Májiye 23
23
Áriwasiyoor Efarisiyeŋ i n'émuse yite Eluwa yite Moyis
(Mark 12.38-39; Luk 11.43,46; 20.45-46)
1Bondu buwas, Yesu n'aane hahooja hu n'eriboora yeene:
2—*Émuse yite Eluwa yite Moyis, *n'Efarisiyeŋ i, burokiin kaliikenuun *Eluwa yite Moyis. 3Náami ariwariinwar kájeŋgin, abe n'árihin yooŋ bimbi kaliikenuun fe. Bare atum'ariliikool ti máhinar mooniin, ábuki bimbi kawaare, káhinaariit bo. 4Iŋi kakob buroon beeniŋe-niŋ, keesejan bo ésuk i, abe káŋaaŋaariitiin káyokunan n'añuuru aŋgilij u keesejo bo. 5Buroon bimbi káhin fe bite búwuforooro: arijuk naane muroon mimmi kakob tu kúyuutiin ni ti sitekiin, méeyekie mu kike kirim kite *Míkiñjin mu mihahe i; iŋi káhin yooŋ balis bite wújufa wooniin bihaŋ bite b'ésuk i kakambu#23.5 Hítiyar hu, bíkeetanuma biŋgilij b'Esuwif i b'ifi kakobooro. Bo bite kábaŋinaniin Eluwa yite Atambatun. Bare h'aamo hu *Efarisiyeŋ i kabina kasiiŋo, n'iŋi kakobooro bíkeetanuma bómbokun kaanuku man ésuk i n'ejukiin bakan kéejube. A̱juk Kayuunoor ku 15.38-41.. 6Hiriy ifi hibaj, iŋi kámaŋi kajab kariiko keewun ésuk i; ti *ñáalawum ñu, boko ifi kariiko hágila. 7Iŋi kámaŋi ésuk i eŋ'erito yeesaafiin ti sifiñjan su, abe n'eŋ'eeniin «Ámuse u». 8Bare aruun fe baatiaay; iŋ'ite ho aamo fu ariwarut kajokiee naane émuse, ábuki Ámuse afeeneŋ taŋ a aribaje fu. 9Atum'arijok an t'etaam ye naane faafuun, ábuki Faaf afeeneŋ taŋ a aribaje fu, eeemo u t'etiir. 10Atum'árihin yooŋ ariijokee naane eseef, ábuki Aseef afeeneŋ taŋ a aribaje fu, eeemo u *Afakana u. 11Eehaŋe u t'aruun aja áyemi ásukateen oonuun. 12An fe eeyitooree, o kawananee; abe an fe eewananooree, o kayitiee.
Wútaañi weeemo hutok nu wúsuba
(Mark 12.40; Luk 11.39-42,44,52; 20.47)
13-14—Átaañi t'aruun *émuse yite Eluwa yite Moyis, n'aruun *Efarisiyeŋ i! Ñatuuk ñondu! Arikulakul ésuk i tíyaŋ *Jáyi jite Atambatun. Ariyooseit toko aruun kumuumuun, abe n'ariteñeko yooŋ kawasu kéemaŋie ku keeyooso.#23.13-14 Wike wuwiit wútiyar wu uŋu wúwutiyen eferse yende: 14Átaañi t'aruun émuse yite Eluwa yite Moyis, n'aruun Efarisiyeŋ i! Ñatuuk ñondu! Aŋ'arimer haare hu ki bákayiniin kakete ku, ariiyit buroon booniin fe. Abe káyemi ti kalawu, n'aŋ'arifiyo naane, t'abin aane aruun arijake. Iŋ'ite ho h'Atambatun aja fu kaniju t'aruun ahaŋ diyu.
15«Átaañi t'aruun émuse yite Eluwa yite Moyis, n'aruun Efarisiyeŋ i! Ñatuuk ñondu! Aŋ'ariñaahoor etaam i fe, ni kan ku, kaanuku man n'aribaj afeeneŋ taŋ, ariiyoosano ti bítim boonuun. Abe af'aribajo, n'aŋ'árihino eehaŋuun káyemi an ite sambuun tu kúsuba.
16«Átaañi t'aruun, aruun égila i kéefuume ku! Aruun kaŋk'ariene an af'awaat *Enuuf ite Atambatun, diyu dóoniit. Bare n'afin awaat éwurus i yeeemo i níbahindaa toko, awarawar káhinu doon d'awaate du. 17Aruun busoŋ, árijukaariit! Kame naŋ nihaŋe fu? Eeman Enuuf ite Atambatun, yéekinineŋe i éwurus i n'éñeyi? 18N'aŋ'arisooñ ariene an af'awaat *ataabul ite *wusarah wu, diyu dóoniit. Bare n'afin awaat doon deesarahee du Atambatun t'ataabul u, awarawar káhinu doon d'awaate du. 19Aruun fu bakan kéefuume! Kame naŋ nihaŋe fu? Eeman ataabul u, éekinineŋe u doon deesarahee du ni díñeyi? 20Náami an eewaate ataabul ite wusarah wu, awaata ataabul u, nu buroon beeemo bu t'etiir te o fe. 21An eewaate Enuuf ite Atambatun, awaata Enuuf i, n'Atambatun eekine u te yo. 22An eewaate bufor bu, awaata eriikeey ite Atambatun yite híyiaate hu, n'Atambatun eeriikee u te yo.
23«Átaañi t'aruun émuse yite Eluwa yite Moyis, n'aruun Efarisiyeŋ i! Ñatuuk ñondu! Aŋ'ariyit buroon bite kajaman kite maanu wu naane kuloolomen ku, efoobar i, ni maamu muroon meejose mu fe#23.23 A̱juk Esaraha i 27.30; Buluwa bu 14.22., áriihin kúrub keemo sumoŋu, abe n'árisik hifeeneŋ ariisarah ho Atambatun. Bare n'aŋ'arifin ariwas beehaŋe bu fe *t'Eluwa yite Moyis, naane káyemi bakate bifeeneŋ, n'ariyubiyeniin, abe n'áriyemi bakan keejoŋoore. Abe bare buroon bondu b'ariware fu yéeni káhinu, abe baabu yooŋ atum'arifiil bo. 24Aruun égila kéefuume! Aŋ'arijind doon d'ariware du búhujo iŋ'ite efaas, bare n'aŋ'arimer bíŋgelem!
25«Átaañi t'aruun émuse yite Eluwa yite Moyis, n'aruun Efarisiyeŋ i! Ñatuuk ñondu! Aŋ'ariñaw akuur but meejukanee mite ekot i bija ebool i fe, bare níbahindaa, aŋ'ahooj bib nu wúfaŋi wute kákuwat, ni biyinoor boonuun beejakut bu. 26Aruun Efarisiyeŋ i bakan kéefuume! Arijab tíme ariñaw ekot i níbahindaa, man meejukanee mu nu mukuur yooŋ.
27«Átaañi t'aruun émuse yite Eluwa yite Moyis, n'aruun Efarisiyeŋ i! Ñatuuk ñondu! Aŋ'arinokoor nu búlum beefañjanee#23.27 Kóŋkeyin, bakate ku *Israyel ifi kahok an eekete kahaban, iŋi kafañjan élum i t'etiir kaanuku ifi tíbaani, an atum'abin akak te yo. Ábuki an af'akak toko kep, n'iŋi kaane *akuurut, abe awarut kalawu t'afeeneŋ ni bakano., kajuku bo tíyaŋ náami béewarie naane, bare níbahindaa, uŋu buhooj bib nu kujoj kite bakan keekete, nu buroon bánoban beefute. 28Aruun yooŋ, arinokooranokoor t'ésuk i naane bakan kéejube, bare níbahindaa, aŋ'arihooj bib nu butuuko, nu wuhoofoor.
29«Átaañi t'aruun émuse yite Eluwa yite Moyis, n'aruun Efarisiyeŋ i! Ñatuuk ñondu! Aŋ'arinut áwari búlum bite *eyiŋana yite Atambatun, abe n'aŋ'arisaŋgan bite kéejube ku. 30Abe n'aŋ'ariene: “Kane arko yéeni uni íriwuwina fu kóyin sifaaf uni, man írisiiŋoorein nu boko iriiyool eyiŋana yite Atambatun.” 31Kame fu me árimoomi kaanuku aruun biñi bite bakan keeyoole ku eyiŋana yite Atambatun? 32Úja tíme! Arihabanoor bi sifaafuun kómbokun kajabe bu! 33Ñuroon ñondu! Búsunduk! Buŋ b'af'arisooñ ariyinoor n'aŋ'ariene aruun kafaku tu kúnuur kite sambuun su? 34Iŋ'ite ho aamo fu íñje káboñinauun eyiŋana, ni bakan kéewesinatee, n'émuse yite bítim bite Atambatun. Aruun kayoolu bakaake, n'aritib bakaaku tu *bukuruwa kaket, n'árimiñ bakaaku kikarawas ti *ñáalawum ñoonuun, abe n'árihihinooriin ti kikinu ku fe ti kayino kateyi. 35Náami t'aruun t'Atambatun aja fu kaniju iŋi bakan kéejube ku keeyoolee ku fe, huta hu *t'Abel éejube u, bija yooŋ ti Sakari añi ite Barasi, eeyoolee u t'Enuuf ite Atambatun, t'etut *t'Anabe du n'ataabul u tindi kásuf *ejuraay i#23.35 Ti Hirim hite Atambatun, busokeesok kaanuku *Abel aamo fu húŋgowulan heejabe hu huyoolee t'etaam ye. Araan u eesokee u ti Hirim hu hoho kaanuku ayooleeyool aamo fu Sakari. A̱juk Kájabina ku 4.8; 2 Híyiaate hu 24.20-22.. 36Iisokuun bifeeneŋ bu: kúnuur kondu fe, aruun bakate ku hahiye arija fu ko kajuku iŋi bokondu keeyoolee kii fe!
Yesu n'asaboor iŋ'ite hu Serusalem
(Luk 13.34-35)
37—Yéeh, aruun bakate ku Serusalem, aruun kaŋk'ariyool *eyiŋana yite Atambatun, abe kaŋk'áboñin t'aruun, n'árimiñiin nu bujuju kaket! Kuhooja teereŋ k'ímaŋie fu kakuukanuun naane emañjuk aa ákumbalool bufuw boone ni síbend soone, náami bare árimaŋiit! 38Hahiyu aruun kawasiee ni hikinu hoonuun áriiweet#23.38 A̱juk Seremi 22.5.. 39Ábuki fu iisokuun: ariroŋut káheelin t'íñje bija hunak h'arija hu kaanu: «Atambatun ásoniyan an eebin u tu huruwu hite Atemit#23.39 Élookiin i 118.26.!»
Atualmente selecionado:
Májiye 23: cwt
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 1999, Wycliffe Bible Translators, Inc. All rights reserved.