SAN LUCAS 23
23
Tej tpon kꞌiꞌn Jesús twitz Pilato
(Mt. 27:1-2, 11-14; Mr. 15:1-5; Jn. 18:28-38)
1Bix cykilcaj xjal otk chi chmet, e jaw weꞌ, bix e xiꞌ cyiiꞌnxin Jesús twitz Pilato, jxin gobernador. 2Bix twitz Pilato akꞌkexin xool yol tiꞌ Jesús. E xiꞌ cykbaꞌnxin:
—Ma tzyet ja xjal lu kuꞌna, cuma ma txiꞌ t-xitenxin cynaabl ke kxjala. O tkbaxin cye xjal yaaꞌn il tiꞌj tuꞌn t-xiꞌ kchjoꞌna kchojentja te cawel te Roma. Tzin tkbaꞌnxin ka jaxxin jun rey scyꞌoꞌn tuꞌn Dios te cawel―tz̈ikexin.
3Bix e xiꞌ tkanen Pilato te Jesús:
—¿Japa tey rey cye xjal judío?―tz̈ixin.
Bix aj ttzakꞌbeꞌn Jesús texin:
—Jay ma scyꞌonte ja yol rey cye judío, yaaꞌn inayena―tz̈i Jesús.
4Bix e xiꞌ tkbaꞌn Pilato cyej xin tneel pala bix te cykilca xjal:
—Mintiiꞌ til ja xjal lu ncnet wuꞌna―tz̈ixin.
5Pero cycyꞌi xjal e weꞌke cyyolen tiꞌjxin. E xiꞌ cykbaꞌnxin:
—Tuꞌnj t-xnakꞌtzbilxin, nchi jaw ke xjal tiꞌ gobierno. Tneel e xnakꞌtzanxin tuj Galilea, bix mas yaj e xnakꞌtzanxin tuj Judea, bix yal jaꞌlewe o tzulxin tzalu tuj Jerusalén―tz̈ikexin.
Tej tpon kꞌiꞌn Jesús twitz Herodes
6Tej tbinte Pilato juꞌwa, e xiꞌ tkanenxin cye xjal ka te Galilea Jesús. 7Tej tbintexin ka e ten Jesús tjakꞌ tcawbil Galilea, e xiꞌ tsmaꞌnxin ja Jesús te Herodes, jxin gobernador te Galilea, cuma otk tzul Herodes tuj Jerusalén te ninkꞌij. 8Tej tpon cyiiꞌnxin Jesús twitz Herodes, e jaw tzalaj Herodes, cuma otk tzꞌel kꞌij tuꞌn tajxin tilxin twitz Jesús, tuꞌnj nim tpocbal tikꞌch otk bint tuꞌn Jesús, bix e tajbexin tuꞌn tcub tyeecꞌan Jesús ti baꞌn tuꞌn twitzxin. 9Nim e xiꞌ tkanenxin te Jesús tiꞌj ti baꞌn tuꞌn, pero min akꞌ Jesús. 10Cyuyax xsunkej xin tneel pala bix ke txꞌolbal ley e pon twitz Herodes, bix nim e jaw cys̈iꞌnxin ẍtakꞌbil yol tiꞌ Jesús twitz Herodes. 11Bix akꞌ Herodes cyuya tsoldadoxin iicꞌbelte Jesús bix te xmucchalte. Nuk te cyxmucchbilxin oc cykꞌoꞌnxin jun t-xbalen rey tiꞌj. Bix e xiꞌ tsmaꞌn Herodes ja Jesús juntl maj tuya Pilato te tyecꞌbilxin el tniyꞌxin tiꞌj at mas tipemal Pilato twitzxin. 12Juꞌ tzunj, te xsunj kꞌij, e cyaj Pilato baꞌn tuya Herodes, bixsen e cub cymojbitlxin cyyolxin, cuma nejl at chꞌin kꞌoj cyxolxin.
Tej tbint tiꞌj tuꞌn tbyet Jesús
(Mt. 27:15-26; Mr. 15:6-15; Jn. 18:39—19:16)
13E tzajtzen ttxcoꞌn Pilato kej xin tneel pala bix kej niyꞌtl xjal nejenel, tuya nimcꞌatl xjal, 14bix e xiꞌ tkbaꞌnxin cyexin:
—Ma tzul cyiiꞌna ja xjal lu nwitza bix ma tzaj cykbaꞌna nkbaꞌnxin cye xjal tuꞌn cykꞌojl tiꞌ gobierno te Roma. Pero jeyꞌ, ma chin jyon tilxin cywitza, pero mintiiꞌ tilxin ma cnet wuꞌna, tisenj tzin cykꞌumena. 15Jax juꞌx te Herodes, mintiiꞌ til ja xjal lu ncnet tuꞌnxin. Matzen tzaj tsmaꞌnxin juntl maj wuyena. Cycyeꞌyenc, mintiiꞌ il o bint tuꞌn ja xinak lu tuꞌn tcyim. 16Juꞌ tzunj nuk tzꞌuꞌn cxeꞌl tiꞌj cyuꞌn soldado, bix oj tel tuj tzꞌuꞌn, cxeꞌl ntzakpiꞌna―tz̈i Pilato, 17cuma at jun ley jaca jnabkꞌi tuj ninkꞌij te Pascua n-el tzakpet jun pres.
18Pero e jaw cys̈iꞌn xjal:
—¡Min! ¡Kaja tuꞌn tcubxin! Ja te Barrabás tzakpintz keya―tz̈ikexin.
19Ja tzunj xin Barrabás tocx tuj tzeeꞌ tuꞌnj otk baj tbyoꞌnxin cab aj Roma tuj Jerusalén tuj jun kꞌoj tiꞌ gobierno te Roma. 20Juꞌ tzunj e tajbe Pilato tuꞌn tel ttzakpiꞌn Jesús, yaaꞌn Barrabás, bix juntl maj e xiꞌ tkbaꞌnxin cye xjal tuꞌn tel ttzakpiꞌnxin Jesús. 21Pero e jaw cys̈iꞌn xjal:
—¡E tjaw twitz cruz! ¡E tjaw twitz cruz!―tz̈ikexin.
22Bix e xiꞌ tkbaꞌn Pilato te toxen maj cye xjal:
—¿Tikentzen cyaja tuꞌn tbyet ja xjal lu? ¿Alcye kaꞌ o bint tuꞌnxin? Mintiiꞌ tkaꞌyel j-o bint tuꞌnxin ma cnet wuꞌna tuꞌn tcyimxin. Juꞌ tzunj nuk tzꞌuꞌn cxeꞌl tiꞌjxin bix qꞌuelex ntzakpiꞌn xina―tz̈i Pilato.
23Pero minx e cykey xjal tyol Pilato, bix e jaw cys̈iꞌn juntl maj tuꞌnx tbyet Jesús twitz cruz, hasta tejxe cycaman tibaj tyol Pilato. 24Juꞌ tzunj e xiꞌ tkbaꞌn Pilato tuꞌn tbyet-xin tisenj alcye cyaj xjal. 25El ttzakpiꞌn Pilato Barrabás, tisenj e cyajbe xjal, jxin pres tuꞌnj otk kꞌojxin tiꞌ gobierno bix otk byonxin xjal. Pero yal te Jesús, e tcuyax Pilato cyyol xjal tuꞌn tbyet-xin.
Tej tjaw kꞌoꞌn Jesús twitz cruz bix e cyim
(Mt. 27:32-56; Mr. 15:21-41; Jn. 19:17-30)
26Bix ex cyiiꞌn ke soldado jaxin, bix jax Jesús e xiꞌ kitente jtzeeꞌ cruz jaaꞌ tuꞌn tcuꞌxe awet, tuꞌn tjawxin twitz. Pero e baj tipenxin, bix e cub cymakuꞌn soldado junxin xjal tzajninxin tuj cojbil tuꞌn tponxin tuj tnom, bix e jaw cykꞌoꞌnxin cruz tiꞌ tkul jxjal. Jxin xjal Simón tbixin, jun aj tnom te Cirenexin, bix e xiꞌ tkitenxin cruz, bix oc lpexin tiꞌ Jesús.
27Nimxsen xjal oc lpe tiꞌ Jesús cyuya nim xuuj. Tzinxsen n-oc cytzꞌajan xuuj tiꞌ cyin tuꞌn takꞌ tcastiwa Jesús tiꞌ cyanemxuj, bix nchi okꞌxuj tisex nbaj cyexuj oj ncyim jun xjal. 28Pero aj tcyeꞌyen Jesús cyexuj, bix e xiꞌ tkbaꞌnxin:
—Key xuuj te Jerusalén, miꞌn chi okꞌa wiꞌja, sino chi okꞌa cyiꞌjxa bix tiꞌ cyala, 29cuma tzul jun kꞌij te nim qꞌuixcꞌaj te cyey bix te cyala. Tuj tzunj kꞌij tzul, cxeꞌl cykbaꞌn xjal: “Mas baꞌn ke cyej xuuj mintiiꞌ cyal bix ke cyej xuuj bajx chi alena bix ke cyej xuuj min-al nchꞌuꞌn tiꞌ cyin, cywitzj ke cyej xuuj at cyal,” tz̈i cybel. 30Bix cxeꞌl cykbaꞌn xjal cye witz: “Chi aaltz tzꞌaka kibaja,” bix cye buꞌj: “Ko cyewacxa, tuꞌn kcleta cywitz kej xjal o chi ul te byolte keya,” tz̈i cybel. 31Jaxte tzul qꞌuixcꞌaj cyiꞌja, cuma ka ma tzꞌocx chaꞌx tzeeꞌ tuj kꞌakꞌ, ¿yaaꞌntzen loj tzkij tzeeꞌ il tiꞌj cꞌoquex? Jtzin nkbaꞌna, ka ma cub ncastiwiya mintiiꞌ wila, ¿yaaꞌntzen loj cyey at nim cyila?―tz̈i Jesús.
32Tuyax caꞌba binchal il e xiꞌ cyiiꞌn ke soldado, tuꞌn cybyet junx tuya Jesús. 33Tej cyponxin t-xeeꞌ jun linaj Tbakel Wiꞌybaj tbi, e xiꞌ cykꞌoꞌnxin clavos tuj tkꞌab bix tuj tken Jesús twitz cruz, bix jax juꞌx e tematl caꞌba binchal il twitz cycruz, jun e jaw tuj tmankꞌab Jesús, bix juntl tuj tneẍ. 34Maatkxsen ncub cykꞌoꞌn soldado Jesús twitz cruz, e xiꞌ tkbaꞌnxin te Dios:
—Taat, najsancꞌa cyil kej soldado lu ncub cybyoꞌn inayena, cuma min tzꞌel cyniyꞌ tiꞌj alcyej ncub cybyoꞌn―tz̈i Jesús.
Bix e cub cypaꞌn soldado t-xbalen Jesús cyxolxxin. E cub cykꞌoꞌnxin suerte tiꞌj tuꞌn al ccamal tiꞌ juun.
35Yaltzen cye tnimal xjal, nuk oc cycyeꞌyen tiꞌ Jesús. Nim xjal cyxolxin, cyuya kej nejenel cye judío, oc cychmucchaꞌnxin tiꞌjxin. E xiꞌ cykbaꞌnxin:
—Ja xjal lu o tcol nim xjal. Laꞌtzen ka jacꞌa tcol te tiib jaꞌlewe. Ka jaxxix jaxin Jscyꞌoꞌn tuꞌn Dios, qꞌueleltzen tcoꞌpan tiibxin twitz cruz―tz̈ikexin.
36Jax juꞌx ke soldado oc cyxmucchaꞌn ja Jesús. E pon lkꞌekexin tiꞌjxin twitz cruz, bix e xiꞌ cykbaꞌnxin:
—Tcuꞌtza, ko kcꞌaꞌx chꞌin cꞌa vino tzalu―tz̈ikexin. 37Bix e xiꞌ cykbaꞌntlxin:
—Ka jay cawel cyibaj judío, clomtzen tiiba―tz̈ikexin.
38Bix e jaw cykꞌoꞌn soldado cab letra tuj twiꞌ Jesús tzin tkbaꞌn te oxe yol junx taꞌ: “Ja xjal lu cawel cye xjal judío,” tz̈i letra tuj yol te griego bix te latín bix te hebreo.
39Jax juꞌx cyej xin aj il e jaw twitz cruz tuya Jesús, at junxin oc t-xmucchaꞌnxin ja Jesús.
—Ka jay Jscyꞌoꞌn tuꞌn Dios, clomtzen tiiba, bix kuyaxa―tz̈ixin.
40Ja tzunj juntlxin aj il tjaw twitz cruz oc ilenxin tiꞌj xin oc xmucchante Jesús. E xiꞌ tkbaꞌnxin:
—¡Cꞌola! ¿Mimpatiiꞌ tnaabla twitz Dios, aj jaana at tuꞌn tcyim? 41Ke, ma kꞌoj kcastiwa tuꞌnj kaꞌ o bint kuꞌn, pero ja xjal lu, mintiiꞌ kaꞌ o bint tuꞌn―tz̈i juntlxin.
42Bix e xiꞌ tkbaꞌn jxin min oc t-xmucchaꞌn te Jesús:
—Jesús, oj toca tuj tcawbila, takꞌxita weya tuꞌn woca tjakꞌ tcawbila―tz̈ixin.
43Bix aj ttzakꞌbeꞌn Jesús texin:
—Cxeꞌl nkbaꞌna tey, tex kꞌij jaꞌlewe cpomela wuyena tuj lugar te tzalajebl Paraíso tbi―tz̈i Jesús.
44Tejtzen tpon chil kꞌij, bix e cub jpet jun nintzaj klolj entera twitz txꞌotxꞌ, bix e ten klolj oxe hora. 45Oc klolj twitz kꞌij. Bix tuyax jnintzaj xbalen tjaw tuj nintzaj tja Dios te maksibl twitzj jawnex xjan cwart jaaꞌ uꞌla Dios, biꞌx e cub rotj tmij. 46Yal te Jesús, e jaw ts̈iꞌnxin te Tmanxin:
—Taat, cxeꞌl wokxenena wanema tuj tkꞌaba―tz̈i Jesús. Bix tej t-xiꞌ tkbaꞌnxin juꞌwa, ncyimtlxin.
47Yal tzunj xin capitán cye soldado e jaw kꞌonte Jesús twitz cruz, tej toc tcyeꞌyenxin cykilcaj otk baj, e xiꞌ tkbaꞌnxin:
—Jaxte mintiiꞌ til ja xjal lu―tz̈ixin, bix e jaw nimset tbi Dios tuꞌnj tyolxin.
48Yal tzunkej xjal otk chi chmet te cyeyꞌlte tej tjaw Jesús twitz cruz, tej t-xiꞌ cycyeꞌyen otk cyim Jesús, bix ajke, bix akꞌ ke xjal tzꞌajlecte ttziiꞌ cyxuucꞌ tisex tten oj ncyim jun xjal. 49Pero ja tzunkej tuya Jesús bix kej xuuj otk chi tzaj lpe tiꞌj Jesús te Jerusalén tuj Galilea, e cyaj tenke, nakch chꞌin, te cyeyꞌlte ti pjel tiꞌj.
Tej tocx kꞌoꞌn Jesús tuj mukbil
(Mt. 27:57-61; Mr. 15:42-47; Jn. 19:38-42)
50Cyxol tzunkej tuya Jesús at junxin xjal José tbi. Tocx José cyxolj xin nejenel e cawen cyxol judío. Jun baꞌn xjalxin bix jiquenxin twitz Dios. 51Min otk tzꞌocxxin cyxol niyꞌtl xjal nejenel tej tcub cynincꞌuꞌn jun kaꞌ tiꞌ Jesús. Jatz itzꞌjaxin tuj tnom te Arimatea, jun tnom cyxol judío. Bix oc ten tiꞌ tanemxin tuꞌn tul tcawbil Dios. 52Jatzen José e xiꞌ tuya Pilato te kanlte t-xumlal Jesús, tuꞌn tocx tkꞌoꞌnxin tuj tjayel. 53E tcuya gobernador, bix e cub tiiꞌn José t-xumlal Jesús twitz cruz, bix oc tbalkꞌiꞌnxin jun xbalen sak tiꞌj. Bix ocx tkꞌoꞌnxin tuj jun tjayel anem twitz xak. Acꞌaj. Mitknaꞌx tocx cyimne tuj. 54Tej kꞌij oj nbaj cybinchaꞌn xjal tikꞌch cye tuꞌn miꞌn chi akꞌananxin te juntl kꞌij, jatzen kꞌij te ajlabl. Chꞌitk tex kꞌij, bix attzen tuꞌn cyxiꞌ cyiiꞌn xjal kꞌij te ajlabl.
55Yal tzunkej xuuj otk tzaj tuya Jesús tuj Galilea, bix ocx lpekexuj tiꞌ José tuj jul tocx tuj xak, bix oc cycyeꞌyenxuj ti e tse José t-xumlal Jesús tej tocx. 56Bix e pon meltzꞌajkexuj tuj tnom, tuꞌn cybinchanxuj cꞌocꞌsbil cye xjal, tuꞌntzen toc cysuꞌnxuj tiꞌ t-xumlal Jesús tbajlenxitl kꞌij te ajlabl. Pero tneel ajlankexuj tuj kꞌij te ajlabl, tisen tzin tkbaꞌn cyley.
Atualmente selecionado:
SAN LUCAS 23: mamTS
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2000, Wycliffe Bible Translators, Inc. All rights reserved.