Yaɓooda 32
32
1Laban ɓai kɨsĩ ritit, kui nganɨn kɨdɨngã kɨ kɨdẽ, kɨ ront na njang dɔd. Kamla Laban nyad, na tel kɨ ɓe lon gog.
Jakob ɗa ron kad ndɔd Esaw
2Jakob so ɗobo aw, na malaikag lo Luwah ndɔdɨna.
3Lon Jakob ood ye, el an: Ĩgɨn non ĩn koosɨg lo Luwah Ndah tɔ lon non an: I Mahanaim ad i ɓut koosɨg joo. 4Jakob la ngombangkɨlag kete nont ro ngonkõn Esawt dɔningt kɨ Seir kɨ kam dɔning Edomt.
5Ndad mber an: A elɨn ngeem Esaw ta 'nten: Titbe kel ɓer loi Jakob: M'hɔlondɨ ro Labant, na m'ndɨ tit kɔk mbã tajigtne. 6M'aw kɨ mangg kɨ korrog, kɨ batg, kɨ ɓerg kɨdɨngãg kɨ kɨdẽg, na m'la kɨla ro ngeem Esawt kad kɨ m'ngan maj takumat. 7Ngombangkɨlag telɨn kɨ ro Jakobt gog, elɨna anan: J'aw kɨ ngah ngonkõi Esaw, na a la tai kɨ deg ɓusɔɔ nat sia.
8Ɓool tɔl Jakob sɔkɨr ad kama gang man. Keg deg'n ĩn nat sia kɨ batg kɨ mangg kɨ lukumg ɓut joo 9El an: Ĩla Esaw ɗe nuj ɓut kɨkɨɗa kɔ a ne, ɓut mad kɨ nãi tee jiat. 10Kamla Jakob el an: Luwah lo bɔwɨm Abraham, Luwah lo bɔwɨm Isaak, Bɨraɓe, ĩn elɨm an: I tel kɨ dɔningt loi kɨ ro noojigt gog, na m'a m'ɗa sei maj.
11M'asɨ al kad m'ngaa kamkẽ tube kɨ nyaɗakɨro tube'n ɔj ɓer loi kɨta m'gang bah Jurdẽ kɨ gɔlkɔp jimt koon, na tajigla m'tel m'ɗe kɨ ɓut joo. 12M'kɔi kɨ ug ɔrrɨm ji ngonkomt, ji Esawt kɨta m'ɓoola, na ɓeta ɗe tɔlɨm kɨ kõnganɨmg kɨ nganɨmg nat. 13Na el an: Rota a i ɗa sem maj, na a ad kohm bɨla tit ngar kɨ bahbot be, kɨ dum tɨda kɨta koosɨd kɨngãi. 14Lot'n non la Jakob to ɓit ndɔ ye, na kɔt kadkari ku dãgt lon kad n'ad ngonkõn Esaw.
15Ad i kõ bĩãg ɓujoo, kɨ bal bĩãg dɔjoo, kɨ kõ batg ɓujoo, kɨ bal batg dɔjoo, 16kɨ kõ lukumg dɔmɨta nat kɨ ngandg kɨ ngékilmba, kɨ kõ mangg dɔsɔɔ, kɨ bɔw mangg kɨlah, kɨ kõ korrog dɔjoo, kɨ bɔw korrog kɨlah. 17Ad ɓerg lon de kɨɗen ɓut loa tadang, na el ɓerg lon kɨ tɔin kete nont, kɨ nyan lo mbɨna ɓutgt kad ɓutg ĩn dang dang. 18Nda mber ɓer kɨdasa an: Lon ngonkom Esaw a ndɔdi, na a ndɨjei an: Ĩ de lo nõ a? I ndɨ aw ɗah a? Ɓut kɨnõit i lo nõ a? 19A ne, a i tur an: I lo ɓer loi Jakob, i kadkari'n lan kɨ ro ngeem Esawt. Oo ĩ kɨɓe ndɨ ɗe gojt nõ 20Nda mber kɨ kɨɗan non ber kɨkõjoo kɨ kɨkõmɨta, kɨ deg tube'n a ndulon go ɓutg'n non an: A elɨn Esaw titbe lon a i ndɔdɨna. 21A i elɨna anan: Oo ɓer loi Jakob, Ĩ kɨɓe, ndɨ ɗe gojt. Kɨtɔ el kamɨnt an: M'a mad kama sɔl kɨ nyasɔlkam'n m'lan kete nomt, kamla m'a m'oo takuma, ke maja a hɔm kɨ ront kɨ kam kɨsokɨber. 22Kadkari'n non aw kete nõat, na Jakob kɨɓe nãi gog ndɔɔ nõ londɨnt.
Jakob ɗɔɔ mɨlla kɨ malaika
23Jakob ɓai ndɔɔ nõ, ɔi nẽng joo kɨ ɓerg lon kɨdẽ joo kɨ nganɨn kɨdɨngã kɨlah gidaikɨɗa, na udɨn man Jabok tɔin.
Jakob ɗɔɔ kɨ Luwah
24Ɔid ad gangɨn man'n non nat kɨ nyag lon tube. 25Na Jakob nãi gog kɨ kɨɗanbe, na de mad ɗɔɔ mɨlla sia mbã bijalo ɓai wɔ.
26Lon oo kad n'asɨ tetɗɔɔ Jakob al ye, de'n non nda Jakob dɔ goyat ad goya ɔrr ta nat, lon ɗa ɗɔɔn sia mɨlla. 27Kamla de'n non ela an: I nyam ad m'aw kɨta bijalo ndɨ ɓai. Na Jakob tur an: M'a M'nyai mad aw al, na i njang dɔm kamtã. 28De'n non ndɨjea an: Tɔi i nõ a? Tur an: Jakob. 29Kamla ela an: A kunɨn tɔi Jakob al ta, na Israel tã, kɨta i ɗɔɔ kɨ Luwah ho kɨ deg ho, na i tetɗɔɔ. 30Jakob ndɨjea an: M'kɔi kɨ elɨm tɔi Tur an: Kɨtɔɗi i ndɨjen tɔm a? De'n non njang dɔa loat'n non. 31Jakob ndah tɔ lon non Takum Luwah, kɨta an: M'oo Luwah kum kɨ kum, na mĩ kɨ dɔm dõ ɓaitɔ. 32Kàd ba lon ndɨ tɔi lo kɨ Peniel, na a tuso moot dɔgoint. 33Kɨtɔ 'nten mbã ɓone Israelag a san tal dã kɨ bɨngt al kɨta nda Jakob bɨngat dɔkur goyat.
Atualmente Selecionado:
Yaɓooda 32: MlL
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Mbai Bible Revision © Bible Society of Chad, 2015.