Yohane 21
21
Mtqita 7 Tnugsaan ka Yesu
1Bobo na nii de mtqita dungal tnugsaan na rcilung Tiberias hiya ka Yesu. So nii ka tnqita na dheya. 2Mtheyaq dheya ka Simon Petros, Tomas kesun Tidumos, Natanael seediq Gana pneyah Galil, 2 laqi Cebeday ma 2 dungal tnugsaan na. 3Rmengo dheya ka Simon Petros: “Maha ku pkadi qcurux.” Rmengo heya ka dheya: “Mpsuupu miyan sunan mosa uri.” Kiya de mosa nganguc duma paapa asu. Kiya de ini tdiyal ani maanu ka 1 rabi ciida. 4Hani lmedax ka karac de mheyu siyo rcilung hiya ka Yesu. Kiya de tnugsaan na we ini daha klai Yesu ka heya. 5Rmengo dheya ka Yesu: “Lqlaqi, niqan uqun namu ho?” Cmiyuk heya ka dheya: “Uka.” 6Rmengo dheya ka Yesu: “Posa narac asu namu ka kadi, kiya de maha namu maangal da.” Kiya de wada daha psaun ka kadi de uka daha kklaan hmeguc baro, ado kneegu ka qcurux. 7Rmengo ka Petros sgaalu Yesu: “Bukung wa!” Ciida, ini plukus ka Simon Petros ma mnbahang sa Bukung de asi hilo lukus pbragun ma pstaril rcilung. 8Duma tnugsaan na we blebil kadi ga stenge qcurux paapa asu biciq. Ado ga daling rcilung ka dheya, yaa 2'00 sese bbaro qnthyaqan. 9Mntaril ka dheya de taan daha ka bagah ga puniq ma ga bobo hiya ka qcurux ma pang uri. 10Rmengo dheya ka Yesu: “Desi tikuh qcurux nangal namu saya.” 11Mosa asu baro ka Simon Petros ma bbilun na ssiyo ka kadi ga stenge egu ba qcurux paru. 153 ka kana qcurux. Ani so nii kneegu we ini smgaliq ka kadi. 12Rmengo dheya ka Yesu: “Aguh mekan uqun mgrebu.” Ckceka tnugsaan we uka ani 1 niqan pahung rmengo: “Ima su ka isu?” Ado klaun daha Bukung ka heya. 13Meyah ka Yesu ma mege pang dheya. Kesun na mege dheya ka qcurux uri. 14Bobo wada pkdusun peeyah hnqilan ka Yesu de mn3 nii ka mtqita tnugsaan na da.
Mn3 Rmengo Petros
15Mnekan mgrebu de smiling Petros ka Yesu: “Simon, laqi Yohane, mgkala su kana nii gmaalu kenan ho?” Rmengo heya ka Petros: “Bukung! Un. Gmaalu ku sunan we ida su klaun.” Rmengo heya ka Yesu, “Tbugi ku hiya ka wawa miric mu.” 16Mn2 smiling heya ka Yesu: “Simon, laqi Yohane, ya su gmaalu kenan ho?” Rmengo heya ka Petros: “Bukung! Un. Gmaalu ku sunan we ida su klaun.” Rmengo ka Yesu: “Tbugi ku hiya ka miric mu.” 17Mn3 smiling heya ka Yesu: “Simon, laqi Yohane, ya su gmaalu kenan ho?” Ado mn3 rmengo heya ka Yesu: “Gmaalu su kenan ho?” Naqah kuxul na ka Petros. Kiya de rngagan na ka Yesu: “Bukung! Klaun su ka kana ani maanu. Gmaalu ku sunan we ida su klaun.” Rmengo ka Yesu: “Tbugi ku hiya ka miric mu. 18Bale ba rngage su mu. Riso su han we hmabik su nanak ma pooda naq lnglungan su mkkesa ani inu. Kiya de rudan su de mphkero su baga ma seediq ka mhabik sunan ma desun su na ini su kmsai.” 19So nii rnengo na ka Yesu we gisu tmiyu mphuwa mesa pkledax Utux Baro hhuqil na ka Petros. Rmnengo kari nii de rmengo heya ka Yesu: “Snegul kenan!”
Yesu ma Tnugsaan Sgaalu Na
20Mspgeriq heyi na ka Petros de taan na ga smnegul heya ka 1 tnugsaan sgaalu Yesu. Heya we kiya ka sndahar smdaling berah Yesu pnuqan hnpure bbiyan ciida ma rmnengo: “Bukung! Ima ka mbaruy sunan?” 21Taan Petros ka heya de rngagan na ka Yesu: “Bukung! Hmuwa ka seediq nii ho?” 22Rmengo heya ka Yesu: “Heya we nasi muudus nina betaq ku meyah ciida, maanu ka pnugluban na isu ho? Isu we snegul kenan!” 23Kiya de kari na nii we gaga mkgarang ckceka seediq smnegul Yesu ma uxe mphuqil ka tnugsaan kiya mesa. Kiya de ini kesa uxe mphuqil ka heya, gisu rmengo Petros: “Heya we nasi muudus nina betaq ku meyah ciida, maanu ka pnugluban na isu ho?”
24Pgkela mnatis so nii we kiya ka tnugsaan nii. Bale ba ka pnugkela na we klaun nami.
25Egu nina ka ndaan Yesu nana. Nasi mu spatis kana ka knkingal de naka uka sskuwan kana bobo dxeral nii ka pnatis patis nii mesa ku lmngelung.
Atualmente Selecionado:
Yohane 21: Stgdaya
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
The Bible Society in Taiwan, 2020
© 台灣聖經公會版權所有，2020