Ap'u 3
3
Dui ien si stu
(Rum 5:12-21)
1 #
Rev 12:9; 20:2. Nmat ptn iak isiv' si dm udlani arna nadep' la a Mlin Atua iani ha. Hin ivr a tav'et kavr ti a, “?Atua ivr a kam'i kavr ti mkarud nava nai udlani iter al pitvet a?”
2Tav'et ivr a nmat kavr ti a, “Nrrndu ti p'erud nava nai udlani iter al pitvet, 3v'eti Atua ivr ti nkarud nava nai iamk iter arna p't nut na pitvet, kavr ti a, ‘Mkarudi, v'aha mkariari, imahei parhap'ni.’ ”
4Nmat ivr a tav'et kavr ti a, “Ikahei, mkarhap'ni ki. 5Sena ti Atua irndu ti, naran parud nki, m'etam'i ipap'ra, laha parma karnap'ei Atua karrndu si p'as m'a si stu.”
6 Laha, tav'et ila ti nava nai lahara ip'as a ti apudi, kap'as a ti apap'ei, kala ti iv'i nai iamk m'ertu iparn nam'er ani sena ti iparndu sei. Laha, kalev' navan kudi, katau an a naun karru karudi. 7Sarei, m'atar ip'ra, karledu ti armalmal, laha arlili ru p'alak karuei iv'i klusar.
8Knarev', naran nut ihaha, arrn drln Atua naran iv'el kunanut al pitvet. Laha, dui m'a tav'etan arruh arna nahn Atua kartutuah al nai iter al pitvet.
9Laha, a Mlin Atua iv'ara a dui kavr ani, kavr ti a, “?Klak ip'i?”
10Ivr ti a, “Nrn drlm al pitvet kadedrn, sena ti nmalmal, laha katutuah.”
11Laha, ivr ti a, “Hin ak ivr anh kavr ti kmalmal? Nakm kud nava nai la nttu sera v'nen hua anh sanan kavr ti mkaudi ha?”
12Dui ivr ti a, “Tav'et la nakm ktu kana ha, a ti ipalak asnk, hin itu kana nava nai laha, sarei nudi.”
13 #
2 Kurin 11:3; 1 Tim 2:14. Laha, a Mlin Atua ivr a tav'et kavr ti a, “Nakm kten sera v'ata?” Tav'et ivr ti a, “Nmat ihap'il m'a kana, laha nud nava nai.”
14A Mlin Atua ivr a nmat kavr ti a, “Sena ti kan si lera, nakm palak a nv' nl rerak asn si slm udlani m'a si dm udlani arna nadep'. Paharev' arna v'atm kahan neiev' arna napn udlani arna silv'ienam. 15#Rev 12:17.Kana p'ani ti nakm m'a tav'et parlap'lep'la kam'i, a natm m'er a natn apavlap'lep'la hir. Hin iparp ptm, v'eti nakm parp plah tln.”
16Ivr a tav'et kavr ti a, “P'ani ti parn istu ipahuadau naran patkar. Naran palev' a natm parn ti p'akm iparer. Nakm parn nam'er an a naum uam, v'eti hin ipav'i ptm.”
17 #
Isrel 6:8. Laha, ivr a dui kavr ti a, “Sena ti kv'rn a sei a naum ivr anh, kaud nava nai la nttu sera v'nen hua anh sanan ha, kavr ti mkaudi ha, nadep' ipater a nv' nl rerak sanam. Parn istu kam'akar a ti pahan sei isi arna nadep' arna napn udlani arna silv'ienam. 18Makau m'a hrhrid ipasi arna nadep' sanam, laha nakm pahan sei isi arna nadep'. 19P'raren nam ipav'el arna nahm a ti pahan tim'ah, dav'a ipaier naran pam'alet ml arna nadep'. Sena ti Kana nlev' nadep' kanh. Sena ti kv'i neiev' uaki, dav'a pam'alet ml arna neiev'.”
20Dui itu nahan a naun iv'i a Iv, sena ti iv'i a uniar m'ertu udlani avsilv'.
21A Mlin Atua ien klus a nila p'ak si dm katau a dui m'a tav'etan a ti aparuei.
22 #
Rev 22:14. Laha, a Mlin Atua ivr ti a, “Pavlei, m'ertu laha itama katnep'a sera nakd, katrndu sera si p'as m'a si stu. Imahei ti ipah lm'an kasva nava nai na silv'ien kahani kasilv' dav'a ikahiris naran.” 23Sena si lera a Mlin Atua israni iruh al pitvet a Iten a ti ipam'akar arna nadep', la Atua ilev' aranan ha. 24Itep'a dui iruh, laha katu ensel kinkin, arv'i serupim, arna Is na pitvet a Iten, katu tali lil iluluv'en a nep'v'en kavav hin kaspat katukar navanel la iv'a asn nai na silv'ien ha.
Atualmente selecionado:
Ap'u 3: nmb
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2023 Presbyterian Reformed Church of Australia