Марк 13
13
Иисус аноконди азонды Шкаень кудть срафтоманц колга
(Матф. 24:1,2; Лук. 21:5,6)
1Мзярда Иисус лиссь Шкаень кудста, тонафниензон эзда фкясь корхтай Тейнза: «Тонафты! Ватт, кодапт кефне, кодапт куттне!» 2Иисус мярьгсь каршезонза: «Няйсайть ня пяк оцю куттнень? Сембось тя калафтови, тяса кев лангса кевга аф ляды».
Мекольдень пинкнень тяштьксна
(Матф. 24:3-14; Лук. 21:7-19)
3Мзярда Иисус ащесь озада Вайшуфта пандть лангса Шкаень кудть каршеса, эста Пётр, Иаков, Иоанн и Андрей лия тонафниензон эзда башка кизефнезь Сонь: 4«Азк тейнек, мзярда тя ули, и кодама тяштьксонь коряс няеви, мзярда сембось тя тиеви?»
5Иисус каршезост корхтась: «Ванфтость прянтень, кивок афоледязь васькафта-эрьготьфта; 6сяс мес ламотне сайхть Монь лемозень ала и кармайхть корхтама эсь колгаст: "Тя Монан", и ламотнень васькафтсазь-эрьготьфтсазь. 7А мзярда марятада тюремань зярьфт и тюремань колга кулят, тяда эводе, сяс мес тянди улема; но тя нинге аф песь. 8Ломаньтналсь кеподи ломаньтнал лангс, фкя масторсь омбоцеть лангс; васток-васток улихть модашерьхкомат и сайхть вачашит. Тя ули кода шачфтомъётконь маятаматнень ушеткссна.
9Но ванфтода пря; тинь кармайхть макссемонт судс и пикссемонт синагогаса, и арафттядязь оцюнятнень и оцязорхнень инголи Монь лемозень инкса: азондоледе тейст Монь колган. 10Но тяда инголе сембе ломаньтналхненди эряви азондомс Пара кулясь. 11Мзярда ина вяттядязь тинь судс, инголькиге тяда пичедь, мезе тейнть корхтамс. Мезе ули максф тейнть ся пингоня, сянь и корхтасть: сяс мес аф тинь карматада корхтама, а Иняру Ваймопожфсь.
12Брадсь макссы брадонц куломас, и алясь – идензон; и кеподихть иттне тядяснон-аляснон каршес и кулофтсазь синь. 13Монь лемозень инкса кивок аф кармай кельгомонт; но кие кирди петь самс, ся идеви».
Оцюдонга оцю ризфсь
(Матф. 24:15-28; Лук. 21:20-24)
14«Мзярда ина тинь няйсасть гастямань-каладомань нулготьксть, конань колга корхтась Даниил пророксь, ащикс тоса, коса тейнза афолемаль уле, – лувись катк шарьхкодьсы, – эста Иудеяста сембе ворьгодест панттненди. 15Кие кудбряса, ся тяза валгонда куду и тяза сувсе кудозонза мезеньге сявондема; 16а кие паксяса, ся тяза мрда меки эсь щамонзон инкса. 17Вай, конашкава стака ули ся шитнень пекихненди и идень потяфтыхненди! 18Озондода, афоль уле ворьгодеманте тялонда. 19Ся шитне пяшкодихть сяшка ризфса, кодама ашель ушетксста сявомок, мзярда Шкайсь тиезень менельть и масторть, и тячиень шить самс, и афи кармай улема. 20Кда Азорсь афолезень кирьфта ся шитнень, эста кивок афоль идев; но ломаттнень инкса, конатнень Сон кочказень, кирьфтазе ся пингть.
21Эста, кда кие тейнть мярьги: "Вага, тяса Христоссь" али "Вона, тоса", – тяда кема. 22Сяс мес сайхть аф афкуксонь христост и аф афкуксонь пророкт, конат кармайхть тиендема тяштькст и дивань тефт кочкафнень васькафтоманкса, кда васькафтовольхть. 23Сяс ванфтода пря. Вага, Мон аноконди азондыне тейнть семботь».
Ломанень Цёрать самац
(Матф. 24:29-35; Лук. 21:25-33)
24«Но ся шитнень, ся ризфта меле, ши валдсь шобдалгоды, ковське аф кармай валдоптома, 25тяшттневок прайхть менельста, шерьхкозевихть менелень вийхневок. 26Эста няйсазь Ломанень Цёрать инь оцю вийсонза и иневалдсонза коволхнень лангса саманц. 27Эста Сон кучсыне Эсь ангелонзон и кочкафтсыне масторть нилецьке ширденза Эсь кочкафонзон, модать песта менельть пес.
28Кепотьксонди сявость смоква шуфтть: мзярда тарадонза путькияйхть и нолдайхть лопат, эста содасасть: кизось маласа. 29Стане тясовок: мзярда тинь няйсасть, сембось тя пяшкоди, содасть: тя пингсь маласа, кенкшть лангса. 30Видеста корхтан тейнть: тяниень пингонь эряйхне аф кенерихть юмамс, кода сембось тя ули. 31Менельсь и модась юмайхть, но Монь валне аф юмайхть».
Уледа анокт
(Матф. 24:36-44)
32«А мзярда сай ся шись али пингсь, кивок аф содасы, аф менелень ангелхне, аф Цёрась, но аньцек Алясь содасы. 33Ванода, уледа фалу анокт и озондода, сяс мес аф содасасть, мзярда сай ся пингсь. 34Тя сянь лаца: мзярда ломанць оцю кис тумстонза и кудонц кадомстонза, макссь эсь покодиензонды азорксши и эрти эздост тев, и орта ваныти мярьгсь ваномда и улемс анококс. 35Тяконь лаца тиньге уледа анокт; сяс мес аф содасасть, мзярда сай кудазорсь, илять али пялевеста, атёкшнень морамста али шобдава пяли; 36апак учсек самстонза афоледязь сата тинь удозь. 37Ина мезе Мон корхтан тейнть, азса сембонди: уледа анокт!»
Atualmente selecionado:
Марк 13: ОС16
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Библиянь ётафтома институтсь, 2016