Logótipo YouVersion
Ícone de pesquisa

लूका 18

18
न्यायधीश ते बांढी असतरी ची मिसाल
1बल्ति ईशु ने ऐचे बारे मां केहले कि हमेशा प्राथना करनी ते हिम्मत नी छोड़नी चाही छै, वानु हा मिसाल ङिली, 2“कुई शहरा मां हेक न्यांयी रेहता, जको ना नरीकारा कनु ङरता, ते ना कुई बन्दे ची परवाह करता। 3ते ओही शहरा मां हेक बांढी असतरी वी रेहती, जको ओचे गोढु आती कर केहती रेहती, ‘माये दुश्मना लारे माया सही न्यां करती ङे।’ 4ओ कई बेले तक तां ना मनला पर अन्त मां विचार करती कर केहले, ‘मैं ना नरीकारा कनु ङरे, ते ना बन्दा ची कहीं परवाह करे। 5तां वी हा बांढी असतरी मनु सताती रिहे, ऐवास्ते मैं विचा न्यां चुकावी, कङी इसड़े ना हो कि घड़ी घड़ी आती कर अन्त मां माये नाका मां दम करे।’ ”
6प्रभु ने केहले, “सुणा, हा अधर्मी न्यांयी का किहे? 7ऐवास्ते का नरीकार आपणे चुणले आला चा सच्‍चा न्यां नी चुकावी, जको रात-ङिओ ओची दुहाई ङिते रिहे? का ओ वांचे बारे मां देर करी? 8मैं तम्हानु किहे पला, ओ तुरन्त वांचा सच्‍चा न्यां चुकावी। तां वी मैं इन्साना चा पूत जिसे बेले आवी, तां का मैं धरती उपर विश्‍वास ङेखी?”
सही तरह ची प्राथना
9ते ईशु ने कितना नु जको आपणे उपर भरोसा राखते कि अम्ही धर्मी छिऊं, ते नेरा नु तोच्छ जाणते, हा मिसाल ङिली, 10“ङोन बन्दी मन्दरा मां प्राथना करने वास्ते गेली, हेक फरीसी हुता ते नेरा चुंगी गेहणे आला। 11फरीसी खड़ा हुती कर आपणे मना मां यूं प्राथना करु लाग़ला, ‘हे नरीकार, मैं दुधा धन्यवाद करे पला, कि मैं नेरा बन्दा आलीकर अन्धेर करने आला, अन्यायी ते व्यभिचारी कोनी, ते ना ऐ चुंगी गेहणे आले चे बराबर छै। 12मैं हफ्ते मां ङोन वारी उपवास राखे, मैं आपणी कमाई चा ङसवां हेंस्सा वी ङिये।’
13“पर चुंगी गेहणे आले ने दूर खड़े हुती कर, स्वर्ग़ा सनु आंखी चवणीया वी ना चाहलीया, बल्कि आपणी छात्ती कोटती-कोटती कर केहले, ‘हे नरीकार, मैं पापी छै, माये उपर दया कर।’
14 # मत्ती 23:12; लूक 14:11 “मैं तम्हानु किहे पला कि ओ ङुजा कोनी, पर ऊंही इन्सान धर्मी ठहराले गेलते आपणे घरे गेले, कांकि जको कुई आपणे आप नु बङे बणावी, ऊं छोटे करले जई, ते जको आपणे आप नु छोटे बणावी, ऊं बङे करले जई।”
ब़ाला नु आशीर्वाद
(मत्ती 19:13–15; मरकुस 10:13–16)
15बल्ति लौक ब़ाला नु वी ओचे गोढु आणु लाग़ले कि ओ वांचे उपर हाथ मेहलो, पर चैला ने ङेखती कर वानु धमकाले। 16ईशु ने ब़ाला नु गोढु हकारती कर केहले, “ब़ाला नु माये गोढु आऊं ङिया, ते वानु मना ना करा, कांकि नरीकारा चा राज़ इसड़ा चा ही छै। 17मैं तम्हानु सच्‍च किहे पला कि जको कुई नरीकारा चे राज़ नु ब़ाला आलीकर स्वीकार नी करी ओ ओचे मां कङी ना जा सग़ी।”
धन उपर विश्‍वास करने आले स्वर्ग़ा मां ना जा सग़ी
(मत्ती 19:16–30; मरकुस 10:17–31)
18कुई सरदारा ने ईशु कनु पूछले, “हे उत्तम गुरु, अनन्त जीवन चा अधिकारी हुवणे वास्ते मैं का करे?”
19ईशु ने ओनु केहले, “तु मनु उत्तम कां किही? कुई उत्तम कोनी, सेर्फ हेक, यानि नरीकार। 20तु आज्ञा नु तां जाणी, ‘व्यभिचार नी करना, हत्या नी करनी, चोरी नी करनी, ते कूड़ी ग़वाही नी ङेणी, आपणे ब़ा ते आपणी आई चा कद्दर करना।’ ”
21ओणे केहले, “यां सब नु मैं बचपन कनु मनता आला।”
22ईं सुणती कर ईशु ने ओनु केहले, “दुधे मां हेक बाते ची कमी छै, जा आपणे सब कोच्छ बेचती कर कंगाला नु ङे, ते तनु स्वर्ग़ा मां धन मिली, ते आती कर माये भांसु टुरती पड़।” 23ओ ईं सुणती कर ब़ोहत उदास हुला, कांकि ओ बङा धनवान हुता।
24ईशु ने ओनु ङेखती कर केहले, “धनवाना चे नरीकारा चे राज़ मां जाणे कितने मुश्किल छै। 25नरीकारा चे राज़ मां धनवान चे जाणे कनु, ऊंठा चे सुई चे दुक्‍का महु निकलती जाणे आसान छै।”
26ऐचे उपर सुणने आला ने केहले, “तां बल्ति काया उद्धार हो सग़े?”
27ओणे केहले, “जको इन्साना कनु ना हो सग़ी, ऊं नरीकारा कनु हो सग़े।”
28पतरस ने केहले, “ङेख, अम्ही तां घर ब़हार छोड़ती कर दुधे भांसु टुरती पले।”
29ईशु ने वानु केहले, “मैं तम्हानु सच्‍च किहे पला कि इसड़े कुई कोनी जेह्णे नरीकारा चे राज़ वास्ते घर, जा घराआली, जा भावां, जा आई-ब़ा, जा ब़ाला-ब़च्‍चा नु छोड़ती ङिले हो। 30ते ऐ समय कई गुणा ज्यादा ना गिहो ते आणे आले युगा मां अनन्त जीवन।”
ईशु ने तीजी वारी आपणी मौत चे बारे मां केहले
(मत्ती 20:17–19; मरकुस 10:32–34)
31बल्ति ओणे ब़ारहा नु लारे गेहती कर वानु केहले, “ङेखा, अम्ही यरुशलेम नु जऊं पले, ते जितनीया बाता मैं इन्साना चे पूता चे वास्ते भविष्यवक्‍ता चे जरिये लिखलीया गेलीया, वे सब पुरीया हुवे। 32कांकि ओ नेरीया जातिया चे हाथा मां सोंपला जई, ते वे ओनु ठठा मां उङारे, ते ओचा अपमान करे, ते ओचे उपर थूके। 33ते ओनु कोड़े मारे, ते मारती नाखे, ते ओ तीजे ङिओ जीता हुती जई।”
34पर वाणे यां बाता महु कुई वी बात कोनी समझली, हा बात वाकनु लुकली रेहली, ते जको केहले गेले हुते वांची समझी मां कोनी आलते।
अन्धा भीख मांगणे आला
(मत्ती 20:29–34; मरकुस 10:46–52)
35जिसे बेले ईशु यरीहो शहरा चे गोढु पुज़ला, तां हेक अन्धा सड़के चे किनारे ब़ेहला भीख मांगे पलता। 36अन्धा भीड़ चे टुरणे ची अवाज सुणती पूछु लाग़ला, “ईं का हुवे पले?”
37वाणे ओनु बावड़ले, “ईशु नासरी जाये पला।”
38बल्ति ओणे साङ मारती केहले, “हे ईशु, दाऊद ची ऊलाद्ध, माये उपर दया कर।”
39वे जको आग़ु-आग़ु जई पलते, वे ओनु दड़काऊं लाग़ले कि चोप रिहो, पर ओ होर वी साङ मारु लाग़ला, “हे दाऊद ची ऊलाद्ध, माये उपर दया कर।”
40तब ईशु ने खड़े हुती कर आज्ञा ङिली कि ओनु माये गोढु गेहती आवा, ते जब ओ गोढु आला तां ओणे ओकनु पूछले, 41“तु का चाहवी कि मैं दुधे वास्ते करे?”
ओणे केहले, “हे प्रभु, ईं कि मैं ङेखु लाग़े।”
42ईशु ने ओनु केहले, “ङेखु लाग़, दुधे विश्‍वास ने तनु ठीक करती ङिले।”
43ते ओ वे घड़ी ङेखु लाग़ती गेला, ते नरीकारा ची बढ़ाई करता हुला, ईशु चे भांसु टुरती पला, जब सारा लौका ने ईं ङेखले तां नरीकारा ची स्तुति करली।

Atualmente selecionado:

लूका 18: ODR

Destaque

Partilhar

Copiar

None

Quer salvar os seus destaques em todos os seus dispositivos? Faça o seu registo ou inicie sessão