اعمالٚ رسولأن ۱
۱
عیسی مسیح صعود به آسمان
۱ اَی تِئوفیلوس، من می اوّلی کیتابٚ میأن#۱:۱ کی انجیلٚ لوقا نام دأره بینیویشتم درباره‌یٚ همه‌یٚ کارأنی کی عیسایٚ مسیح شروع به انجام و تعلیم بوکوده‌بو ۲ تا او روزی کی اون، روح‌القدسٚ هیدایتٚ اَمرأ، خو رسولأنی‌یَ کی اینتخاب بوکوده‌بو، دستوراتی‌یَ فدَه و بأزین اون به آسمانٚ جور، ببرده بوبوسته. ۳ اون بعدٚ رنج کشئن، خو مرگٚ اَمرأ، خودشَ زنده به خو رسولأن آشکارَ کوده و دلایلٚ فراوانی اَمرأ ثابت بوکوده کی زندَه بوسته. چهل روز اوشأنَ آشکارَ بوستی و خودا پادشایی جأ گب زه‌یی. ۴ ایوار کی خو رسولأنٚ اَمرأ غذا خوردن دوبو، بفرمأسته: «اورشلیمَ ترکَ نوکونید، روح‌القدسَ رافا بِیسید کی می پئر وعده بدَه‌بو و می جأ بیشتأوستیدی. ۵ چونکی یحیی، شمرَ آبٚ اَمرأ تعمید دَیی ولی چن روزی ویشتر نوگوذره کی شومأن روح‌القدسٚ اَمرأ تعمید گیریدی.»
۶ عیسی شاگردأن، وختی کی دورٚ هم ایسَه‌بید، عیسی جأ وَورسه‌ییدی: «خوداوندأ، هَه زمانٚ میأن ایسه کی او پادشایی‌یَ کی اَمی دوشمنأن اَمی دسٚ جأ فیگیفتیدی، تو بنی‌ایسرائیلَ وأگردأنی؟» ۷ عیسی جواب بدَه: «تاریخ و وختأنی کی وأستی ایتفاق دکفه می پئرٚ اختیار نهَه و لازم نی‌یه شومأن بدأنید. ۸ ولی او چیزی کی وأستی بدأنید هَنه کی وختی روح‌القدس شمرَ نازل ببه، قوّت گیریدی کی اورشلیم و تومامی‌یٚ یهودیه و سامره اوستانأنٚ میأن، تا دورترین نقطه‌یٚ دونیا، می شاهدأن بیدی.»
۹ عیسی بعدٚ گفتنٚ اَ حرفأن، هوطو کی اوشأن فندرستید، همه‌تأنٚ چومأنٚ جُلُو ابرٚ میأن آسمانٚ جور ببرده بوبوسته. ۱۰ هو وخت کی شوئون دوبو و شاگردأنم رو به آسمان چوم بودوخته‌بید، ایدفعه‌یی دینیدی کی دوتأ مرد، سیفیدٚ لیباس دوکوده اوشأنٚ ورجأ بپا ایسَه‌ییدی. ۱۱ اوشأن، رسولأنَ بوگفتید: «اَی جلیلٚ مردأکأن، چره اَیه به پا ایسَه‌ییدی، آسمانَ فندریدی؟ هَه عیسی کی جٚه شیمی میأن آسمانٚ جور ببرده بوبوسته، هَطویی دوواره، وأگرده.»
مَتّیاسٚ اینتخاب به جای یهودایٚ اسخریوطی
۱۲ او وخت رسولأن جٚه کوهی کی اونٚ ایسم «زیتون» بو وأگردستیدی اورشلیمٚ شهر. او کوه ویشتر جٚه یک کیلومتر، اورشلیمٚ جأ فاصله نأشتی. ۱۳ وختی فأرسه‌ییدی شهر، بوشویید هو بالاخانه‌یی کی شاگردأنٚ اقامتگاه بو. پطرس و یوحنا، یعقوب و آندریاس، فیلیپُس و توما، برتولما و متّی؛ یعقوب کی حلفی زأی بو، شمعون کی معروف به «غیور» بو، و یهودا، یعقوبٚ زأی هم اویه ایسَه‌بید. ۱۴ اوشأن، عیسی مار، مریمٚ اَمرأ و الباقی زنأکأن و عیسی برأرأنٚ اَمرأ یکدل تومامٚ وخت دوعا کودیدی.
۱۵ ایتأ جٚه او روزأن، پطرس تومامٚ ایماندارأنٚ میأن کی حدودٚ صد و بیست نفر بید، به پا بِیسه ۱۶و۲۰ و بوگفته: «اَی برأرأن و خأخورأن، کیتابٚ مزامیرٚ نیویشته‌یأن وأ به حقیقت برسه کی روح‌القدس پیشترأن داوودٚ نبی‌یٚ زبانٚ اَمرأ در موردٚ یهودا پیشگویی بوکوده‌بو:
«‹ببه کی اونٚ خانه فوگُرده، هیکس اویه ساکن نبه.›#۱:۱۶،۲۰ مزمور ۶۹، آیه ۲۵
«و هَطویم بینیویشته بوبوسته:
«‹ببه کی اونٚ خدمت به خودا، به اینفرٚ دیگرٚ دس بیسپرده ببه.›#۱:۱۶،۲۰ مزمور ۱۰۹، آیه ۸
«هَطو کی دأنیدی، یهودا عیسایَ خیانت بوکوده و با نیشأن دَئنٚ عیسی جاجیگاه باعثٚ اونٚ دسگیری بوبوسته. ۱۷ یهودا قبلٚ اَنکی عیسایَ خیانت بوکونه، ایتأ جٚه اَمأن بو و اونَ عیسی اینتخاب بوکوده‌بو تا اَمی مأنستن خودایَ خدمت بوکونه.»
۱۸ یهودا، هو پولٚ اَمرأ کی خو خیانتٚ وأسی فیگیفته‌بو، ایتأ باغ بیهه کی هو باغٚ میأن دمر بکفته زیمینٚ سر، اونٚ شکم بترکسته و اونٚ روده فووُسته بیرون. ۱۹ تومامٚ مردومی کی اورشلیمٚ میأن زندگی کودیدی وأخبرَ بوستیدی و خوشأنٚ زوانٚ اَمرأ او محله‌یَ «حَقِلْ‌دَما»، ینی زیمینٚ خون، نام بنَه‌ییدی.
۲۱ پطرس ایدامه بدَه و بوگفته: «هسأ وأ جٚه شاگردأنی کی تومامی‌یٚ سفرأنٚ میأن، خوداوندٚ عیسی مسیح و اَمی اَمرأ بید، ۲۲ ینی جٚه او وختی کی یحیی، عیسی مسیحَ تعمید بدَه تا روزی کی عیسی جٚه اَمی ورجأ آسمانٚ جور ببرده بوبوسته، اینفرَ اینتخاب بوکونیم تا اَمی اَمرأ عیسی مسیحٚ مردن و زنده بوستنَ شهادت بده.»
۲۳ هَنٚ وأسی دو نفرَ پیشنهاد بوکودیدی کی ایتأ، یوسف مشهور به «برسابا» بو، ولی اونَ «یوستوس» دوخوأدیدی و اینفرٚ دیگرم کی اونٚ نام «متیاس» بو.
۲۴ پس اَطو دوعا بوکودیدی: «خوداوندأ، تو همه کسٚ قلبَ جأ وأخبری. تو خودت، اَمرَ نیشأن بدن کی اَ دو نفرٚ جأ کویتأیَ اینتخاب بوکودی ۲۵ تا تی خادم و تی رسول ببه، خدمتی کی یهودایٚ اسخریوطی اونٚ جأ رو وأگردأنه و بوشو او جایی کی لایقش بو.»
۲۶ بأزین قرعه تأودَه‌ییدی و مَتّیاسٚ ایسم بیرون بمو. اَطویی اونم او یازده‌تأ رسولٚ اَمرأ خدمت کودنٚ وأسی همرأه بوبوسته.
Atualmente Selecionado:
اعمالٚ رسولأن ۱: گیلکی (رشتی)
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2010-2019 Gilak Media