Lukas 23
23
Binisara' Si Yisus ni Pilatus
(Mat 27:1-2,11-14; Mrk 15:1-5; Yns 18:28-38)
1Mundiio yo kiawi' lobuw minuimpug iiri, om owito yo nosiro si Yisus dii si Pilatus nu nipobisara'. 2Tumimpuuno sono nosiro monapud so Iyo dii nu, “Noimpa'an mai lobuw iitu momalid nu ongo lobuw. Mongimuun Iyo nu lobuw dai popongobarai nu sukai so Raja Maayo nu Ruum, om minutangar po Iyo nu Iyo yo su Raja Nijanji nu Kinoringan,” koo.
3Duato yo ni Pilatus si Yisus nu, “Bana ka nu Ikau-o su Raja nu lobuw Yaudi?” koo.
Sumombuto yo si Yisus nu, “Oo. Bana ya tangar mu no,” koo.
4Mutongaro yo si Pilatus so wowaidon nu imam om lobuw suang-i nu, “D'ado ya noimpa'an ku kosola'an nu lobuw iitu nu opatut kopongukuman so Iyo,” koo.
5Nga mongaagar nai' nosiro nu, “Ono yo pontudukan Niyo no su pongoboyayat Niyo nu lobuw so pilolongkop nu Yudia, gulu po so Galilia, om kosiono nokologa' yo sono tuui,” koo nosiro.
Binisara' Si Yisus ni Irudis
6Norongou-o po iri ni Pilatus, mongoduato yo sono iyo nu, “Bana ya ka nu lobuw Iyo nu Galilia?” koo. 7Noilaan-o po ni Pilatus nu bana ya nu lobuw Galilia si Yisus om poranak ni Irudis, poopiti yo sono niyo si Yisus dii si Irudis nu laid niyo so Yirusalim-i. 8Nosudu'an sobana si Irudis nu nosambat niyo si Yisus, so' olaid-o iyo nokorongou nu tuturan suat so si Yisus, om mokisisiou so Iyo momaal nu koiran-iran. 9Indadi, osuang sono dinuat ni Irudis so Iyo, nga dai ya sinombutan Niyo. 10Ongo wowaidon nu imam om moomontuduk nu Ukum-i nga dii ya monapud so si Yisus. 11Tumimpuun-o sono si Irudis om ongo soujar niyo ri muragam om mongusiba' so si Yisus. Pinopupokakas Iyo nosiro nu sabung nu raja om inowit nai' mululi' dii si Pilatus. 12Runat-a iiri minuwarong-o sono si Irudis om si Pilatus, ampa gulu ri nokopualod nosiro.
Inukuman si Yisus nu potoyon
(Mat 27:15-26; Mrk 15:6-15; Yns 18:39—19:16)
13Soginaa yo ni Pilatus ongo wowaidon nu imam, wowaidon wokon nu lobuw Yaudi, om lobuw suang-i, 14om tongaro yo niyo nu, “Inowit muyu lobuw iitu tuui so aku, om mutangar kou nu Iyo yo po moomalid nu lobuw. Kosiono inudio ku yo Iyo so tiningkuangon muyu tu, nga d'ado ya noilaan ku kosola'an Niyo soko ponopudan muyu no. 15Si Irudis nga d'ado ya noilaan niyo kosola'an nu lobuw iitu no, ono yo ko' niapit Iyo mululi' tuui so aku. Dai ya nokowaal lobuw iitu nu kosola'an mupatut kopongukuman so Iyo nu potoyon. 16Indadi monuu' aku ya nu soujar mongolubak so Iyo om nilabus-o sono,” koo si Pilatus.
[ 17Minutangar iyo soko iri, so' koopotan ong Rami-Rami Paska, polabus iyo ido koyuwan kiat so jiil, om si Yisus su pokilolobusan niyo.]
18Lumuapo yo kiawi' lobuw minuimpug-i nu, “Potoyon Iyo! Lobusi so kai si Barabas!” koo. 19(Si Barabas-o po jiniil so' minaid mongolawan nu pogkuosaan nu Ruum so Yirusalim, om minomatoi nu lobuw.)
20Mutongaro po si Pilatus nu pokilolobusan niyo si Yisus, 21nga ginumonsok nai' lobuw suang-i nu, “Solibon Iyo! Solibon Iyo!” koo nosiro.
22Mutongaro po si Pilatus kointolu so nosiro nu, “Onu yo ka bana koraayan nu lobuw iitu no? D'ado ya ong aku noimpa'an ku kosola'an Niyo nu otoop kopongukuman nu potoyon! Nipolubak ku ya Iyo nu soujar om polobuson ku yo,” koo si Pilatus.
23Nga koogaran nai' nosiro gumonsok nu, subai solibon-a si Yisus. Ompus nu iri, nokomanang-a sono lobuw suang-i. 24Indadi, ukumo yo sono ni Pilatus si Yisus nu potoyon mongowaid nu koinginan nu lobuw suang-i. 25Lobusi yo niyo lobuw pinokilabus nosiro ri, iri nojiil so' linumawan nu pogkuosaan nu Ruum om minomatoi nu lobuw-i. Soko iri po, komoulii yo ni Pilatus si Yisus so lobuw suang iiri, potuud nu onu yo po koinginan nosiro momaal so si Yisus.
Nisalib si Yisus
(Mat 27:32-44; Mrk 15:21-32; Yns 19:17-27)
26Owito yo nu ongo soujar-i lumabus si Yisus maid nu pinoponimban nu salib. Laid nosiro manou-panou-i, nokosambat nosiro nu ido koyuwan sundur so bandar, ngaran niyo si Simun, lobuw kiat so Kirini. Okomo yo iyo nu soujar-i, nipososog poponimban nu salib ni Yisus, om mompanou so tinoudion Niyo.
27Osuang lobuw tinumundan so si Yisus, maid nu kowoinoyan tinumangi' oupus so Iyo. 28-29Kumowiio yo si Yisus so kowoinoyan iiri om mutongaro yo nu, “Oo su kowoinoyan nu Yirusalim, ondomo muyu yo, kikoogutan po lumoga' tuui ong wagu, om mutangar sono lobuw nu, ‘Sobana ko osanang kowoinoyan dai insan momontian, dai insan kianak, om dai insan potiti' nu lolaing!’ koo. Indadi, ikod kou yo kitangi' so Aku, nga tangi' kou yo so kou kondiri om inonakan muyu. 30Om iya nu koogutan oono mutangar-a lobuw nu, ‘Oo su bulud opangkat, onsiti kai yo! Oo su bulud oyompop, topui kai yo!’ koo nosiro.#Us 10:8; P'tolang 6:16 31So' bang potoyon Aku nosiro, ono lobuw d'ado sala' no, soko kayu oiyau po susulan-o, ingkololabi pononsara' nosiro so kou, lobuw kisala' soko kayu nolonot-o,” koo si Yisus.
32Kuwai ya duo koyuwan oraai inowit nosiro nu nisalib maid so si Yisus. 33Nokologa' yo po nosiro so tontong ingoranan nu Doupuk,#23:33: Doupuk; intawa: duakup solibo yo sono nosiro si Yisus maid nu duo lobuw oraai iiri, ido umpit so wanan, om ido umpak so gibang Niyo ri. 34Mogdu'aa yo si Yisus nu, “Oo Amo! Ompuno yo ongo lobuw oono, so' dai ya oorotian nosiro ong onu winaal nosiro no!”#23:34: Tinu-tinu solinan d'ado nokosurat tinangar ni Yisus so ayat 34. koo.#Lgu 22:18
Musuuso#23:34: Gama' yo po nosiro musuus, momakai nu watu kitanda' mongilo ong isai su komanang. yo sono ongo soujar nu Ruum-i pongilaan ong isai su kaalap nu sabung olanggau ni Yisus. 35Osuang lobuw songundii-dii momontong, om ongo wowaidon nu lobuw Yaudi ri monoruru so si Yisus maid nu mutangar nu, “Koponapul Iyo nu lobuw sondiang, nga bang bana-bana nu Iyo yo su Raja Nijanji nu Kinoringan, kinaman-o Niyo musapul kondiri!” koo nosiro.#Lgu 22:7
36Ongo soujar-i nga mubaag-a so Iyo. Lumogaa yo nosiro dii si Yisus poinum nu anggur ousom, om mutangar nu,#Lgu 69:21 37“Bang bana-bana nu Raja ko nu bansa Yaudi, pusapul-o kondiri!” koo nosiro.
38Kuwai surat nikapit so dilanggau nu ulu Niyo ri nu,
Itu Yo Su Raja
Nu Lobuw Yaudi.
39Ido koyuwan oraai nisalib-i, minubaag so si Yisus nu, “Ikau-o su Raja Nijanji nu Kinoringan, kon? Pusapul-o kondiri, om sopulo kai yo!” koo.
40Nga ido lobuw oraai-i minonawoi nu una' niyo ri nu, “Dai ko ya ka lumaa' nu Kinoringan? Toko yo po iitu muinong pinongukuman nu potoyon. 41Mutoop nai' ong kito nu ukumon nu potoyon, so' oraai. Nga Iyo yo po d'ado ya muad kosola'an mutoop kopongukuman so Iyo nu potoyon!” koo. 42Mutongaro yo sono iyo so si Yisus nu, “Oo Yisus, ondomo aku yo ong ourug ko yo nu Raja!” koo.
43Sumombuto yo si Yisus so iyo nu, “Obaran Ku ikau nu runat-a iitu koido ko so Aku so polak osanang so surga,”#23:43: polak osanang so surga; intawa: Pirdaus. koo.
Kinopotoyan ni Yisus
(Mat 27:45-56; Mrk 15:33-41; Yns 19:28-30)
44Kiro-kiro tonga' runat-i, rinumondom sono so pilolongkop nu tontong iiri sampai jaam kotolu nu awi-awi ri. 45Iya oono tabir okapal nirinding so lintonga' nu Waloi Maayo nu Kinoringan-i, nointonga' nopisi' nu kuasa nu Kinoringan.#23:45: Tabir oono pinonapad nu Bilik Sobana ko Osusi om Bilik Osusi so Waloi Maayo nu Kinoringan dii so Yirusalim. Kosudaan-o po nu tabir iiri pubaatan nu riniba om Kinoringan. Nadi, orati yo po nu nopisi' iiri nga koduung minatoi-o si Yisus, dai yo sono koputondiang riniba om Kinoringan.#Kin 26:31-33 46Gumiako yo sono si Yisus nu, “Oo Amo, nikomouli' Ku so Ikau atod Ku no!” koo. Notangar-o po iri Niyo, minatoi-o sono Iyo.#Lgu 31:5
47Nosiou-o po noongourug iiri nu wowaidon nu soujar-i, minongorayou sono iyo nu Kinoringan, om minutangar nu, “Bana ya pala lobuw iitu no nu d'ado ya kosola'an!” koo.
48Nosiou-o po nu lobuw suang noimpug-i kiawi' nourug iiri, noboromosingan sono nosiro muli' maid nu musiduntung nu olunggui. 49Kiawi' nokotondu' yo so si Yisus, om kowoinoyan, iri minaid so Iyo kiat so Galilia ri, minundii so dirawu' ri mongimpatong bana nu iri.#Luk 8:2-3
Nilobong si Yisus
(Mat 27:57-61; Mrk 15:42-47; Yns 19:38-42)
50-51Kuwai ido koyuwan ingoranan so si Yusup, lobuw Arimatia so wonuo nu Yudia. Iyo yo po owarong om orumaton nu lobuw. Mindad-indad iyo nu mogkuasa Kinoringan nu lobuw songapan Niyo.
Pudi pona lobuw si Yusup so Poongobisora'an nu Ugama, nga dai ya iyo nokotaayun nu ongo lobuw wokon so Poongobisora'an oono nu ukuman so si Yisus nu potoyon. 52Nadi, sumombato yo sono iyo so si Pilatus, mokilila' nu olapon bangkai ni Yisus. 53Nolila'an-o po iyo ni Pilatus, untibai yo niyo bangkai ni Yisus kiat so salib-i, om soluyo yo niyo nu koukuputi aalus. Noopod iri, osuwi yo niyo bangkai ni Yisus so lobong, dai po insan opongolobongan. Lobong-o po iiri nga watu inuangan.
54-55Iri yo po kowoinoyan ginumayud so si Yisus kiat so Galilia ri, minaid so si Yusup monsiou nu pinolobongan so si Yisus. Inudio ya nosiro gama' popolak nu bangkai ni Yisus so lobong oono. Runat-o po iiri nga runat kolimo, purigap-rigapan nu lobuw Yaudi nu Runat Pongintoronan. 56Mulio yo sono nosiro monodia' nu rampa om inosak#23:56: inosak; intawa: minyak lanung ponuntug nu bangkai ni Yisus.#Kin 20:10; Pom 5:14
Mintorono yo nosiro mugogoma'on nu Runat Pongintoronan-i mongowaid nu Ukum.
Atualmente selecionado:
Lukas 23: TomPWPgLgPn
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2023 (Active), Wycliffe Bible Translators, Inc. All rights reserved.