝ်ဖြာ ဒီ အန်။

6ဒေါ န့ ပုန် အိုမ် ဒဲင် ကာဒါယ် ဒွန် ပ့လုဝ့်၊ ဒေါ အန် တီ အာဆာက် အာနုဝ် ဟဲ့ နုဝ့် ဒဝ် မာယဝ်း ဆီနမ်။ 7အာတ့် တး အိုမ် တာင် တွိုန်၊ အာနုဝ် ယီ ဟဲ့ ဟာဝ် လိုပ် ခဲင် ရိုဝ် ဆင်ဖုဝ် တာင်။ ဘော ဂေ ဂွန် အီမာယ် အန် ဘော အီဘိုန့် အန်၊ ဂေ အဝ် အန်၊ ဂေ ဘောကာဂ့လျီတ် ဟဲ့ လိုပ် ခဲင် ရိုဝ် ဆင်ဖုဝ် တီ။ 8ဘော ဂေ ဒုဝ် ဆတ်ဒါဝါ အီ မွှိုမ် အီ ဆီချာ၊ ဘော ဂေ ဒုဝ် ဆတ်ဒါဝါ အီ တူ မွှိုမ် အီ တူ ဆီချာ၊ ဘော ဂေ မာဆိမ် ဂေ ဒုဝ် အီ မွိုန် ဟာဝ် ဒဲင် ကာဒါယ်၊ 9ဂေ ဒုဝ် ဆတ်ဒါဝါ ဇိုဝ် တီ ဘောကာဂ့လျီတ် ဟဲ့ ဟွတ့် လိုပ် ခဲင် ရိုဝ် ဆင်ဖုဝ် တီ။ အူ မျုဝ် အူ ဂူ ဟဲ့ လိုပ်၊ တဲး န့ ဘဲန် တူတ့် ပီ ဒမ် ဇဝ်ဖြာ။ 10ဟဲ့ နုဝ့် ဘူ ဆီငဲ၊ န့ မိုဝ်း အိုမ် တာင် တး၊ တဲး န့ ပုန် ကာဒါယ်။

11ဒေါ အန် တီ အာဆာက် အာနုဝ် ဟဲ့ နုဝ့် ဒဝ် မာယဝ်း ဆီနမ် ဒီ အာ မာဂျီန် ဒီ ဂိုဝ် ဒီ ဘူ ဆီငဲ။ ဆီငဲ အန် တီ အိုမ် ဘော တုဝ်း ဒွန် ပ့လုဝ့် ဒွန် နာ၊ ဝီ ယိုင် ဟုဝ့် အူ ဇေန့်။ ဘ့လေန့် မိူဝ် ဟဲ့ ဝိုဝ်း အူ ဇေန့်။ 12ဂ့လာယ် မိူဝ် စုဝ်း လူင် ဒဲင် ကာဒါယ် အာဒါ ဖွုန် ဂိုဝ် ဆီငဲ ဒီ ဖွုန် ဂိုဝ် မှိုဝ်။

13ဆီငဲ အန် တီ အာနုဝ် တွိုန် ဟဲ့ ဟွတ့် လိုပ် ခဲင် ရိုဝ် ဆင်ဖုဝ်။ ဘော ဂွန် အီမာယ် အန်၊ အီ စိူဝ် အာဆေမ်၊ အာဟာမ် ဘော အာယာဖေတ်၊ ဘော အီဘိုန့် အာနုဝ်၊ ဘော ဂေ အီဘိုန့် ဂွန် အန်၊ ဂေ ဟဲ့ ဟွတ့် ဒူပ် အန်၊ ကွယ် ခဲင် ရိုဝ် ဆင်ဖုဝ်။ 14ဘော ဒုဝ် ဆတ်ဒါဝါ အီ ကွယ် ခဲင် ပြဲ ဘဲန် မျုဝ် ဘဲန် မျုဝ်၊ ဘော ဂေ ဒုဝ် ဆတ်ဒါဝါ အီ ကွယ် ခဲင် နာ ဒွန် မျုဝ်၊ ဂေ ဒုဝ် အီ ဟာဝ် ဒဲင် ကာဒါယ် ဒွန် မျုဝ်၊ မာဆိမ် ဒွန် မျုဝ် အီ ဘိုန့် ခဲင် ဘ့လေန့်၊ 15ဂေ ဒွန် မျုဝ် ဟဲ့ ဟာဝ် လိုပ် ဒူင် ကွယ် အာနုဝ် တွိုန်၊ လိုပ် ကွယ် ခဲင် ရိုဝ် ဆင်ဖုဝ် တာင်။ ခဲ့ ကွယ် ဒုဝ် အီ မိုဝ်း အာဆာက်၊ ဂေ ဟဲ့ ဟာဝ် လိုပ် အူ မျုဝ် အာ ဒုဝ်။ 16ဂေ ဟဲ့ ဟွတ့် ဟာဝ် လိုပ်၊ အူ မျုဝ် အူ ဂူ၊ တဲး န့ ပီ ပီ ဒမ် ဇဝ်ဖြာ ဒီ ဂေ။ ဂေ ဟဲ့ ဟွတ့် ကွယ် နာ ခဲင်၊ ဇဝ်ဖြာ မိူဝ် ကာဘိတ် မာလုဝ်း ဒီ ပန် ဂေ။

17ပန် တီ အိုမ် ဂ့လာယ် ဘော စုဝ်း လူင် ဘော ပုန် ကာဒါယ် အာဒါ ဖွုန် ဂိုဝ် ဆီငဲ။ အိုမ် ဘော ယိုင် ဟုဝ့် နာ ဒဲင် ဘော စုဝ့် ရိုဝ် ဆင်ဖုဝ် လှဲ ဒဲင် အိုမ်။ 18အိုမ် ယီ ကြဲ ဒီ ကိူန် ကာဆဝ် ဒဲင် ကာဒါယ်။ ရိုဝ် ဆင်ဖုဝ် ယီ လှဲ နာ ဒဲင် အိုမ်။ 19အိုမ် ယီ တာင် ကာဆဝ်၊ ကော န့ ပုန် နွန် စာ ဒွန် နွန်။ 20အာဒါ ဂိုဝ် ဒီ ဖန် ကာနိး အိုမ် ဟဲ့ န့ ပုန် နာ ဒဲင် နွန် စာ၊ တဲး နွန် ဒွန် နွန် ကွယ် နာ ခြိုမ် အိုမ်။ 21ဒေါ အန် တီ အာဆေ အီ ကွယ် ဒဲင် ကာဒါယ်၊ အန် ဟဲ့ ယမ် တူတ့်။ ဘော မုး မာဆိမ်၊ ဒုဝ် ဆတ် အီ ကွယ် ခဲင် နာ ခဲင် ပြဲ၊ ဒုဝ် အီ ကွယ် ဒဲင် ကာဒါယ် ဘော ဒူအီ၊ ဂေ ဟဲ့ ယမ် တူတ့် ဒွန် မျုဝ်။ 22မာဆေ အီ မိုဝ်း ဖွိုမ်၊ မာဆေ အီ ကွယ် ဒဲင် ကာဒါယ်၊ န့ ဟဲ့ ယမ် တူတ့်။ 23ပါယ် တီ ဇဝ်ဖြာ ဟဲ့ ပျာတ့် ဝဲန် တူတ့် ဒွန် မျုဝ် အီ ကွယ် ဒဲင် ကာဒါယ်။ ဘော ဒူအီ၊ ဘော ဒုဝ် ဆတ်ဒါဝါ အီ ကွယ် ဒဲင် ကာဒါယ်၊ ဘော မာဆိမ် အီ ကွယ် ခဲင် ဘ့လေန့်၊ အန် ဇဝ် ဟဲ့ ပျာတ့် ဝဲန် တူတ့် ဒွန် မျုဝ်။

24န့ ဟဲ့ ဂိတ် မီ အာနုဝ် ဘော ဂေ အီ ကွယ် ရိုမ် ဒူပ် အန် ခဲင် ရိုဝ် ဆင်ဖုဝ်။ အိုမ် တာင် ဟဲ့ ပုန် ကာဒါယ် အာဒါ အူ မာယဝ်း ဒီ ဖန် ဂိုဝ် ဆီငဲ။

Atualmente selecionado:

ဒေါ ဂုဝ် 7: pce

Destaque

Partilhar

Copiar

Quer salvar os seus destaques em todos os seus dispositivos? Faça o seu registo ou inicie sessão

Aprenda Mais Sobre Palaung, Ruching Bible