མ་ཏི། 24

མཇུག་དུས་ག་ རྟགས་བ།

1ཡི་ཤུ་གི་ མཆོད་ཁང་ཐུབ་ཐཱན་ཐཱན་ ཉ་གེ་བྱོན་ཅ་ཨ་ཉི་ རོ་ཀ་སློ་མ་བ་ཀི་ མཆོད་ཁང་ག་ཕའི་བ་ཀ་ཀོར་གེ་ རོ་ཀ་ཞུ་ཝ༌ལ། 2དག་པ་ཀབ་ཉི་ རོ་ཀི་ རོག་ཏེ་བ་ཀ་ ལན་གནང་ཉི་གསུངས་མ་ལ་ ཇི་གི་ཐྲང་ཉི་ཡེག་ཅ་ ན་ཤི་ཨོ་ཐ་ཕའི་ག་བ་ཐོང་ལ་སྨོ། ཨོ་ཐ་ཕའི་ ཐམས་ཅན་རང་ ཆེད་ཇོང་ཉི་ ལུང་ཐུར་གི་ཐུར་ག་ཐུང་ཀ་ཙེག་ཉི་ ཐུར་བུ་ མ་ལུས་པ་དག༌ཉི།

3ཨོ་ཉ་ཚི་ངེ་ ཡི་ཤུ་ ཨོ་ལིབ་ཤིང་ཕུ་ཐུང་ཀ་ བཞུགས་པེ་གང་ཀ་ རོ་ཀ་སློ་མ་བ་ཙང་ཀེན་ཨ་ཉི་ རོ་ཀ་སྐུན་མདུན་ག་བཅག་ཐཱན་ ཨོ་ཐ་བ་ཤོ་ ཧ་ལ་ཇུང་མེ་ཡ། ནཱན་མ་བྱོན་མེ་གོ་མ་དང་ འཛམ་གླིང་བརྟན་པ་མ་ལུ་ཕེ་གོ་མ་ རྟགས་ཧང་ཇུང་མེ་ཡ་དག་ཉི་ ཞུ་ཝ༌ལ།

4ཡི་ཤུ་གི་ རོག་ཏེ་བ་ཀ་ལན་གནང་ཉི་ གསུངས་མ་ལ་ ན་ཧ་བ་ ཨི་བི་གི་རང་ ལམ་མང་གི་ཝ་གེ་ མ་རིག་པེ་དེན་གེ་ རིག་པ་སྒྲིམ་ཅོ། 5ཧང་ཡ་དག་ནེ་ལ་ མང་པུ་ཐུར་གི་ ཇ་ག་མིང་ག་ཨུན་ཐཱན་ རོག་ཤོ་ ཁིརིས་གི་ལ་དག་ཉི་ ཡེག༌པེ། རོག་ཏེ་བ་ཀི་ སོ་ངོ་མང་པུ་ཐུར་ ལམ་མང་གི་ཝ་གེ་རིག༌པེ། 6ཉི་ན་ཤི་ ཕྱད་མདའ་ཕི་ཝ་ག་ན་ཐ༌ལེ། ཉི་ཕྱད་མདའ་ཕི་ན་དག་ཉི་ ཚང་ན་ཐ༌ལེ། དག་པ་ཀབ་ཉི་ ན་ཧ་བ་ ཡོང་ཁེ་ཉི་སྡུག་བསྔལ་མ་ཨའི། ཧང་ཡ་དག་ནེ་ལ་ གོ་རང་ ཨོ་ཐ་བ་ ཇུང་མེ་ཁེ༌ལེ། དག་པ་ཀབ་ཉི་ འཛམ་གླིང་བརྟན་པ་ལུབ་ཅ་ཤོ་ མང་གི། 7མི་རིགས་གི་ མི་རིགས་ག་དགྲ་ཨ༌ལེ། ཉི་རྒྱལ་སྲིད་གི་ རྒྱལ་སྲིད་ག་དགྲ་ཨ༌ལེ། ཟ་ལེ་ག་བེས༌པེ། ཉི་ས་ཆ་མང་པུ་ཐུར་ག་ ན་ཀ་ཨོ་ཕེ། 8ཨོ་ཐ་བ་ ཐམས་ཅན་རང་ དཀའ་ཝ་ཅཱད་པེ་ གོ་ཙུག་པ་ཐུར་ཤ་གི༌ལ།

9ཉི་རོག་ཏེ་བ་ཀི་ ན་ཧ་བ་ ཙུང་ཐཱན་ ཀ་ལུ་ཅོད་ཉི་ཤེ༌ལེ། ཉི་ཇ་ག་མིང་ག་ཡོར་ཀེ་ ན་ཧ་བ་ མི་རིགས་ཐམས་ཅན་གི་ མ་ཟེས་པ། 10ཉི་མང་པུ་ཐུར་གི་ དད་པ་ཨ་ལེ་ཐུབ་ཐ༌ལེ། ཐུར་གི་ཐུར་ག་ མགུ་སྐོར་ཕི༌ལེ། ཉི་ཐུར་གི་ཐུར་ག་ མ་ཟེས་པ་ཨ༌ལེ། 11ཉི་ལུང་བསྟན་པ་ རྫུས་མ་མང་པུ་ཐུར་ཨུན་ཐཱན་ སོ་ངོ་མང་པུ་ཐུར་ ལམ་མང་གི་ཝ་གེ་ རིག༌པེ། 12ངན་པ་མང་པུ་ རི་ཝ་ཨ་དེན་གེ་ སྙིང་རྗེ་ཆང་པུ་རི༌ལེ། 13དག་པ་ཀབ་ཉི་ ཨི་བི་གི་ ཇུ་ཀ་སག་པུ་ཐེས་པ་ཐུར་ ཨོ་ཉ་སོ་ངོ་གི་ ཐར་པ་ཉོང༌པེ། 14མི་རིགས་ཐམས་ཅན་གི་ ན་ཐ་ལེ་དེན་གེ་ དཀོན་མཆོག་ག་ རྒྱལ་སྲིད་ག་ཀོར་གེ་ ཨོ་ཐ་འཐེན་ལེག་པུ་ཁེ་པ་ འཛམ་གླིང་ ཐམས་ཅན་རང་ ཆ་པ་ཨ་ཉི་བཤད་པེ་ཁེ༌ལེ། ཉི་ཤ་ འཛམ་གླིང་བརྟན་པ་ལུ་ཕེ་གི༌ལ།

15ལུང་བསྟན་པ་ ད་ནི་ཡེལ་གི་ ལུང་བསྟན་མ་དང་ཏུ་ཉི་#24:15 ད་ནི་ཨེལ་ག་དཔེ་ཆ་ 9:27; 11:31; 12:11 ཡོང་ཁེ་སི་སི་ཨ་ཝ་ ཙོག་པ་ཆོ་ཁཱན་ཁེ་པ་ དམ་པའི་མཆོད་ཁང་ནང་ཀ་ ཐིང་མ་ཐོང་མ་ཀབ་ཉི་ (ལྷག་ཁཱན་སོ་ངོ་བ་ཀི་ ཧ་གོ་ལེ་ཁེ༌ལེ།) 16ཡ་ཧུ་དི་ཡ་ག་ཆོ་ཁཱན་བ་ ཕུ་ཐུང་ཀ་ཏཱན་ གཱན་ཇོང་མེ་ཁེ༌ལེ། 17ཉི་ཕའི་ཐུང་ཀ་ཆོ་ཁཱན་གི་ ཧང་ཐུར་ཕ་ལེ་དེན་གེ་ ལོག་ཉི་ཕའི་ནང་ཀ་ དི་ལེ་མང་ཕ། 18ཉི་ཨུང་ནང་ཀ་ཆོ་ཁཱན་གི་ རོ་ཀ་ཁ་མུང་ཕ་ལེ་དེན་གེ་ ལོག་ཉི་ཕའི་ག་དི་ལེ་མང་ཕ། 19ཨའི་ ཨུ་ཉུ་གང་ཀ་ ལུས་པུ་མ་ཉམ་པ་ཆོ་ཁཱན་དང་ ཝག་ཙ་ག་ནུ་བི་ལེ་ཁེ་ཁཱན་བ་ ཧབ་ཏུར་དཀའ་ཝ་ཅཱད་པེ་ཡ། 20ཏོན་ ཡང་ན་ལ་ དུས་བཟང་ག་ནོང་ཀ་ ན་ཧ་བ་ གཱན་ཇོང་མེ་མ་ཁེན་ཆེན་དག་ཉི་ སྨོན་ལམ་ཏབ་ཅོ། 21ཧང་ཡ་དག་ནེ་ལ་ ཨུ་ཉུ་གང་ཀ་ གནམ་མེད་ས་མེད་ དཀའ་ཝ་ཅཱད་པེ་ཨོ་ཕེ། འཛམ་གླིང་བཀོད་པ་གེ་ག་ཏཱན་ ཨུ་ཉུ་ད་བུ་ ཧ་ལ་རང་ དཀའ་ཝ་ཅཱད་ཉི་ ཉོང་པ་མང་ཕ། ཉི་ཨོ་ཉ་གེ་ག་ཏཱན་བུ་ ཨུ་ཉུ་ད་བུ་ ཧ་ལ་རང་ དཀའ་ཝ་ཅཱད་པེ་མ་ཁེ༌ལ། 22ཨོ་ཉ་དཀའ་ཝ་ཅཱད་པེ་ག་ དུས་ཙུན་ཁེ་པ་ ཐུ་མུ་མ་ཅོད་པ་ ད་བུ་ཨ་ནེ་ལ་ སོ་ངོ་བ་ ཐམས་ཅན་རང་ ཤིན་ཆུ༌མེ། དག་པ་ཀབ་ཉི་ སི་ཁཱན་བ་ཀ་ཡོར་ཀེ་ ཨོ་ཉ་དཀའ་ཝ་ཅཱད་པེ་ག་ དུས་ཙུན་ཁེ་པ་ ཐུ་མུ་ཅོད་ཉི་གནང༌མེ།

23ཨོ་ཉ་ཚི་ངེ་ སོ་ངོ་ཐུར་ཕང་གི་ གོད་ཅོ་ལེ་ ཁིརིས་ཐ་ག༌ཅ། ཨུ་ཉུ་མ་ནེ་ལ་ ཁིརིས་ཨ་ལེ་ལ་ལ་དག་ཉི་ ཡེག་ནེ་ལ་ ན་ཤི་ རོ་ཀ་ཆཱས་ག་ལོ་མ་དི། 24ཧང་ཡ་དག་ནེ་ལ་ ཁིརིས་རྫུས་མ་དང་ ལུང་བསྟན་པ་རྫུས་མ་བ་ཨུན་ཐཱན་ སོ་ངོ་མང་པུ་ཐུར་ག་ མགུ་སྐོར་ཕི་ལེ་དེན་གེ་ རྫུ་འཕྲུལ་དང་ ཡིད་ཆི་ཝ་ག་ལའི་ མང་པུ་གེན༌མེ། ཉི་རེན་ཐཱན་ཨ་ནེ་ལ་ རོག་ཏེ་བ་ཀི་ སི་ཁཱན་བ་ཀ་བུ་ མགུ་སྐོར་ཕི་ལེ་གོད༌པེ། 25དག་པ་ཀབ་ཉི་ ཇི་གི་ ན་ཧ་གོ་མ་གེ་རང་ཡེག་ཉི་ ཐ་ཝ་ཅ་ན།

26ཨོ་ཉི་ཨ་དེན་གེ་ སོ་ངོ་ཐུར་ཕང་གི་ རོག་ཨ་ལེ་ལ་ ས་ཏོང་པ་ནང་ཀ་ལ་དག་ཉི་ ཡེག་ནེ་ལ་ ས་ཏོང་པ་ནང་ཀ་ཏཱན་མ་དི། ཨུ་ཉུ་མ་ནེ་ལ་ རོག་ཐ་ཕའི་ནང་ཀ་ཅ་དག་ཉི་ ཡེག་ནེ་ལ་ ན་ཤི་ རོ་ཀ་ཆཱས་ག་ལོ་མ་དི། 27ཧང་ཡ་དག་ནེ་ལ་ ཏང་ལེ་ཕ་ཀབ་ཉི་ ཤར་གེ་ནུབ་ཀ་སག་པུ་ ཐོང་མེ་རེ་བ་པུརུས་ཀིན་ཨ་ཉི་ སོ་ངོ་ག་ཟ་ ཨོ་ཕ་ཀབ་ཉི་བུ་ཇུང༌མེ། 28ཤི་ཝ་ག་རོ་ ཨོ་ག་ཆོ་ཝ་ཐུར་ རྒོད་ཨོ་ཉ་ག་རང་ཨོ་ཕེ།

29དཀའ་ཝ་ཅཱད་ཉི་ ཆུ་མ་ཐུར་ག་རང་

ངམ་མེར་བུ་རི༌ལེ། ལ་ཉི་ངམ་གི་ འོད་ཟེར་མ་ག༌ལ། ཉི་སྐར་མ་སྨིན་དྲུག་བ་ ངབ་ཀེ་དོང་ཞུད་ཁེ༌ལེ། ཉི་ཞིང་ཁམས་ག་ དབང་ག་བ་ དྲེང་གེ༌མེ།#24:29 ཡ་ཤའི་ཡ་ག་དཔེ་ཆ་ 13:10; 34:4

30ཉི་ཤ་ སོ་ངོ་ག་ཟ་ ལོག་པེ་ག་རྟགས་ ཞིང་ཁམས་ག་ཤོ༌ལེ། ཉི་འཛམ་གླིང་ག་ མི་རིགས་ ཐམས་ཅན་རང་ མརང་ཉི་གེ་ཕེ། ཉི་རོག་ཏེ་བ་ཀི་ སོ་ངོ་ག་ཟ་ རོ་ཀ་དབང་དང་ གཟི་བརྗིད་ཆི་ལུ་ཀབ་ཉི་ ངབ་ཀ་མུག་པ་ཐུང་ཀ་ བྱོན་མ་ཐོང༌མེ། 31ཉི་རོ་ཀི་སི་ཁཱན་བ་ འཛམ་གླིང་ཐམས་ཅན་གེ་དུས་ཉི་ ཞིང་ཁམས་ག་ཟུར་ལོག་ཐུར་གེ་ ཨོམ་ཐུར་ཟུར་ཀ་སག་པུ་རང་ དུས་པེ་དེན་གེ་ རོ་ཀི་ རོ་ཀ་ཞིང་ཁམས་ག་འཐེན་པ་བ་ དམག་དུང་ཤུག་ཨན་ཐེད་ཉི་ ཀུན་ཏི༌ལེ།

32དཔེ་ལྕོག་མ་ཤིང་གེ་ལམ་ཅོ། ལྕོག་མ་ཤིང་གེ་ཉོམ་ཐུང་ཉི་ ཤ་བ་ཡེང་ལུ་ཨ་ཉི་ ཤོ་ལ་ཀབ་ཉི་ བེར་རེན་པ་གི་ཝ་ལ་དག་ཉི་ ན་ཤི་སེན༌ཅ། 33ཉི་ཨུ་ཉུ་པུརུས་ཀིན་ཨ་ཉི་ ཨོ་ཐ་བ་ ཐམས་ཅན་རང་ ཇུང་མ་ཐོང་མ་ཀབ་ཉི་ རོག་ར་ག་ཏེབ་ཉི་ ཀོ་ག་རང་ཅ་གི་ཝ་ལ་དག་ཉི་ ན་ཤི་ཧ་གོ་ལེ་ཁེ༌ལེ། 34ཇི་གི་ ན་ཧ་ཐྲང་ཉི་ཡེག་ཅ་ ཨོ་ཐ་བ་ ཐམས་ཅན་རང་ མ་ཇུང་མ་སག་པུ་ ཨོ་ཐ་མི་རབས་མ་ཆཱད་པ། 35ཞིང་ཁམས་དང་འཛམ་གླིང་ ཡེ་ཉི་དི༌ལེ། དག་པ་ཀབ་ཉི་ ཇི་གི་ཡེག་ཁཱན་ཆཱས་ཁེ་པ་ ཏི་ངེ་རང་ཡེ་ཉི་མ་དི༌ལ།

36དག་པ་ཀབ་ཉི་ ཨོ་ཉ་ནོང་དང་ ཆུ་ཚོད་ཁེ་པ་ ཧ་ལ་ཨོ་ཕེ་གི་ལ་སྨོ་ ཨི་བི་གི་རང་མ་སེ༌ལ། ཞིང་ཁམས་ག་འཐེན་པ་བ་ཀི་བུ་ མ་སེ༌ལ། ཉི་སོ་ངོ་ག་ཟ་གི་བུ་ མ་སེ༌ལ། དག་པ་ཀབ་ཉི་ ཡབ་ཐུར་གི་ཤ་མཁྱེན༌མེ།

37ནོ་ཨ་ག་གང་ཀ་ ཇུང་མ་པུརུས་ཀིན་ཨ་ཉི་ སོ་ངོ་ག་ཟ་ ལོག་ཉི་ཨོ་ཕ་ཀབ་ཉི་བུ་ ཇུང༌མེ། 38ཨུ་ཉུ་གང་ཀ་ རོད་པ་མང་ཕེ་གོ་མ་ སོ་ངོ་བ་ཟཱན་ཇམ་ཉི་ ཉི་གཉེན་ཕི་ཉི་ གཉེན་ཕི་ལེ་ག་བི་ཉི་ཆོ་ཝ། ནོ་ཨ་གྲུ་ནང་ཀ་ མ་ནུ་ཕ་སག་པུ་རང་ ཨོ་ཉེན་ཆོ་ཝ། 39རོད་པ་ཨུན་ཐཱན་ རོག་ཏེ་བ་ ཕག་མ་བུ་ཝ་སག་པུ་ སོ་ངོ་བ་ཀི་ རོག་ཏེ་བ་ཀ་ཐུང་ཀ་ ཧང་ཇུང་མེ་གི་ལ་སྨོ་ མ་སེ་ཝ་ཆོ་ཝ། ཨུ་ཉུ་པུརུས་ཀིན་ཨ་ཉི་ སོ་ངོ་ག་ཟ་ ལོག་པེ་གང་ཀ་བུ་ཇུང༌མེ།

40སོ་ངོ་ཉིག་ཙིང་ ཨུང་ནང་ཀ་ ལའི་ཨན་ཆོ་ཝ་བར་ཀེ་ ཐུར་དུང་ཉི་བུ་ལ་ཀབ་ཉི་ ཐུར་ལུས༌པེ། 41མེ་ཝག་ཙ་ཉིག་ཙིང་ རང་ཐང་ཞུམ་ཉི་ཆོ་ཝ་བར་ཀེ་ ཐུར་དུང་ཉི་བུ་ལ་ཀབ་ཉི་ ཐུར་ལུས༌པེ།

42ཨོ་ཉི་ཨ་དེན་གེ་ ན་ཧ་བ་ རིག་པ་སྒྲིམ་ཉི་ཆོའི། ཧང་ཡ་དག་ནེ་ལ་ ན་ཧ་གཙོ་བོ་ ཧ་ལ་བྱོན་མེ་གི་ལ་སྨོ་ ན་ཤི་སེ་ལུ་མཱན༌ཅ། 43དག་པ་ཀབ་ཉི་ ན་ཤི་ཨོ་ཐ་ཆཱས་ཁེ་པ་ སེ་ལེ་ཁེ༌ལེ། ཕའི་ཡོན་ད་གི་ དྲོ་ཝཱན་པ་ བི་ནང་ག་ཆུ་ཚོད་ ཨོམ་ཏུར་ག་ཨུན་ཅ་གི་ལ་ཨ་ཉི་ སེ་ཝ་གི་ནེ་ཏ་ རོ་ཀི་རིག་པ་སྒྲིམ་ཉི་ ཆོ་ཝ་ཨོ་ཕེ། ཉི་དྲོ་ཝཱན་པ་ རོ་ཀ་ཕའི་ནང་ཀ་ ནུ་ཕེ་མ་བི་ཝ་ཨོ་ཕེ། 44ཨོ་ཉི་ཨ་དེན་གེ་ ན་ཧ་བ་བུ་ རིག་པ་སྒྲིམ་ཉི་ ཆོ་ལེ་ཁེ༌ལེ། ཧང་ཡ་དག་ནེ་ལ་ སོ་ངོ་ག་ཟ་གི་ ན་ཤི་མ་ཤེག་པ་དག་ཉི་ མི་ཁཱན་དུས་ཙུན་ག་ཨོ་ཕེ།

45དམ་ཚིག་ཙུང་ཁཱན་དང་ མཁས་ཏྲ་ཆོ་ཁཱན་གཡོག་པ་ ཨི་བི་གི་ལ་ཡ། ཨོ་ཉ་གཡོག་པ་ཤོ་ དུས་ཙུན་ཕྲིག་ཀིན་རེན་པ་ཀབ་ཉི་ བཱརའ་གཡོག་པ་བ་ཀ་ ལྟོ་བི་ལེ་དེན་གེ་ ཡོན་ད་གི་ བཱརའ་གཡོག་པ་བ་ཀ་ འགོ་དཔོན་ཅོད་ཁཱན་ སོ་ངོ་ཁེ་པ་གི༌ལ། 46ཡོན་ད་ལོག་པེ་གང་ཀ་ ཨུ་ཉུ་དང་ཏུ་ཉི་ ཨ་ཉི་ཆོ་ཝ་ག་ཁྲབ་ཁཱན་ གཡོག་པ་ཁེ་པ་ བྱིན་རླབས་ཅན་གི༌ལ། 47ཇི་གི་ ན་ཧ་ཐྲང་ཉི་ཡེག་པེ་ ཡོན་ད་གི་ ཨོ་ཉ་གཡོག་པ་ཁེ་པ་ ཡོན་ད་ རོག་ཏེན་ག་རྒྱུ་ནོར་ ཐམས་ཅན་རང་ བདག་འཛིན་ཨ་ཁཱན་ཅོད༌པེ། 48དག་པ་ཀབ་ཉི་ ཨོ་ཉ་གཡོག་པ་ཁེ་པ་ ཏེ་ངན་ཆོན་ཐཱན་ཨ་ནེ་ལ་ རོ་ཀི་ཡོན་ད་ ཨོ་ཕེ་ག་ཕིད་པེ་དག་མི་ཉི་ 49རོ་ཀ་གཡོག་པ་ ཇ་རོ་བ་ཀོང་ཉི་ ཉི་ཞུ་སུང་ཁུ་ཁཱན་བ་ཀབ་ཉི་ ཟཱན་ཇམ་ཉི་ཆོ་ནེ་ལ་ 50གཡོག་པ་གི་ མང་ཕ་དག་ཉི་མི་ཁཱན་ ནོང་དང་དུས་ཙུན་ག་ ཡོན་ད་ཨུན་ཐཱན་ 51ཨོ་ཉ་གཡོག་པ་ག་ ཁྲིམས་ཅིད་པུ་ཀེ༌བེ། ཉི་རོག་ འུ་དྲ་པ་བ་ཀ་ དྲེ་ཀ་ཐ༌ལེ། ཉི་ཉ་ག་ རོག་ཏེ་བ་ གེབ་ཉི་ ཤ་ཟེང་མེ་ཁེ༌ལེ༎

Atualmente selecionado:

མ་ཏི། 24: TNTB

Destaque

Partilhar

Copiar