If you have would like a copy of this version please contact info@davaraudiobibles.org

Inner Seraji New Testament, CC-BY-SA-4.0, The Love Fellowship (Text). Inner Seraji New Testament Audio Bible, CC-BY-SA-4.0, Davar Partners International, The Love Fellowship, 2022 (Audio).

Inner Seraji New Testament

Inner Seraji 2017 BI (NT) NonDrama

Inner Seraji 2017 BI (NT) Drama

Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.

जेबा यीशु तेऊ पहाडा का उतरु, तेबा एक खासे लोका तेऊ पीछे हांडदे लागे। होर हेरा, एक कोढ़ी यीशु सेटा इच्छी करे तेऊबै नमस्ते करी होर बोलू, हे प्रभु! अगर तुह चाहे, तुह महा ठीक करी सका। यीशु हाथ जेह काडी करे सह छूंहुँ, होर बोलू, हाऊं यह चांहदा, की तुह शुद्धध हो। होर सह कोढ़ा का ठीक होऊ। यीशु तेऊवै बोलू, हेर, कासी बे किछे नांई खोजे, पर नाहीं करे आपणे आपुबे याजका बे रिहाय होर जोह चढ़ाबा मूसा डाहुदा तूह चढ़ा, कि लोका बे गुआही हो।


जेबा यीशु कफरनहूम नगर में आउअ तेबा एक सुबेदार तेऊ सेटा इच्छी करे बिनती करी, हे प्रभु, मेरअ सेबक घरे दरांगा री बमारी का बहु दुखी साहा। तेऊ तेऊबै बोलू, महा इच्छी करे सह ठीक करनअं। सुबेदारे उतर दिंना, हे प्रभु, हाऊं एता लायक नांई कि तुह मेरे घरा री छता थई इच्छे, पर मुंहाँ का ही आज्ञा दे तेबा मेंरअ सेबक ठीक हूँणअं। किबेकी हाऊं भी एक पराधीन मणश साहा, होर सपाही मेरे अधीन साहा। जेबा हाऊं एकु बे बोला, नांह! तेबा सह नाहंदा, होर दूजे बे बोला, इच्छ! तेबा सह इहंदा; होर जेबा आपणे नोकरा बे बोला, यह कर! तेबा सह करा। यह शुणी करे यीशु हैरान होऊ, होर जोह तेऊ पीछे इहंदे लागे दे थी, तयाबे बोलू, हाऊं तमाबे सच बोला कि मांई इस्राएल देशा में भी एडा बुशाह नांई पाऊ। होर हाऊं तमाबे बोला कि पूर्ब होर पशिचमा का भी लोका इच्छी करे अब्राहम होर इसहाक होर याकूबे संघे स्वर्गा रे राज्य में बेशणे। इस्राएली राज्य बागे न्याहरे में पाउणे: तखे लेरना होर दाँदा रा पीशणा हूँणा। तेबा यीशु सुबेदारा बे बोलू, घरा बे नांह, जेड़ा तेरा बुशाह साहा, तेडा ही ताहबे हो। होर तेऊरअ सेबक तेसी घड़ी ठीक होऊ।


होर यीशु जेबा पतरसा रे घरे आउअ, तेबा तेऊरी शाशु ज़रा में पड़ी दी हेरी। तेऊ तेसकअ हाथ छुहूँ होर तेसकअ ज़र उतरु, होर उठी करे तेऊरी सेवा टहली करदी लागी। जेबा ब्यालक होई तेबा तेऊ सेटा बहु लोका आंणी जासू में दुष्टात्मा, होर तेऊ त्याह आत्मा आपणे बचना संघे काडी; होर सभे बीमार ठीक करी। कि जोह बचन यशायाह भविष्यद्वक्ता बोलू, सह पूरअ हो: तेऊ आपु ही महारी दुर्बलता नी होर महारी बमारी चुआकी।


यीशु जेबा आपु चहु फेरे एक बड़ी भीड़ हेरी तेबा झिला रे पारा फेरे बहु लोका रअ एक छुड हेरी करे तेता पारा फेरा बे नाहंणे री आज्ञा दिनी। तेबा एकु शास्त्री सेटा इच्छी करे तेऊबै बोलू, हे गुरु, ज़खे कई भी तुह नाहलअ, महा ताह पीछे इंहणा। यीशु तेऊबै बोलू, शयाली री जुहल़ी होर सरगा रे चेलू रे कोलह हुँदा; पर महा मणशा रे शोहरू बे मुंड़ा ढोपणे री भी ज़ागा नांई आंधी। एकु होरी चेले तेऊबै बोलू, हे परमेश्वर, महा पहिले नाहंणे दे कि आपणे बापू गाढू। यीशु तेऊबै बोलू, मेरअ चेले बणने री तणी महा पीछे इच्छे, होर मुरदे आपणे मुरदे गाढ़ने दे।


जेबा सह किस्ती में चढू, तेबा तेऊरे चेले भी तेऊ पीछे चली। होर हेरा, नइ मे एक बडी ढीश बागर होई की किस्ती छाली मे डुबदी लागी, होर सह सूतदअ थी। तेबा चेले सेटा इच्छी करे सह भझयाऊ होर बोलू, हे प्रभु, हामा बचा, हामे नाश होई चाली। तेऊ त्याह बे बोलू, हे अल्पविश्वासीययो तमे किवे डरा? तेबा सह उठु होर ढीश बागर होर पाणी डांटू, होर तेबरी सारा शांत होउ। होर त्याहे हैरान होई करे बोलदे लागे, यह केहडअ मणश साहा कि बागर होर पाणी भी एउरी गला मना।


जेबा यीशु झीला रै पार गदरनियों रै प्रदेशे पूजअ, तेबा दुई मणश जासू में दुष्टात्मा, कब्रा का निखलते ही तेऊबै भेटी। त्याहे एतरे प्रचण्ड थी, की कोहे भी तेसा बाता नांई हाडी सकतअ थी । त्याहे जोरे करे बोलू, हे परमेश्वरा रे शोहरूआ, ताहका हामा केह काम? कैह वक्ता का पहिले हामा बे दुखा दींदअ तुह अखे आउअ। त्याका कुछ दूर तखे ज़ोता एक सूरा रअ बड़अ छूंऊड चरदअ लागदअ थी। दुष्टात्मा तेऊबे यह बोली करे बिनती करी, अगर तुह हामा काहडना चाहंदा, तेबा सूरा रे छुंडा में भेज़। तेऊ तयाबे बोलू, नाहाँ! होर निखल़ी करे सूरा में पेठी होर हेरा, सारअ छुंड ढगा पैंदा का पटिकी करे पाणी में पडू, होर डूबी करे मुंअं। त्यार गुआले ठुरी, होर नगरे नाहीं करे या सबे गला होर जासू मे दुष्टात्माएँ थी, त्यारा सारा हाल शुणाऊ। तेबा सारे नगरा रे लोका यीशु संघे मिलदे आउए, होर तेऊ हेरी करे बिनती करी कि महारी सीमा का बागे नाहाँ।

Ouça मत्ती 8