San Mateo 1
1
Yejwah ninteh intokah iwejkatatawah n Cristo Jesús
(Lc. 3:23-38)
1Ninteh iwejkatatawah n Cristo Jesús, non walewatok itech David iwa noijki walewatok itech Abraham.
2Abraham ita n Isaac.
Isaac ita n Jacob,
iwa Jacob ita n Judá iwan oksikimeh ikniwah.
3Ipilwah n Judá non okímpixki iwan Tamar, omonotsayah Fares iwa Zara.
Fares ita n Esrom,
iwa n Esrom ita n Aram.
4Aram ita n Aminadab.
Aminadab ita n Naasón.
Naasón ita n Salmón.
5Salmón iwa n Rahab okipixkeh inkone non itoka Booz.
Booz iwa n Rut okipixkeh inkone non itoka Obed.
Obed ita n Isaí.
6Isaí ita n rey David.
N rey David ita n Salomón. Imamá n Salomón okatka isiwa n Urías.
7Salomón ita n Roboam.
Roboam ita n Abías,
iwa Abías ita n Asá.
8Asá ita n Josafat.
Josafat ita n Joram,
iwa Joram ita n Uzias.
9Uzias ita n Jotám.
Jotám ita n Acaz,
iwa Acaz ita n Ezequías.
10Ezequías ita n Manasés.
Manasés ita n Amón,
iwa Amón ita n Josías.
11Josías ita n Jeconías. Jeconías iwan ikniwah otlakatkeh itech tonatijmeh ijkuak n israelitas okinwikatokah kan tlali de Babilonia.
12Satepa de okinwikakeh Babilonia,
Jeconías ita n Salatiel,
iwa Salatiel ita n Zorobabel.
13Zorobabel ita n Abiud.
Abiud okatka ita n Eliaquim,
iwa Eliaquim ita n Azor.
14Azor ita n Sadoc.
Sadoc ita n Aquim,
iwa Aquim ita Eliud.
15Eliud ita n Eleazar.
Eleazar ita n Matán,
iwa Matán ita n Jacob.
16Jacob ita n José.
José omonamikti iwan María.
María okatka imamá n Jesús non tejwah tikixmatih kemi Cristo.
17Opanokeh májtlaktli iwa n nawi (14) iwejkaixwiwah n Abraham asta otlakatiko David. Iwa satepa májtlaktli iwa n nawi (14) iwejkaixwiwah ijkuak ok onemia n David asta ijkuak okinwikakeh kan tlali de Babilonia. Iwa satepa ok májtlaktli iwa n nawi (14) iwejkaixwiwah ijkuak okinwikakeh n Israelitas kan tlali de Babilonia asta ijkuak otlakatiko n Cristo.
Otlákatki Cristo Jesús
(Lc. 2:1-7)
18Ijkí otlamochi ijkuak otlákatki n Cristo Jesús. María, imamá Jesús, yokichixtoka tonati para monamiktis iwan José. Pero ijkuak ayamó omonamiktiayah, María yokatka kókoxki ika konetl ika iweletilis n Espíritu Santo. 19José ya monamiktiskia iwan María,#1:19 Ijkuak n judíojteh kisentlaliah monamiktiskeh mokawah kemi yomonamiktijkeh. Yika, tla ayakmó monamiktiah kipiah mokajkawaskeh ika se amatl, maya ayamó omonamiktiayah, porke nin kompromiso weyi kijtosneki para n judíojteh. Xikamapoa Mateo 19:3-9. iwa kemi kuali tlakatl, ye amo okinek kipijpinatis n María, yika okimoli kikajkawas san ichtaka. 20Ye okimoliaya ijkó kichiwas, pero se iángel n Totajtsi Dios okimonextili ijkuak otejtemiktoka iwa okili:
—José, iwejkaixwi n David, amo ximawi tikselis n María kemi mosiwa. N konetl non kichixtok wits ika iweletilis Espíritu Santo. 21María kipias se konetl, iwa te tiktlalilis itoka Jesús, Ye kinmakixtis itlakaikniwah de intlajtlakolwah.
22Nochi ni opanok para mamochiwa tlan okijto Totajtsi Dios ijkuak okijkuilo n tiotlajto:
23Se íchpochtli kipias ijtik se konetl,
iwa kitlakatilis,
iwa kitlalilis itoka Emanuel.
Emanuel kijtosneki: Dios kajki towah.
24Ijkuak José oijsak, okichi tlan okinawati iángel Totajtsi Dios, iwa okiseli n María kemi isiwa. 25Yejwah mach okochiah sansikah, asta ijkuak yotlákatki n konetl.
Iwa José okitlalili itoka Jesús.
Atualmente selecionado:
San Mateo 1: npl
Destaque
Partilhar
Copiar
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fpt-PT.png&w=128&q=75)
Quer salvar os seus destaques em todos os seus dispositivos? Faça o seu registo ou inicie sessão
© 2011, Wycliffe Bible Translators, Inc. All rights reserved.