Shiyanso 17
17
Ilitaawa lya Abulaamu liseetulwa
1UAbulaamu pina akhandi ana maakha mashumi gonja ni gonja, uMutwa uNguluvi wámutwiwushilaga, wámujovela wáaja, “One yuune Nguluvi Munya Ngufu Soona.#17:1 Nguluvi Munya Ngufu Soona: Amaswi aga kwa Shihebulaniya giganula ilitaawa ilya Nguluvi ilya Eli Shadayi. Yinatilaga amamanyiso gangu na kiiva mugolofu, 2kwa kiiva one nisifinje ulufingo lwangu noowe, ndeeno nisivayoolose avanaakho.”
3UAbulaamu wáfugama pansi, baheene uNguluvi wámujovela wáaja, 4“Puliisa, ulu lulwene lufingo lwangu noowe, nisikugahe uve daada wa fimyanja finshi mandu. 5Khanji, nisiliseetule ilitaawa lyakho. Kiyansisa iminsiyaano usiiva witambulwa Abulaamu,#17:5 Abulaamu: Litaawa lya Shihebulaniya. Uluganulo lwakwe, daada yuna atunwilwe. leelo usitambulwe Abulahamu,#17:5 Abulahamu: Litaawa lya Shihebulaniya. Uluganulo lwakwe, daada wa fikholo finshi. kwa kiiva nakugaha uve daada wa vaanu va nyi nyinshi. 6Nisikuyoolose mandu, ishisafi shaakho shisiyalaalile mu nyi soona, khanji avatwa vakhava viihuma ku vanaakho.
7“Ulufingo lwangu ulu noowe na vanaakho lwa shiluta, nikhaluyinatila. Khanji nisiive Nguluvi waakho, na vanaakho ni fisafi fyona kwa nsiku soona. 8Inyi yoona iyi iya Kanaani yina wiikhala ngaja muhensa, nikhakupeela owe nu lusawo lwakho ni fisafi fyanave, yive wusi waanave nsiku soona. One nisiive Nguluvi waanave nsiku soona.”
9UNguluvi wáava apikimutaviilila uAbulahamu iija, “Uyinatilaje wunofu ulufingo lwangu, owe, avanaakho ni shisafi sha vanaakho. 10-11Lino, shila mugoosi uwa kunyeenyu mbakha adumulwe ulunsiita. Ulu lulwene luwonensa ulufingo lwangu kunyeenyu. 12Avaana veenyu woona va shigoosi vina vafisiise nsiku munaana kihuma vasawe, muvayinjisaaje ijando. Khanji avavanda vina vasaviilwe kukhaaya yaakho, hata vala vina muvagulile kihuma ku nyi inyensa, woope muvayinjisaaje ijando. 13Shila muunu mugoosi uwa mukhaaya yaakho ayinjisiwaajwe ijando! Kiyinjisiwa ijando kusiwonense ulufingo lwangu mu mavili geenyu insiku soona. 14Shila mugoosi yuna asiyinjisiwa ijando, uyo asiiva munyaayumo wa vaanu vangu, ndeeno iiva wálusala ulufingo lwangu.”
UAbulahamu ijovelwa kiija uSalaayi akhasava umwana
15UNguluvi wáyitenekha kimujova uAbulahamu wáaja, “Kiyansisa iminsiyaano umudala waakho usimushemeela Salaayi khanji, usiive ukimushemeela Saala.#17:15 Salaayi nu Saala: Aga mataawa ga Shihebulaniya. Uluganulo lwakwe, mwali wa shitwa. 16One nisimuyimiilile, khanji asikusavile umwana wa shigoosi. Nisimuyimiilile ave maayi wa fikholo finshi, khanji avatwa va vaanu vakhava viihuma kunyaakwe.”
17Baheene uAbulahamu wágubama pansi, wáahekha ikiyilogolela mwene iija, “Vayaa! Aasi, yingava wuli umuunu mugogolo umunya maakha ligana, kisava umwana? USaala umushimaayi umugogolo uwa maakha mashumi gonja, akhasava umwana wuli?” 18Apo uAbulahamu wámujovela uNguluvi wáaja, “Yaali yiveesaje umuyimiilile uIshimayeli ave muhalaaji wangu.”
19Leelo uNguluvi wámujovela wáaja, “Ndaali ndeeno, uSaala umudala waakho akhakusavila umwana wa shigoosi, ilitaawa lyakwe ukhamutambulila Isaaka.#17:19 Isaaka: Litaawa lya Shihebulaniya. Uluganulo lwakwe, luhekho. One nisilukwise ulufingo lwangu wunofu nu mwene nu lusawo lwakwe. Ulufingo ulu lusiive lwa shiluta. 20Ulubali lwa Ishimayeli, ishiinu shina walomba, napulikha. Lino puliisa, nisimuyimiilile, nisiigahe ave ni shisafi shikhome, nisimugahe ave na vaana vinshi. Khanji akhava daada wa vatwa ishumi na vavili na akhava shikholo shikhome. 21Leelo, ulufingo lwangu nikhalugaha nu Isaaka yuna akhasawa nu Saala, uluhaavi ngaja ulu, umwakha guna gwiyinsa.” 22UNguluvi wáganile kimala kilogola na woope, wámulekha, wáwuukha.
23Ilijuva lilila, uAbulahamu wávawunganiaga avagoosi woona ava mukhaaya yaakwe, umwanaakwe uIshimayeli, avavanda woona va shigoosi vina vasawaagwa kukhaaya yaakwe, na vina vagulwagwa kwa hela saakwe, wávatwala ku jando ngaja shina uNguluvi akhandi alajiise. 24-25UAbulahamu akhandi ana maakha mashumi gonja ni gonja, umwanaakwe uIshimayeli akhandi afisiise maakha ishumi na gatatu pina vatwalwagwa ku jando. 26UAbulahamu nu mwanaakwe uIshimayeli, vakhayinjisiiwe ijando lijuva limo. 27Hata avagoosi woona va nanda yaakwe, avavanda vina vasawaagwa kukhaaya yaakwe na vina vagulwaga kwa hela saakwe, vakhayinjisiiwe ijando lumo woope.
Atualmente Selecionado:
Shiyanso 17: Shisangu
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2020, Wycliffe Bible Translators, Inc. All rights reserved.