Svun Juan 4
4
Ja' li' yaloj ti ilo'ilaj xchi'uc jun jsamariail ants ti Jesuse
1Ti jfariseoetique iya'i ti más xa chp'ol yajchanc'optac ti Jesuse, xchi'uc ti más xa ep iyac' ich'vo' chac c'u cha'al ti Juane 2(ac'u mi ta melele, ma'uc iyac' ich'vo' ti Jesuse, ja' iyaq'uic ti yajchanc'optaque). 3C'alal iya'i ti Jesuse, iloc' ech'el ta Judea, icha'sut ech'el noxtoc ta Galilea.
4Ti c'alal ibat ta Galileae, persa tey ch-ech' ta yosilal Samaria. 5Ic'ot ta jun jteclum, Sicar sbi, tey ta yosilal Samaria, nopol xil sba xchi'uc srasyon osil ti Josee ti i'ac'bat comel yu'un ti ánima stote, ja' ti Jacove. 6Oy tey jun pozo, ja' yac'oj ta joq'uel ti Jacove. Ti Jesuse tey ichoti ta ti' pozo yu'un ilub ta xanbal. Po'ot xa'ox ol c'ac'al. 7Ti yajchanc'optaque ja' o batemic ta jteclum yu'un ba smantal sve'elic. 8Ja' o tey ic'ot jun jsamariail ants yo' bu li pozoe, yu'un tal spul ya'al, ti Jesuse ja' yech iyalbe chac li'i:
―Ac'bon jset'uc ava'al ―xut. 9Ti Jurioetique xchi'uc ti jsamariaetique muc'bu lec xil sbaic, Ti antse ja' yech itac'av chac li'i:
―¿C'u yu'un ti chac'anbon vo'e? Yu'un li vo'ote Jurioot, yan li vo'one jsamariaon ―xi.
10Itac'av ti Jesuse:
―Ti ana'ojuc ti c'usi chac' ti Rioxe xchi'uc ti much'u la sc'anbe li vo'e, vo'ot ac'anbe ti yechuque, ja' la yac'be li vo' ti chacuxi o ta sbatel osil ti yechuque ―xut.
11Itac'av li antse:
—Totic, mu c'u xapul o loq'uel li vo'e yu'un toj nat li pozoe: ¿Bu ma li vo' ti chavac'bon cuch' ti chicuxi o ta sbatel ta osil chavale? 12Ti jmuc'tatotic Jacove ja' liyac'boticotic li pozo li'i, ja' iyuch' xchi'uc ti xch'amaltaque, xchi'uc ti sts'unubtaque. ¿Mi vo'ot xa más tsots avabtel chac c'u cha'al ti Jacobe? ―Xi ti antse.
13Itac'av ti Jesuse:
—Scotol ti much'utic chuch'ic li vo' li'i ta to xtaquij sti'ic; 14Yan ti much'utic chuch'ic li vo' chcaq'ue, mu xa bu ta xtaquij sti'ic. Li vo' chcaq'ue co'ol xchi'uc ninabvo' ti bu mu sna' x'ule, ti tey xch'olch'on oe, ja' chcuxiic o ta sbatel osil ―xi ti Jesuse.
15―Itac'av ti antse:
—Totic, ac'bon li vo' chavale yo' mu xa xtaquij o jti'e, yo' mu xa xtal jpul o ca'al li' ta pozoe ―xi.
16Itac'av ti Jesuse:
—Batan, ba ic'o tal la malale xa cha'sutal li'toe ―xut.
17Ti antse ja' yech itac'av chac li'i:
—Ch'abal jmalal ―xi.
Ti Jesuse xi iyalbee:
—Yech xaval ava'uc ti ch'abal amalale; 18yu'un svo'va'al xa amalal, ti much'u avic'oj lavie ma'uc amalal. Melel ti c'usi avale ―xut.
19Ti c'alal iya'i yech ti antse, ja' yech iyal chac li'i:
—Totic, iquil xa ti j'alc'opote. 20Ti ba'yi jtot jme'ticotique, ti jsamariaetique li' iyich'ic ta muc' Riox li' ta vitse; yan li vo'oxuc ti Juriooxuque, chavalic ti ta Jerusalen tsc'an quichtic ta muc' ti Rioxe ―xi ti antse.
21Itac'av ti Jesuse:
—Ants, ch'uno ti c'usi chacalbee, ta sta yora ti mu xa persauc li' chavich'ic ta muc' Jtotic Riox ta vitse, mi ja'uc ta Jerusalene. 22Li vo'oxuque mu xa na'ic ti much'u chavich'ic ta muq'ue; yan li vo'oticotique jna'ojticotic ti much'u chquich'ticotic ta muq'ue, li coltaele tey chloc' tal ta stojol li jurioetique. 23Pero ta xa xc'ot yora, xchi'uc ja' xa yorail lavie, ti much'utic chich'ic ta muc' ta melel ti jtotic Rioxe, ta xich'ic ta muc' ta melel chac c'ucha'al tsc'an ti Espíritu yu'un ti Rioxe. Ti jtotic Rioxe ja' tsc'an ti ja yech ac'u spasic ti much'utic chich'ic ta muq'ue. 24Ti Rioxe ch'abal sbec'tal, ti much'utic ta xich'ic ta muq'ue, ja' tsc'an ti ta melel ja yech tspasic chac c'u cha'al tsc'an stuc ti Espíritu yu'un ti Rioxe. ―Xut ants ti Jesuse.
25Ti antse ja' yech iyal chac li'i:
—Jna'oj ti chtal ti much'u chtaque tal yu'un ti Rioxe (ja' ti Cristoe); ti c'alal xtale ja' chiyalboticotic smelol scotol. ―Xi.
26Ti Jesuse ja' yech iyalbe chac li'i:
―Li chaval taje, vo'on xa ti li' chilo'ilajotique ―xut.
27Ja'o xa ic'ot ti yajchanc'optaque, xch'ayet xa o yo'onic yolel ti chlo'ilaj xchi'uc jun ants ti Jesuse. Pero mi jun muc' much'u isjac' c'usi tsc'an xchi'uc c'usi ti yolel tslo'iltaique. 28Ti antse tey iscomtsan ta pozo ti sq'uibe, isut ech'el ta yutil jteclum, c'ot yalbe ti crixchanoetique:
29―La' q'uelavilic oy jun vinic ti liyalbe scotol ti c'usitic jpasoje. ¿Mi mu ja'uc xa na'ic ti much'u sc'oplal chtaque tal yu'un ti Rioxe? ―Xi c'otel.
30Ti crixchanoetic ta jteclume tal sq'uelic ta ora ti Jesuse. 31C'alal mu to'ox xulique, li yajchanc'optaque isc'anbeic vocol ti Jesuse:
—Jchanubtasvanej, ve'an jts'ujuc ―xutic.
32Pero ti Jesuse ja' yech itac'av chac li'i:
—Li vo'one oy jve'el, ti mu xana'ic c'usie ―x'utatic.
33Li yajchanc'optaque xalxalbe xa sbaic, ¿Min van oy much'u ay ac'bonuc sve'el? ―Xut sbaic.
34Ti Jesuse ja' yech iyal chac li'i:
―Li jve'ele ja' ti ta jpas c'usi tsc'an ti much'u li stac tale xchi'uc ti ta jtsutsesbe li yabtele. 35Li vo'oxuque ja' yech chavalic chac li'i: “Sc'anto chanib u chich' loq'uel li trigoe”; —xachiic, pero li vo'one chacalbeic ti ac'u avaq'uic cuenta li trigoaltique, yijic xa, lec xa ta loq'uel. 36Li jloc' trigoetique ta xich' stojolic, ti c'uyepal ta sta ta tsobele, ta xcuxi ta sbatel osil, ja' no'ox yech ti much'u ists'une xchi'uc ti much'u tsloq'ue co'ol xa jun yo'onic. 37Ja' chac c'u cha'al oy yech xalique, “Yan o much'u tsts'un, yan o much'u tsloc'.” —Xichiotic. 38Vo'on cha jtaquic ech'el ta sloq'uel ti bu muc' bu avac'oj avocolique; yan o ti much'u i'abtejique ti yac'oj svocolique, li vo'oxuque naca xa no'ox cha tuch'beic sat li yabtelique. ―X'utatic yu'un ti Jesuse.
39Ep jnaclejetic tey ta jteclum Samariae, ixch'unic ti ja' ti much'u tacbil tal yu'un ti Rioxe, ja' ti c'alal xi iyal ti antse: «Li yalbe scotol ti c'usitic jpasoje.» —Ti xie 40Ti c'alal ic'otic ti jsamariaetique, isc'anbeic vocol ti Jesuse ti ac'u to pajuc teyo'e. Ti Jesuse tey ipaj chib c'ac'al, 41ep to much'utic ixch'unic ti c'alal iya'iic ti c'usi iyal stuc ti Jesuse.
42Li antse ja' yech i'albat yu'un xchi'iltac chac li'i: «Lavie ijch'unticotic xa, ma'uc no'ox ijch'unticotic o ti c'u yepal avalboticotique, yu'un ica'i jtucticotic ti c'usitic iyale, lavi une jna'ojticotic xa ti ja' ti much'u tal scolta li crixchanoetic ta sjunlej balamile.» ―Xutic ti antse.
Ja' li' yaloj ti i'ech' xchamel screm ti jmeltsanejc'ope
43C'alal ilaj ti chib c'ac'ale, ti Jesuse iloc' ech'el ta yosilal Samaria, tey ibat ta Galilea. 44Ja' c'ucha'al yaloj ono'ox stuque, li jun j'alc'ope mu x'ich'e ta muc' ta slumal stuc. —Xi ono'ox. 45Ti c'alal ic'ot ta Galileae, lec ichbil ta muc' ic'ot yu'unic li jnaclejetic teyo'e, yu'un ti c'alal i'ayic ta q'uin coltael tey ta Jerusalene, iyilic scotol ti c'usitic ispas tey ta q'uine.
46Ti Jesuse isut ech'el Caná tey ta Galilea yo' bu ti isc'atajes ta ya'lel uva ti vo'e. Tey nacal jun xchi'il ta abtel ti reye, oy jun screm ip, tey ta Capernaum. 47C'alal iya'i ti xchi'il ta abtel reye ti tey xa ic'ot ta Galilea ti Jesuse, ba sc'opon, isc'anbe vocol ti ac'u batuc ta snae, ti ac'u ba scoltabel li screm ti yu'un xa ch-chame. 48Itac'bat yu'un ti Jesuse:
—Li vo'oxuque mu xa ch'unic mi mu xavilic jlequilal jyu'elale ―x'utat.
49Pero li xchi'il ta abtel reye, xi iyale:
—Cajval, la' ta ora yo'to cuxul li jcreme ―xi.
50Ti Jesuse xi istac'bee:
—Sutan xa ech'el ta anae; la creme cuxul ―x'utat.
Ti vinique ixch'un ti c'usi i'albat yu'un ti Jesuse, isut ta sna. 51C'alal po'ot xa'ox xc'ot ta snae, tal snupel ta be yu'un smozotac, ja' yech i'albat chac li'i:
―Lec xa lacreme cuxul muc'bu icham ―x'utat.
52Li vinique isjac' jayib ora ilecub li screme, li mozoiletique ja' yech iyalic chac li'i:
―Volje ta jun ora xmal itup' li sc'ac'al ―xiic.
53Ti vinique iyul ta sjol ti yeche ora i'albat yu'un ti Jesuse: «la creme cuxul»; ti x'utee, li vinique xchi'uc ti c'uyepal teyic ta snae, ixch'un scotolic ti ja' jcoltavanej ti Jesuse.
54Li'i ja xa xcha' ech'elal iyac' iluc slequilal syu'elal ta Galileae ti Jesuse, ti c'alal isutal ta Judeae.
Atualmente Selecionado:
Svun Juan 4: LeqAC
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Sociedad Biblica de Mexico AC