Luke 1
1
1ဗေ့လဗင်လေးစား သော်ဖိလု လောကအေနီးနို ဖြားဇာ့ဘာ့ယို့ဗွို့မဲ့ အံ့ဖွယ်အမှုအရာနွို့နု့ လို့ဘို့ဘက်နွို့နား တဲင်းဗွို့ကိုးနွို့နဲ့။ 2ခွို့နွို့နောင်း အစနွို့တွိုန်း ဘာ့ကလုဲင် ဘာ့ရင်သက်သေခွို့ဘို့ဘက်နွို့န ပနောင်ကတမ်းဖြားနွို့ လို့ဘာ့ဟောဖြိုဘာကရီနွို့ကိုးနဲ့။ 3နွို့ခေါင်းအမ်လဖြစ်ပျက်ပို့မျက်မျက်နွိုနို အေစုံစမ်းပို့တိုဂရုတစိုက်ထာ အေ့တဲင်းပွို့စီရင်ခံလိတ်တပို့လည်း အမ်ကလိုလ့်မနသာအေ့။ 4ပွို့နွို့ ဘာ့ကရီအွေဘို့မဲ့ အကြောင်းအရာနွို့နောင်း မှန်ကန်ဟောက်နွို့ အာ့ငန်းအောင် တာ့ပွို့နွို့ နာ့နီးအစဉ်အ့်တွိုန်း တဲင်းဗွို့ကိုးနွို့နဲ့။ 5ဖြိုင်ယုဒနွို့ မန်းကုန်းဟေရုဒ် ချန်တန်းဘာ့အုပ်စိုးနွို့နု့ မာတ်ဘာ့ဟိုမဲ့ ဇာခရိ ပုရောဟိတ် နောင်း ဘာဟက်အဘိယc ပုရောဟိတ်အဖွဲဝင်အာ့်ကွက်ကိုးနဲ့။ ဖြိုလ်းအမ် ဧလိရှဗက်နားလဲဉ်း ဘာ့ဟက်အာရုန် စမျိုးရိုးပုရောဟိတ်နွို့မှ လို့စန်းပိုကိုးနဲ့။ 6ခွို့အဲဉ်ကွက်နောင်း ပညက်တော်ဖြားနွို့နု့ အမှားလာ့ဟို ယို့လွမ်းယော့ကြဘို့နွို ငွမ်းဖြားနွို့နား ကလုဲင်ကြဘို့ လို့ဖြောင့်မက်ကိုးနဲ့။ 7တခို့အမ်နား ကွန်ဖြောက်ကွန်မြအလက်ဟို့ကား။ ခွိုအမ်အမ်ကွပ်နားအရွယ်ခို့အမ်လဲကုမ်းမြဲတွိုခေါင့် ဧလိရှဗက်နားအမ်ဆောင်နိုင်ကားကိုယ်ဝန်ဗာ့ 8စနွို့လဲ ခွို့နွို့နား ကွန်ဖြောက်ကွန်မြဟိုကောဘို့နွို့နဲ့။ ရွားနွို့ပဒေကား ဧလိရှဗက်နောင်း ဗင်နိုင်းကောကွန်ဖြောက်ကွန်မြနွို့ခေါင်း ကွန်ဖြောက်ကွန်မြလက်ထွန်းကားကောနွို့ကိုးနဲ့။ ခွိုအဲဉ်ကွက်နားလဲဉ်း အထက်အရွယ် ထိုးလွန်းတွို့ကြဘို့နားကိုးနဲ့။ 9ထုံတမ်းစဉ်လာပုရောဟိတ်နွို့အတွိုန်း ကောင်ဗိမာန်တော်နွို့ မှု့တိုင်ဘို့ဘက်နွို့မောင်းထွန်လှူနား နိုက်တွို့မဲထာ ဘာရွီးနွို့နား အမ်နွို့ မင်ရွီးခံဟောက်နွို့နဲ့။ 10စနွို့နား ဇာခရိနောင်း မှု့တိုင်မူးတူးဘို့ဘက် တန်းဘာ့ထွန်းလှူချန်နွို့နု့ လို့အများနောင်း ကောင်ဗိမာန်တော်နွို့နု့ အောက်အိုတွို့ထာ ဆုတောင်းကြဘို့နွို့နဲ့။ 11နွို့ခေါင်း ပလွတ်ဗွိုမဲ့ ကနံကလို့gနား မှု့တိုင်မူးတူးဘို့ဘက် ဘာ့ထွန်းလှူမဲ့ ပလ္လင်ဖက်ဒိဒုနွို့နု့ ဇာခရိနား ပလေမဲ့သိုလ်ထာ မုဲင်မနကိုးနဲ့။ 12ဆောင်ရင် ကနံကလို့နွို့ ဇာခရိနား ရရောခရုံးဒိတ်ဒနကိုးနဲ့။ 13ချန်နွို့နု့ ကနံကလို့နား အမ်နွို့ “လခရုံးလရန ဇာခရိ။ ရွားနွို့ပဒေကား မွို့ပါညောင်းဆုတောင်းကရက်နွို့နား ဖြားအွန်တွို။ တာ့ဖြို့လ့်မို့ ဧလိရှဗက်နွို့လဲဉ်း အန်းဗွီးပိုအာလောက်ဟောက်ကွန်ဖြောက်အာ့်ကွက်ကိုး။ မို့နား အမ်နွို့ ယောဟန်နွို့ မင်အာမာတ်ကိုး။ 14အမ်ဆောင့်မွီးယော့ချန်နွို့နောင်း ပွို့နား နာ့နွက်တူးနွို့ လို့တခြားနောင်းလဲဉ်း နွက်တူးလောက်ဟောက်။ 15ကိုယ်တော်နား လငွမ်ဖြားနွို့နား ကလုဲင်လောက်ဟောက်လို့မြတ်ကိုး။ အမ်းနား ဆောင်မားမှ စပျစ်ဝိုင်န ကဒိုနွို့ လငွမ်းကား။ အမ်နောင်း ခါမွီးကော ဗဟိုကောင်ဗစ်မွေးအမ်နွို့တွိုန်း ဉာဏ်အလင်းတော်ဖြားနောင်း အမ်နွို့ အွမ်ခေါင်းလောက်ဟောက်ကညွမ်းနွို့နဲ့။ 16အမ်နား လို့မျိုးအစ္စရေးစာနွိုနု့ ဆိုဗင်တွို့နောင်တသံဝေဂထာ လို့ကလုဲင်အရှင်သခင်ခွို့နွို့ ဖက်ဖြားနွို့နား အ့်လှည့်ဘတ်လောက်ဟောက်။ 17အမ်နောင်း နာ့ပရောဖက်iဧလိယနွို့ အခွင့်အာဏာန တန်ခိုးမောင်းဟိုတွို့ထာ ကလုဲင်လောက်ဟောက်လို့ကု့ငွမ်းဖြား နွို့ကိုးနဲ့။ အမ်နောင်း မိတ်ပါန ကွန်ဖြောက်ကွန်မြအမ် နွက်နှလုံးနွို့ အ့်ညီညွတ်တွို့ထာ လို့ဘာ့နာခံကောနွို့လဲဉ်း ကရီအာလောက်ဟောက်။ စနွို့နား လို့နောင်းလဲဉ်း ဖြားဆောင့်ကြွပိုအချန်နွို့နု့ ကလုဲင်လောက်ဟောက်အဆင်သင့်” နွို့ဖြိုမနနဲ့။ 18နွို့ခေါင်း ဇာခရိနောင်းလဲဉ်း ကနံကလို့နွို့နား “ဘာ့ကလုဲင်ပိုဇာနီးနွို့ အေ့မောင်းငန်းနိုင်းဇာ့မား။ အေ့ဖြိုလ့်မှန်အဲဉ်ကွက်နောင်း ထိုးလွန်းလန်းတွို့” နွို့ဖြိုဘက်မနနဲ့။ 19ချန်နွို့နု့ ကနံကလို့နား အမ်နွို့ “အို့နား ငွမ်းဖြားနွို့ မင်ခစားမဲ့ ဂါဗြေလကိုး။ မယ့်နောင်နွက်တူးမင်္ဂလာကတမ်းကလို့စ်ဇာ့နီးနွို့ တာ့မောင်ပွို့ဟောဖြိုတာ့မို့နွို့ ဖြားနား ပလွတ်ဗွို့ အို့ကိုးနွို့နဲ့။ 20စနွို့နား ပနောင်အို့မို့ယွမ်ကောနွို့နား အဖြစ်အပျက်နီးနွို့ ခါကလုဲင်ကောနွို့တွိုန်း မို့နောင်း ဖြိုနိုင်းကောပနောက်နွို့နား အအောလောက်ဟောက်။ စနွို့နား အို့ဘာဖြိုပနောင်အို့နွို့နား အချန်တလောက်နွို့ ကလုဲင်လောက်ဟောက်” နွို့ဖြိုမနနဲ့။ 21ဇာခရိန ကနံကလို့နွို့နား ခွို့သမ်းဖြိုကျဗို့ပနောင် ကောင်ဗိမာန်တော်နွိုနား ဘာဟိုဖက်ပလန်း လို့ဖုန်ကုန်းနွို့နောင်း ဇာခရိနွို့ စုန့်တွို့ထာ ဟိုကြမဲ့ဘို့နွို့နဲ့။ ခွို့နွို့နောင်း ကောင်ဗိမာန်တော်နွို့ ဇာခရိနား ရွား ကနိုနွို့အောင် ဟိုမနနု့ နွက်တန်တန်န ကလုဲင်မဲ့ကြဘို့ကိုးနဲ့။ 22စနွို့လဲ ဇာခရိဆောင့်လေးပိုဘက်ဖက်ပလန်းချန်နွို့နား ဖြိုနိုင်ကောပနောင်နွို့ခေါင်း တန်ဘာ့ဟိုကောင်ဗိမာန်တော်နွို့နား ဇာခရိနောင်း နိမိတ်လက္ခဏာအမာ့မာ့နွို့ ရင်မာန့်ဟောက်နွို့ လို့ဖုန်ကုန်းနောင်း ငါးလည်ကု့ကြဘို့နွို့နဲ့။ အမ်နောင်းအာအာတွို့ထာ လို့ဇာ့နွို့ ယို့ပလေတိကောက်န ဆက်တွို့ထာ ပလေမဲ့အမှုအရာကိုးနဲ့။ 23နွို့ခေါင်း ဇာခရိနောင်း ဗိမာန်တော်နွို့ ပုရောဟိတ် ဘာ့မင်ဆောင့်ရွက်မဲ့ ကိစ္စအဝဝနွို့ ဆောင့်ဆောင်ရွက်ယော့နောင်း ယန်းကု့တညာ့အမ်နို့ကိုးနဲ့။ 24အချန်ဆောင့်ကနိုနောင်း ဖြိုလ့်ဇာခရိ ဧလိရှဗက်နား ကွန်ဟိုပိုနွို့ခေါင်း ဧလိရှဗက်နောင်း ကနို့ထွန်သို့အောင် ကောင်ဗလလို့အများနွို့ ကု့ကောနဲ့။ 25ဧလိရှဗက်နွို့ “ဖြားနောင်း အို့နွို့ ကွန်ဘာ့ဟိုအခွင့်နွို့အာတွို။ အလိုတော်ဖြားနွို့န အို့ဘာ့ကဆာ့နွက်ဘာ့ပေ့နွို့နောင်း ကောင်ဗလလို့အများနွို့ အဗာပွန်တွို” နွို့သိုလ်အမ်သိုလ်အမ်ဖြိုမနနဲ့။ 26နွို့ခေါင်း ဧလိရှဗက်ကွန်အမ်ဆောင့်ဟိုသု့သို့နွို့ ဖြားနောင်း ကနံကလို့ဂါဗြေလနား ဗဟိုဖြိုင်ဂါလိလဲ မြိုနာဇရက်နွို့ပလွတ်ကု့ကူးဟောက်ကိုးနဲ့။ 27ကနံကလို့နား ဘာ့ဟက်မာရိ တကက်မြွန်းအာ့်ကွက်နွို့ ကု့လောက်တွို့ထာ ပနောင်ကတမ်းနွို့ဖြိုမနနဲ့။ မာရိနောင်း မျိုးရိုး ဖရင်ဒါဝိဒ်နွို့မှ ဘာ့စန်းဗွို့မဲ့ ယောသပ်န လို့စေ့စပ်ဗွို့ယော့နွို့နဲ့။ 28ကနံကလို့နား တာ့မာ့ရိနုတ်ဆက်ဖြိုတွို့ထာ မာရိနွို့ “ဖြားနား ပွို့နဟိုတွို့အနုဲင်နုဲင် ကရုဏာမေတ္တာအမ်နောင်း ကမြအခြားဘို့ဘက်နွို့ တကွေပွို့ ပလေလိုလ့်တွို့” နွို့ဖြိုအွမ်မနနဲ့။ 29စနွိုနား မာရိနောင်း ပနောင်နွို့နု့ ဆောင်အွမ်နွို့နောင်း နွက်ဆုတ်လွန်းဟောက်နွို့ခေါင်း ပနောင်ကနံကလို့ဘို့ဘက်နောင်း အမ်ဆိုလိုတတ်ထားနွို့ စဉ်းစားဗင်ကောကလုဲင်မနနွို့နဲ့။ 30နွို့ခေါင်း ကနံကလို့နား အမ်နွို့ “လာ့ရန၊ မာရိ။ ဖြားနား မို့နွို့ အာသနားကြင်နာတော်မူတွို့။ 31မို့နား ဗင်ပိုတွိုကွန်ထာ မွီးပိုလောက်ဟောက်ကွန်ဖြောက်အပါး။ မာတ်အမ်နောင်း ယေရှုနွို့ မင်ဟက်ဟောက်။ 32အမ်နောင်း ကလုဲင်ပိုလို့မြတ်အ်ာ့ကွက်ထာ ဘာ့မြတ်မဲ့ကွန်ဖြားနွို့ မင်ဟက်ခံလောက်ဟောက်နွို့နဲ့။ ဘာ့ကလုဲင်လို့ကစာ့အမ် နာ့လို့မျိုး ဖရင်ဒါဝိဒ် ဘာ့အုပ်စိုနိုင်းအခွင့်အာဏာနွို့ ဖြားနွို့ အာလောက်အမ်နွို့နဲ့။ 33အမ်နောင်း လို့မျိုးအစ္စရေးမေ့မေ့jနွို့နု့ အ့်ကလုဲင်ဖရင် ထာဝရအမြဲအုပ်စိုးယော့ နိုင်ငံအမ်နောင်းလဲဉ်း ဆောင်မားမှ လာ့ဖျောက်ကော” နွို့ဖြိုမနနဲ့။ 34နွို့ခေါင်း မာရိနား “အို့နောင်း ကလုဲင်ကမြွန်းအ်ာ့ကွက်နွို့ခေါင်း ဇာ့နီးနောင်း မောင်းကလုဲင်နိုင်းဇာ့မား” နွို့ဖြိုမဲ့ ကနံကလို့ နွို့ကိုးနဲ့။ 35ကနံကလို့နွိုနားလဲဉ်း ကမြနွို့ “ဉာဏ်အလင်းတော်နား အမ်စွမ်းဒပ်တွိုတမို့နွို့ တန်ခိုးဖြားနားလဲဉ်း မန်ဒုပ်ပွို့လောက်ဟောက်တကွေမို့နွို့နဲ့။ စနွိုနား ကွန်ဖြောက်မို့နားလဲဉ်း ဘာ့မြတ်မဲ့ကွန်ဖြားနွို့ မင်ဟက်ခံလောက်ဟောက်နွို့နဲ့။ 36ကမာ့ဆွေမျိုးမို့ဘာ့စပ်ဘို့မဲ့ ဧလိရှဗက်နား ထို့းလွန်းတွို့နု့နား ထန်မှယို့နိုင်းကောနွို့ လို့အများနား ဗင်နိုင်ကောကွန်နွို့ ဖြိုကြဘို့နွို့လဲ အခွပ်ဆောင့်စောင်ကွန်နောင်း ဟိုတွို့သု့သို့ကိုးနွို့နဲ့။ 37ရွားနွို့ပဒေကား ဖြားလာ့တတ်နိုင်းကောနွို့နု့ ဆောင်မှမားမှလာဟိုကောနွို့ခေါင်းကိုးနဲ့” နွို့ဖြိုမနနဲ့။ 38ချန်နွို့နု့ မာရိနား “အို့နား အစေခံဖြားအာ့်ကွက်ကိုးနွို့နဲ့။ မို့ဘာ့ဖြိုပနောင်နွို့အတွိုန်း အို့နီးနောင်း အလိုလ့်တော်ဖြားအ့်ဗင် တာ့ကလုဲင်လဲဉ်း” နွို့ဖြိုမနနဲ့။ နွို့ခေါင်း ကနံကလို့နား လေးပွန်ကု့ တာ့ညာ့မာရိနွို့ကိုးနဲ့။ 39ခါကနိုကောအချန်နည်းနည်းနွို့ မာရိနောင်း ဖျောင်တွိုအဆင်သင့်ထာ ဇာခရိဘာ့မှန်း ဗဟိုဖြိုင်ယုဒကွေဗွေ မြိုအ့်မြိုနွို့ ကု့ကူးအ့်ဗီအပါနွို့နဲ့။ 40ဆောင့်လောက်တာ့လွက်နွို့နား မာရိနောင်း ကွက်ထို့တွို့ကောင်ညာ့ဇာခရိနွို့ထာ ဘာ့ကလုဲင်ဖြိုလ့်ဇာခရိ ဧလိရှဗက်နားနှုတ်ဆက်မနနဲ့။ 41မာရိဘာ့နှုတ်ဆက်ပနောင်နွို့ ဧလိရှဗက်ဆောင်အွမ်န ကောင်ဗစ်ကမြနွို့ လို့ပေ့နောင်း တရုတ်ရုတ် တာမိုက်မနကိုးနဲ့။ နွို့ခေါင်း ဧလိရှဗက်နောင်းလဲဉ်း ဉာဏ်အလင်းတော် အွမ်ခေါင်းပလေကညွမ်းနွို့ မင်ခံမနကိုးနဲ့။ 42ဧလိရှဗက်နောင်း မာရိနွို့ “ဖြားနား တခြားခြားမေ့မေ့ကမြနွို့ လိုလ့်တွို့ထာ မင်ခံစွေတွို့ကောင်းကြီးထာ မို့မွီးပိုမဲ့လို့ဗေ့နွို့လဲဉ်း ကံကလို့လောက်ဟောက်။ 43အခွပ် အို့မွေးကိုယ်တော်နီးနား အမ်ကြွပိုကျေးဇူးနွို့ အပန်ဇာ့မား ဗင်လက်ခံဇာ့နီးနား။ 44ပွို့ဘာ့နှုတ်ဆက်ပနောင်ကရက်နွို့ ဆောင့်အွမ်နွို့န ဗဟိုကောင်ဗစ်အို့နီး လို့ပေ့နောင်း နွက်တူးတွို့ထာ ကမိုက်မနနွို့နဲ့။ 45ပနောင်ကတမ်းဖြားနောင်း ကလုဲင်ပိုလောက်ဟောက်အမှန်ခါလောလောနွို့ မို့ယွမ်ဟောက်နွို့ခေါင်း မို့နောင်း ဗင်လောက်ဟောက် မျက်နှာသာအမှန်ခါလောလောကိုး” နွို့ကရက်အထန်ထောတွိုန်းန ကလေ့စ်ကြဘို့နွို့နဲ့။ 46နွို့ခေါင်း မာရိနားလဲဉ်း “နွက်နှလုံးအို့နောင်း ချီးမွမ်းမန ကျေးဇူးဖြားကိုး။ 47ဖြားဘာ့ကယ်တင်အို့နွို့နား နွက်နှလုံးအို့နောင်းလဲဉ်း နွက်တူးမာန့်လှူးဟောက်ကိုး။ 48ရွားနွို့ပဒေကား အို့နောင်း ဘာ့တောင့်ဒေ့ ကလုဲင်အစေခံကိုယ်တော်နွို့လဲဉ်း အမ်နောင်းလာ့ဘေ့ကောအို့။ စတွို့ချန်အခွပ်ထာ လို့လောင်ဘက်မေ့မေ့နောင်း အေ့နွို့ လို့မင်အာခံကောင်းကြီးမင်္ဂလာ” နွို့ဟက်လောက်ကြဘို့နွို့နဲ့။ 49ကလုဲင်တတ်ထားနွို့ပဒေကား ဘုန်းတန်ခိုးဘာ့မြတ်တော်မူ ဖြားနွိုနောင်း တကွေအို့နီးနွို့ ဘာ့မြတ်ဇာ့နွို့နု့ အမ်ဆောင်ရွက်အာတွို့။ မာတ်နာမတော်အမ်နွို့လဲဉ်း မြတ်ဟောက်။ 50ဖြားနောင်း ခေတ်အဆက်ဆက်နွို့ လို့ဘာ့ကိုးကွယ်အမ်နွို့နား နွက်ဘာ့သနားကြင်နာနွို့ နု့ အစဉ်အမြဲထင်းရှားတွို့ထာ ပလေစ်ဗွို့ဖူးဟောက်ကိုးနဲ့။ 51ဖြားနောင်း ကောင်နွက် ခွို့လို့မာန်မာနဗဟို လို့နွို့နား တန်ခိုးအမ်န အဗာပွန်လောက်ဟောက်။ 52အမ်နောင်း လို့ဘာ့အုပ်စိုးနွို့ ကွေပလ္လင်ခွို့နွို့မှ ပန်းကလို့တွို့ထာ လို့ဘာ့နှမ့်ချနွို့မေ့မေ့နား လို့အရေးတန်ဘို့ဘက် အ့်ကလုဲင်ဟောက်ကိုးနဲ့။ 53အမ်နောင်း လို့လပဆာလို့ပငတ်မဲ့ လို့အများနား ဘာ့ကလို့ဇာ့နွို့နား အာသနားယော့ လို့ဘာ့ကထေးနွို့နား ထန်မှအာကော ပလွှတ်ရန်းပလောက်မနနဲ့။ 54“ဖြားနောင်း ဘာ့လုဲင်လို့ကစာ့အေ့ အာဗြဟံနွို့ကမာ့လို့မျိုးတကွေအမ်နွို့ဘာဘို့ပို့ မောင်းဘို့သနားကြင်နာအမြဲနွို့ အာဗွို့ကတိနွို့နဲ့။ အချန်အခွပ်နွို့ ဖြားနောင်း ကတိနွို့ နောင်ထွိတွို့။ 55စနွို့နား အမ်နား အေ့နီးန အမှုအမ်နွို့ လို့ဘာ့ထမ်းဆောင် လို့မျိုးအစ္စရေးနွို့နား ကူညီအာတွို” နွို့ကျေးဇူးတော်ဖြားနား ချီးမွမ်းမနနွို့နဲ့။ 56နွို့ခေါင်း မာရိနောင်း ဧလိရှဗက်နအနုဲင်နုဲင် မာန်းပို့ယော့မဲ့အွီသို့နား ဘာ့ဗဟိုမြိုနာဇရက် ညာ့အမ်နွို့ ရန်းကုဟောက်နွို့နဲ့။ 57နွို့ခေါင်း ဧလိရှဗက်နောင်း ချန်အမ်မွီး ကွန်ဆောင်လောက်နွို့ အမ်နား မွီးလေးကွန်ဖြောက်အာ့်ကွက်နဲ့။ 58ဧလိရှဗက် လို့ကူဇာ့ညား ဧလိရှဗက်ဘို့ဘက်န ကမာ့အမ်ဘို့ဘက်နောင်း တကွေဧလိရှဗက်နွို့ ဖြားနား နွက်သနားကြင်နာဘာ့ကုန်းနွိုနွို့ အွမ်ဟောက်ခေါင်း ဧလိရှဗက်နအနုဲင်နုဲင် နွက်တူးကြဘို့နွို့နဲ့။ 59နွို့ခေါင်း ဆောင်မွီးယား ဆောင့်လောက်စံန်ရှိနွို့ နာ့အရေပြားလှီးမင်္ဂလာkနွို့နား ဘာယို့ဝတ္တရားဘို့ဘက်နွို့ မောင့်ဆောင်ရွက်နွို့ လို့ဘို့ဘက်ဆောင့်လောက်နွို့ ခွို့နွို့နောင်း လို့ပေ့နွို့နု့ ဘာ့ကလုဲင်မာတ်ပါအမ်ဇာခရိနွို့နား အွေတွို့ထာ ဇာခရိနွို့ ဆောင်အာကြဘို့နွို့နဲ့။ 60စနွို့လဲ လို့ပကလုဲင်မိတ်ကွန်နွို့နား လာ့ကက်ကော “လို့ပေ့နွို ယောဟန်နွို့ မင်မှတ်အာမာတ်” နွို့ဖြိုမနနဲ့။ 61ချန်နွို့နား လို့ဗင်ဖုံဖုံနွိုနားလဲဉ်း ဧလိရှဗက်နွို့ “ကောင်ကမားမောသွေမို့နွို မာတ်ဇာ့နီးနွို လာ့ဟိုကော” နွို့ဖြိုမနနဲ့။ 62နွို့ခေါင်း ခွို့နွို့နောင်း လို့ဘာ့ကလုဲင်ပါလို့ပေ့ ဇာခရိနား ပလေတွို့တိကောက်ထာ မွိုဆောင်ဟက်အာမတ်စမွားနွို့ မားမဲ့ကျဗို့နဲ့။ 63ချန်နွို့နု့ ဇာခရိနောင်း ညောင်းအွေယော့တွို ကျောက်သင်ပုန်းအခြပ်ထာ မာတ်ကွန်ဖြောက်အမ်နွို့နား ကလုဲင်ယောဟန်ကိုးနွို့ ဆောင့်ချတဲင်းဝဲ့န လို့ဘာ့ရင်နွို့မေ့မေ့နောင်းလဲဉ်း အံဩမျက်ကု့ကြဗို့နွို့နဲ့။ 64နွို့ခေါင်း အတိတွိုန်းစယ် ဇာခရိနောင်း အမ်ဖြိုဘတ်ပလောက်တွို့ပနောင်ထာ ဂုဏ်ကျေးဇူးတော်ဖြားနွို့ စတွို့ထာ ချီးမွမ်းမနနဲ့။ 65လို့ကမေ့ညားအမ်ဘို့ဘက်န ကမားမောသွေအမ်မေ့မေ့နောင်း ဆောင်ရင်အဖြစ်ပျက်နွို့နောင်း ရရောဒိတ်ဒမနနဲ့။ စနွို့ဖုန် လို့မေ့မေ့နောင်း ကတမ်းနွိုနု့ ဗဟိုကွေဗွေဒေသဖြိုင်ယုဒ စေ့လွက်နွို့ ဖြိုမဲ့ဘို့နွို့နဲ့။ 66ကတမ်းနွို့နွို့ လို့ဘာ့အွမ်မေ့မေ့နွို့နောင်းလဲဉ်း “လို့ပေ့နီးတကုမ်းဗွိုနွိုနောင်း အမ်ကလုဲင်လို့အခမ်းမာ့မွား” နွို့ တွေးတွို့ကောင်နွက်နှလုံးခွို့ထာ နွက်တန်တန်န ဖြိုကြဘို့တတ်တတ်နွို့နဲ့။ ရွားနွို့ကား တန်ခိုးတော်ဖြားနောင်းလဲဉ်း လို့ပေနွို့ အွမ်ခေါင်းပလေမဲ့ကညွမ်းထာ ဟိုမနနွို့ခေါင်းကိုးနဲ့။ 67ဆောင်ယော့နွို့ ဉာဏ်အလင်းတော်နောင်း စွမ်းဒပ်တွိုတကွေဇာခရိနွို့ထာ ပရောဖက် ဘာယို့ယော့ ဘာ့ဖြိုနွို့ပဒေနောင်း 68“ဘာ့ကလုဲင်မဲ့ လို့မျိုးအစ္စရေးမေ့မေ့နွို့ ကျေးဇူးဖြားနားချီးမွမ်းမန။ ရွားနွို့ပဒေကား အမ်နောင်း လို့မျိုးအမ်ဘို့ဘက်နွို့ မောင်းကယ်တင်နွို့ ကြွပိုတွို။ 69ဖြားနောင်း လို့ဘာ့ဆင်းသက်ပို့ အစေခံကမာ့ ဖရင်ဒါဝိဒ်နွို့ တန်ခိုးတော်ဘာ့ကုန်းလွန်းလန်း ကယ်တင်ရှင်နွို့နား တာ့အေ့မေ့မေ့ အာသနားတော်မူတွို့။ 70အချန်ကစာ့နွို့ ဖြားနောင်း ဘာ့မြတ်မဲ့ပရောဖက်ဘို့ဘက်နွို့ ဘာ့ဖြိုဘို့နွို့အတွိုန်း 71တန်ခို့ဘာ့ကုန်းကယ်တင်ရှင်နွို့နောင်း အေ့နီးနား ကောင်တိရန်သူနွို့မှ ကယ်တင်နွို့ဖုန် အေ့နီးနား လို့ဘာ့ရှိအိအေ့ ရန်နွို့လဲဉ်း ကယ်လွတ်တွို့နွို့နဲ့။ 72ဖြားနောင်း သနားကြင်နာဘာ့ကဒီနွို့န လို့ကစာအေ့နွို့နား ပလေတွိုထာ ခွို့နဘာ့ယို့ပို့ကတိ ဘာ့မြတ်မဲ့ သဘောဘာ့တူပွို့နွို့ အ့်နောင်ထွိလောက်ဟောက်” နွို့ဖြိုမနနဲ့။ 73ဖြားနား လို့ကစာအေ့နွို့ဘာ့ကလုဲင်မဲ့ အာဗြဟံ နွို့သဘောဘာ့တူပွို့အမ်နွိုအတွိုန်း 74“အေ့နီးနား လို့ဘာ့ယို့အန္တရာယ် ကောင်တိရန်သူနွို့မှ လွတ်မြောက်တွို့ထာ အေ့နီးနောင်းလဲဉ်း ဇာ့အထက်ပလုဲင်း ကာလနွို့နု့ ဘာရတရားနွို့န အမှုတော်ဖြားနွို့ ဆောက်ရွက်နိုင်းလောက်ဟောက်။ 75နာ့စနွို့န အေ့နီးနောင်းလဲဉ်း ငွမ်းရှေ့တော်အမ်နွို့ ဟိုမဲ့ဖြောင့်မတ်စင်ကြယ်ထာ ဘာ့လွန်ဘဝအသက်သာနွို့ ဗင်မေ့ဟောက်နွို့နဲ့” နွို့ဂုဏ်ကျေးဇူးတော်ဖြားနွို့ ချီးမွမ်းမနနဲ့။ 76နွို့ခေါင်း ဇာခရိနောင်း လို့ပေ့အမ်နား “ကွန်ပေအို့၊ ဘွတ်ဘာ့မြတ်မဲ့ကွန်ဖြားနွို့ ဟက်ချီးမြှင့်ကြဘို့ခေါင်း ကညွမ်းဖြားနွို့ လို့ဘာ့ကြိုတင်ပြင်ဆင်နွို့လဲ ကလုဲင်လောက်ဟောက်။ 77ဖြားနား အပြစ်ဒုစရိုက်လို့နွို့ ခွင့်လွှတ်တိုထာ ဘာ့ကယ်တင်အခွင်နွို့ ခံမ့်ဘာ့ကလုဲင်အာသနားတော်မူနွို့ မို့နား လို့ဇာ့နွို့ ငွမ်းထက်ဘေ့ မင်ဟောဖြိုလောက်ဟောက်။ 78ဖြားအေ့ သနားကြင်နာဘာ့ကဒီနွို့နု့ခေါင်း ဇာ့ကွေတအောင်နွို့မန်းရှိနောင်း တာ့အေ့နီးနွို့ ကြွပိုတွို့ထာ 79ကောင်အ့်ဝေါက်နွို့ လို့ဘာ့ဟိုဘို့ဘက်န အ့်ဗီးတရားန ဘာ့တာ့ဗောက်မဲ့လို့ဘို့ဘက်နွို့ အာ့တွို့ငြိမ်းချမ်းထာ ဘဝနွို့ပလေစ်အာလောက်ဟောက်ကညွမ်း” နွို့ဖြိုမနနဲ့။ 80ချန်အခို့နွို့ ယောဟန်နောင်း ကုန်းပိုတွို့ထာ အရွယ်အမ်ဆောင်ဗင်ပို့နွို အမ်နား လို့သိုလ်အမ်ဆောင့်ကုန်းယော့ ဉာဏ်ပညာနဗြောက့်ဟောက်နွို့ခေါင်းကိုးနဲ့။ ဖြားနောင်း အမ်နား ငွမ်းလို့မျိုးအစ္စရေး အမှု့တော်နွို့ စအ့်ဆောင်ယို့ ရှိနွို့ခါလောက်ကောအောင် အမ်နောင်း ကောင်ဗွေကန္တာရနွို့ လက်လေမနနွို့နဲ့။
Atualmente Selecionado:
Luke 1: dtpv-rv
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.