1ဘရာလောနူးတဟယ်နူကွားခလိုက်အမုမုဒေါ်မာသပရတာရီဝာာကေးတမွတ်တမောင်းအော်ထောင်ဒုန်းပဘုန်းဂျုန်တဟယ်နူအကဆိန့်နူးနခုးတဟယ်နူလော်။ 2ဘရာဒုန်းအအုတ်ဆူတာတဟယ်နူရီလို့ဂျေဒေါ်လိုင်လော်။ 3အခူစားနူတာဒုန်းပသိုက်တာရီတာကေးတဟယ်မကိုက်သူးကသိုက်လတိလရှိုက်န ခူးပမာပဒိပဒါဇိန်လော်ဘရာဒူဘရာလုန်းသီဟိုဖိလက်။ 4တာဒုန်းခေးမာဒေါ်ခေးသွတ်တဟယ်နူမယ်မကိုက်သူးကသိုက်ငါးဘီဘီနခူးခေးရီလောင်နူးသူးလိုင်ဆောင်းဆူးယိုးလော်။ 5ယုဒကစဟွာဟေရိုအစဓိန်းကူးခိန်နူယုဒတာသဘားအခူ'အဘိဘ'အပရာ"ဇာခရိ"အော်တပရာလော်။အဝေအမား'ဧလိရှဖက်'မယ်ဟေရုန်အရွီးအလောင်းကူးပွန်မွန်တပရာလော်။ 6အဝေသူးသနုနူမယ်မွေးပရာဇောင့်ပရာဒါတဟယ်ဒုန်းအဖိတ်ကျုန်ဖိတ်ကလုန်ဘွေအတာမာလောင်တဟယ်နူလော်။ 7မသော်မယ်အဝေသူးသနု့ငှားထွန်းဒေါ်အနိန်ပရားလားပရားခိန်နူအဖော့တပရားဇာ့အော်ခေါင်။ 8ဘာတနုန်နူ'ဇာခရိ'အပရာတဟယ်နူအခိန်ဘာဒုန်းအကဘာမာဘွေအတာဖိတ်တာမာတာကရုန်းတာဘုန်းပွတ်မုနူလော်။ 9အဝေသူးတဟယ်နူမကိုက်ယုဒတာသဘားအခူတဟယ်အတာမာနူဒုန်းတာသဘားစရကူးနူအမာဘူဒေါ်ဇူးလောင်နူးဘာဘွေဒုန်းတာနူဝီနူပရုန်းနု့ဘလယ်နူလော်။ဘုန်းအမာဘူတာခိန်ငှား 10ပရာဒုန်းအအော်ဒုန်းအကွန်တဟယ်နူဘာဆုန်းထုန်ဒေါ်သဘားလော်။ 11ဘုန်းအခိန်နူမယ်ဘွေတနဲဖော့တပရာအော်လုန်းဒုန်း'ဇာခရိ'အတာလမောက်အကထွိုက်တဘိုင်းနူလော်။ 12ဘုန်းနူအခိန်နူအအုတ်ဆူတနဲဖော့အခိန်ငှားအသပရုတ်သဟွလော်။ 13နဲမယ်တနဲဖော့တပရာဆိန့်ဝေ"သဘိုက်မာ၊'ဇာခရိ'ဘွေနာဟူးနတာသဘားဟုန်း။နမားဒုန်းမယ်'ဧလိရှဖက်'နူအဖော့ကအော်လောင်ပခူးလော်။အဝေနူနာဘာကအမီဒေါ်'ယောဟန်'လော်။ 14ပရာလောနူးသနောင့်သဆူးဒေါ်သူးမယ်သူးကသနောင့်ဟော့ဘာဒုန်းသူးဖော့အော်လောင်ပခူးယိုးပရာလော်။ 15နာဖော့ခူးယိုးပရာနူအကဖိတ်ထောင်ပွန့်ထောင်ဘာဘွေအတာဖိတ်တာမာဒုန်းအဒူအထူးတဟယ်နူလော်။အဝေနူကဘာမွေးပရာဒုန်းအဆွားရိန်တာမူတာဘလွတ်တာအယ်ဒုန်းအမွေးသိတ်ရန်းဘီယာဒေါ်စပျစ်ဆူးတဟယ်နူလော်။ဇာ့ထောင်ဘုန်းအအော်လောင်ဘုန်နူဘွေသဆောင်းဆူးကအော်ဇွတ်ဝေနူလော်။ 16အဝေနူအကသုန်ပရာအီစရေးလာဖော့အားပရာဒုန်းအကသိုက်ငှားလောင်ဇေအနဲအကယုဘွေဒေါ်သဘားဘွေနခူးနူလော်။ 17အကမွေးပရာဒုန်းအာလေတာဒုန်းဘွေလမောက်အကမာမကိုက်'ဧလိယာ'ဒေါ်ဘွေသဆောင်းဆူးကလုန်းဘွေးဒေါ်အဝေလော်။မုဖားတဟယ်မယ်အဝေသုဒေါ်အဖော့အယူငှားကအော်ဇိန်ဒေါ်တာနူရူနူရားနူလော်။အဝေနူအကမာရောင့်ဇေပရာဒုန်းအာဇာ့နာဒိန်းဘွေဟွားဘွေငေါ့တဟယ်နူအကာအော်မုရောင့်ဇိန်မကိုက်ပရာရီပရာရောင့်ဒေါ်အတာသိုက်ငှားဒူတဟယ်နူလော်။မကိုက်နူတာဒုန်းအမာတဟယ်နူမယ်မွေးတာဆူကလိုက်ဒုန်းဘွေအနခူးဒုန်းမယ်ပရာတကူးနူလော်မယ်အတာဖင်လော်တာဟွားတာငေါ့နူလော်။ 18ဇာခရိနဲဇိန်တနဲဖော့ဒုန်း'တာရီတာကေးတဟယ်ယိုးမယ်အာကာဖင်းထောင်ဇောင့်ဒေါ်ပါကမား၊ပါသမားဝါသနုယိုးပါမွေးပရာဒုန်းပရာကု့ပရာ့သာ့ဘီတဟယ်နူလော်။ 19တနဲဖော့တပရာငှား"ခေးမယ်ပရာမာဘွေတာမာ'ဂါဗြေလ"လော်။တာဘလိုင်လော်ခေးဒုန်းခေးကဆိန့်နု့နာတာဘရွီးဒုန်းအရီအရောင့်နာနခူးလော်။ 20တာဒုန်းခေးဆိန့်နူးနာတဟယ်နူနဇာ့ယုမယ်ဒါ။တာရီတာကေးတဟယ်ဒုန်းအဇာ့ထွားထောင်မွန်းခိန်နာကာဇာ့ဘွင်ရွီးဇောင့်နယ်။မာကနူခူစားအခိန်အကလောင်ဘာခိန်နူတာယိုးတဟယ်နူကထွားထောင်လော်။ 21ပရာလူအားပရာအော်ပုန်း'ဇာခရိ'တဟယ်နူဇာခရိလေနုစရားကူးအခိန်အော်လိမ်းအခူကျားထွားထောင်တာတမွန်းတမောင်းဒုန်းဝေသူးနခူးတဟယ်နူလော်။ 22အဝေသူးတဟယ်နူသိုက်ငှားဘာဒုန်း'ဇာခရိ'အုတ်ဆူတာအုတ်ဆူအလမောက်ကိုးနူလော်။ဘုန်းအဆွားထောင်အကွန်ခိန်နူပရွီးဇာ့ဇောင့်ပယ်ပရွီးဒေါ်တာရုန်းစွတ်ရုန်းခေါင်နူလော်။ 23'ဇာခရိ'မာဘွေတာဖိတ်တာမာဒုန်းစရားကူးဘုန်ဇိန်အသင်လော်။ 24အခိန်အော်လိမ်းတဘလယ်နူ'ဇာခရိ'အမားနူဒုန်းထောင်မွန်းးနူလော်။အမားနူငိုင်းလားထောင်းကူးဇာ့ဆွားထောင်အကွန်ဒေါ်အော်သင်ကူးနူလော်။ 25ဘွေမွေးပရာဒုန်းအမာထမိုင်းနူးခေးပရာအတာအုတ်ဆူရှင်ခေးနူလော်မယ်အနဲလတိုက်ဇိန်အနဲနူလော်။ 26အော်တလားအခိန်နူဂါလိလဲဂေး၊နာဇရက်ဝိန်ကူးဘွေနူလားနတ်ကလူဂါဗြေလဒုန်း 27ဘလိုင်လေမွန်းဝေဒုန်းပွန်မွန်ဘလိမ်း'မာရိ'အအော်နူလော်။အဝေနူအော်ဒေါ်တာထုတ်တာလွိုင်း'ယောသ'ဒုန်းအမွေးကျဟွာဒါဝိတ်အရွီးအလောင်းကူးဒုန်းအကဖိတ်စဓိန်းနူလော်။ 28'မာရိ'နာမယ် "ပွန်အားပရာအကားဘာဆူရီကဒွန်တပရာနူလော်၊ဘွေနူကအော်ကျွတ်သယောင်းနာ"မယ်တနဲဖောါ့တပရာအတာဆိန့်ရှူအော်နူလော်။ 29မာရိတမွန်းတမောင်းဒုန်းတနဲဖော့တပရာအတာဘရွီးနူအသနူးနဲသရားထွားထောင်ဝေတာနသု့နူလော်။ 30ဘုန်းနူအခိန်နူတနဲဖော့ရှိတ်'မာရိ'ဇာ့သဘိုက်ကာဘွေသာ့မင်းဒေါ်ဘာသာ့ဘာလောနာလော်။ 31နနူနဖော့ခူးကအော်လောင်တပရာဒေါ်နာဘာကအမီဒုန်း'ယေရှု'လော်။ 32အဝေနူကမွေးပရာဒူပရာလုန်းလော်။အဝေနူတာကကတ်အော်ဒုန်းဘွေအဖော့ခူးအဒူအလုန်းနူလော်။ဘွေကလားဝေဒုန်းတာထလုန်းဒုန်းစဟွားကလဲဖူးဖွန်စကျဟွာဒါဝိကလဲအော်နူလော်။ 33အဝေနူကအုတ်ကာကရူပရာအီစရေးလာဖော့ဒေါ်အလဲနောင်းဒုန်းအမွေး(ဘောမူး)နူကျမွေးအကေးအပြားဇောာင့်တခေါင်းတခေါင်ကိုးနူလော်။ 34'မာရိ'လွိုက်ဇိန်ဘလယ်တနဲဖော့နူ"ခေးမယ်ပရာဒုန်းအဇာ့အော်ဒေါ်တာဖိတ်စဓိန်းမူးတာရီတာကေးယိုးတဟယ်နူအကထွားထောင်ဒေါ်ခေးကမား။" 35တာပရာ်တာပရောက်သာ့ဆောင်းဆူးကာ ကလောင်ဒုန်းနလော်ဘုန်ဘွေအတာပရော်တာပရောက်ကဟော့ဘုနာလော်။နဖော့ခူးနူကဘာတာကအော်ဘွေအဖော့ခူးပရာဒူပရာလုန်းလော်။ 36နရွီးနလောင်း'ဧလိရှဖက်'နူပရာယူပရာပရာ့မသောနူမယ်ကဒုန်းထောင်ဘာအဖော့ပခူးလော်။ပရာဇာ့နသု့ဒေါ်အဖော့ကအော်ပယ်မသောနူမယ်ဘထောင်သု့လားအခိန်အဖော့ခူးကအော်နူလော်။ 37"တာဇာ့ဒါဇဇောင့်ဒေါ်ဘွေဇာ့အော်တမိခေါင်"မယ်တနဲဖော့အတာဆိန့်သိုက်ငှားဇိန်နူလော်။ 38'မာရိ'နူ "ခေးမယ်ဘွေအဇု့အခေးအပရာတပရာလော်"မကိုက်ဘွေအတာသနူးနူအကထွားထောင်ဇွတ်"မယ်အတာဆိန့်ဇိန်တနဲဖော့နူလော်။ဘုန်မယ်တနဲဖော့နူဆွားထောင်ဒုန် 'မာရိ' အအော်နူလော်။ 39ဇာ့ယုန်ဇာ့လိမ်းနူ 'မာရိ' လေအော်ဒုန်းယုဒဝိန်ခေါဒုန်းတဒုန်းအကူးနူလော်။ 40အဝေနူလေနူးဒုန်း 'ဇာခရိ' အသင်ကူးဘုန်လေဖိတ်းဇွတ်ဧလိရှဖက်'နူလော်။ 41ဘုန်းအနာဟူး'မာရိ'အတာပရွီးအခိန်နူပဇာ့ဖော့အော်ဒုန်း'ဧလိရှဖက်'အဖူးကူးဒေါ်တထင်နူလော်။ဘွေသာ့ဆောင်းဆူးဟွတ်ဘု့'ဧလိရှဗက်' ဘုန် 42'မာရိ'နာမယ် " ပွန်မွန်တပရာဒုန်း ဘွေဆူရီဒေါ်လားဒူလားထူးနာ ဒုန်းပွန်မွန်အားပရာအကား၊တာသာ့တာယတာရီတာရောင့် ကအော်ဒေါ် နဖော့ခူးဒုန်းန ကအော်လောင်ဟော့နူလော်။ 43အဘာသရားဒုန်း ဘွေအမုတူးလေဒုန်းခေးအော်ခါးမာရား၊ 44ဘုန်းခေနာဟူးဘာပွန်မွန်တပရာအတာဘရွီးအခိန်နူ ပဇာ့ဖော့ဒုန်းခေးဖွန်းကူးယိုးသနောင့်သဆူးဒေါ်တထင်နူလော်။ 45နာမယ်ပရာဒုန်းအယူးဘွေအတာမာငေါ့လုန်းဘွေးတဟယ်အခူစားတာဆူရီကဘာနာ"မယ်အတာပရွီးသကာ့လောင်နူလော်။ 46'မာရိ'နဲ'ခေးသယိုး ခေးလားခေနဲဒုန်း ခေးမယ်ဘွေအပရာပွန်မွန် 47သနောက်ထော်ဟော့ဘွေအဘူးအယောင်းနူလော်။ခေးသနောင့် သဆူးဟော့ဘာဒုန်းခေးမာဘာ ဘွေအတာဖိတ်တာမာ အကူးနူလော်။ 48ခါးယိုးနူဘွေအုတ်ဇိန်ဒေါ်မာကွားအခေးအပရာပွန်မွန်ဟုန်း။ဇာ့ထောင်ဘုန်းယိုးနူလေအလမောက် ပရာတဟယ်နူက ကမူးခေးဒေါ် ပရာဘာတာဆူရီနူလော်။ 49ဘွေအတာပရာ်တာပရောက်လောနူးတဟယ်နူတာဒူတာလုန်းတာစောင်းတာဆူး အမီတဟယ်နူကလောင်ဘာလောဒုန်း နပရာပွန်မွန်တပရာအလော်နူဟုန်း။ 50ပရာဒုန်းအယူးအနာဘွေဒေါ်အအော်ဘထိတ်ဘွေလောနူးတဟယ်နူ ကအုတ်ဆူဘာဘွေအတာစလိမ့်ကလုန်းထောင်ဒုန်းတာအုတ်ဆူးအလမောက်တဟယ်နူလော်။ 51ဘွေနူမာထမိုက်ကေးပရာဒုန်း အဖိတ်ဒူဖိတ်ထာလုန်းးဇိန်အနဲတဟယ်ဒုန်းဘွေအစဓိန်းနူလော်။ 52ဘွေရှောင်လောင်ပရာဒုန်းအလားဒူလားလုန်းအနက်တဟယ်ဒုန်းအလဲဒေါ်လားဒူလားလုန်းဇိန်မွန်းပရာဒုန်းအရှောင်လောင်အသတဟယ်နူလော်။ 53ဘွေနူပရာဒုန်းသာဝီးလာဖလိတ်တဟယ်နူဖင်အယ်တာ ယ်အဝီအဆူး ဘုန်ပရာဒူယောင်မာတုန်တဟယ်နူဘွေဘလိုင်ဇိန်နာနွာနားနွားနူလော်။ 54ဘွေမာကွားပရာအီစရေးလာဖော့ဒုန်းအမာဘွေတာဖိတ်တာမာဒေါ် သ အော်ပရာအီစရေးလာဖော့တဟယ်သာယောင်းသာယောင်းနူလော်။ 55ဘွေအော်ဒေါ်တာသူအော် သအော်အတာအုန်းလောင်ယားလောင်ဒုန်းပရာပွန်မွန် အာဗြံဟံ အရွီးအလောင်းကူးတဟယ်နူ"ဒေါ် ထော်ထောင်ဟော့ဘာဇိန်ဘွေအဘူးအာယောင်းလော်။ 56'မာရိ'နူလေအော် ဘလုန်ဇွတ်'ဧလိရှဗက်'သုလားအကူးနူဘုန်အဇိန်ဘလယ်မွန်းဒုန်းအသင်အဖောင်းနူလော်။ 57ဘုန်း'ဧလိရှဖက်'အော်လောင်ယူးအဖော့ခူးအခိန် 58'ဧလိရှဖက်' အရွီးအငေါ်ဒေါ်အသင်ကထိတ်တဟယ်နူသိုက်ငှားဘာဘွေအတာလားဒူဒေါ်တာခေါ်ဝယ်စီဇာ့ဘာ ဧလိရှဖက် အခူစား သနောင့်သဆူးယွန်းဇွတ်ကွားဒေါ်ဝေလော်။ 59ဘာ့ဘွေးရှောသားအခိန်နူ မောရှေ တာမာလောင်အော်တောင်းဒေါ်လေမာဘာပဇာ့ဖော့တာဒွတ်ကေးဖိုက်နူလော်။အဝေသူးတဟယ်နူ သနူးက နူးပဇာ့ဖော့အမီ မကိုက်အဖား'ဇာခရိ'အမီနူလော်။ 60မသော်မယ်ပဇာ့ဖော့အမူး'ဧလိရှဖက်'နူအမီစိုးမွက်ယိုးမူးကိုး။ဘာက ဇေအမီဒုန်း 'ယောဟန်'နူလော်။ 61"ဘုန်းသူးရွီးသူးငေါ်ကူးနူ ပရာအမီဒုန်းအမွက်' ယောဟန်' နူစိုးအော်တပရားကိုး "နူမယ်ပရာတဟယ်အတာဘာရွီးရှီဆောက်ရောက်ထောင်နူလော်။ 62မကိုက်ဒေါ် 'ဇာခရိ'ကာကအဖော့အမီကာမားကာမားနူအဝေသူးထုပ်လွိုင်ဒေါ်တာပြစွတ်ပြခေါင်နူလော်။ 63'ဇာခရိ'နူ ကွီးပရာတဟယ်လုန်းဘိန်လုန်းဘောဒေါ် ကွက်လောင်မွန်းအဖော့မီဒေါ် 'ယောဟန်' ပရာတဟယ်အုတ်ဆူသိုက်ငှားထွားထောင်တာတမွတ်တမောင်းဝေသူးန ခူးလော်။ 64အော်တပလော့ခိန်နူ'ဇာခရိ'ပရွီးထောင်ဇိန်ဇောင့် မာငေါ့ဇိန်ဒန်သ နောင့်ဒေါ် ထော်ထောင်ဇိန်ဟော့ဘွေအဘူးအယောင်းနူလော်.။ 65ပရာဒုန်းအော်အသင် ကဒီတဟယ် သပရုတ်သဘိုက်ဒေါ် တာရီတာကေးတဟယ်ယိုးနူဆိန့်နူးဘာပရာဒုန်းအအော်ဒုန်းခေါလုန်းခေါစုန်နာဟူးနာသိုက်လောပူးပရာနူလော်။ 66ပရာဇာ့ယိုးပရာယိုးနူ အမွဲဒူထောင်နူအကထွားပရာကမား ဒေါ်ပရာတဟယ်နူအော်ယုဒုန်းအသ ကူးနူလော်။ပရာဇာ့ယိုးပရာနူဘွေအော်ဒါ်ဝေအဝေသူးတဟယ်သိုက်ငှားနူလော်။ 67တာဆောင်းတာဆူးဒေါ်တာသိုက်ငှားတာလီးတာခါး လောင်ဘာဒုန်း 'ဇာခရိ'အလော်အဝေသနောင့်ထော်ထောင်ဇိန်ယူးမူးဘွေအဘူးအယောင် မကိုက်ဒေါ် ဒုန်းအကလားတဟယ်နူလော်။ 68ပရာ'အီစရေးလာ'ဖော့တဟယ်နူသနောင့်သဆူးထော်ထောင်ယူးဘွေအဘူးယောင်းနူလော်။ဘွေနူလောင်ဒုန်းအလောင်မာကွားပရာလူဟယ်ခူဖော့လောနူးပွန့်ပရာနူလော်။ 69ပါဖားဘွေစာသအော်ဒေါ်ဖင်လောင် တာသအော် တာမာကွားဒုန်း'ဒါဝီ'အရွီးအလောင်းကူးဟုန်း။ 70လားအရီးခါး ဝီးတဟယ်အတာပရွီးဒုန်းဘွေအတာထွန်လောင်မန်လောင်မယ် 71ဒေါ်အကမာပူးဘလွတ်ပါဒုန်းပရာဒုန်းအအုတ်ဇာ့တိုးဘာတဟယ်ဒေါ်ပဒူပဒါးအစဓိန်းကူးနူလော်။ 72ဘွေအော်ဒေါ် အတာအုန်းလောင်ယားလောင်ဒုန်း အကအုတ် က ကရူဇိန်ပရာဟယ်ခူဖော့တဟယ်နူလော်။ 73ဘွေထူလောင်မာလောင်'အဗြဟံ'ဒေါ်ဖူးဖွန်းလားအရီးတဟယ်မယ် 74ပကပူးဘလွတ်ဘာဒေါ်တာဗေါင်းတာဆား ဘုန်ဘာဇာ့သဘိုက်ဘာဒုန်းပကမာဘာဘွေအတာဖိတ်တာမာနူလော်။ 75ပကအော်ရောင့်ဘာဒုန်းတာဆောင်းတာဆူးဒုန်းနိန်လားအားအားလားအကူးနူလော်။ 76ပရာမော့ခူဖေါ့ကထော်ဒေါ် ကာကနာဒုန်းပရာတာသိုက်ငှားဒူအာဝီးတပရာနူလော်။ 77ဘွေဘလိုင်လွတ်ပရာလူဟယ်ခူဖော့တဟယ်အတာခေါ်ဝယ်ဘုန်ကအုတ်ကာကရူဒေါ် ကမာကွားဇိန်နူလော်။ 78ဘွေအတာသအော် အဒူအထူးတဟယ်နူကမာမကိုက်ဒုန်းမော့ခူမုန်းအတာလီးတာခါးကလောင်ဘာဒုန်းပလော်နူလော်။ 79ပရာအအော်မူးဒုန်းတာသူးတာခုကားတဟယ်နူတာကသုန်ဇိန်အော်ဒုန်းတာအော်သ အော်ယကူးနူတာလီးတာခါးလော်မယ်အတာ သပုတ်ထော်ထောင်ဇိန်ဘွေနူလော်။ 80ယောဟန်ဒူထောင်ဘုန်ဘွေဖင်လောင်ဝေတာပရော်တာပရောက်အဒူတာသိုက်ငှားအလင်းအခါးနူလော်။ဇာ့ထော်ဘုန်းနူခိန်နူဘုန် သလားမွန်း'ယောဟန်'ဇာ့လေတူးမွန်းဒုန်းပရာအီစရေးလာဖော့ကားခိန်နူအလေအော်ဒုန်းတာသွန်အလဲ ဒုန်းမယ်ပရာဇာ့အော်လုန်းမိုက်ခူနူလော်.။

Ascultă Luke 1