MWAMBĨLĨLYO 1
1
Kũtw’ĩkĩthw’a kwa nthĩ na kwa mũndũ
1Mwambĩlĩlyonĩ Ngai nĩwatw’ĩkĩthisye matu na nthĩ. #Yovu 38.4–7; Isa 42.5; 45.18; Yoa 1.3; Ako 1.16; Aevl 1.10; 11.3; Ũvu 4.11. 2Na nthĩ yaĩ ntheĩ na ndĩaĩ kĩndũ; na kĩvindu kyaĩ ĩũlũ wa ĩ kyũngũ: na Veva wa Ngai avw’ĩkĩte ĩũlũ wa manzĩ. #Yel 4.23. 3Na Ngai asya, Nĩkwĩthĩwe kyeni; na kweethĩwa kyeni. #2 Ako 4.6. 4Na Ngai oona kyeni, atĩ nĩ kĩseo: na Ngai avathan’ya kye ni na kĩvindu. 5Na Ngai eeta kyeni Mũthenya, na kĩvindu akĩta Ũtukũ. Na kweethĩwa wĩoo na kweethĩwa kĩoko, mũthenya ũmwe.
6Na Ngai asya, Nĩkwĩthĩwe yayaya katĩ wa manzĩ, nayo yĩvathan’ye manzĩ na manzĩ. #Yovu 37.18; Sav 33.6; Yel 10.12. 7Na Ngai aseũvya yayaya, na avathan’ya manzĩ ala maĩ ĩtheo wa yayaya na manzĩ ala maĩ ĩũlũ wa yayaya: na kweethĩwa ũu. 8Na Ngai eeta yayaya Ĩtu. Na kweethĩwa wĩoo na kweethĩwa kĩoko, mũthenya wa kelĩ.
9Na Ngai asya, Manzĩ ala me ĩtheo wa matu nĩmasyokeanĩe vamwe, na nthĩ nyũmũ yumĩle: na kweethĩwa ũu. #Yovu 38.8,10,11; Sav 33.7; 95.5; Yel 5.22. 10Na Ngai eeta mũthanga mũmũ Nthĩ; na kũsyokeanĩa kwa manzĩ akwĩta Maũkanga: na Ngai oona nĩ ũseo. 11Na Ngai asya, Nthĩ nĩmesye nyeki, nyũnyi ikĩsyaa mbeũ, na mĩtĩ yĩ mosyao ĩkĩsyaa mosyao o mũthemba wayo, ala me na mbeũ syamo nthĩnĩ wamo, ĩũlũ wa nthĩ: na kweethĩwa ũu. #Sav 104.14. 12Na nthĩ yamesya nyeki, nyũnyi ikĩsyaa mbeũ o mũthemba wasyo, na mĩtĩ ĩkĩsyaa mosyao, ala me na mbeũ syamo o mũthemba wayo nthĩnĩ wamo: na Ngai oona nĩ ũseo. 13Na kweethĩwa wĩoo na kweethĩwa kĩoko, mũthenya wa katatũ.
14Na Ngai asya, Nĩkwĩthĩwe syeni yayayanĩ ya ĩtu ivathanasye mũthenya na ũtukũ; na nĩsyĩthĩwe mawonan’yo, na mavinda, na matukũ na myaka: #Sav 104.19; Yel 10.2; Yoe 2.30,31; Mt 24.29; Lk 21.25. 15nasyo syĩthĩwe syeni yayayanĩ ya ĩtu sya kũete kyeni ĩũlũ wa nthĩ: na kweethĩwa ũu. 16Na Ngai aseũvya syeni ilĩ nene; kyeni kĩnene kya kũsumbĩka mũthenya, na kyeni kĩnini kya kũsumbĩka ũtukũ: o na ndata nasyo. #Kũt 4.19; Sav 136.7–9. 17Na Ngai asia yayayanĩ ya ĩtu sya kũete kyeni ĩũlũ wa nthĩ, 18na kũsumbĩka mũthenya na ũtukũ, na kũvathan’ya kyeni na kĩvindu: na Ngai oona nĩ ũseo. #Yel 31.35. 19Na kweethĩwa wĩoo na kweethĩwa kĩoko, mũthenya wa kana.
20Na Ngai asya, Manzĩ nĩmausũwe nĩ wingĩ wa nyamũ syĩ thayũ, na nyũnyi iũlũkae ĩũlũ wa nthĩ yayayanĩ. 21Na Ngai atw’ĩkĩthya mĩkũnga mĩnene, na syũmbe syonthe syĩ thayũ ila ithambĩaa, ila syusũĩte manzĩnĩ, o mũthemba wasyo, na kĩla nyũnyi ĩ nthwau o mũthemba wayo: na Ngai oona nĩ ũseo. #Sav 104.25,26. 22Na Ngai aiathima, akyasya, Ongelekai, mwingĩve, musũe manzĩ ma maũkanga, na nyũnyi singĩve kũũ nthĩ. 23Na kweethĩwa wĩoo na kweethĩwa kĩoko, mũthenya wa katano.
24Na Ngai asya, Nthĩ nĩyumye syũmbe syĩ thayũ o mũthemba wasyo, indo, na tũsamũ tũla tũtambũkaa, na nyamũ sya kũũ nthĩ o mũthemba wasyo: na kweethĩwa ũu. 25Na Ngai oombie nyamũ sya kũũ nthĩ o mũthemba wasyo, na indo o mũthemba wasyo, na kĩla kĩndũ kĩtambũkaa ĩũlũ wa nthĩ o mũthemba wakyo: na Ngai oona nĩ ũseo. 26Na Ngai asya, Nĩtũmbe mũndũ na mũvw’ano witũ, na kĩtutya kitũ: na methĩwe na ũsumbĩko ĩũlũ wa makũyũ ma ũkanganĩ, na ĩũlũ wa nyũnyi sya yayaya, na ĩũlũ wa indo, na ĩũlũ wa nthĩ yonthe, na ĩũlũ wa kĩla kasamũ katambũkaa, kala katambũkaa ĩũlũ wa nthĩ. #Mwa 3.22; 5.1; 9.6; 11.7; Sav 8.6–8; Isa 6.8; Yak 3.7,9. 27Na Ngaĩ atw’ĩkĩthya mũndũ na mũvw’ano wake, na mũvw’ano wa Ngai amũtw’ĩkĩthya; mũũme na mũka amatw’ĩkĩthya. #Mal 2.14,15; Mt 19.4; Mko 10.6; 1 Ako 11.7; Aev 4.24; Ako 3.10. 28Na Ngai amaathima: na Ngai amea, Ongelekai, mwingĩve, mu-sũsye nthĩ, na kũmĩkĩlya vinya; na ĩthĩ-wai na ũsumbĩko ĩũlũ wa makũyũ ma ũkanga, na ĩũlũ wa nyũnyi sya yayaya, na ĩũlũ wa kĩla kĩndũ kĩ thayũ kĩendaa ĩũlũ wa nthĩ. #Mwa 9.1,7; Ali 26.9; 1 Tim 4.3. 29Na Ngai asya, Sisya, nĩnĩmũnengete kĩla nyũnyi ĩsyaaa mbeũ, yĩ ĩũlũ wa nthĩ yonthe, na kĩla mũtĩ wĩ ũsyao wa mũtĩ ũsyaaa mbeũ; ũkeethĩwa wĩ lĩu kwenyu: #Yovu 36.31; Sav 104.14,15; 145.15,16. 30na kĩla nyamũ ya kũũ nthĩ, na kĩla nyũnyi ya yayaya, na kĩla kĩndũ kĩtambũkaa ĩũlũ wa nthĩ, kĩla kĩ thayũ, nĩninengete nyũnyi nziũ syonthe sya ũya: na kweethĩwa ũu. #Sav 104.27,28; 147.9. 31Na Ngai oona kĩla kĩndũ wombie, na, sisya, kyaĩ kĩseo mũno. Na kweethĩwa wĩoo na kweethĩwa kĩoko, mũthenya wa thanthatũ. #Sav 104.24; 1 Tim 4.4.
Atualmente Selecionado:
MWAMBĨLĨLYO 1: Mbivlia
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956