Madiu 3
3
Yoni Tobafitaiso gilulumamala.
Maki 1:1-8; Luke 3:1-18; Yoni 1:19-28
1Tu medema tovai-nadi Yoni Tobafitaiso gilakayemu ada givebutu Yudiya wala'aiya gilulumamala. 2#Ais 40:3Gigahe gigayo, “Yami dewa koyona wanavenikohiyena be wanahagavilami, fa'ina Yaubada yana aituha a gilakayemu. Tova kabisona kaliva Yaubada yana itave'avina againe hinamiyami be ase'asediya ginavehivehimeya.” 3Boi tuwai-mo'ena Yaubada bonana ana to'awatalatalaina ana egana Aiseya hida kaliva Yoni fa'ine gigaheye-vagahina gigayo,
Kaliva agona hinogalina wala'aiya gikovakovadadana
gigayo, Kaiwabu yana eda wanavetauna,
yana eda ase'asemiya wanakidewedewena.
Hidedemi bana Aiseya gigahe.
4Tu bana Yoni yana miyami kaliva koyokoyo'avana amine. Ana aikeva ma kameli utuutuna againe hiyogona, ada gaiyona bulumakau kwafilina againe hiyogona-ma goline gihifona. Ada anaga ma koloma, kadu ana bwai ma ma'awa gufadi. 5Au kaliva moya'aidi bana againe hi'ela, miYelusalema be Yudiya ana fafali kalivadi, kadu gufa ana egana Yolidani ana fafali kalivadi moya'aidi hi'ela. 6Yadi dewa koyona hiyauna be Yoni Yolidani againe gikivebafitaisoyedi.
7Tu miYuda yadi tonagona tafatafalolodiyao adi egana Falisi kadu Sadusi moya'aidi hi'ela'ela be hinabafitaiso. Yoni gi'itadi-yo gidakeyedi gigayo, “Omi vaita oloto koyona ana egana vaiba natuneyao amine. Hakwadi givenuwa'atami-yo vaita Yaubada yana ila'a omi agaimiya wada'oseni? Keke amifaiweya Yaubada wana'oseni. 8#Af 26:20Omi wagahe vaita yami koyona wadahegeni-yo wadahagavilami. Au dewa yamumuna wanafaisewani-yo yami hagavila au velemo'ena ma anahalamanena. 9#Yo 8:33-40; Lo 4:12Ada keke wananuwanuwa vaita taumiyao agaimiya wanagahe wanagayo, Ide Abelahamo bwaneneneyao fa'ina, kadu ide Yaubada natuneyao. Au gagahemi Yaubada anafaiweya ginakilowemi tu hida kabala agaidiya kaliva ginabubudi be Abelahamo ana yo'oya ginasedi. 10Kadu'e adamoya tamuyoko ahe hiyadalina be ai hinalu'inubadi, ada ai sa'eyana sa'eyana guwadi keke yamumuna ma hinataladi be ai'ala'alata againe hinahegedi. Ai-dina amine omi'iyao.
11 #
Yo 1:33; Af 1:5 Iya'eku ma gufa againe gakivebafitaisoyemi higa iya'iyaya vaita yami dewa koyona wadavenikohiyena be wadahagavilami. Iya wai ganagona tu kaliva sa'eyana wai ginamulina-ma gifaiwalahegeku. Bana kikaiwabu-mo'ena tu iya kwamana kabisoku fa'ina, keke akufaiweya Bana againe ganave'agetoga-yo ana ageyafayafa ganawahini. Bana'e ma Alu'aluwa Mahalina againe tufoimi ginakivebafitaisoyemi be ginavemagami tu tufoimi ai'ala'alata againe ginakivebafitaisoyemi ma higa ginavematahiwadiyemi. 12E, aimo gina'ela ada yana abasaibutu ana gi'e lakahina gina'abina be witi ana abavagakolukolu againe ginasibutuna. A'a-mo'ena yana kweda againe gina'ive'ave'ahina tu yogona ai gi'alata-vagata ma againe ginaluve'alahina.” Hidedemi Yoni gilumamala.
Yoni Yesu gikivebafitaisoyena.
Maki 1:9-11; Luke 3:21-22; Yoni 1:32-34
13Tu Yesu Galili ana fafaliya gitauya ada Yolidani againe gilakayemu be Yoni ginakivebafitaisoyena fa'ina. 14Yoni ma nuwanuwana ginahawatana gigayo, “Gavadi-yo iya agaikuya u'ela be unabafitaiso? Iya kwamana kabisoku be vaita O againiya gada'ela gadabafitaiso.”
15Tu Yesu gigahena gigayo, “Auwe keke unanuwanuwa. Adamoya unakivebafitaisoyeku be au Yaubada kaliva givehimeyeda amine kanahuluva.” Hidedemi gigahe-yo Yoni givenogala be gikivebafitaisoyena.
16Ada Yesu gibafitaiso gihavaina, avaleya gilaka ada auhe'ama lobama gi'ayavalina, ada Yaubada Alu'aluwana ana ita vaita bunebune amine gihobuhobu tu Bana againe gihobu'ela ma gi'itana. 17#Md 12:18, 17:5Ada Yaubada agona lobameya gikova gigayo, “Bana hidevama Natu'ase'aseku. Bana nuwaku gikiveyamumu-mo'ena.”
Atualmente Selecionado:
Madiu 3: viv
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2003, Wycliffe Bible Translators, Inc. All rights reserved.